1-2. Kilehile deɛmɔti Baebolo nu ngyinlazo bie mɔ anwo bakyia yɛ kpalɛ wɔ mekɛ mɔɔ yɛ tɛnlabelɛ ne bahakyi la anu.

 WƆ BƐ atɔfolɛlielɛ kenle ne, atɔfolɛ nrenyia ne nee ɔ ye mɔɔ bɛ nwo ɛyɛ fɛ la tie agyalɛ nwo ɛdendɛlɛ ne mɔɔ gyi Baebolo ne azo mɔɔ bɛlɛmaa la kpalɛ. Baebolo nu ngyinlazo mɔɔ bɛlɛkilehile nu la ɛnle bɛ debie fofolɛ. Noko ɔvi mekɛ zɔhane mɔɔ kɔ la, edwɛkɛ zɔhane anwo bahyia bɛ kpalɛ. Duzu ati ɔ? Ɔluakɛ bɛbava bɛali gyima kɛ agyalɛma.

² Zɔhane ala a ɔde wɔ mekɛ mɔɔ Kilisiene agyalɛma barayɛ awovolɛ la. Wɔ ɛvolɛ dɔɔnwo anu, bie a bɛdie ɛdendɛlɛ dɔɔnwo mɔɔ fale ngakula ɛtetelɛ nwo la. Noko bɔ zo mɔɔ ngyinlazo zɔhane mɔ anwo bahyia bɛ kpalɛ a. Bɛdabɛ mumua ne bɛbawo bɛ ra na bɛatete ye. Ɔle ɛzonlelilɛ kpole kpalɛ! Nɔhalɛ nu, saa yɛ tɛnlabelɛ ne kakyi a, yɛɛ akee Baebolo ne anu ngyinlazo bie mɔɔ yɛze ye kpalɛ la anwo bakyia yɛ kpalɛ a. Ɛhye le debie ko mɔɔ ɔti Gyihova azonvolɛ kenga Ngɛlɛlera ne na bɛdwenledwenle nwolɛ bɛ “ngoane mekɛ kɔsɔɔti” anu kɛ mɔɔ bɛhanle bɛhilele Yizilayɛ arelemgbunli kɔsɔɔti kɛ bɛyɛ la a.​—Dit. 17:19.

3. Duzu a yɛbazuzu nwo wɔ edwɛkɛ ɛhye anu a?

³ Awovolɛ, bɛnyia nwolɛ adenle kpole mɔɔ Kilisienenli bie bahola anyia la anu ko, yemɔ a le kɛ bɛbahilehile bɛ mra Gyihova anwo debie. Noko tɛ mɔɔ bɛkulo kɛ bɛyɛ la ala a le kɛ bɛbaha Nyamenle anwo edwɛkɛ bɛahile bɛ. Bɛkulo kɛ bɛboa bɛ bɛmaa bɛnyia ɔ nwo ɛlɔlɛ kpole. Duzu a bɛbahola bɛayɛ  amaa bɛaboa bɛ mra bɛamaa bɛanyia Gyihova anwo ɛlɔlɛ a? Wɔ edwɛkɛ ɛhye anu, yɛbazuzu Baebolo nu ngyinlazo nna mɔɔ baboa bɛ kɛ awovolɛ la anwo. (2 Tim. 3:16) Eza yɛbanwu kɛzi Baebolo nu folɛdulɛ ɛboa Kilisienema bie mɔ mɔɔ bɛvale bɛlile gyima la.

4. Ngyinlazo ko mɔɔ baboa awovolɛ yeamaa bɛava Gyihova anwo ɛlɔlɛ bɛawula bɛ mra ahonle nu la a le boni? (Gyemise 1:5)

⁴ Ngyinlazo 1: Kpondɛ adehilelɛ fi Gyihova ɛkɛ. Sɛlɛ Gyihova kɛ ɔmaa ɛnyia nrɛlɛbɛ mɔɔ ɛhyia nwo amaa wɔaboa ɛ mra ne mɔ wɔamaa bɛanyia ɔ nwo ɛlɔlɛ la. (Kenga Gyemise 1:5.) Ɔdaye a ɔle Awie mɔɔ fɛta bɔkɔɔ kɛ ɔtu yɛ folɛ a. Deɛmɔti ɔle zɔ la zonle. Maa yɛzuzu nwiɔ anwo. Mɔɔ limoa, Gyihova le awovolɛ mɔɔ lɛ anwubielɛ tɛla awie biala. (Edw. 36:9) Mɔɔ tɔ zo nwiɔ, ye folɛdulɛ mɔɔ nrɛlɛbɛ wɔ nu la boa yɛ dahuu.​—Aye. 48:17.

