1, 2. Saa yɛkɔ sɔnea nu a, kɛzi Gyihova kyekye yɛ rɛle ɛ, na anwodozo boni a ye Edwɛkɛ ne maa yɛnyia a?

KPAVOLƐ bie mɔɔ yɛbavɛlɛ ye Eduardo mɔɔ ɔtɛgyale la hanle ye ngyegyelɛ hilele kpanyinli bie mɔɔ ɛgya mɔɔ bɛfɛlɛ ye Stephen la. Ɛnee Eduardo ɛlɛdwenle edwɛkɛ mɔɔ wɔ 1 Kɔlentema 7:28 mɔɔ ɔse: “Bɛdabɛ mɔɔ bɛbagya la anwo bahyele bɛ wɔ nwonane nu” la anwo. Ɔbizale kɛ, “Duzu ‘anwongyelelɛ ɔ,’ saa megya a kɛzi mebahola meagyinla ɔ nloa ɛ?” Kolaa na yɛabua zɔhane kpuya ne la, Stephen zele Eduardo kɛ ɔzuzu debie bieko mɔɔ ɛzoanvolɛ Pɔɔlo hɛlɛle la anwo, ɔhɛlɛle kɛ Gyihova le “arɛlekyekyelɛ muala Nyamenle ne, mɔɔ kyekye yɛ rɛle wɔ yɛ sɔnea [“amaneɛnwunlɛ”ɔbdw.] kɔsɔɔti anu.”—2 Kɔl. 1:3, 4.

² Nɔhalɛ nu, Gyihova le ɛlɔlɛ Selɛ, saa yɛ nwo kyele yɛ a, ɔkyekye yɛ rɛle. Bie a ɛdawɔ mumua ne wɔnwu kɛzi Nyamenle luale ye Edwɛkɛ ne azo maanle wɔ adehilelɛ la. Yɛbahola yɛalie yɛali kɛ ɔkulo kɛ ɔwie yɛ boɛ, kɛ mɔɔ ɔyɛle  ɔmaanle ye tete azonvolɛ la.—Kenga Gyɛlɛmaya 29:11, 12.

3. Kpuya boni mɔ a yɛbazuzu nwo a?

³ Nɔhalɛ nu, saa yɛnwu mɔɔ fa yɛ ngyegyelɛ ne ba la a, ɔbamaa yɛagyinla ɔ nloa. Na kɛ ɔde wɔ agyalɛ anzɛɛ abusua nu ngyegyelɛ nwo la ɛne. Kɛ mɔɔ Pɔɔlo hanle la, ninyɛne mɔɔ bamaa bɛ nwo ‘ahyele bɛ’ la bie mɔ a le boni? Baebolo nu neazo nee yɛ mekɛ ye azo ɛdeɛ boni mɔ a bamaa yɛanyia arɛlekyekyelɛ mɔɔ yɛhyia a? Neazo ɛhye mɔ baboa yɛ yeamaa yɛagyinla ɔ nloa.

4, 5. Ngyegyelɛ boni mɔ a agyalɛma bahola ayia a?

⁴ Yɛbahola yɛagenga mɔɔ Nyamenle hanle ye wɔ alesama tetedwɛkɛ mɔlebɛbo la: “Nrenya fi ɔ ze nee ɔ nli anwo na ɔfa ɔ nwo ɔbɔ ɔ ye anwo kyengye, na bɛ mu nwiɔ bɛbɔ nu bɛyɛ nwonane ko.” (Mɔl. 2:24) Gyihova hanle ɛhye wɔ mekɛ mɔɔ ɔhyehyɛle agyalɛ mɔɔ limoa la. Noko, kɛmɔ yɛnli munli la ati, saa yɛgya na yɛkyekye abusua a, ɔkola ɔfa ngyegyelɛ ɔba. (Wlo. 3:23) Saa bɛgya a, tumi mɔɔ awovolɛ lɛ la badi kunli ne asa nu. Nyamenle ɛmaa ye tumi kɛ ɔnlea ɔ ye anwo zo. (1 Kɔl. 11:3) Ɛhye ɛnla aze ɛmmaa menli mɔɔ bɛgya fofolɛ la. Kɛ mɔɔ Nyamenle Edwɛkɛ ne ka la, ɔwɔ kɛ raalɛ ne nwu ye kɛ ɔ hu a bamaa ye adehilelɛ a, tɛ ye awovolɛ ɔ. Ase mɔ noko bahola amaa menli mɔɔ bɛgya fofolɛ la anwo ahyele bɛ.

