1. Duzu ati a Gyisɛse zele Gyihova kɛ ɔnlea ye ɛdoavolɛma ne anwo zo a?

NƆE ne mɔɔ aleɛ kye a Gyisɛse bawu la, ɛnee ɔlɛdwenle ngyegyelɛ mɔɔ ye ɛdoavolɛma ne bayia la anwo. Kɛmɔ ɛnee Gyisɛse kulo ɔ gɔnwo mɔ la ati, ɔzɛlɛle ɔ Ze kɛ ɔnlea “bɛ nwo zo ɔlua amumuyɛnli ne ati.” (Dwɔn 17:14, 15) Ɛnee Gyisɛse ze kɛ saa ɔsia ɔkɔ anwuma a, Seetan Abɔnsam bahɔ zo ava konle adoa awie biala mɔɔ kulo kɛ ɔsonle Gyihova la. Ɔti Gyihova menli bahyia banebɔlɛ.

2. Duzu a maa yɛdie yɛdi kɛ Gyihova babua yɛ asɔneyɛlɛ a?

² Kɛmɔ Gyihova kulo ɔ Ra ne la ati ɔdiele ye asɔneyɛlɛ. Saa yɛbɔ mɔdenle yɛyɛ mɔɔ sɔ Gyihova anye la a, ɔbahulo yɛdayɛ noko na ɔbadie asɔne mɔɔ yɛyɛ kɛ ɔboa yɛ na ɔbɔ yɛ nwo bane la. Gyihova le abusua Tile mɔɔ ɔdwenle ye abusua ne anwo a, ɔti ɔbahɔ zo yeavi ɛlɔlɛ nu yeanlea ɔ mra. Saa yeanyɛ ye zɔ a, ɔbagua ye duma ne anwo evinli anzɛɛ ye duma bazɛkye!

3. Duzu ati a yɛhyia Gyihova banebɔlɛ ɛnɛ a?

³ Yɛhyia Gyihova banebɔlɛ ɛnɛ yɛtɛla mekɛ biala. Bɛdu Seetan bɛvi anwuma “na yeva ɛya kpole.” (Yek. 12:12) Yehola yebɛlɛbɛla menli bie mɔ yemaa bɛlie bɛli kɛ saa bɛyɛ yɛ kpɔdekpɔde a ɛnee ‘bɛlɛfa bɛazonle Nyamenle.’ (Dwɔn 16:2) Bɛdabɛ mɔɔ bɛnlie Nyamenle bɛnli la yɛ yɛ kpɔdekpɔde ɔluakɛ yɛle ngakyile yɛfi menli mɔɔ wɔ ewiade ne anu la anwo. Ɔnva nwo adwenle biala mɔɔ bɛlɛ la, ɛzulolɛ ɛnga yɛ. Duzu ati ɔ? Ɔluakɛ Nyamenle Edwɛkɛ ne se: “Awulae le nɔhavo, na ɔbamaa bɛ anwosesebɛ na yeabɔ bɛ nwo bane yeavi amumuyɛnli ne asa anu.” (2 Tɛs. 3:3) Adenle boni a Gyihova dua zo bɔ yɛ nwo bane a? Yɛbazuzu ndenle nwiɔ anwo.

4. Kɛ mɔɔ Ɛfɛsɛsema 6:13-17 kile la, duzu a Gyihova ɛva ɛmaa kɛ ɔfa yeabɔ yɛ nwo bane a?

⁴ Gyihova ɛva konle tɛladeɛ bie ɛmaa yɛ mɔɔ ɔbabɔ yɛ nwo bane yeavi Seetan ɛtetalɛ nwo a. (Kenga Ɛfɛsɛsema 6:13-17.) Sunsum nu konle tɛladeɛ ɛhye anwo yɛ se yɛɛ ɔbɔ yɛ nwo bane kpalɛ! Noko saa ɔbabɔ yɛ nwo bane a, kyesɛ yɛwula ɔ muala, yɛɛ ɔnle kɛ yɛye. Duzu a tɛladeɛ ne foa biala gyi ɛkɛ ne maa a? Bɛmaa yɛzuzu ko biala anwo.