5. (a) Duzu a Gyihova ahyehyɛdeɛ ne yɛ kɛ bɛfa bɛaboa awovolɛ a? (b) Kɛ mɔɔ yɛnwunle ye wɔ vidio ne anu la, duzu a ɛsukoa ɛfi kɛzi Adiema Amorim nee ɔ ye tetele bɛ mra ne mɔ la anu a?

⁵ Gyihova dua ye Edwɛkɛ nee ye ahyehyɛdeɛ ne azo ɔmaa bɛnyia sunsum nu aleɛ dɔɔnwo mɔɔ baboa bɛ yeamaa bɛatete bɛ mra yeamaa bɛahulo Gyihova a. (Mat. 24:45) Kɛ neazo la, ɛbahola wɔanyia folɛdulɛ dɔɔnwo mɔɔ baboa la wɔ edwɛkɛ “Help for the Family” (Moalɛ Maa Abusua) mɔɔ ɛnee ɔta ɔba Awake! ne anu wɔ ɛvolɛ dɔɔnwo anu na kɛkala ɔwɔ jw.org azo la anu. Eza edwɛkɛbizebizalɛ nee yekile nwo vidio dɔɔnwo mɔɔ wɔ jw.org azo la baboa awovolɛ yeamaa bɛava Gyihova folɛdulɛ bɛali gyima wɔ mekɛ mɔɔ bɛlɛtete bɛ mra la. *​—Mrɛ. 2:4-6.

6. Kɛzi selɛ bie te nganeɛ wɔ adehilelɛ mɔɔ ɔ nee ɔ ye nyia fi Gyihova ahyehyɛdeɛ ne ɛkɛ la anwo ɛ?

⁶ Awovolɛ dɔɔnwo ɛha kɛzi bɛ nye sɔ moalɛ mɔɔ Gyihova ɛlua ye ahyehyɛdeɛ ne azo ɛva ɛmaa bɛ la anwo edwɛkɛ. Selɛ bie mɔɔ bɛfɛlɛ ye Joe la hanle kɛ: “Ngakula nsa mɔɔ yɛtete bɛ wɔ nɔhalɛ ne anu la ɛnle gyima ekyi. Me nee me ye sɛlɛ Gyihova dahuu kɛ ɔboa yɛ. Na saa yɛlɛyia ngyegyelɛ bie a, yɛnwu ye kɛ edwɛkɛ anzɛɛ vidio bie mɔɔ ɔbara la le ye mekɛ nu ɛdeɛ mɔɔ ɔboa yɛ ɔmaa yɛgyinla  ngyegyelɛ ne anloa a. Yɛfa yɛ nwo yɛto Gyihova adehilelɛ zo dahuu.” Joe nee ɔ ye ɛnwu kɛ edwɛkɛ nee vidio ɛhye mɔ ɛlɛboa bɛ mra ne mɔ yeamaa bɛabikye Gyihova.

7. Duzu ati a ɔhyia kɛ awovolɛ nea neazo mɔɔ bɛyɛ la boɛ a? (Wulomuma 2:21)

⁷ Ngyinlazo 2: Fa wɔ neazo kilehile. Ngakula nea mɔɔ bɛ awovolɛ yɛ la kpalɛ na bɛta bɛsukoa bɛ. Nɔhalɛ nu, awovolɛ biala ɛnli munli. (Wlo. 3:23) Noko ɔwɔ kɛ awovolɛ mɔɔ bɛ nye la ɛkɛ la yɛ biala mɔɔ bɛbahola la yɛ neazo kpalɛ maa bɛ mra. (Kenga Wulomuma 2:21.) Selɛ ko hanle ngakula nwo edwɛkɛ kɛ: “Bɛle kɛ emiane la, bɛfa debie biala.” Ɔdoale zo kɛ: “Saa mɔɔ yɛkilehile bɛ la nee mɔɔ yɛyɛ la ɛnle ko a, bɛka bɛkile yɛ.” Ɔti saa yɛkpondɛ kɛ yɛ mra ne mɔ kulo Gyihova a, ɔwɔ kɛ ɛlɔlɛ mɔɔ yɛlɛ yɛmaa ye la yɛ kpole na ɔda ali.

