Nicolas nee Céline yiale ngyegyelɛ gyɛne. France Bɛtɛle ne maanle bɛ gyimalilɛ mɔɔ maanle bɛdule bɛhɔle asafo fofolɛ nu la. Bɛhanle kɛ: “Mɔlebɛbo ne yɛ nye liele noko nzinlii yɛ nwo lɔle yɛ gɔnwo mɔ. Ɛnee yɛtɛbikyele mediema mɔɔ wɔ yɛ asafo fofolɛ ne anu la kpalɛ.” a Ɔlua ngyegyelɛ ɛhye mɔ ati, saa ɛtu ɛkɔ asafo fofolɛ nu a, kɛ ɔkɛyɛ na ninyɛne ahɔ boɛ amaa wɔ ɛ? Duzu a awie mɔ bahola ayɛ aboa wɔ a? Yɛɛ nyilalɛ boni mɔ a ɛbahola wɔanyia wɔ wɔ asafo fofolɛ ne anu anzɛɛ ɛbahola wɔava wɔamaa wɔ asafo fofolɛ ne anu amra a?

NGYINLAZO NNA MƆƆ BABOA WƆ YEAMAA WƆAHOLA TƐNLA LA

1. Fa ɛ nwo to Gyihova anwo zo. (Edw. 37:5) Mɔɔ Kazumi mɔɔ wɔ Japan la ahu gyima nu amra yele ye hɔle ɛleka fofolɛ la, ɛnee ɔwɔ kɛ Kazumi fi asafo mɔɔ yedɛnla nu ɛvolɛ 20 la anu. Kɛzi ‘ɔvale ye adenle ɔwulale Gyihova asa anu’ ɛ? Ɔhanle kɛ: “Menganle kɛzi mesulo, me nwo mɔɔ ɛyɛ me koonwu, adwenleadwenle mɔɔ ɛdɔ me nwo la anwo edwɛkɛ mengilele Gyihova fane dɔɔnwo. Mekɛ biala mɔɔ mebayɛ zɔ la, ɔmaa me anwosesebɛ mɔɔ mehyia nwo la.”

Kɛzi ɛbahola wɔamia anwodozo mɔɔ ɛlɛ wɔ Gyihova anu la anu ɛ? Kɛ mɔɔ mbaka hyia nzule nee aleɛ fi azɛlɛ ne anu amaa bɛanyi la, zɔhane ala a ɔwɔ kɛ yɛdi sunsum nu aleɛ amaa yɛ diedi ne anu ayɛ se a. Nicolas mɔɔ yɛlimoa yɛha ɔ nwo edwɛkɛ la nwunle kɛ saa ɔdwenledwenle Ebileham, Gyisɛse nee Pɔɔlo mɔɔ bɛvale ninyɛne dɔɔnwo bɛbɔle afɔle amaa bɛayɛ Gyihova ɛhulolɛdeɛ la neazo ne  anwo a, ɔmaa anwodozo mɔɔ ɔlɛ kɛ Gyihova baboa ye la yɛ kpole. Saa ɛyɛ ngyehyɛleɛ ɛsukoa Baebolo ne dahuu a, ɔbaboa wɔ yeamaa wɔagyinla nzenzaleɛ biala mɔɔ bara wɔ ɛbɛlabɔlɛ nu la anloa na wɔazukoa ninyɛne mɔɔ ɛbahola wɔava wɔamaa wɔ asafo fofolɛ ne anu amra anwosesebɛ la.