5. Nɔhalɛ ne mɔɔ yɛfa yɛayɛ bɛlɛte la kile duzu, na duzu ati a ɔwɔ kɛ yɛfa yɛkye yɛ nze zo a?

⁵ Nɔhalɛ ne mɔɔ yɛfa yɛayɛ bɛlɛte la gyi ɛkɛ ne maa nɔhalɛ ne mɔɔ wɔ Nyamenle Edwɛkɛ Baebolo ne anu la. Duzu ati a ɔwɔ kɛ yɛfa bɛlɛte ɛhye yɛkye yɛ nze zo a? Ɔluakɛ Seetan le “adalɛ kɔsɔɔti bɛ ze.” (Dwɔn 8:44) Yeva ɛvolɛ apenle dɔɔnwo yezukoa kɛzi bɛbɔ adalɛ la kpalɛ na yebɛlɛbɛla “azɛlɛ ye azo amra amuala.” (Yek. 12:9) Noko nɔhalɛ ne mɔɔ wɔ Baebolo ne anu la bɔ yɛ nwo bane amaa Seetan ambɛlɛbɛla yɛ. Kɛzi yɛfa sɛkɛlɛneɛ adenle zo bɛlɛte ɛhye yɛkye yɛ nze zo ɛ? Yɛdua Gyihova anwo nɔhalɛ ne mɔɔ yɛbazukoa, yɛazonle ye “wɔ sunsum nee nɔhalɛ nu,” na yɛali nɔhalɛ wɔ debie biala anu la azo a yɛyɛ zɔ a.​—Dwɔn 4:24; Ɛfɛ. 4:25; Hib. 13:18.

6. Duzu a le tenleneyɛlɛ akɛnrazo enyinlike ne, na duzu ati a ɔwɔ kɛ yɛwula a?

⁶ Tenleneyɛlɛ akɛnrazo enyinlike ne gyi ɛkɛ ne maa Gyihova tenlene ngyinlazo ne mɔ. Duzu ati a ɔwɔ kɛ yɛwula akɛnrazo enyinlike ne a? Kɛ mɔɔ akɛnrazo enyinlike bɔ sogyanli ahonle ne anwo bane amaa bɛando debie bɛanwɔ nu la, zɔhane ala a tenleneyɛlɛ akɛnrazo enyinlike ne bɔ yɛ sɛkɛlɛneɛ adenle zo ahonle ne anzɛɛ sonla holɛ mɔɔ yɛde la anwo bane fi ewiade ɛhye ɛbɛlatane ne anwo a. (Mrɛ. 4:23) Gyihova kulo kɛ yɛfa yɛ ahonle muala yɛkulo ye na yɛsonle ye. (Mat. 22:36, 37) Yemɔti Seetan bɔ mɔdenle kɛ ɔmaa yɛahulo ninyɛne mɔɔ wɔ ewiade ne anu, ninyɛne mɔɔ Gyihova kyi la, amaa yɛ ahonle ne anu ahyɛ nwiɔ. (Gye. 4:4; 1 Dwɔn 2:15, 16) Na saa ɔyɛ ɛhye na yeanyɛ boɛ a, ɔbɔ mɔdenle kɛ ɔyɛ yɛ kpɔdekpɔde amaa yɛayɛ debie mɔɔ Gyihova anye ɛnlie nwo la.

7. Kɛzi yɛwula tenleneyɛlɛ akɛnrazo enyinlike ne ɛ?

⁷ Saa yɛdie Gyihova ngyinlazo mɔɔ fale kpalɛ nee ɛtane nwo la yɛto nu na yɛfa yɛbɔ yɛ ɛbɛla a, ɛnee yɛlɛwula tenleneyɛlɛ akɛnrazo enyinlike ne. (Edw. 97:10) Wɔannea a bie mɔ bade nganeɛ kɛ Gyihova ngyinlazo ne mɔ maa yɛ nwo kyele yɛ. Noko saa yɛgyakyi kɛ yɛbava Baebolo ngyinlazo yɛali gyima wɔ yɛ ɛbɛlabɔlɛ nu a, yɛbayɛ kɛ sogyanli mɔɔ gyi konle nloa na ɔte nganeɛ kɛ ye akɛnrazo enyinlike ne yɛ ɛnlomboɛ somaa la ati yeye la. Saa ɔyɛ zɔ a ɛnee yeyɛ ngoaseade! Bɛdabɛ mɔɔ bɛkulo Gyihova la ɛmbu ye mɛla ne mɔ kɛ ‘ɔle adesoa,’ emomu bɛbu ye kɛ ɔdie ngoane.​—1 Dwɔn 5:3.

