1, 2. Duzu ati a Gyihova Alasevolɛ bɔ mɔdenle kɛ bɛbanlea adɛladeɛ mɔɔ bɛwula la kpalɛ ɛ? (Nea mɔlebɛbo nvoninli ne.)

WƆ AYIA bie mɔɔ ɛzonlenlɛ nu mgbanyima bie mɔ hɔle la abo, Dutch amaneɛbɔlɛ kɛlata bie bɔle nolo kɛ, bɛ “nuhua dɔɔnwo wulale adɛladeɛ gyɛne biala, titili saa wuluwulu wɔ nu a.” “Noko saa ɛkɔ Gyihova Alasevolɛ nyianu bo a ɔnle zɔ. . . . Mrenyia ne mɔ wula kootu yɛɛ bɛbɔ taye, mraalɛ ne mɔ noko adɛladeɛ ne ɛnle nzinrenzinra somaa yɛɛ ɔle kɛnlɛma.” Nɔhalɛ, bɛta bɛkanvo Gyihova Alasevolɛ ɔluakɛ bɛsiezie bɛ nwo “kɛnlɛma wɔ adenle mɔɔ kile kɛ bɛze deɛ na nyiane wɔ bɛ nye zo la azo; . . . [wɔ] ɛbɛla kpalɛ ɛbɔlɛ mɔɔ fɛta [menli] mɔɔ sonle Nyamenle la” anu. (1 Tem. 2:9, 10) Ɛnee ɛzoanvolɛ Pɔɔlo ɛlɛka mraalɛ nwo edwɛkɛ, noko ngyinlazo mɔɔ wɔ nu la fale Kilisiene mrenyia nwo.

² Kɛ Gyihova menli la, adɛladeɛ mɔɔ fɛta mɔɔ yɛbawula la hyia yɛ kpalɛ, na ɔhyia yɛ Nyamenle ne noko. (Mɔl. 3:21) Mɔɔ Ngɛlɛlera ne ka fale adɛladeɛ nee anwoziezielɛ nwo la maa yɛnwu kɛ Gyihova lɛ ngyinlazo kpalɛ mɔɔ fale adɛladeɛ nwo la maa ye nɔhalɛ azonvolɛ. Ɛhye ati, tɛ adɛladeɛ nee anwoziezielɛ mɔɔ yɛkulo la ala a ɔwɔ kɛ yɛkpa a. Ɔwɔ kɛ yɛkpa mɔɔ ɔbazɔ Tumivolɛ Awulae Gyihova anye la.

3. Duzu a Mɛla mɔɔ Nyamenle vale maanle Yizilayɛma la maa yɛnwu ye wɔ adɛladeɛ nwo a?

 ³ Kɛ neazo la, Nyamenle vale adehilelɛ ngakyile mɔɔ babɔ Yizilayɛma anwo bane avi adenle ɛtane mɔɔ maanle mɔɔ zuozua bɛ dua zo bɔ bɛ ɛbɛla la anwo la maanle bɛ wɔ Mɛla ne anu. Mɛla ne maanle bɛnwunle kɛzi Gyihova te nganeɛ wɔ adɛladeɛ mɔɔ ɔmmaa bɛnnwu ngakyile mɔɔ wɔ nrenyia nee raalɛ avinli la anwo. Noko ɛnɛ, zɔhane ala a menli siezie bɛ nwo a. (Kenga Mɛla ne 22:5.) Mɔɔ Nyamenle ɛha ɛvale adɛladeɛ nwo la maa yɛnwu ye wienyi kɛ ɔ nye ɛnlie adɛladeɛ mɔɔ maa mrenyia sɔho mraalɛ na mraalɛ noko sɔho mrenyia, anzɛɛ ɔmmaa bɛngola bɛnnwu ye saa awie le nrenyia anzɛɛ raalɛ la anwo.