8-9. Duzu a ɛsukoa ɛfi Andrew nee Emma edwɛkɛ ne anu a?

⁸ Awovolɛ bahola alua ndenle dɔɔnwo azo ahilehile bɛ mra bɛamaa bɛahulo Gyihova. Adiema kpavolɛ bie mɔɔ bɛfɛlɛ ye Andrew mɔɔ yeli ɛvolɛ 17 la hanle kɛ: “Dahuu me awovolɛ si nvasoɛ mɔɔ wɔ asɔneyɛlɛ zo la azo. Nɔsolɛ biala, me papa nee me yɛ asɔne, saa bɔbɔ menlimoa meyɛ asɔne a. Dahuu yɛ awovolɛ kakye yɛ kɛ: ‘Bɛbahola bɛ nee Gyihova adendɛ fane dodo biala mɔɔ bɛkulo la.’ Ɔlua ɛhye ati, asɔneyɛlɛ ɛrayɛ debie mɔɔ hyia me kpalɛ a na kɛkala ɔnyɛ se kɛ mebayɛ asɔne, yɛɛ menwu Gyihova kɛ ɔle Selɛ mɔɔ lɛ ɛlɔlɛ.” Awovolɛ, bɛhakye ye dahuu kɛ ɛlɔlɛ mɔɔ bɛdabɛ mumua ne bɛlɛ bɛmaa Gyihova la baha bɛ mra yeamaa bɛahulo ye.

⁹ Eza suzu adiema raalɛ Emma neazo ne anwo. Mɔɔ ye papa gyakyile bɛ ɛkɛ ne hɔle la, ɔgyakyile kakɛ kpole bie mɔɔ ɛnee ɔwɔ kɛ ye mame tua a. Emma hanle kɛ: “Ɔdwu mekɛ ne bie a me mame anwo kyele ye kpalɛ wɔ ezukoa afoa nu, noko dahuu ɔka kɛzi Gyihova nea ye azonvolɛ na ɔmaa bɛ sa ka mɔɔ bɛhyia nwo la anwo edwɛkɛ ɔkile yɛ. Na kɛzi ɔbɔle ye ɛbɛla la maanle menwunle kɛ amgba ɔdie mɔɔ ɔka la ɔdi. Me mame fa mɔɔ ɔkilehile awie mɔ la bɔ ye ɛbɛla.” Duzu a yɛsukoa yɛfi nu a? Awovolɛ bahola ava bɛ neazo ahilehile bɛ mra wɔ mekɛ mɔ ninyɛne nu yɛ se bɔbɔ la.​—Gal. 6:9.

10. Nwolɛ adenle ngakyile boni a Yizilayɛ awovolɛ dɔɔnwo nyianle mɔɔ ɛnee bɛbahola bɛalua zo bɛ nee bɛ mra adendɛ a? (Ditilɔnomi 6:6, 7)

¹⁰ Ngyinlazo 3: Ɛ nee ɛ mra ne mɔ ɛdendɛ dahuu. Gyihova hanle hilele tete Yizilayɛ awovolɛ kɛ bɛhilehile bɛ mra ne mɔ ɔ nwo debie dahuu. (Kenga Ditilɔnomi 6:6, 7.) Ɛnee awovolɛ ɛhye mɔ lɛ nwolɛ adenle dɔɔnwo wɔ kenle ne anu amuala kɛ bɛ nee bɛ mra ne mɔ bɛadendɛ na bɛava Gyihova anwo ɛlɔlɛ bɛawula bɛ ahonle nu. Kɛ neazo la, bie a Yizilayɛ kakula nrenyia bie bava dɔnehwele dɔɔnwo aboa ye papa yeamaa bɛaluolua ninyɛne wɔ bɛ ɛya nu anzɛɛ bɛahɔde ma bɛara sua nu. Bie a ɔ diema raalɛ bɛava mekɛ dɔɔnwo aboa ye mame wɔ sua nu wɔ ninyɛne ɛkpomgbalɛ, ninyɛne ɛnwonlɛ yɛɛ sua nu gyima ngakyile ɛyɛlɛ nu. Mekɛ mɔɔ awovolɛ ne mɔ nee bɛ mra ɛlɛbɔ nu ayɛ gyima la, bɛbahola bɛabɔ ninyɛne dɔɔnwo mɔɔ hyia la anwo adawu. Kɛ neazo la, bɛbahola bɛaha Gyihova kpalɛyɛlɛ ne nee kɛzi ɔlɛboa bɛ abusua ne la anwo edwɛkɛ.