8. Mgbɔlaboa mɔɔ yɛwula yɛava yɛaziezie yɛ nwo yɛabɔ edwɛkpa ne nolo la kile duzu?

⁸ Eza Pɔɔlo maanle yɛ anwosesebɛ kɛ yɛwula mgbɔlaboa yɛva yɛziezie yɛ nwo yɛbɔ anzodwolɛ edwɛkpa ne nolo. Ɛhye kile kɛ dahuu ɔwɔ kɛ yɛsiezie yɛ nwo kɛ yɛbabɔ Belemgbunlililɛ edwɛkpa ne nolo. Saa yɛka Baebolo nu edwɛkɛ ne yɛkile awie mɔ a, ɔmaa yɛdayɛ noko yɛ diedi nu mia. Saa yɛnwu kɛzi Gyihova menli mɔɔ wɔ ewiade amuala la ɛlɛkpondɛ ndenle alua zo abɔ edwɛkpa ne nolo wɔ gyima nu, sukulu nu, ɛleka mɔɔ gyima gyima wɔ, mekɛ mɔɔ bɛlɛdi daselɛ wɔ azua nu, bɛlɛdi gua, mekɛ mɔɔ bɛkakpɔla bɛ mbusuafoɔ mɔɔ bɛnle diedima, menli mɔɔ bɛ nee bɛ bayia yɛɛ mekɛ bɔbɔ mɔɔ ɔwɔ kɛ bɛfea sua nu la a, ɔmaa yɛ anwosesebɛ. Saa yɛmaa ɛzulolɛ ka yɛ na yɛgyakyi edwɛkpa ne nolobɔlɛ a, yɛbayɛ kɛ sogyanli mɔɔ ɔgyi konle nloa na yeye ye  mgbɔlaboa ne la; debie bawɔ ɔ gyakɛ. Ɛhye ati saa bɛteta ye a, ɔnrɛhola ɔ nwo die na ɔbayɛ se kɛ ɔbali sogya kpanyinli ne adehilelɛ zo.

9. Duzu ati a ɔwɔ kɛ yɛfa diedi enyinlike kpole ne a?

⁹ Diedi enyinlike kpole ne gyi ɛkɛ ne maa diedi mɔɔ yɛlɛ ye wɔ Gyihova anu la. Yɛdie yɛdi kɛ ɔbali ye ɛwɔkɛ kɔsɔɔti azo. Zɔhane diedi ne baboa yɛ yeamaa yɛanlua “amumuyɛnli ne ɛda ne mɔ mɔɔ ɛlɛsɔ la amuala.” Duzu ati a ɔwɔ kɛ yɛfa enyinlike kpole ɛhye a? Ɔluakɛ ɔbɔ yɛ nwo bane amaa kpɔkyevolɛma anva bɛ ngilehilelɛ ne ambɛlɛbɛla yɛ, yɛɛ saa agolobɛnwoma ka yɛ diedi ne anwo edwɛkɛ ɛtane a yɛ sa nu ɛnrɛdo. Saa yɛnlɛ diedi a, awie mɔ bɔ mɔdenle kɛ bɛdi yɛ adwenle bɛamaa yɛabu yɛ nye yɛagua Gyihova ngyinlazo ne mɔ azo a, yɛnrɛnyia anwosesebɛ yɛnrɛgyinla ɔ nloa. Noko saa yɛkɔ gyima anzɛɛ sukulu na bɛka kɛ yɛyɛ debie mɔɔ Gyihova kyi la na yɛanyɛ a, ɔmaa yɛ diedi ne anu mia. (1 Pita 3:15) Mekɛ biala mɔɔ yɛbakpo gyima mɔɔ bɛbadua yɛ kakɛ kpalɛ noko ɔnrɛmaa yɛnrɛnyia adenle yɛnrɛzonle Gyihova la, ɛnee yɛ diedi ne ɛlɛbɔ yɛ nwo bane. (Hib. 13:5, 6) Yɛɛ mekɛ biala mɔɔ yɛbagyinla dwazotia nloa na yɛazonle Gyihova la, ɛnee yɛ diedi ne ɛlɛbɔ yɛ nwo bane.​—1 Tɛs. 2:2.