4. Duzu a baboa Kilisienema yeamaa bɛazi kpɔkɛ kpalɛ wɔ bɛ adɛladeɛ ɛwulalɛ nu a?

⁴ Ngyinlazo ngakyile mɔɔ baboa Kilisienema yeamaa bɛazi adɛladeɛ mɔɔ ɔwɔ kɛ bɛwula anwo kpɔkɛ kpalɛ la wɔ Nyamenle Edwɛkɛ ne anu. Ɛhye le zɔ ɔnva nwo ɛleka mɔɔ bɛde, bɛ amaamuo anzɛɛ kɛzi bɛ maanle nu tɛnlabelɛ ne de la. Ɔngyia kɛ bɛkile yɛ kɛ adɛladeɛ ngakyile bie mɔ le kpalɛ anzɛɛ bɛnle kpalɛ. Emomu, yɛmaa Baebolo ngyinlazo boa yɛ ɔmaa yɛkpa mɔɔ yɛkulo la. Bɛmaa yɛzuzu Baebolo ngyinlazo ngakyile mɔɔ saa yɛkpondɛ kɛ yɛsi adɛladeɛ mɔɔ yɛbawula la anwo kpɔkɛ a bɛbaboa yɛ bɛamaa yɛanwu “Nyamenle ɛhulolɛdeɛ kpalɛ ne mɔɔ le kpalɛ, ɔsɔ ɛnyelɛ, na ɔdi munli la” anwo.​—Wlo. 12:1, 2.

5, 6. Tumi boni a ɔwɔ kɛ yɛmaa yɛ adɛladeɛ nyia wɔ awie mɔ anwo zo a?

⁵ Sunsum ne maanle ɛzoanvolɛ Pɔɔlo zile ngyinlazo titili bie mɔɔ wɔ 2 Kɔlentema 6:4 la azo. (Kenga.) Kɛzi yɛsiezie yɛ nwo la ka yɛ nwo edwɛkɛ dɔɔnwo. Menli dɔɔnwo dua mɔɔ bɛ ‘nye’ nwu ye la azo nyia yɛ nwo adwenle ngakyile. (1 Sa. 16:7) Kɛ Nyamenle azonvolɛ la, yɛte ɔ bo kɛ yɛ nwo mɔɔ yɛbaziezie la ɛngile kɛ ɔwɔ kɛ yɛwula adɛladeɛ biala mɔɔ yɛ nye die nwo na ɔbamaa yɛ nwo adɔ yɛ la. Ɔwɔ kɛ yɛmaa Baebolo ngyinlazo mɔɔ yɛnwu ye la maa yɛkoati adɛladeɛ mɔɔ kyekye bɛ, ɔmaa bɛ nwo gua ɛkɛ anzɛɛ ɔmaa menli nyia nla nwo atiakunluwɔzo la ɛwulalɛ. Ɛhye kile kɛ ɔnle kɛ yɛwula adɛladeɛ mɔɔ maa bɛnwu yɛ sonla baka ne ɛleka bie mɔ la. Ɔnle kɛ yɛ anwoziezielɛ maa awie yɛ basaa anzɛɛ ɔto ɔ nye ɛbɔ nu.

⁶ Kɛ Tumivolɛ Awulae Gyihova azonvolɛ la, saa yɛ adɛladeɛ anye te na yɛsiezie yɛ nwo kɛnlɛma a, ɔbamaa bɛabu yɛ. Na bie a ɔbamaa bɛabikye Nyamenle ne mɔɔ yɛsonle ye la. Eza yɛ anwoziezielɛ kɛnlɛma ne baha ahyehyɛdeɛ ne mɔɔ yɛgyi ɔ gyakɛ anu la anwo edwɛkɛ kpalɛ. Ɛhye bamaa awie mɔ adie ngoane edwɛkɛ ne mɔɔ yɛbɔ ye nolo la.

7, 8. Mekɛ titili boni a ɔwɔ kɛ yɛwula adɛladeɛ mɔɔ fɛta a?

⁷ Yɛ nwuanzanwuanza Nyamenle ne, yɛ sunsum nu mediema nee yɛ azɛlɛsinli ne anu amra ati, ɔwɔ kɛ yɛwula adɛladeɛ mɔɔ ɔbamaa bɛadie yɛ edwɛkɛ ne na eza bɛaye Gyihova ayɛlɛ la. (Wlo. 13:8-10) Ɛhye le zɔ, titili saa yɛlɛkɔ debiezukoalɛ anzɛɛ yɛlua daselɛlilɛ nu a. Ɔwɔ kɛ yɛsiezie yɛ nwo wɔ adenle kpalɛ mɔɔ fɛta menli “mɔɔ sonle Nyamenle la” azo. (1 Tem. 2:10) Nɔhalɛ, wɔ ɛleka bie mɔ adɛladeɛ bie mɔ fɛta, noko saa ɛfa ɛkɔ ɛleka gyɛne a ɔnfɛta. Ɛhye ati, ɔwɔ kɛ Gyihova azonvolɛ suzu amaamuo ngakyile nwo amaa bɛangyegye awie mɔ.

