Rilihɔbowam papa Sɔlɔmɔn lile belemgbunli ɛvolɛ 40 wɔ Yizilayɛ. (1 Arl. 11:42) Sɔlɔmɔn wule wɔ ɛvolɛ 997 K.Y.M. Akee Rilihɔbowam vile Gyɛlusalɛm sɔlɔ hɔle Hyikɛm maanle bɛkpokpale ye kɛ belemgbunli. (2 Ek. 10:1) Ɛnee ɔsulo kɛ ɔbayɛ belemgbunli ɔ? Ɛnee bɛze Sɔlɔmɔn kɛ ye nrɛlɛbɛ ne le kpole. Yeangyɛ, ɛnee ɔwɔ kɛ Rilihɔbowam kile kɛ ɔze nrɛlɛbɛ mɔɔ ɔbahola yeali ngyegyelɛ mgbole nwo gyima a.

Bie a Rilihɔbowam nwunle kɛ menli ne kpondɛ dɔɔnwo avi ye ɛkɛ. Yizilayɛma dele nganeɛ kɛ bɛlɛsisi bɛ, ɔti bɛzoanle bɛ bie mɔ kɛ bɛhɔha mɔɔ bɛkulo kɛ Rilihɔbowam yɛ maa bɛ la: “Ɛ ze Sɔlɔmɔn sisile yɛ kpole kpalɛ na ɔzoale yɛ adesoa ɛnlomboɛ. Yemɔti nea na te mɔɔ ɛ ze kyekyele zoale yɛ la azo maa yɛ nwo ɛdɔ yɛ na yɛkɛzonle wɔ.”​—2 Ek. 10:3, 4.

Ɛnee ɔwɔ kɛ Rilihɔbowam si kpɔkɛ mɔɔ anwo hyia. Saa ɔtie menli ne a, ɔ nee ye abusua ne nee belemgbunli sua nu amra ɛnrɛnyia ninyɛne bie mɔ mɔɔ ɛnee bɛ sa ka ye dahuu la. Noko, saa yeandie menli ne a, bie a bɛbadwazo bɛatia ye. Duzu a ɔyɛle a? Belemgbunli fofolɛ ne limoa maanle mgbanyima mɔɔ bɛdule Sɔlɔmɔn folɛ la dule ye folɛ. Noko, Rilihɔbowam diele ɔ gɔnwo mɔ mɔɔ ɔ nee bɛ sɛ atipɛne la folɛdulɛ ne, ɔti ɔzele menli ne kɛ: “Egya zoale bɛ adesoa ɛnlomboɛ, na mame, mebava bie meaboka nwolɛ. Egya vale nɛnemilɛ a bole bɛ a, na mame, mebava empele mɔɔ anloa yɛ nyane kɛ nyamenleakɛlɛ ɛbɔlɛ la a meabila bɛ a.”​—2 Ek. 10:6-14.

Duzu a yɛsukoa yɛfi nu a? Nrɛlɛbɛ wɔ nu kɛ yɛbadie mgbanyima mɔɔ bɛnyi wɔ sunsum nu la dahuu. Kɛmɔ bɛlɛ anwubielɛ dɔɔnwo la ati, bɛbahola bɛanwu mɔɔ bavi yɛ kpɔkɛzilɛ nu ara la na bɛadu yɛ folɛ kpalɛ.​—Dwobu 12:12.

Akee Rilihɔbowam boɔboale ye ɛlɔnema anloa kɛ ɔ nee mbusua ekpunli mɔɔ bɛde atua la  kaho. Noko, Gyihova luale ngapezonli Hyɛmaya anwo zo hanle kɛ: “Bɛmmafa konle bɛtoa bɛ mediema Yizilayɛma; bɛzia bɛhɔ sua nu. Medame [Gyihova] a memaa ɛhye ɛzi a.”​—1 Arl. 12:21-24. *

Ɛnee ɔla aze kɛ Rilihɔbowam badie Gyihova ɔ? Kɛzi menli ne babu bɛ belemgbunli fofolɛ ne ɛ? Ɔzele bɛ kɛ ɔbava “empele mɔɔ anloa yɛ nyane” la yeahwe bɛ nzo, noko yeanyɛ bɛ atuadelɛ ne anwo ɛhwee! (Fa toto 2 Edwɛkɛsisilɛ 13:7 anwo.) Noko, belemgbunli ne nee ye ɛlɔnema ne diele “[Gyihova] nrɛlaleɛ ne na bɛhɔle sua nu.”