⁵ Eza dwenle kɛzi kunli nee yelɛ te nganeɛ wɔ mekɛ mɔɔ bɛkɛnwu kɛ bɛbawo kakula la anwo. Kɛ anrɛɛ bɛ nye balie la, bɛfa bɛ adwenle bɛsie ngyegyelɛ mɔɔ bie a bɛbayia wɔ ɛnrenzɛlɛ ne anu anzɛɛ ɔ nzi la azo. Eza ezukoa afoa nu ngyegyelɛ mɔɔ ɔwɔ kɛ bɛdi nwolɛ gyima ndɛndɛ nee amozii la noko wɔ ɛkɛ. Akee saa bɛwo kakula ne a, ɔbahyia kɛ bɛyɛ nzenzaleɛ dɔɔnwo. Ɛrɛladane ne fa ye mekɛ nee ye adwenle kɔsɔɔti sie adɔma ne anwo zo. Ɔti, ɔmaa kunli ne te nganeɛ kɛ ɔ ye ɛkpo ye, ɔluakɛ ye adwenle wɔ kakula ne mɔɔ ɔnea ye la azo. Bieko, ɛzonlelilɛ dɔɔnwo bada kunli ne anwo zo. Ɔyɛ gyima dɔɔnwo ɔluakɛ awie fofolɛ ɛraboka abusua ne anwo mɔɔ ɔwɔ kɛ bɛnea ye a.

6-8. Saa awie ɛnnwo a, kɛzi ɔkola ɔmaa ɔdi nyane ɛ?

⁶ Agyalɛma kola yia ngyegyelɛ fofolɛ noko. Mekɛ mɔɔ bɛkulo kɛ bɛwo na awolɛ ne ɛmba la. Saa yelɛ ne ɛnnwo a, ɔmaa ɔdi nyane kpalɛ. Tɛ agyalɛ anzɛɛ awolɛ a bamaa yɛ nwo adɔ yɛ a, noko akee saa yɛkulo kɛ yɛwo na awolɛ ne ɛmba a, ɔdaye noko ɔle agyalɛ nu ngyegyelɛ. (Mrɛ. 13:12) Wɔ Baebolo mekɛ nu, ɛnee saa awie ɛnnwo a ɔle munzule. Mɔɔ Gyekɔbo aye Relahyɛle nwunle kɛ ɔ diema ne ɛlɛwo la, ɔlile nyane. (Mɔl. 30:1, 2) Wɔ maanle mɔɔ bɛ amaamuo kile kɛ ɔwɔ kɛ bɛwo dɔɔnwo la anu, bɛta bɛbiza edwɛkpatɛlɛvolɛma mɔɔ bɛwɔ ɛkɛ ne la deɛmɔti bɛtɛwole la. Saa bɛdua nrɛlɛbɛ adenle zo bɛbua bɛ bɔbɔ a, bɛka kɛ, “Oo! yɛbayɛ asɔne yɛamaa bɛ!”

⁷ Maa yɛzuzu England adiema raalɛ bie mɔɔ ɛnee ɔhyia awolɛ nwo kpalɛ, noko yeannwo la anwo. Ɔnwunle kɛ ye awolɛ mekɛ ɛkpa nwo. Ɔka kɛ, ɔgyegyele ye kpalɛ ɔluakɛ ɔnrɛwo wɔ mekɛ ɛhye anu. Ɔ nee ɔ hu zile kpɔkɛ kɛ bɛbade awie ara. Noko, ɔhanle kɛ: “Ɛnee mekɔ zo medi nyane. Ɛnee meze kɛ  awie ara mɔɔ mebade ye la, ɛnrɛyɛ kɛ me kunlu ralɛ la.”

⁸ Baebolo ne ka Kilisiene raalɛ mɔɔ “ɔlua mralɛ ɛwolɛ ti bɛbabɔ ɔ nwo bane” la anwo edwɛkɛ. (1 Tim. 2:15) Noko ɛhye ɛngile kɛ awolɛ anzɛɛ ngakula a bamaa yɛanyia dahuu ngoane a. Emomu, ɔkile kɛ saa raalɛ ɛlɛnea ngakula na ɔlɛ gyima gyɛne ɔyɛ ye wɔ sua nu a, ɔbamaa yeagyakyi ndɛneyelɛ nee awie mɔ edwɛkɛ mɔɔ ɔbava ɔ nloa yeawulowula nu la. (1 Tim. 5:13) Noko ɔbahola yeayia agyalɛ nee abusua nu ngyegyelɛ.