⁸ Kenga 1 Kɔlentema 10:31. Saa yɛlɛkɔ nyianu a, ɔwɔ kɛ yɛ adɛladeɛ ne mɔ yɛ  kɛnlɛma na ɔfɛta, ɔnle kɛ ɔsɔho ewiade ne anu ɛdeɛ ngakyile mɔɔ ɛbu la. Saa yɛlɛkɔ hotɛle anzɛɛ yɛlɛfi ɛkɛ, yɛlɛdie yɛ ɛnwomenle kolaa na nyianu ne abɔ ɔ bo anzɛɛ saa bɛkpɔne gyimalilɛ ne a, ɔnle kɛ yɛwula adɛladeɛ gyɛne gyɛne biala. Ɛhye bamaa yɛahola yɛala yɛ nwo ali kɛ yɛle Gyihova Alasevolɛ. Na saa yɛnyia nwolɛ adenle bie noko a, yɛbahola yɛali daselɛ.

9, 10. Duzu ati a ɔwɔ kɛ yɛmaa Felepaema 2:4 boa yɛ wɔ yɛ adɛladeɛ ɛwulalɛ nu a?

⁹ Kenga Felepaema 2:4. Duzu ati a ɔwɔ kɛ Kilisienema suzu kɛzi bɛ adɛladeɛ bahola aha bɛ mediema azonvolɛ la anwo a? Debie ko a le kɛ, Nyamenle menli ɛlɛbɔ mɔdenle ali folɛdulɛ mɔɔ se: ‘Ɔwɔ kɛ bɛku nwonane nu atiakunluwɔzo ne mɔ mɔɔ wɔ bɛ nu, mɔɔ le kɛ adwɔmane, ɛbɛla mgbane mgbane ɛbɔlɛ nee ɛhulolɛ ɛtane’ la azo. (Kɔl. 3:2, 5) Yɛmkpondɛ kɛ ɔyɛ se ɔmaa yɛ mediema diedima kɛ bɛbali zɔhane folɛdulɛ ne azo. Bie a mediema mrenyia nee mraalɛ mɔɔ bɛgyakyi nla nu ɛbɛlatane ɛbɔlɛ la ɛlɛkɔ zo aho atia ninyɛndane ɛhye mɔ. (1 Kɔl. 6:9, 10) Asoo yɛkpondɛ kɛ bɛ nwo kyele bɛ wɔ mɔdenle mɔɔ bɛlɛbɔ la anu ɔ?

¹⁰ Saa yɛwɔ yɛ mediema avinli a, ɔwɔ kɛ yɛ anwoziezielɛ boa maa asafo ne yɛ ɛleka mɔɔ yɛnyia anwobanebɔlɛ wɔ ɛbɛlabɔlɛ nu a. Saa yɛlɛkɔ ayia bie abo anzɛɛ ɛleka gyɛne biala a, ɔwɔ kɛ yɛsiezie yɛ nwo kɛnlɛma. Yɛlɛ adenle yɛwula mɔɔ yɛkulo la. Noko ɔwɔ kɛ yɛ nuhua ko biala wula adɛladeɛ mɔɔ ɔnrɛmaa ɔnrɛyɛ se kɛ awie mɔ bamaa bɛ nwo ade na  bɛava Nyamenle ngyinlazo mɔɔ anwo te la bɛali gyima wɔ bɛ nzuzulɛ, bɛ edwɛkɛ nee bɛ nyɛleɛ nu la. (1 Pita 1:15, 16) Nɔhalɛ ɛlɔlɛ “ɛnyɛ ninyɛne mgbane mgbane, yɛɛ . . . ɔnle angomedi.”​—1 Kɔl. 13:4, 5.

11, 12. Saa yɛlɛdwenle adɛladeɛ mɔɔ yɛbawula la anwo a, duzu a ɔwɔ kɛ yɛsuzu nwo a?