Duzu a yɛsukoa yɛfi nu a? Nrɛlɛbɛ wɔ nu kɛ yɛbadie Gyihova, saa bɔbɔ bɛbagolo yɛ nwo a. Yɛtie Nyamenle a, ɔmaa yɛnyia ɔ nyunlu ɛlolɛ nee nyilalɛ.​—Mɛla 28:2.

Bɛyilale Rilihɔbowam wɔ ye tieyɛ ne anwo ɔ? Ɛnee Rilihɔbowam tɛde Dwuda nee Bɛngyaman belemgbunli, na ɔzile kpɔkɛ kɛ ɔbazi azua fofolɛ. Ɔhɔle azuamgbole ɛhye mɔ biala azo ɔboale bɛ, “amaa bɛ nwo ayɛ se.” (2 Ek. 11:5-12) Mɔɔ hyia kpalɛ la, ɔlile Gyihova mɛla zo wɔ mekɛ ekyi bie anu. Kɛmɔ mbusua-bulu belemgbunlililɛ ne vale bɛ nwo wulale awozonlezonlenlɛ nu wɔ Gyɛlɔbowam tumi bo la ati, bɛ nuhua dɔɔnwo maanle “Rilihɔbowam nyianle gyinlagyakɛ,” ɔluakɛ bɛvile ɛkɛ bɛhɔle Gyɛlusalɛm bɛhɔboale nɔhalɛ ɛzonlenlɛ. (2 Ek. 11:16, 17) Ɔti, Rilihɔbowam tieyɛ ne maanle ye belemgbunlililɛ ne gyinlanle.

Mɔɔ Rilihɔbowam tumililɛ ne gyinlanle la, ɔyɛle azibɛnwo debie bie. Ɔkpole Gyihova mɛla na ɔhɔzonlenle awozonle! Duzu ati ɔ? Asoo ye mame mɔɔ le Ammɔnnli la a piepianle ye maanle ɔyɛle zɔ a? (1 Arl. 14:21) Yɛnze, noko maanle ne lile ye neazo ɛtane ne anzi. Ɔti, Gyihova maanle Yigyibiti Belemgbunli Hyaehyake rahonle vale Dwuda azua dɔɔnwo ɔnva nwo kɛ Rilihɔbowam ɛmaa bɛ nwo ɛyɛ se la!​—1 Arl. 14:22-24; 2 Ek. 12:1-4.

Akee ninyɛne nu yɛle se wɔ mekɛ mɔɔ Hyaehyake nee ye ɛlɔne tetale Gyɛlusalɛm ɛleka mɔɔ Rilihɔbowam lile tumi la. Wɔ mekɛ ɛhye anu, ngapezonli Hyɛmaya hanle Nyamenle nrɛlaleɛ ne hilele Rilihɔbowam nee ye mgbanyima kɛ: “Bɛkpo me, yemɔti medame noko mekpo bɛ memaa Hyaehyake.” Kɛzi Rilihɔbowam yɛle ye nyɛleɛ wɔ ndeanlɛ ne anwo ɛ? Ɔyɛle tieyɛ! Baebolo ne ka kɛ: “Belemgbunli ne nee ye mgbanyima ne mɔ nlunle bɛ nwo na bɛhanle bɛ nloa edwɛkɛ kɛ bɛyɛ ɛtane na bɛhanle kɛ, ‘[Gyihova] di pɛlepɛle.’” Ɔti, Gyihova ammaa bɛanzɛkye Rilihɔbowam nee Gyɛlusalɛm.​—2 Ek. 12:5-7, 12.