9. Kɛzi awie aye anzɛɛ ɔ hu mɔɔ ɔbawu la le sɔnea mɔɔ anu yɛ se ɛ?

⁹ Saa yɛlɛka ngyegyelɛ mɔɔ wɔ agyalɛ nu a, nuhua ko wɔ ɛkɛ ne mɔɔ bie a ɔmmaa yɛ adwenle nu ndɛndɛ a. Yemɔ a le kulovolɛ bie ewule. Sɔnea mɔɔ anu yɛ se mɔɔ menli dɔɔnwo ɛyia la a le bɛ ye anzɛɛ bɛ hu mɔɔ ɔbawu la. Ɛhye le sɔnea mɔɔ ahenle mɔɔ de aze la anye ɛnla kɛ ɔbayia ye wɔ mekɛ ɛhye anu a. Kilisienema lɛ diedi kpundii wɔ Gyisɛse ewudwazo nwo ɛwɔkɛ ne anu. (Dwɔn 5:28, 29) Kɛzi anyelazo ɛhye kola boa kunli anzɛɛ yelɛ ne mɔɔ de aze la ɛ? Ɔkyekye bɛ rɛle. Ɛhye le adenle bieko mɔɔ yɛ Ze mɔɔ lɛ ɛlɔlɛ la dua ye Edwɛkɛ ne azo kyekye bɛdabɛ mɔɔ bɛlɛyia ngyegyelɛ la arɛle a. Akee bɛmaa yɛzuzu kɛzi Nyamenle azonvolɛ bie mɔ dele nganeɛ wɔ kɛzi Gyihova kyekyele bɛ rɛle la anwo.

10. Kɛzi Hana nyianle arɛlekyekyelɛ ɛ? (Nea mɔlebɛbo nvoninli ne.)

¹⁰ Ɛlekana aye Hana yiale sɔnea titili bie. Ɛnee ɔle mota wɔ mekɛ mɔɔ ɛnee ɔ hola Pɛnena ɛlɛwo mralɛ la. (Kenga 1 Samoɛle 1:4-7.) Pɛnena zile Hana amgbu ‘mekɛ biala.’ Ɛhye maanle Hana lile nyane kpole kpalɛ. Ye ngyegyelɛ ne mɔɔ ɔvale ɔdole Gyihova anyunlu la maanle ɔnyianle arɛlekyekyelɛ. Nɔhalɛ nu, ɔhɔle ‘zolɛ ɔzɛlɛle Gyihova mekɛ tendenle.’ Asoo ɛnee ɔ nye la kɛ Gyihova babua ye asɔneyɛlɛ ne? Ɔbayɛ zɔ. Yemɔti, “ɔgyakyile ɔ nwo alɔbɔlɛ ɛyɛlɛ.” (1 Sa. 1:12, 17, 18) Ɔnyianle anwodozo kɛ bie a Gyihova bamaa yeawo anzɛɛ ɔbali ngyegyelɛ ne anwo gyima wɔ adenle fofolɛ zo.

11. Kɛzi asɔneyɛlɛ kola kyekye yɛ rɛle ɛ?

¹¹ Suzu amgba ala mɔɔ yɛnli munli na yɛwɔ Seetan tumililɛ bo la, yɛbahɔ zo yɛayia sɔnea nee ngyegyelɛ. (1 Dwɔn 5:19) Nea kɛzi ɔyɛ anyelielɛ kɛ Gyihova le “arɛlekyekyelɛ muala Nyamenle ne” a! Adenle ko mɔɔ yɛbahola yɛalua zo yɛagyinla yɛ sɔnea anzɛɛ ngyegyelɛ nloa la a le asɔneyɛlɛ. Hana hanle ye ahonle nu edwɛkɛ kɔsɔɔti hilele Gyihova. Saa yɛdayɛ noko yɛyia sɔnea na yɛka kɛzi yɛte nganeɛ la anwo edwɛkɛ yɛkile Gyihova a ɛnee yɛtɛwiele. Ɔwɔ kɛ yɛdua modolɛ zo yɛsɛlɛ ye, na yɛfi yɛ ahonle nu yɛda yɛ nganeɛdelɛ ali yɛkile ye.—Fel. 4:6, 7.

