KƐMƆ Mateyu Edwɛkpa ne kile la, “Gyisɛse hɔle ɛzonlenlɛ sua ne anu na ɔvoanle bɛdabɛ mɔɔ bɛlɛtɔne ninyɛne nee bɛdabɛ mɔɔ bɛlɛtɔ debie wɔ ɛzonlenlɛ sua ne anu la amuala, na ɔbutubutule menli mɔɔ senza ezukoa la ɛkponle ne mɔ na ɔhanle menli mɔɔ tɔne mɔlɔnoma la mbia ɔguale. Na ɔzele bɛ kɛ: “Bɛhɛlɛ kɛ, ‘Bɛbavɛlɛ me sua ne asɔneyɛlɛ sua,’ noko bɛmɛ bɛlɛyɛ ye nwule feabelɛ.”—Mat. 21:12, 13.

Dwuuma tetedwɛkɛ bie kile kɛ, ɛzonlenlɛ sua ne anu gualilɛma dɔnenle bɛ ninyɛne awolɛ ɛsesebɛ vale sisile menli ne. Kɛ neazo la, wɔ kɛyɛ ɛvolɛ 50 wɔ Kelaese ewule nzi, ɛnee ɔwɔ kɛ awie yɛ gyima kɛyɛ kenle 25 na yɛahola yɛadɔ mɔlɔnoma nwiɔ yeabɔ afɔle. Ehyiavolɛma kola fa abubule anzɛɛ mɔlɔnoma bɔ afɔle, noko ye bolɛ ne ati, ɛnee bɛngola ye tɔ. (Sɛl. 1:14; 5:7; 12:6-8) Relabae Semɛyɔn ben Gameeleɛle vale ɛhye anwo ɛya na ɔdele afɔle dodo mɔɔ ɔwɔ kɛ Dwuuma bɔ la azo, ɛkɛ ne ala bɛdele bolɛ ne azo, na kɛkala kyesɛ awie yɛ gyima dɔnehwele nsa na yeahola yeadɔ mɔlɔnoma nwiɔ.

Ɛhye ati, ɔmaanle Gyisɛse vɛlɛle ɛzonlenlɛ sua ne anu gualilɛma ne “nwule” ɔluakɛ ɛnee bɛle nzisi nee anyebolo.