11. Nwolɛ adenle ko mɔɔ Kilisiene awovolɛ lɛ kɛ bɛbalua zo bɛ nee bɛ mra adendɛ la a le boni?

¹¹ Mekɛ ɛhakyi. Wɔ maanle dɔɔnwo anu, awovolɛ nee bɛ mra ɛnnyia mekɛ ɛmmaa bɛ nwo wɔ alehyenlɛ ne anu. Mɔɔ awovolɛ ne mɔ ɛhɔ gyima la, ɛnee ngakula ne mɔ noko ɛhɔ  sukulu. Ɛhye ati ɔwɔ kɛ awovolɛ ne mɔ kpondɛ mekɛ kpalɛ mɔɔ bɛbahola bɛ nee bɛ mra ne mɔ abɔ adawu a. (Ɛfɛ. 5:15, 16; Fel. 1:10) Abusua ɛzonlenlɛ mekɛ ne le nwolɛ adenle ɛhye mɔ ko. Adiema kpavolɛ bie mɔɔ bɛfɛlɛ ye Alexander la hanle kɛ: “Me papa yɛ ngyehyɛleɛ maa abusua ɛzonlenlɛ ne dahuu, na ɔmmaa debie biala ɛnzɛkye mekɛ ɛhye mɔɔ yɛnyia yɛmaa yɛ nwo la. Saa yɛsukoa debie yɛwie a, akee yɛbɔ adawu.”

12. Saa bɛlɛyɛ abusua ɛzonlenlɛ ne a, duzu a ɔwɔ kɛ abusua tile ne kakye a?

¹² Saa ɛle abusua tile a, duzu a ɛbahola wɔayɛ amaa ɛ mra ne mɔ anye alie abusua ɛzonlenlɛ nwo a? Duzu ati a ɛ nee ɛ mra ne mɔ ɛmbɔ nu ɛnzukoa yɛ buluku fofolɛ kɛnlɛma ɛhye, Nyia Anyelielɛ Dahuu! ne a? Buluku ɛhye maa bɛkola bɛbɔ adawu kpalɛ. Bɛkulo kɛ bɛ mra ne mɔ buke bɛ nu ka kɛzi bɛte nganeɛ nee ninyɛne mɔɔ ɔgyegye bɛ la kile bɛ, ɔti ɔnle kɛ bɛfa abusua ɛzonlenlɛ mekɛ ne bɛtea bɛ anzɛɛ bɛtwi bɛ nyunlu. Yɛɛ saa bɛ mra ne mɔ kile bɛ adwenle na ɔ nee ngyinlazo mɔɔ wɔ Baebolo ne anu la ɛnyia a, ɔnle kɛ bɛfa bɛ nwo ɛya. Emomu, bɛmaa bɛ nye ɛlie kɛ bɛlɛka kɛzi bɛte nganeɛ la bɛahile bɛ la, na bɛmaa bɛ anwosesebɛ kɛ bɛhɔ zo bɛyɛ ye zɔ. Saa bɛnwu kɛzi amgba bɛ mra ne mɔ te nganeɛ la a, yɛɛ bɛbahola bɛaboa bɛ kpalɛ a.