10. Duzu a le ngoanelielɛ bulalɛ kyɛlɛ ne, na duzu ati a ɔwɔ kɛ yɛsoa a?

¹⁰ Ngoanelielɛ bulalɛ kyɛlɛ ne a le anyelazo  mɔɔ Gyihova ɛmaa yɛnyia la​—anyelazo mɔɔ yɛlɛ kɛ ɔbalie yɛ yeavi ewule nu na yeayila bɛdabɛ mɔɔ bɛyɛ ye ɛhulolɛdeɛ la kɔsɔɔti. (1 Tɛs. 5:8; 1 Tim. 4:10; Tae. 1:1, 2) Kɛ mɔɔ bulalɛ kyɛlɛ bɔ sogyanli ati nwo bane la, zɔhane ala a ngoanelielɛ nwo anyelazo ne bɔ yɛ nzuzulɛ nwo bane a. Adenle boni azo? Zɔhane anyelazo ne maa yɛfa yɛ adwenle yɛsie Nyamenle ɛwɔkɛ ne mɔ azo yɛɛ ɔboa yɛ amaa ngyegyelɛ anvo yɛ nwo zo. Kɛzi yɛsoa kyɛlɛ ɛhye ɛ? Saa yɛnyia adwenle mɔɔ Gyihova lɛ ye wɔ ninyɛne nwo la bie a, ɛnee yɛzoa yɛ kyɛlɛ ne. Kɛ neazo la, yɛnva yɛ nwo yɛndo anwonyia mɔɔ sɛkye la azo, emomu yɛfa yɛto Nyamenle anwo zo.​—Edw. 26:2; 104:34; 1 Tim. 6:17.

11. Duzu a le sunsum ne konle dadeɛ ne, na duzu ati a ɔwɔ kɛ yɛfa yɛdi gyima a?

¹¹ Sunsum ne konle dadeɛ ne a le Nyamenle Edwɛkɛ Baebolo ne. Dadeɛ zɔhane lɛ tumi kpa adalɛ kɔsɔɔti anwo ɛdanlɛ na ɔdie menli ɔfi adalɛ ngilehilelɛ nee subane ɛtane mɔɔ ɛyɛ bɛ ngɛkɛlɛ la anu. (2 Kɔl. 10:4, 5; 2 Tim. 3:16, 17; Hib. 4:12) Yɛdua bɛtianwo debiezukoalɛ ɛyɛlɛ nee ndetelɛ mɔɔ yɛnyia yɛfi Gyihova ahyehyɛdeɛ ne anu la azo yɛsukoa kɛzi yɛbava konle dadeɛ ɛhye yɛali gyima kpalɛ la. (2 Tim. 2:15) Saa ɛye konle tɛladeɛ ne mɔɔ Gyihova ɛva ɛmaa yɛ la ɛsie ahane a, eza yemaa yɛ debie bieko mɔɔ bɔ yɛ nwo bane kpole a. Duzu debie ɔ?

12. Duzu bieko a yɛhyia nwo a, na duzu ati ɔ?

¹² Sogyanli mɔɔ ze konle nye zo kpalɛ la ze kɛ ɔ ngomekye ɔnrɛhola ɔ nee sogyama dɔɔnwo ɛnrɛho na ɔnrɛli bɛ nwo zo konim; kyesɛ ɔ gɔnwo mɔ sogyama boa ye. Zɔhane ala a yɛ ngomekye yɛnrɛhola yɛnrɛli konim wɔ konle mɔɔ yɛ nee Seetan nee ɔ sa zo mɔ ɛlɛko la anu a; kyesɛ yɛ mediema boa yɛ. Gyihova ɛva “mediema muala” mɔɔ wɔ ewiade la ɛmaa yɛ amaa bɛaboa yɛ.​—1 Pita 2:17.