2. Mmafa wɔ asafo dɛba ne ɛtoto fofolɛ ne anwo. (Nol. 7:10) Mɔɔ Jules dule vile Benin hɔle United States la, ɔnwunle kɛ ɛkɛ ne amaamuo le ngakyile kpole kpalɛ fi ye ɛdeɛ ne anwo. Ɔhanle kɛ: “Mendele nganeɛ kɛ ɔwɔ kɛ meka me ɛbɛlabɔlɛ nu edwɛkɛ mekile awie fofolɛ biala mɔɔ mebayia ye la.” Kɛmɔ ɛnee bɛnyɛ ninyɛne zɔ wɔ ye maanle nu la ati, ɔbɔle ɔ bo kɛ ɔtwe ɔ nwo yeavi asafo ne anu amra anwo. Noko mekɛ mɔɔ ɔnwunle mediema ne mɔ kpalɛ la, ɔhakyile ye adwenle. Ɔhanle kɛ: “Membanwunle kɛ ɔnva nwo ɛleka biala mɔɔ yɛde wɔ azɛlɛ ye azo la, alesama amuala le ko. Kɛzi bɛtendɛ nee kɛzi bɛyɛ bɛ nyɛleɛ la a le ngakyile a. Ɔhyia kpalɛ kɛ yɛbalie kɛzi menli de biala la yɛado nu.” Ɔti mmafa wɔ asafo dɛba ne ɛtoto fofolɛ ne anwo. Adiema raalɛ Anne-Lise mɔɔ le adekpakyelɛnli la hanle kɛ: “Meandu meangɔ kɛ mekakpondɛ ninyɛne mɔɔ megyakyi wɔ me nzi la. Mengɔle kɛ mekazukoa ninyɛne fofolɛ.”

Ɔnle kɛ asafo nu mgbanyima noko fa bɛ asafo dɛba ne toto fofolɛ ne anwo. Nvonleɛ ɛnle ndenle ngakyile mɔɔ bɛdua zo bɛyɛ debie ko ne ala la anwo. Nrɛlɛbɛ wɔ nu kɛ ɛbanwu kɛzi ɛkɛ ne amra yɛ bɛ ninyɛne la kolaa na wɔahile wɔ adwenle. (Nol. 3:​1, 7b) Ɔle kpalɛ kɛ ɛbalua wɔ neazo zo wɔahilehile mediema tɛla kɛ ɛbabɔ mɔdenle wɔava wɔ nzuzulɛ wɔatinlitinli bɛ nwo zo.—2 Kɔl. 1:24.

3. Fa ɛ nwo wula gyimalilɛ ngakyile nu. (Fel. 1:27) Saa ɛtu ɛkɔ ɛleka fofolɛ a ɔdie wɔ mekɛ nee wɔ anwosesebɛ ɛdeɛ, noko ɔwɔ kɛ ɛdwu ɛkɛ ne ala a ɛkɔ debiezukoalɛ ne mɔ bie, na saa ɔbayɛ boɛ a kɔ ye wɔ Belemgbunlililɛ Asalo. Ɔluakɛ saa wɔ asafo fofolɛ ne anu amra ɛnnwu wɔ fee anzɛɛ bɛnda bɛnnwu wɔ a, kɛ ɔkɛyɛ na baboa wɔ ɛ? Lucinda mɔɔ ɔ nee ɔ mra mraalɛ nwiɔ dule hɔle South Africa suakpole bie azo la hanle kɛ: “Me gɔnwo mɔ dule me folɛ kɛ membɔ mɔdenle kɛ mebabikye me asafo ne anu amra kpalɛ, me nee bɛ bahɔ daselɛlilɛ na meamaa mualɛ wɔ debiezukoalɛ bo. Eza yɛmaanle bɛrayɛle daselɛlilɛ ayia wɔ yɛ sua nu ɛkɛ.”

Saa ɛ nee mediema mɔɔ wɔ wɔ asafo fofolɛ ne anu la ‘bɔ mɔdenle’ yɛ teokelase gyimalilɛ ngakyile a, ɔle adenle kpalɛ mɔɔ ɔbamaa wɔaboa wɔ “edwɛkpa ne anwo diedi ne” anu a. Anne-Lise, mɔɔ yɛhanle ɔ nwo edwɛkɛ la asafo nu mgbanyima maanle ye anwosesebɛ kɛ ɔbɔ mɔdenle kɛ ɔ nee awie biala bahɔ daselɛlilɛ. Boni a ɛvi nu ɛra a? Ɔhanle kɛ: “Ɛkɛ ne ala menwunle kɛ yemɔ a le debie titili mɔɔ ɔbamaa meahola asafo fofolɛ ne anu tɛnla a.” Eza saa ɛtu ɛ nwo ɛmaa ɛboa wɔ Belemgbunlililɛ Asalo ɛkɛ ne ɛziezielɛ nu a, ɔbahile kɛ wɔlie wɔdo nu kɛ asafo mɔɔ ɛwɔ nu kɛkala la ɛne. Saa ɛfa ɛ nwo ɛwula gyimalilɛ ngakyile nu a, ɔbamaa mediema ne mɔ alie wɔ ndɛndɛ na wɔade nganeɛ kɛ ɛboka wɔ sunsum nu abusua fofolɛ ɛhye anwo.

