1. Duzu ati a Gyihova azonvolɛ anye die a? (Nea mɔlebɛbo nvoninli ne.)

GYIHOVA ALASEVOLƐ le menli mɔɔ bɛ nye die. Bɛ nye die wɔ debiezukoalɛ, nyianu nee ayia ngakyile bo, na bɛbɔ adawu bɛsele. Duzu ati a bɛ nye die zɔhane a? Ɔluakɛ bɛze Gyihova, “anyelielɛ Nyamenle ne,” bɛsonle ye yɛɛ bɛbɔ mɔdenle kɛ bɛsukoa ye. (1 Tim. 1:11; Edw. 16:11) Gyihova mɔɔ le anyelielɛ Ɛvileka la kulo kɛ yɛ nye die, na yemaa yɛnyia ndelebɛbo dɔɔnwo mɔɔ ɔti yɛ nye die a.​—Mɛla 12:7; Nol. 3:12, 13.

2, 3. (a) Duzu a le anyelielɛ? (b) Duzu ati a ɔnla aze kɛ yɛbamaa yɛ nye alie ɛ?

² Na ɛdawɔ mumua ne ɛ? Ɛ nye die ɔ? Ɛbahola wɔamaa wɔ anyelielɛ ne ayɛ kpole ɔ? Bɛkile anyelielɛ abo kɛ “tɛnlabelɛ mɔɔ awie kɔ nu a, ɔ kunlu dwo ɔ nwo na ɔdi fɛlɛko wɔ ye ɛbɛlabɔlɛ nu mɔɔ ɔ kunlu anu a anrɛɛ ɔnrɛpɛ nu ɛlɛ emomu ɔbadɛnla ɛkɛ dahuu la.” Baebolo ne maa yɛnwu kɛ Gyihova nyilalɛ a maa sonla nyia nɔhalɛ anyelielɛ a. Ɛnɛ, ɔnla aze kɛ yɛ nye balie. Duzu ati ɔ?

³ Tɛnlabelɛ mɔɔ anu yɛ se​—le kɛ dɔvolɛ bie ewule, yɛ busuanli mɔɔ bɛkɛdu ye anzɛɛ yɛ gyima mɔɔ bavi yɛ sa la bahola azɛkye yɛ anyelielɛ. Abusua nu ngyegyelɛ yɛɛ adawubɔlɛ  kpalɛ mɔɔ ɛngɔ zo la kola sɛkye awie anyelielɛ. Bɛ gɔnwo mɔ sukuluma anzɛɛ gyimayɛvoma mɔɔ bɛgolo bɛ nwo, ɛkpɔlɛ nee Gyihova ɛzonlenlɛ mɔɔ ɔti bɛto bɛ efiade la kola sɛkye yɛ anyelielɛ. Zɔhane ala a kpanyinliyɛlɛ, ewule mɔɔ ɛnlɛ ye ayile yɛɛ adwenle nu ngyegyelɛ ɛmmaa menli nye ɛnlie a. Noko, Gyisɛse Kelaese, “anyelielɛ nee Tumivolɛ kokye ne” anye die nwo kɛ ɔbamaa menli anyia arɛlekyekyelɛ nee anyelielɛ. (1 Tim. 6:15; Mat. 11:28-30) Wɔ Gyisɛse Boka zo ɛdendɛlɛ ne anu, ɔhanle subane ngakyile mɔɔ bahola amaa yɛ nye alie ɔnva nwo kɛ yɛyia ngyegyelɛ wɔ Seetan ewiade ɛhye anu la anwo edwɛkɛ.

4, 5. Kɛ ɔkɛyɛ na yɛanyia anyelielɛ na yeadɛnla ɛkɛ dahuu ɛ?

⁴ Debie mɔɔ Gyisɛse limoa hanle nwolɛ edwɛkɛ la anwo hyia kpalɛ: “Anyelielɛ a le bɛdabɛ mɔɔ bɛze bɛ sunsum nu ngyianlɛ la, ɔluakɛ anwuma Belemgbunlililɛ ne le bɛ ɛdeɛ.” (Mat. 5:3) Kɛzi yɛbahile kɛ yɛze yɛ sunsum nu ngyianlɛ ɛ? Ɔlua sunsum nu aleɛ mɔɔ yɛbali na yɛamaa yɛ nye abolo anyelielɛ Nyamenle ne ɛzonlenlɛ nwo la azo. Saa yɛyɛ ɛhye mɔ a, yɛ nye balie kpole. Diedi mɔɔ yɛlɛ kɛ Nyamenle ɛwɔkɛ ne mɔ bara nu la bayɛ kpole. Na “anyelazo kɛnlɛma” mɔɔ Baebolo ne ka nwolɛ edwɛkɛ la bamaa yɛ anwosesebɛ.​—Tae. 2:13.