12. Duzu a boale kunlavolɛ Ana maanle ɔnyianle anyelielɛ a?

¹² Saa yɛannwo anzɛɛ yɛ kulovolɛ bie wu a yɛbahola yɛali nyane kpalɛ. Noko yɛbahola yɛanyia arɛlekyekyelɛ. Fa Ana mɔɔ dɛnlanle aze wɔ Gyisɛse mekɛ zo la kɛ neazo, bɛgyale la, ye ɛvolɛ nsuu pɛ yɛɛ ɔ hu wule a. Baebolo ne anga kɛ bɛwole mralɛ. Mɔɔ Ana nyianle ɛvolɛ 84 la, duzu a ɛnee ɔlɛyɛ a? Luku 2:37 ka kɛ: “Ɛnee dahuu ɔwɔ ɛzonlenlɛ sua ne anu, ɔfa ɛhɔnehyelɛ nee modolɛ ɔsonle alehyenlɛ nee aledwolɛ.” Nɔhalɛ nu, Ana nyianle  arɛlekyekyelɛ nee anyelielɛ wɔ Gyihova ɛzonlenlɛ nu.

13. Yɛ mbusuafoɔ ye yɛ rɛle to yɛ sa nu a, kɛzi agɔnwolɛma kpalɛ kola kyekye yɛ rɛle ɛ?

¹³ Saa yɛ nee yɛ mediema tu a, ɔmaa yɛnyia agɔnwolɛma kpalɛ mɔɔ yɛkola yɛbikye bɛ a. (Mrɛ. 18:24) Paula ka kɛzi ɔlile nyane la wɔ mekɛ mɔɔ ɛnee yeli ɛvolɛ nnu na ye mame vile asafo ne anu la. Ɛnee ɔnla aze kɛ ɔbagyinla sɔnea ɛhye anloa. Noko ɔnyianle anwosesebɛ wɔ mekɛ mɔɔ adekpakyelɛnli Ann mɔɔ ɔ nee ye wɔ asafo ko anu vale ye adwenle ziele ye sunsum nu anyuhɔlɛ zo la. Paula ka kɛ: “Ann ɛnle me busuanli, noko menwunle kɛ me nwo mɔɔ ɔdwenle la boale me kpalɛ. Ɔmaanle mengɔle zo menzonlenle Gyihova.” Paula tɛsonle Gyihova nɔhalɛ nu. Ɔyɛ Paula anyelielɛ kpole kɛ ɔ nee ye mame ɛlɛbɔ nu azonle bieko la. Ann noko anye die kɛ ɔyɛle mame ɔmaanle Paula wɔ asafo ne anu la.

14. Nyilalɛ boni a menli mɔɔ kyekye awie mɔ arɛle la nyia a?

¹⁴ Nɔhalɛ nu, saa yɛkile awie mɔ anwo anyelielɛ a, ɔnrɛmaa yɛnrɛdwenle yɛ ngyegyelɛ nwo. Mediema mraalɛ mɔɔ bɛgya nee mɔɔ bɛtɛgyale la ze kɛ saa bɛbɔ edwɛkpa ne nolo kɛ Nyamenle gyimayɛvoma a, ɔmaa bɛ nye die kpole. Bɛ bodane a le kɛ bɛyɛ  Nyamenle ɛhulolɛdeɛ bɛava bɛawula ye anyunlunyia. Bie mɔ bɔbɔ bu daselɛlilɛ mɔɔ bɛkɔ la kɛ ɔle ayileyɛlɛ. Ɔda ali kɛ saa yɛ kɔsɔɔti yɛdwenle menli mɔɔ bɛwɔ azɛlɛsinli ne nee asafo ne anu la anwo a, yɛbamaa koyɛlɛ ara asafo ne anu. (Fel. 2:4) Ɛzoanvolɛ Pɔɔlo yɛle nwolɛ neazo kɛnlɛma. Ɔyɛle kɛ “ɛrɛladane” ɔmaanle Tɛsalonaeka asafo ne; eza ɔyɛle kɛ sunsum nu selɛ la.—Kenga 1 Tɛsalonaekama 2:7, 11, 12.

15. Nwane mɔ a ɔle bɛ gyima titili kɛ bɛbahilehile ngakula nɔhalɛ ne a?

¹⁵ Debie ko mɔɔ ɔwɔ kɛ ɔkyia yɛ la a le arɛlekyekyelɛ nee moalɛ mɔɔ yɛfa yɛmaa mbusua la. Ɔyɛ a bɛdabɛ mɔɔ bɔ zo mɔɔ bɛnwu nɔhalɛ ne la maa nolobɔlɛma mɔɔ bɔ mɔdenle la boa bɛ maa bɛkilehile bɛ mra, bie bɔbɔ a bɛmaa bɛ nee bɛ mra sukoa Baebolo ne. Baebolo ne ka kɛ ɔle awovolɛ gyima kɛ bɛbahilehile bɛ mra na bɛatete bɛ. (Mrɛ. 23:22; Ɛfɛ. 6:1-4) Ɔdwu mekɛ ne bie a awie mɔ moalɛ nwo hyia kpalɛ. Noko, ɛhye ɛnye awovolɛ ne mɔ ɛzonlelilɛ ɛnvi bɛ nwo zo. Adwelielilɛ mɔɔ kɔ zo dahuu wɔ abusua ne anu la anwo hyia.