13. Kɛ mɔɔ Hibuluma 10:24, 25 kile la, kɛzi yɛ debiezukoalɛ ne mɔ boa yɛ ɛ?

¹³ Adenle ko mɔɔ yɛdua zo yɛnyia moalɛ la a le yɛ debiezukoalɛ ne mɔ mɔɔ yɛkɔ la. (Kenga Hibuluma 10:24, 25.) Ɔyɛ a yɛ muala yɛ sa nu to, saa ɔba ye zɔ a, yɛ debiezukoalɛ ne mɔ bahola amaa yɛ anwosesebɛ. Mualɛ mɔɔ ka ahonle mɔɔ yɛ mediema maa wɔ debiezukoalɛ bo la maa yɛ anwosesebɛ. Ɛdendɛlɛ nee yɛkile mɔɔ gyi Baebolo ne azo mɔɔ yɛ mediema maa yɛ sa ka ye wɔ debiezukoalɛ bo la maa yɛ anwosesebɛ maa yɛkɔ zo yɛsonle Gyihova. Yɛɛ adawu mɔɔ yɛbɔ kolaa na yɛabɔ debiezukoalɛ bo anzɛɛ mekɛ mɔɔ yɛkpɔne la maa yɛ anwosesebɛ. (1 Tɛs. 5:14) Bieko, yɛ debiezukoalɛ ne mɔ maa yɛnyia nwolɛ adenle yɛboa awie mɔ na ɛhye maa yɛ nye die. (Gyi. 20:35; Wlo. 1:11, 12) Eza yɛ debiezukoalɛ ne mɔ boa yɛ wɔ ndenle gyɛne zo. Saa yɛbaha a, bɛboa yɛ bɛmaa yɛnwu yɛ konle ne anye zo kpalɛ, mɔɔ yemɔ a le kɛ ɔmaa yɛnwu yɛ edwɛkɛhanlɛ nee ngilehilelɛ gyima ne anye zo kpalɛ. Kɛ neazo la, bɛmaa yɛnwu kɛzi yɛfa Ninyɛne Titili Mɔɔ Yɛfa Yɛkilehile la yɛdi gyima kpalɛ la. Ɔti siezie ɛ nwo kpalɛ na wɔahɔ debiezukoalɛ ne mɔ. Saa ɛwɔ debiezukoalɛ bo a, tie mɔɔ bɛka la kpalɛ. Bɛkpɔne debiezukoalɛ a, fa mɔɔ bɛhilehilele wɔ ɛkɛ ne la di gyima. Saa ɛyɛ ninyɛne ɛhye mɔ a, ɛbayɛ “Kelaese Gyisɛse sogyanli kpalɛ.”​—2 Tim. 2:3.

14. Moalɛ boni bieko a yɛlɛ a?

¹⁴ Eza anwumabɔvolɛma dɔɔnwo mɔɔ lɛ tumi la gyi yɛ nzi. Wɔmɔ nea mɔɔ anwumabɔvolɛ kokye kola yɛ la! (Aye. 37:36) Akee nea mɔɔ anwumabɔvolɛ ɛlɔne mɔɔ lɛ tumi la bahola ayɛ la. Sonla anzɛɛ sunsum ɛtane biala ɛnrɛhola ɛnrɛli Gyihova anwumabɔvolɛma mɔɔ lɛ tumi la anwo zo konim. Gyihova le  tumivolɛ bedevinli, ɔti saa ɔ nee yɛ lua a, dahuu yɛ nwo bayɛ se adɛla menli mɔɔ dwazo tia yɛ la, ɔnva nwo kɛzi bɛ dodo de la. (Ndɛ. 6:16) Ɛhye le nɔhalɛ bɔkɔɔ! Yemɔti saa awie mɔɔ ɛ nee ye yɛ gyima, ɛ nee ye kɔ sukulu, anzɛɛ wɔ busuanli bie mɔɔ ɛnle diedinli la ka edwɛkɛ anzɛɛ yɛ debie mɔɔ ɔbamaa ɛ sa nu ado a, kakye edwɛkɛ ɛhye. Tɛ ɛ ngomekye a ɛgyi konle ɛhye anloa a. Gyihova a ɛlɛkile wɔ adenle a.