⁵ Saa yɛbanyia anyelielɛ dahuu a, ɔwɔ kɛ yɛ nee Gyihova nyia agɔnwolɛvalɛ kpalɛ. Sunsum ne maanle ɛzoanvolɛ Pɔɔlo hɛlɛle kɛ: “Bɛli fɛlɛko wɔ Awulae [Gyihova] anu dahuu. Mesi zo bieko, Bɛli fɛlɛko!” (Fel. 4:4) Amaa yɛ nee Nyamenle anyia abusuabɔlɛ kpalɛ la, ɔwɔ kɛ yɛnyia anwuma nrɛlɛbɛ. Nyamenle Edwɛkɛ ne ka kɛ: “Nyilalɛ ɛha sonla ne mɔɔ kɛnwu nrɛlɛbɛ na ɔkɛnyia ndelebɛbo la. Ɔle ngoane baka ɔmaa bɛdabɛ mɔɔ bɛsɔ nu boɛ la; bɛdabɛ mɔɔ bɛsɔ nu boɛ la di fɛlɛko.”​—Mrɛ. 3:13, 18.

6. Duzu a ɔwɔ kɛ yɛyɛ na yɛ nye alie dahuu a?

⁶ Noko saa yɛ nye balie dahuu a, ɔnle kɛ yɛkenga Nyamenle Edwɛkɛ ne ala, ɔwɔ kɛ yɛfa yɛbɔ yɛ ɛbɛla. Mɔɔ Gyisɛse si kɛzi ɔhyia kɛ yɛbava mɔɔ yɛsukoa yɛayɛ gyima azo la, ɔhanle kɛ: “Saa bɛze ninyɛne ɛhye mɔ na bɛyɛ a, bɛ nye balie.” (Dwɔn 13:17; kenga Gyemise 1:25.) Ɛhye a bamaa wɔali wɔ sunsum nu ngyianlɛ nwo gyima na ɛ nye alie dahuu a. Noko kɛ ɔkɛyɛ na yɛ nye alie wɔ mekɛ mɔɔ yɛlɛyia tɛnlabelɛ mɔɔ anu yɛ se la ɛ? Maa yɛzuzu edwɛkɛ bieko mɔɔ Gyisɛse hanle ye wɔ ye Boka Zo Ɛdendɛlɛ ne anu la anwo.

7. Kɛzi menli mɔɔ ɛlɛdi nyane la anye kola die ɛ?

⁷ “Anyelielɛ a le bɛdabɛ mɔɔ bɛdi nyane la, ɔluakɛ bɛbakyekye bɛ rɛle.” (Mat. 5:4) Bie a ɛbabiza kɛ, ‘Kɛ ɔkɛyɛ na awie mɔɔ ɛlɛdi nyane la anye alie ɛ?’ Tɛ awie biala mɔɔ di nyane la anwo edwɛkɛ a ɛnee Gyisɛse ɛlɛka a. Amumuyɛma bɔbɔ di nyane wɔ ngyegyelɛ mɔɔ ɛlɛkɔ zo wɔ ‘mekɛ ɛhye mɔɔ li awieleɛ’ anu la anwo. (2 Tim. 3:1) Noko bɛ angomedi nyanelilɛ zɔhane ɛndwe bɛ ɛmbikye Gyihova; yemɔti ɔmmaa bɛ nye ɛnlie. Ɛnee menli mɔɔ ze bɛ sunsum nu ngyianlɛ na bɛdi kɛzi alesama sunsum nu tɛnlabelɛ ɛzɛkye anwo nyane la a wɔ Gyisɛse adwenle nu a. Bɛdie bɛto nu bɔkɔɔ kɛ bɛnli munli na bɛdi mɔɔ alesama sinlidɔlɛ ɛva ɛra la anwo nyane. Gyihova nwu bɛdabɛ mɔɔ bɛlɛdi nyane wɔ bɛ ahonle nu la, na  ɔdua Baebolo ne azo ɔkyekye bɛ rɛle ɔmaa bɛ nye die wɔ ɛbɛlabɔlɛ nu.​—Kenga Yizikeɛle 5:11; 9:4.

8. Kilehile deɛmɔti awie yɛ bɛlɛvo a, ɔ nye die la anu.

⁸ “Anyelielɛ a le bɛdabɛ mɔɔ bɛle bɛlɛvo la, ɔluakɛ bɛbanyia azɛlɛ ne.” (Mat. 5:5) Saa yɛyɛ bɛlɛvoma a, kɛzi ɔkola ɔmaa yɛ nye die ɛ? Saa awie nyia nɔhalɛ ne anwo nɔhalɛ ndelebɛbo a, ɔmaa ɔkakyi ye subane. Bie a mekɛ bie ɛnee ɔlɛ ahonle, ɔdi butule yɛɛ ɔyɛ basabasa. Noko, kɛkala bɛva “subane fofolɛ ne” bɛwula na bɛlɛda subane le kɛ “anwunvɔnezelɛ, atiakunlukɛnlɛma, mɛlɛbɛnwoaze, bɛtɛɛyɛlɛ, nee abotane” ali. (Kɔl. 3:9-12) Ɔlua ɛhye ati, bɛnyia anzodwolɛ na bɛ nye die wɔ ɛbɛlabɔlɛ nu. