DON mɔɔ ɔle Gyihova Dasevolɛ wɔ Canada la bɔ mɔdenle di menli mɔɔ da gua zo la daselɛ. Don ka menli ɛhye mɔ ko anwo edwɛkɛ kɛ: “Metɛnwunle awie mɔɔ anwo le evinli kɛ Pita mɔɔ da gua zo la ɛlɛ. Ɔnli ɔ nwo eni yɛɛ ɔmmaa menli ɛmbikye ye. Ɔkpole ahunlunyele mɔɔ menli dɔɔnwo lale ye ali hilele ye la.” Ɛhye hɔle zo too ɔbole ɛvolɛ 14, noko Don nyianle abotane lale nyele ali hilele nrenyia ɛhye mɔɔ da gua zo la.

Kenle ko, Peter bizale Don kɛ: “Duzu ati a ɛlɛgyegye ɛ nwo wɔ me nwo a? Awie biala ɛmbikye me. Duzu ati a ɛdwenle me nwo a?” Don luale nrɛlɛbɛ adenle zo vale ngɛlɛlera nsa lile gyima amaa yeaha Peter ahonle. Mɔɔ limoa, ɔbizale Peter saa ɔze Nyamenle duma a, akee ɔmaanle ɔgengale Edwɛndolɛ 83:18 wɔ Baebolo ne anu. Bieko, amaa Peter anwu deɛmɔti Don dwenle ɔ nwo la, ɔmaanle ɔgengale Wulomuma 10:13, 14 mɔɔ ka kɛ, “awie biala mɔɔ kɛbɔ Gyihova duma la bɛbalie ye ngoane” la. Awieleɛ bɔkɔɔ ne, Don gengale Mateyu 9:36 na ɔzele Peter kɛ ɔdaye noko ɔgenga. Ngyɛnu zɔhane ka kɛ: “Ɔnwunle menli dɔɔnwo ne la, bɛ nwo yɛle ye alɔbɔlɛ, ɔluakɛ ɛnee bɛle kɛ mboane mɔɔ ɛnlɛ neavolɛ mɔɔ bɛbodɛboda bɛ na bɛgyakyi bɛ ɛkɛ ne la.” Ɛhye maanle Peter zunle na ɔbizale kɛ: “Mele mboane ɛhye mɔ anu ko ɔ?”

Peter bɔle ɔ bo kɛ ɔyɛ nzenzaleɛ. Ɔbiale, ɔkpale ɔ kɛsa na ɔwulale adɛladeɛ ngɛnlɛma mɔɔ Don vale maanle ye la. Peter bɔle mɔdenle lile ɔ nwo eni dahuu.

Peter hɛlɛle ɔ nwo edwɛkɛ wɔ buluku nu. Edwɛkɛ mɔɔ ɔlimoa ɔhɛlɛle la ɛnyɛ anyelielɛ kpalɛ, noko mɔɔ yehɛlɛ ye kenlensa ye la le ngakyile. Ko ka kɛ: “Menwu Nyamenle duma ɛnɛ. Kɛkala saa melɛyɛ asɔne a, mebɔ Gyihova duma. Ɔyɛ anyelielɛ kɛ ɛbanwu ye duma. Don se, Gyihova bahola ayɛ me Gɔnwo, awie mɔɔ ɔbanyia mekɛ yeadie me mekɛ biala ɔnva  nwo mekɛ nee mɔɔ mekulo kɛ meka nwolɛ edwɛkɛ la.”

Peter hɛlɛle ye edwɛkɛ mɔɔ li awieleɛ la ɔmaanle ɔ mediema ne mɔ. Ɔhɛlɛle kɛ:

“Ɛnɛ, mende kpɔkɛ. Kɛkala, me nye ɛvi. Saa ɛnɛ a le me kenle mɔɔ li amozii bɔbɔ a, meze kɛ mebanwu me gɔnwo [Don] bieko wɔ Paladaese. Ɛnɛ mɔɔ ɛlɛkenga edwɛkɛ ɛhye la, mende aze bieko. Na saa ɛnwu awie wɔ me ɛzɛne bo mɔɔ ɛnze ye a, ɛ nee ye ɛdendɛ na mesɛlɛ wɔ kenga buluku buluwu ekyii ɛhye [ɔlɛka buluku mɔɔ bɛfa bɛsukoa Baebolo ne la, The Truth That Leads to Eternal Life mɔɔ ɔnyianle ye ɛvolɛ dɔɔnwo anu la]. * Ɔka kɛ, mebanwu me gɔnwo ne bieko wɔ Paladaese. Mefa me ahonle muala medie ɛhye medi. Ɛ diema kulovolɛ, Peter.”

Bɛwiele ɛzɛne ne la, Peter adiema raalɛ Ummi hanle kɛ: “Kɛyɛ ɛvolɛ nwiɔ ɛne yɛɛ Peter nee me dendɛle a. Mekɛ zɔhane ala a menwunle kɛ ɔ nye ɛlie a. Ɔzelele bɔbɔ.” Ɔzele Don kɛ: “Mebagenga buluku ne, ɔluakɛ deɛ holɛ ko ne mɔɔ yemaa me diema ne ɛhakyi la le debie mɔɔ sonle bolɛ.” Ummi noko liele dole nu kɛ Gyihova Alasevolɛ ne mɔ ko nee ye ɛzukoa Duzu A Baebolo Ne Kilehile Amgba A? buluku ne mɔɔ bɛyɛ ye kenlensa ye la.

Yɛdayɛ noko, yɛnrɛnlea sonla wɔ ɛnyelɛzo ala, yɛbala nɔhalɛ ɛlɔlɛ ali na yɛanyia menli nwo abotane. (1 Tim. 2:3, 4) Mekɛ mɔɔ yɛlɛyɛ zɔ la, yɛbahola yɛamaa menli mɔɔ le kɛ Peter mɔɔ bie a bɛmbu bɛ noko bɛlɛ ahonle kpalɛ la ahakyi. Yɛlɛ anwodozo kɛ Nyamenle mɔɔ nea “sonla ahonle nu” la, bamaa nɔhalɛ ne anyi wɔ menli mɔɔ fɛta la ahonle nu.—1 Sa. 16:7; Dwɔn 6:44.