Ɛhye anzi, Rilihɔbowam hɔle zo lile tumi wɔ nyiakɛ belemgbunlililɛ ne anu. Kolaa na yeawu la, ɔhyɛle ninyɛne ɔmaanle ɔ mra ne mɔ amaa bɛande atua bɛantia bɛ diema Abaegya mɔɔ bali ye agya la. (2 Ek. 11:21-23) Ɛhye mɔɔ ɔyɛle la hilele kɛ ɔlɛ nwunu mɔɔ alimoa ne yeannyia la.

Rilihɔbowam bɔle mɔdenle kɛ ɔyɛ ninyɛne mgbalɛ ɛdeɛ, noko, Baebolo ne ka kɛ: “Ɔyɛle ɛtane ɔtiale [Gyihova].” Duzu ati ɔ? “Ɔboalekɛ ɔkpole [Gyihova].”​—2 Ek. 12:14.

Duzu a yɛsukoa yɛfi Rilihɔbowam edwɛkɛ ne anu a? Ɔdiele Nyamenle wɔ mekɛ bie mɔ anu. Noko, ɔ nee Gyihova annyia agɔnwolɛvalɛ kpalɛ yɛɛ yeannyia ɛhulolɛ kɛ ɔbayɛ mɔɔ sɔ ɔ nye la. Ɔti, ɔyɛle ɛtane na ɔzonlenle awozonle. Bie a ɛbabiza kɛ: ‘Mɔɔ Rilihɔbowam diele Gyihova la, asoo ɛnee amgba yenlu ɔ nwo wɔ ye ɛtane nwo na ɔkulo kɛ ɔyɛ mɔɔ sɔ Nyamenle anye ɔ? Anzɛɛ mɔɔ awie mɔ hanle kɛ ɔyɛ la ati a ɔyɛle zɔ a?’ (2 Ek. 11:3, 4; 12:6) Nzinlii, ɔziale ɔyɛle mɔɔ ɛnle kpalɛ la. Nea kɛzi ɛnee ɔle ngakyile kolaa ɔfi ye nenya Belemgbunli Devidi anwo a! Nɔhalɛ nu, Devidi yɛle ɛtane ngakyile, noko ye ɛbɛlabɔlɛ hilele kɛ ɔkulo Gyihova, ɔdule ɔ nwo ɔmaanle nɔhalɛ ɛzonlenlɛ, yɛɛ ɔnlunle ɔ nwo nɔhalɛ  nu wɔ ye ɛtane nwo.​—1 Arl. 14:8; Edw. 51:1, 17; 63:1.

Yɛbahola yɛazukoa ninyɛne dɔɔnwo yɛavi Baebolo nu edwɛkɛ ɛhye anu. Saa yɛnea yɛ mbusua na yɛyɛ gyima ɛsesebɛ wɔ Gyihova ɛzonlenlɛ nu a, ɛnee yɛtɛwiele. Amaa yɛanyia Gyihova anyunlu ɛlolɛ la, ɔwɔ kɛ yɛsonle ye wɔ adenle mɔɔ ɔdie ɔto nu la azo, na yɛ nee ye nyia agɔnwolɛvalɛ mɔɔ anu yɛ se.

Saa yɛnyia ɛhulolɛ kpole yɛmaa Gyihova a yɛbayɛ zɔ. Kɛ mɔɔ yɛfa ɛyɛne yɛgua senle nu amaa yeannu la, ɔwɔ kɛ yɛsukoa Nyamenle Edwɛkɛ ne dahuu, yɛdwenledwenle mɔɔ yɛkenga la anwo na yɛyɛ asɔne dahuu amaa ɛhulolɛ mɔɔ yɛlɛ yɛmaa ye la ahɔ zo ayɛ kpole. (Edw. 1:2; Wlo. 12:12) Gyihova anwo ɛlɔlɛ bamaa yɛanyia ɛhulolɛ kɛ yɛyɛ mɔɔ sɔ ɔ nye dahuu la. Saa yɛyɛ ɛtane a, ɔbamaa yɛanlu yɛ nwo nɔhalɛ nu. Yɛbaboa nɔhalɛ ɛzonlenlɛ dahuu, yɛnrɛyɛ kɛ Rilihɔbowam la.​—Dwu. 20, 21.