¹¹ Saa Nyamenle azonvolɛ ɛlɛsi adɛladeɛ mɔɔ bɛbawula la anwo kpɔkɛ a, ɔwɔ kɛ bɛkakye kɛ ‘debie biala nee gyima biala lɛ ye mekɛ.’ (Nol. 3:1, 17) Yɛte ɔ bo kɛ maanle nu tɛnlabelɛ nee ɛlobɔ mɔɔ kakyi la bahola aha adɛladeɛ mɔɔ yɛbawula la. Zɔhane ala a tɛnlabelɛ nee gyinlabelɛ mɔɔ awie wɔ nu la noko de a. Noko maanle nu tɛnlabelɛ ɛngakyi Gyihova ngyinlazo ne mɔ.​—Mal. 3:6.

¹² Wɔ maanle mɔɔ wuluwulu wɔ nu la anu, ɔbahola yeayɛ se kɛ yɛbawula adɛladeɛ mɔɔ ɔfɛta na ɔkile kɛ yɛlɛ adwenle kpalɛ la. Ɛhye ati, saa yɛwula adɛladeɛ mɔɔ ɔnkyekye yɛ anzɛɛ ɔmmaa yɛ nwo ɛngua ɛkɛ la a, yɛ mediema ne mɔ anye die nwo kpalɛ. (Dwobu 31:1) Eza saa yɛlɛbia nyevile anzɛɛ azule bɔbɔ a, ɔwɔ kɛ yɛ adɛladeɛ ne fɛta. (Mrɛ. 11:2, 20) Saa ewiade ne anu amra ɛlɛkɔ ahɔbia nyevile anzɛɛ azule na bɛwula adɛladeɛ mɔɔ maa bɛ nwo gua ɛkɛ bɔbɔ a, kɛ Gyihova azonvolɛ la, ɔwɔ kɛ yɛmaa yɛ adɛladeɛ ɛdeɛ ne wula Nyamenle nwuanzanwuanza ne mɔɔ yɛkulo ye la anyunlunyia.

13. Duzu ati a ɔwɔ kɛ yɛmaa folɛdulɛ mɔɔ wɔ 1 Kɔlentema 10:32, 33 la boa yɛ wɔ yɛ adɛladeɛ ɛwulalɛ nu ɛ?

¹³ Ngyinlazo bieko mɔɔ anwo hyia mɔɔ ɔboa yɛ ɔmaa yɛkpa adɛladeɛ mɔɔ fɛta la wɔ ɛkɛ. Yemɔ a le awie mɔ adwenle mɔɔ ɔwɔ kɛ yɛsuzu nwo la​—saa bɛle yɛ mediema azonvolɛ anzɛɛ bɛnle yɛ mediema azonvolɛ bɔbɔ a. (Kenga 1 Kɔlentema 10:32, 33.) Ɔwɔ kɛ yɛmaa yɛ adɛladeɛ mɔɔ yɛnrɛmaa ɔnrɛgyegye awie mɔ la kyia yɛ kpalɛ. Pɔɔlo hɛlɛle kɛ: “Mɔɔ ɔwɔ kɛ yɛyɛ la a le kɛ yɛkɛmaa yɛ gɔnwo mɔ anye kɛlie bɛ nwo wɔ bɛ boɛlilɛ ti, amaa bɛ diedi anyi. Ɔluakɛ Kelaese andwenle ɔdaye mumua ne ɔ nwo.” (Wlo. 15:2, 3) Gyisɛse vale awie mɔ mɔɔ ɔboa bɛ la limoale mɔɔ ɔkulo la anyunlu​—na yemɔ a le Nyamenle ɛhulolɛdeɛ mɔɔ ɔyɛle a. Ɛhye ati, ɔwɔ kɛ yɛgyakyi adɛladeɛ mɔɔ yɛ nye die nwo noko ɔnrɛmaa menli ɛnrɛnyia ɛhulolɛ kɛ bɛbadie yɛ edwɛkɛ ne la ɛwulalɛ.