 4. Kpondɛ agɔnwolɛma fofolɛ. (2 Kɔl. 6:​11-13) Saa ɛbanyia agɔnwolɛma a, kyesɛ ɛkile awie mɔ anwo anyelielɛ; ɔti nyia mekɛ ɛ nee mediema ɛbɔ adawu kolaa na bɛabɔ debiezukoalɛ ne abo yɛɛ mekɛ mɔɔ bɛkpɔne la amaa wɔanwu bɛ. Bɔ mɔdenle kɛ ɛbanwu bɛ aluma. Saa ɛkakye menli aluma, ɛkile bɛ nwo anyelielɛ na ɛyɛ awie mɔɔ bɛkola bɛbikye wɔ a, ɔbamaa awie mɔ anyia ɛhulolɛ kɛ bɛbanwu wɔ kpalɛ na bie a bɛayɛ ɛ gɔnwo mɔ.

Kɛ anrɛɛ ɛbayɛ biala mɔɔ ɛbahola amaa awie mɔ alie wɔ ado nu la, maa mediema ne mɔ ɛnwu sonla holɛ mɔɔ ɛde la. Yɛ kɛ mɔɔ Lucinda hanle la, ɔse, “Kɛmɔ yɛdole ɛsalɛ yɛvɛlɛle awie mɔ wɔ yɛ sua nu la ati, yɛnyianle agɔnwolɛma kpalɛ.”

“BƐLIE BƐ NWO NGOKO”

Saa bie mɔ wolo Belemgbunlililɛ Asalo na menli mɔɔ bɛnze bɛ la ala a wɔ ɛkɛ a, ɔkola ɔmaa bɛ ahonle tu. Ɔti kɛ ɔkɛyɛ na yɛaboa bɛdabɛ mɔɔ bɛdu bɛra yɛ asafo ne anu la ɛ? Ɛzoanvolɛ Pɔɔlo maanle yɛ anwosesebɛ kɛ: “Bɛlie bɛ nwo ngoko kɛ mɔɔ Kelaese noko liele bɛ la.” (Wlo. 15:7) Saa mgbanyima sukoa Kelaese a, bɛbahola bɛaboa menli fofolɛ mɔɔ bɛra bɛ asafo ne anu la bɛamaa bɛ nye alie. (Nea ɛlɛka, “ Saa Ɛlɛtu A, Kɛ Ɔkɛyɛ Na Ninyɛne Ahɔ Boɛ Ɛ?”) Noko akee asafo ne amuala, mɔɔ ngakula bɔbɔ boka nwolɛ la bahola aboa menli fofolɛ mɔɔ bɛra asafo ne anu la bɛamaa bɛahola tɛnla.

Ninyɛne mɔɔ ɔwɔ kɛ yɛyɛ yɛfa yɛdie awie mɔ la bie a le kɛ yɛbado ɛsalɛ yɛavɛlɛ bɛ wɔ yɛ sua nu noko eza ɔwɔ kɛ yɛboa bɛ yɛmaa bɛkola bɛyɛ ninyɛne bie mɔ. Kɛ neazo la, adiema raalɛ ko nyianle mekɛ maanle adiema raalɛ gyɛne mɔɔ ɛdu ɛra ɛleka mɔɔ ɔde la na ɔhilele ye sua ne azo nee kɛzi ɔkpondɛ kɛ ɔkɔ ɛleka a ɔbanyia nwolɛ kale la. Zɔhane mɔɔ ɔyɛle la hanle adiema raalɛ ne mɔɔ bɔ zo mɔɔ yedu yera ɛkɛ ne la ahonle na ɔmaanle ɛkɛ ne asetɛnla ne nee ɔ nwo lile ndɛndɛ.