13. Nwolɛ adenle gyɛne boni a awovolɛ lɛ mɔɔ bɛbahola bɛava bɛaboa bɛ mra bɛamaa bɛabikye Gyihova a?

¹³ Awovolɛ, bɛkpondɛ adenle wɔ alehyenlɛ ne anu bɛva bɛboa bɛ mra bɛmaa bɛbikye Gyihova. Ɔnle kɛ bɛkendɛ too na saa bɛlɛsukoa Baebolo ne a bɛahilehile bɛ yɛ ɛlɔlɛ Nyamenle ne anwo debie. Ɛrɛladane bie mɔɔ bɛfɛlɛ ye Lisa la hanle kɛ: “Yɛluale abɔdeɛ zo yɛhilehilele yɛ mra ne mɔ Gyihova anwo debie. Kɛ neazo la, saa yɛ twea ne yɛ debie mɔɔ yɛ yɛ mra ne mɔ ɛzelekɛ la a, yɛka yɛkile bɛ kɛ ɛhye kile kɛ Gyihova le anyelielɛ Nyamenle, na ɔbɔle yɛdayɛ noko mɔɔ yɛ nye die ninyɛne mɔɔ yɛ ɛzelekɛ la anwo a.”

14. Duzu ati a ɔhyia kɛ awovolɛ boa bɛ mra maa bɛfa agɔnwolɛ kpalɛ a? (Mrɛlɛbulɛ 13:20)

¹⁴ Ngyinlazo 4: Boa ɛ mra maa bɛva agɔnwolɛ kpalɛ. Nyamenle Edwɛkɛ ne maa ɔda ali kɛ, yɛ gɔnwo mɔ bahola anyia yɛ nwo zo  tumi kpalɛ anzɛɛ ɛtane. (Kenga Mrɛlɛbulɛ 13:20.) Awovolɛ, asoo bɛze bɛ mra ne mɔ agɔnwo mɔ? Bɛyia bɛ ɛlɛ na bɛ nee bɛ ɛbɔ nu ɛyɛ ninyɛne ɔ? Kɛ ɔkɛyɛ na wɔaboa ɛ mra wɔamaa bɛava menli mɔɔ bɛkulo Gyihova la agɔnwolɛ ɛ? (1 Kɔl. 15:33) Bɛbahola bɛado bɛ sa bɛavɛlɛ menli mɔɔ bɛlɛbɔ mɔdenle wɔ sunsum nu la bɛamaa bɛ nee bɛ abusua ne abɔ nu ayɛ ninyɛne amaa bɛaboa bɛ mra bɛamaa bɛakpa agɔnwolɛ kpalɛ.​—Edw. 119:63.

15. Duzu a awovolɛ bahola ayɛ aboa bɛ mra bɛamaa bɛanyia agɔnwolɛma kpalɛ a?

¹⁵ Suzu selɛ bie mɔɔ bɛfɛlɛ ye Tony la anwubielɛ ne anwo. Ɔhilehilele mɔɔ ɔ nee ɔ ye yɛle boale bɛ mra ne mɔ maanle bɛvale agɔnwolɛ kpalɛ la anu kɛ: “Wɔ ɛvolɛ dɔɔnwo anu, me nee me ye dole ɛsalɛ vɛlɛle mediema mɔɔ asolo bɛ ɛvolɛ yɛɛ ɛleka mɔɔ bɛvi la yɛmaanle bɛrale yɛ sua nu. Bɛ nee yɛ bɔ nu di aleɛ yɛɛ bɛboka yɛ nwo bɛmaa yɛyɛ abusua ɛzonlenlɛ. Ɛhye le adenle kɛnlɛma mɔɔ yɛdua zo yɛnwu bɛdabɛ mɔɔ bɛkulo Gyihova na bɛfa anyelielɛ bɛsonle ye la. Ɛnee yɛmaa maangyebakyi zo neavolɛma, edwɛkpatɛlɛvolɛma nee awie mɔ gyɛne bada yɛ sua nu. Bɛ anwubielɛ ngakyile, bɛ mɔdenlebɔlɛ yɛɛ bɛ tunwomaa sunsum ne ɛnyia yɛ mra ne mɔ anwo zo tumi kpalɛ na yeboa bɛ yemaa bɛbikye Gyihova.” Awovolɛ, bɛbɔ kpɔkɛ kɛ bɛbaboa bɛ mra bɛamaa bɛava agɔnwolɛma kpalɛ.