16. Saa yɛlɛboa ngakula a, duzu a ɔwɔ kɛ yɛkakye a?

¹⁶ Saa awovolɛ si kpɔkɛ kɛ awie nee bɛ mra ɛzukoa debie a, ɔnle kɛ ahenle die awovolɛ ne mɔ gyima fi bɛ sa. Ɔyɛ a bɛmaa Alasevolɛ bie mɔ nee ngakula mɔɔ bɛ awovolɛ anye ɛnlie nɔhalɛ ne anwo la sukoa debie. Ɔwɔ kɛ Dasevolɛ ne kakye kɛ kakula ne mɔɔ ɔ nee ye ɛlɛsukoa la ɛngile kɛ ɔdaye a ɔle ye papa anzɛɛ ye mame a. Ɔbayɛ kpalɛ kɛ bɛbayɛ debiezukoalɛ ne wɔ kakula ne sua nu mɔɔ awovolɛ ne mɔ wɔ ɛkɛ anzɛɛ Dasevolɛ gyɛne mɔɔ le kpanyinli la wɔ ɛkɛ anzɛɛ ɛleka gyɛne mɔɔ fɛta la. Ɛhye ɛnrɛmaa awie mɔ ɛnrɛnyia mɔɔ ɛlɛkɔ zo la anwo adwenle ɛtane. Yɛ nye la kɛ ɔnrɛhyɛ awovolɛ ne mɔ babɔ ɔ bo ahilehile bɛ mra ne kɛ mɔɔ Nyamenle ɛha la.

17. Kɛzi ngakula kola kyekye bɛ mbusuafoɔ arɛle ɛ?

¹⁷ Ngakula mɔɔ bɛkulo nɔhalɛ Nyamenle ne na bɛfa ye folɛdulɛ bɛyɛ gyima la maa bɛ abusua ne nyia arɛlekyekyelɛ. Bɛkola bɛyɛ ɛhye ɔlua bɛ awovolɛ mɔɔ bɛbabu bɛ na bɛaboa bɛ wɔ nwonane afoa nu la azo. Eza bɛkola bɛboa kpalɛ wɔ sunsum afoa nu. Kolaa na Azuyilɛ ne ara la, Sɛte alɔnra Leemɛke zonlenle Gyihova. Selɛ zɔhane hanle ɔ ra Nowa anwo edwɛkɛ kɛ: “Nyamenle ɛmaa munzule ɛha azɛlɛ ye. Ɔlua zo ɛnɛ yɛyɛ zolɛ egyinli a yɛnwu nyane kpalɛ. Noko kakula ɛhye bamaa yɛ nyanenwunlɛ ne aha aze.” Ngapezo zɔhane penle zo wɔ mekɛ mɔɔ bɛyele amowa ne bɛvile azɛlɛ ne azo la. (Mɔl. 5:29; 8:21) Ngakula mɔɔ bɛli nɔhalɛ ɛzonlenlɛ nzi la kola yɛ arɛlekyekyelɛ maa bɛ mbusua, na bɛboa bɛ muala bɛmaa bɛgyinla sɔnea mɔɔ bɛyia ye ɛnɛ nee mɔɔ le kɛ Azuyilɛ la anloa.

18. Duzu a kola boa yɛ ɔmaa yɛfa akɛnrasesebɛ yɛgyinla ngyegyelɛ anzɛɛ sɔnea biala mɔɔ yɛbayia la anloa ɛ?

¹⁸ Ɛnɛ, Gyihova menli ɛnyia arɛlekyekyelɛ ɔlua asɔneyɛlɛ, Baebolo nu neazo mɔɔ bɛdwenledwenle nwo nee bɛ mediema mɔɔ bɛ nee bɛ tu kpalɛ la azo. (Kenga Edwɛndolɛ 145:18, 19.) Kɛmɔ yɛze kɛ Gyihova kyekye yɛ rɛle dahuu la ati, ɔboa yɛ ɔmaa yɛfa akɛnrasesebɛ yɛgyinla sɔnea biala mɔɔ yɛbayia ye ɛnɛ nee kenle bie la anloa.