Edwɛkɛ mɔɔ boka nwo la kile kɛ ɛnee ɛzoanvolɛ Pɔɔlo ɛlɛtwe adwenle ahɔ Baebolo ne anu edwɛkɛ, anzɛɛ Nyamenle bodane nwo edwɛkɛ mɔɔ wɔ Baebolo ne anu la azo.

Bɛta bɛtwe adwenle bɛkɔ Hibuluma 4:12 azo wɔ yɛ mbuluku ne mɔ anu bɛkile tumi mɔɔ Baebolo ne lɛ kakyi menli ɛbɛlabɔlɛ la, na ɔfɛta bɔkɔɔ. Noko saa yɛnea edwɛkɛ mɔɔ boka Hibuluma 4:12 anwo la anu bieko a, ɔbaboa yɛ kpalɛ. Ɛnee Pɔɔlo ɛlɛsi Hibulu Kilisienema ne adua kɛ bɛlie bodane mɔɔ Nyamenle lɛ la bɛdo nu. Bɛhɛlɛ bodane ɛhye mɔ anu dɔɔnwo anwo edwɛkɛ wɔ Baebolo ne anu. Pɔɔlo vale Yizilayɛma mɔɔ bɛliele bɛ bɛvile Yigyibiti la yɛle neazo. Ɛnee bɛ nye la “azɛlɛ kpalɛ mɔɔ kye aleɛ” mɔɔ bɛbalie bɛ ɛnwomenle wɔ zo la ade.​—Ade. 3:8; Mɛla 12:9, 10.

Ɛnee ɔle Nyamenle bodane. Noko Yizilayɛma kpunlinle bɛ ahonle yɛɛ bɛannyia diedi, yemɔti bɛ nuhua dɔɔnwo angola angɔnlie bɛ ɛnwomenle wɔ ɛwɔkɛ azɛlɛ ne azo. (Ɛdi. 14:30; Dwɔh. 14:6-10) Noko Pɔɔlo doale zo kɛ, “ɛwɔkɛ tɛbɔ ɛkɛ ne kɛ yɛbahola yɛawolo [Nyamenle] ɛnwomenlelielɛ ne anu.” (Hib. 3:16-19; 4:1; NW) Zɔhane “ɛwɔkɛ” ne boka Nyamenle bodane ne anwo. Yɛbahola yɛagenga na yɛayɛ mɔɔ ɔ nee zɔhane bodane ne yia la kɛ mɔɔ Hibulu Kilisienema ne yɛle la. Mɔɔ Pɔɔlo kile kɛ ɛwɔkɛ ɛhye gyi Ngɛlɛlera ne azo la, ɔhwenle adwenle ɔhɔle Mɔlebɛbo 2:2 yɛɛ Edwɛndolɛ 95:11 foa bie mɔ azo.

Nɔhalɛ, ɔwɔ kɛ yɛmaa yɛ nye die kɛ “ɛwɔkɛ tɛbɔ ɛkɛ ne kɛ yɛbahola yɛawolo [Nyamenle] ɛnwomenlelielɛ ne anu la.” Yɛlɛ anwodozo kɛ ɛwɔkɛ mɔɔ Nyamenle ɛbɔ kɛ yɛbahola yɛawolo ye ɛnwomenlelielɛ ne anu la bara nu, na yɛlɛyɛ mɔɔ bamaa yɛ sa aha ye la. Tɛ Mosisi Mɛla ne azo ɛlilɛ anzɛɛ gyima gyɛne mɔɔ yɛyɛ amaa Gyihova anye alie yɛ nwo la azo a yɛlɛdua yɛayɛ ɛhye a. Emomu, diedi ɛmaa yɛva anyelielɛ yɛlie Nyamenle bodane ne mɔ mɔɔ bɛla ye ali la yɛdo nu yɛɛ yɛtɛdɛ nuhua. Eza kɛ mɔɔ bɛha ye wɔ anwuma ɛkɛ la, menli apenle dɔɔnwo mɔɔ wɔ ewiade amuala la ɛlɛsukoa Baebolo ne amaa bɛanwu bodane mɔɔ Nyamenle lɛ la. Ɛhye ɛmaa bɛ nuhua dɔɔnwo ɛhakyi bɛ ɛbɛlabɔlɛ, bɛla diedi ali na bɛmaa bɛzɔne bɛ kɛ Kilisienema. Kɛzi Baebolo ne mɔɔ bɛlɛsukoa la ɛnyia bɛ ɛbɛlabɔlɛ zo tumi la di daselɛ kɛ “Nyamenle edwɛkɛ ne gyi zo na ɔyɛ se.” Bodane mɔɔ Nyamenle lɛ mɔɔ bɛla ye ali wɔ Baebolo ne anu la ɛnyia yɛ ɛbɛlabɔlɛ zo tumi dɛbadɛba, na ɔbahɔ zo yɛanyia yɛ ɛbɛlabɔlɛ zo tumi.