16. Saa kakula bie ka kɛ ɔngulo kɛ ɔsonle Gyihova a, duzu a bɛbayɛ a?

¹⁶ Saa bɛbɔ bɛ nwo mɔdenle biala na bɛ mra ne mɔ anu ko ka kɛ ɔngulo kɛ ɔsonle Gyihova a, duzu a bɛbayɛ a? Mmamaa bɛnyia adwenle kɛ bɛanyɛ bɛ gyima kpalɛ kɛ awovolɛ. Gyihova ɛmaa yɛ muala, mɔɔ ɛ ra ne boka nwo la, adenle mɔɔ yɛkola yɛkpa mɔɔ yɛkulo, yɛkola yɛkpa kɛ yɛbazonle Nyamenle anzɛɛ yɛnrɛzonle ye. Saa ɛ ra ne si kpɔkɛ kɛ ɔnrɛzonle Gyihova a, mmamaa ɛ sa nu to na nyia anyelazo kɛ kenle ko dedee ɔbazia yeara. Kakye ralɛ nrenyia ɛkobɔfo ne anwo ndonwo ne. (Luku 15:11-19, 22-24) Zɔhane kpavolɛ ne yɛle ninyɛndane dɔɔnwo, noko nzinlii ɔziale ɔrale sua nu. Bie mɔ baha kɛ, “Yemɔ ɔle ndonwo ala. Asoo me ra ne bahola azia arazonle Gyihova ɔ?” Ɛhɛe, ɔbahola yeara! Nɔhalɛ nu,  ɛhye bie a dole kpavolɛ bie mɔɔ bɛfɛlɛ ye Elie la a.

17. Kɛzi Elie anwubielɛ ne maa wɔ anwosesebɛ ɛ?

¹⁷ Elie hanle ye wɔ ye awovolɛ anwo kɛ: “Bɛyɛle biala mɔɔ bɛbahola la bɛvale Gyihova nee ye Edwɛkɛ Baebolo ne anwo ɛlɔlɛ bɛwulale me nu. Noko mɔɔ menyɛle kakula kpavolɛ la, mendele atua.” Elie bɔle ɔ bo bɔle ɛbɛla nwiɔ nwiɔ, na yeanlie mɔdenle mɔɔ ye awovolɛ bɔle kɛ bɛboa ye wɔ sunsum nu la yeando nu. Ɔvile sua nu na ɔvale ɔ nwo ɔwulale ɛbɛlatane nu. Noko yemɔ bɔbɔ, ɔdwu mekɛ ne bie a ɔ nee ɔ gɔnwo ko suzu Baebolo ne anu edwɛkɛ bie anwo. Elie hanle kɛ: “Mekɛ mɔɔ melɛka Gyihova anwo edwɛkɛ dɔɔnwo meahile me gɔnwo ne la, ɛnee ɔlɛmaa meadwenle Gyihova anwo dɔɔnwo. Ngyikyingyikyi, Baebolo nu nɔhalɛ ne mɔɔ me awovolɛ bɔle mɔdenle luale ye wɔ me ahonle nu mɔɔ yeansosɔ ndinli la bɔle ɔ bo kɛ ɔfifi.” Nzinlii, Elie ziale rale nɔhalɛ ne anu. * Pɛ kɛzi ye awovolɛ anye liele kɛ bɛbɔle mɔdenle kɛ bɛkilehile ye wɔ ye ngakula nu bɛamaa yeahulo Gyihova la anwo nvoninli nea!​—2 Tim. 3:14, 15.

18. Kɛzi ɛte nganeɛ wɔ awovolɛ mɔɔ bɔ mɔdenle kilehile bɛ mra maa bɛkulo Gyihova la anwo ɛ?

¹⁸ Awovolɛ, bɛmaa bɛ nwolɛ adenle kɛnlɛma kɛ bɛtete awolɛndoazo fofolɛ bɛmaa bɛrazonle Gyihova. (Edw. 78:4-6) Ɛhye ɛnle gyima ekyi na yɛkanvo bɛ kpalɛ wɔ mɔdenle mɔɔ bɛbɔ bɛnea bɛ mra ne mɔ la anwo! Saa bɛkɔ zo bɛyɛ biala mɔɔ bɛbahola la bɛboa bɛ mra bɛmaa bɛkulo Gyihova na bɛfa ye folɛdulɛ nee ye ngilehilelɛ bɛtete bɛ a, bɛbahola bɛanyia anwodozo kɛ yɛ anwuma Selɛ ne mɔɔ lɛ ɛlɔlɛ la anye balie mɔɔ bɛyɛ la anwo.​—Ɛfɛ. 6:4.