14. Kɛ ɔkɛyɛ na awovolɛ ahilehile bɛ mra bɛamaa bɛ adɛladeɛ ɛwulalɛ awula Nyamenle anyunlunyia ɛ?

¹⁴ Ɔle Kilisiene awovolɛ gyima kɛ bɛbamaa bɛ mbusua ava Baebolo ngyinlazo abɔ bɛ ɛbɛla. Ɔwɔ kɛ bɛ nee bɛ mra noko bɔ mɔdenle kɛ bɛbawula adɛladeɛ mɔɔ fɛta la amaa Nyamenle anye alie. (Mrɛ. 22:6; 27:11) Ɔwɔ kɛ awovolɛ maa bɛ mra nyia ɛbulɛ kpole maa Nyamenle nwuanzanwuanza ne mɔɔ bɛsonle ye la ɔlua neazo kpalɛ mɔɔ bɛbayɛ na bɛahilehile bɛ kpalɛ la azo. Saa awovolɛ kile bɛ mra ɛleka nee kɛzi bɛbahola bɛanyia adɛladeɛ mɔɔ fɛta la a, ɔle kpalɛ kpole! Ɛhye kile kɛ ɔwɔ kɛ bɛmaa bɛnwu kɛ tɛ adɛladeɛ mɔɔ bɛkulo la ala a hyia a, emomu mɔɔ ɔbamaa bɛahola bɛazonle Gyihova Nyamenle la.

15. Duzu a ɔwɔ kɛ yɛmaa ɔboa yɛ wɔ adɛladeɛ mɔɔ yɛbakpa la anu a?

¹⁵ Nyamenle Edwɛkɛ ne maa yɛ adehilelɛ kpalɛ mɔɔ baboa yɛ yeamaa yɛazi kpɔkɛ kpalɛ mɔɔ bawula Nyamenle anyunlunyia  la. Noko ɔwɔ kɛ yɛkpa mɔɔ yɛ nye die nwo la. Asolo adɛladeɛ mɔɔ awie biala anye die nwo nee ye ezukoa gyinlabelɛ. Noko ɔwɔ kɛ dahuu yɛ adɛladeɛ anye te, ɔyɛ kɛnlɛma, ɔfɛta mekɛ ne na eza bɛdie bɛto nu wɔ ɛleka mɔɔ yɛde la.

16. Duzu ati a ɔwɔ kɛ yɛbɔ mɔdenle kɛ yɛbawula adɛladeɛ mɔɔ fɛta la ɛ?

¹⁶ Nɔhalɛ nu, ɔnla aze kɛ dahuu yɛbazi kpɔkɛ mɔɔ kile kɛ yɛlɛ adwenle kpalɛ, kpɔkɛ mɔɔ nrɛlɛbɛ wɔ nu na ɔkile kɛ yɛzuzule debie biala anwo la. Adɛladeɛ mɔɔ ɛdwu zo la ala a bɛtɔne bɛ wɔ efiade dɔɔnwo anu a, yemɔti kyesɛ ɛbɔ mɔdenle kpalɛ na wɔanyia adɛladeɛ mɔɔ fɛta na ɔnkyekye bɛ la wɔadɔ. Noko saa yɛbɔ mɔdenle yɛkpondɛ adɛladeɛ mɔɔ fɛta na bɛle ngɛnlɛma la a, yɛ mediema ne mɔ anye sɔ ye kpalɛ. Saa yɛbɔ mɔdenle yɛwula adɛladeɛ mɔɔ maa anyunlunyia ka yɛ anwuma Selɛ ne mɔɔ lɛ ɛlɔlɛ la a, ɔbamaa yɛ kunlu adwo yɛ nwo kpalɛ.