15. Kɛ mɔɔ Ayezaya 54:15, 17 kile la, duzu ati a bɛnrɛhola bɛnrɛmaa Nyamenle menli ɛnrɛha bɛ nloa ɛnrɛdo nu ɛlɛ a?

¹⁵ Ewiade ne mɔɔ Seetan nea zolɛ la lɛ ninyɛne dɔɔnwo mɔɔ ɔti ɔkpɔ yɛ a. Yɛngyinla afoa biala wɔ maanyɛlɛ nu yɛɛ yɛngɔ konle. Yɛmaa bɛnwu Nyamenle duma, yɛbɔ ye nolo kɛ ye Belemgbunlililɛ ne ala a bava anzodwolɛ ara a, yɛɛ yɛfa ye tenlene ngyinlazo ne mɔ yɛbɔ yɛ ɛbɛla. Yɛmaa menli nwu kɛ, ahenle mɔɔ nea ewiade ne azo la le adalɛ kpole yɛɛ ɔle kodiawu. (Dwɔn 8:44) Yɛɛ yɛbɔ ye nolo kɛ ɔnrɛhyɛ bɛbazɛkye Seetan ewiade ne. Noko Seetan nee ɔ sa zo ne mɔ ɛnrɛhola ɛnrɛmaa yɛnrɛha yɛ nloa yɛnrɛdo nu ɛlɛ. Emomu, yɛbahɔ zo yɛayɛ biala mɔɔ yɛbahola la yɛaye Gyihova ayɛlɛ! Ɔnva nwo kɛ Seetan lɛ tumi la, ɔtɛkolale ɔtɛsile Belemgbunlililɛ edwɛkɛ ne mɔɔ yɛbɔ ye nolo yɛahile menli wɔ ewiade amuala la adenle. Kɛmɔ Gyihova bɔ yɛ nwo bane la ati a yɛkola yɛyɛ zɔ a.​—Kenga Ayezaya 54:15, 17.

16. Kɛzi Gyihova balie ye menli wɔ anwongyelelɛ kpole ne anu ɛ?

¹⁶ Duzu a bazi kenle bie a? Wɔ anwongyelelɛ kpole ne anu, Gyihova balua ndenle nwiɔ mɔɔ yɛ nwanwane la azo alie yɛ. Mɔɔ limoa, ɔbalie ye nɔhalɛ azonvolɛ wɔ mekɛ mɔɔ ɔbamaa azɛlɛ ye azo arelemgbunli azɛkye Babelɔn Kpole ne, mɔɔ le adalɛ ɛzonlenlɛ kɔsɔɔti la. (Yek. 17:16-18; 18:2, 4) Mɔɔ tɔ zo nwiɔ, ɔbalie ye menli wɔ mekɛ mɔɔ ɔlɛsɛkye Seetan ewiade ne mɔɔ ɛha la wɔ Amagɛdɔn la.​—Yek. 7:9, 10; 16:14, 16.

17. Saa yɛkɔ zo yɛbikye Gyihova a, duzu nvasoɛ a yɛbanyia a?

¹⁷ Saa yɛbikye Gyihova a, Seetan ɛnrɛhola ɛnrɛyɛ yɛ debie mɔɔ bagyegye yɛ dahuu a. Nɔhalɛ nu, ɔdaye a bɛbazɛkye ye bɔkɔɔ a. (Wlo. 16:20) Ɔti wula konle tɛladeɛ ne amuala​—mmaye! Mmabɔ mɔdenle kɛ ɛ ngomekye ɛko konle ne. Boa ɛ mediema. Na di Gyihova adehilelɛ zo. Saa ɛyɛ zɔ a, ɛbahola wɔanyia anwodozo kɛ, wɔ anwuma Selɛ ne mɔɔ lɛ ɛlɔlɛ la bamaa wɔ anwosesebɛ na yeabɔ ɛ nwo bane.​—Aye. 41:10.