ƆLE NWOLƐ ADENLE MƆƆ ƆBAMAA WƆANYI

Saa abɛbɛ ɛlɛnyi a, ɔkpolo ɔ nwo fane dɔɔnwo amaa yeahola yeadu. Zɔhane ala a saa ɛlɛtu wɔahɔ asafo fofolɛ nu a, ɔwɔ kɛ ɛye ɛzulolɛ biala mɔɔ ɔbahola  yeazi wɔ adenle kɛ ɛbayɛ dɔɔnwo wɔ Gyihova ɛzonlenlɛ nu la ɛfi wɔ nu a. Nicolas nee Céline hanle kɛ: “Saa ɛtu ɛkɔtɛnla ɛleka fofolɛ a, ɔtete wɔ kpalɛ. Kɛmɔ ɔwɔ kɛ ɛyɛ nzenzaleɛ amaa wɔahola ɛ nee menli fofolɛ adɛnla anzɛɛ wɔahola wɔadɛnla ɛleka mɔɔ le ngakyile fi mɔɔ ɛze la anwo la ati, ɔmaa ɛsukoa subane fofolɛ.” Jean-Charles mɔɔ yɛlimoa yɛha ɔ nwo edwɛkɛ la hanle kɛzi ye abusua ne ɛnyia bɛ ɛdulɛ ne azo nvasoɛ la, ɔse: “Yɛ asafo fofolɛ ne ɛlɛboa yɛ mra ne mɔ yeamaa bɛanyi sunsum nu. Siane ekyi anzi, yɛ ra raalɛ ne bɔle ɔ bo kɛ ɔyɛ gyimalilɛ wɔ dapɛne avinli debiezukoalɛ ne abo yɛɛ yɛ ra nrenyia ne yɛle nolobɔlɛnli mɔɔ bɛtɛsɔnenle ye.”

Na saa bie a wɔ tɛnlabelɛ ne ɛnrɛmaa ɛnrɛhola ɛnrɛdu ɛnrɛhɔ ɛleka mɔɔ bɛhyia moalɛ kpole la ɛ? Ɛnee fa ye kɛ wɔhɔ asafo fofolɛ nu na fa nzuzulɛ mɔɔ bɛhilehile nu wɔ edwɛkɛ ɛhye anu la di gyima. Fa ɛ nwo to Gyihova anwo zo na fa ɛ nwo wula asafo gyimalilɛ ngakyile nu. Akee yɛ ngyehyɛleɛ ɛ nee awie mɔ ɛhɔ daselɛlilɛ na kpondɛ agɔnwolɛma fofolɛ anzɛɛ mia agɔnwolɛ dɛba mɔɔ ɛlɛ la anu. Ɛbahola wɔalimoa wɔadudu agyakɛ wɔaboa menli fofolɛ mɔɔ bɛra wɔ asafo ne anu anzɛɛ menli mɔɔ bɛhyia moalɛ la na wɔaboa bɛ wɔamaa bɛahola bɛayɛ ninyɛne bie mɔ ɔ? Kɛmɔ ɛlɔlɛ a maa bɛnwu nɔhalɛ Kilisienema la ati, saa ɛyɛ zɔ a, ɔbaboa wɔ yeamaa wɔabikye Gyihova kpalɛ. (Dwɔn 13:35) Ɛbahola wɔanyia anwodozo kɛ “afɔlebɔlɛ zɛhae mɔ sɔ Nyamenle anye kpalɛ.”—Hib. 13:16.

Ɔnva nwo ninyɛne ɛhye mɔ mɔɔ yɛzuzu nwo la, Kilisienema dɔɔnwo ɛhola ɛdu ɛhɔ asafo fofolɛ nu na bɛ nye ɛlie, ɔti ɛdawɔ noko ɛbahola! Anne-Lise hanle kɛ: “Asafo fofolɛ mɔɔ mengɔle nu la ɛmaa mebuke me ahonle nu kpalɛ.” Kɛkala Kazumi ɛnwu kɛ saa ɛtu ɛkɔ asafo fofolɛ nu a, “ɛnwu kɛzi Gyihova ɛlɛboa wɔ la wɔ ndenle mɔɔ ɛtɛnwunle ye ɛlɛ la azo.” Na Jules noko ɛ? Ɔhanle kɛ: “Agɔnwolɛma mɔɔ menyia bɛ la ɛmmaa mende nganeɛ kɛ yeha me ngome bieko. Kɛkala mebikye me asafo fofolɛ ne anu amra kpalɛ na ɔbayɛ se kɛ mebavi ɛke.”