17. Ninyɛne boni mɔ zɛhae a bahola amaa adiema bie azie ɔ kɛsa a?

¹⁷ Na mediema mrenyia mɔɔ bɛsie bɛ kɛsa la noko ɛ? Ɛnee ɔle mɛla wɔ Mosisi Mɛla ne anu kɛ mrenyia ɛzie bɛ kɛsa. Noko Kilisienema ɛnle Mosisi Mɛla ne abo yɛɛ ɔnle kyengye kɛ ɔwɔ kɛ bɛdi zo. (Sɛl. 19:27; 21:5; Gal. 3:24, 25) Wɔ ɛleka bie mɔ, saa awie sie ɔ kɛsa na ɔsiezie ye kɛnlɛma a, bɛdie bɛto nu yɛɛ bɛbu zɔhane sonla ne, yemɔti saa adiema bie sie ɔ kɛsa na ɔkɔ daselɛlilɛ bɔbɔ a, bɛtie ye edwɛkɛ. Nɔhalɛ, mgbanyima nee azonvolɛ bie mɔ sie bɛ kɛsa. Noko wɔ ɛleka zɔhane mɔ bɔbɔ, mediema bie mɔ ɛzi kpɔkɛ kɛ bɛnrɛzie bɛ kɛsa. (1 Kɔl. 8:9, 13; 10:32) Wɔ ɛleka bie mɔ, bɛnzie bɛ kɛsa yɛɛ Gyihova Alasevolɛ ɛnlie bɛ kɛsa ɛzielɛ ɛndo nu. Nɔhalɛ nu, saa adiema bie sie ɔ kɛsa a, bie a ɔnrɛmaa ye adɛladeɛ nee ye anwoziezielɛ ɛnrɛwula Nyamenle anyunlunyia yɛɛ ɔbahola yeaha ye ɛzonlelilɛ.​—Wlo. 15:1-3; 1 Tem. 3:2, 7.

18, 19. Kɛzi Maeka 6:8 boa yɛ maa yɛbɔ mɔdenle kɛ yɛbamaa yɛ adɛladeɛ awula Nyamenle anyunlunyia ɛ?

¹⁸ Nea kɛzi ɔyɛ anyelielɛ kɛ Gyihova ɛtɛmaanle yɛ mɛla kyengye wɔ yɛ adɛladeɛ nee yɛ anwoziezielɛ nwo a. Emomu, yemaa yɛ adenle kɛ yɛva nwolɛ adenle mɔɔ yɛlɛ yɛkpa mɔɔ yɛkulo la yɛzi kpɔkɛ mɔɔ nrɛlɛbɛ wɔ nu, ɔlua Ngɛlɛlera ne anu ngyinlazo mɔɔ yɛbava yɛali gyima la azo. Ɔlua ɛhye ati, yɛkpondɛ kɛ yɛkile kɛ wɔ yɛ adɛladeɛ nee yɛ anwoziezielɛ nu yɛ nee ‘Nyamenle ɛlɛdua wɔ mɛlɛbɛnwoaze nu.’​—Maeka 6:8.

¹⁹ Ɔwɔ kɛ yɛbɛlɛ yɛ nwo aze na yɛnwu kɛ yɛmbikye Gyihova wɔ bɔkɔbɔkɔyɛlɛ nee anwodelɛ nu, yemɔti ɔdaye ala a ɔkola ɔkile yɛ adenle kpalɛ a. Eza saa yɛbɛlɛ yɛ nwo aze a, yɛbahile ɛbulɛ yɛamaa awie mɔ nganeɛdelɛ nee bɛ nzuzulɛ. Ɛhye ati, saa yɛmaa yɛ ɛbɛlabɔlɛ nee Nyamenle ngyinlazo ne mɔ mɔɔ kpogya la yia na yɛkile ɛbulɛ yɛmaa awie mɔ nganeɛdelɛ a, ɛnee ‘yɛlɛbɛlɛ yɛ nwo aze yɛ nee Nyamenle alua.’

20. Tumi boni a ɔwɔ kɛ yɛ adɛladeɛ nee yɛ anwoziezielɛ nyia wɔ awie mɔ anwo zo a?

²⁰ Ɔnle kɛ yɛmaa yɛ adɛladeɛ maa awie mɔ nyia adwenle ngakyile, ɔwɔ kɛ bɛnwu yɛ kɛ yɛle Gyihova azonvolɛ. Ɔwɔ kɛ yɛ mediema nee awie mɔ nwu yɛ kɛ amgba yɛle tenlene Nyamenle ne azonvolɛ. Yɛkpondɛ kɛ yɛda ye ngyinlazo ne mɔ mɔɔ kpogya la ali. Yɛkanvo mediema mɔɔ bɛ anwoziezielɛ nee neazo kpalɛ maa menli mɔɔ bɛlɛ ahonle kpalɛ la tie ngoane edwɛkɛ mɔɔ wɔ Baebolo ne anu na ɔmaa Gyihova anye die la. Saa yɛsi yɛ adɛladeɛ ɛwulalɛ nwo kpɔkɛ kpalɛ a, ɔbamaa anyunlunyia aha Ahenle ne mɔɔ yeva ‘wienyi yeheda kɛ ɛdanlɛ’ la.​—Edw. 104:1, 2.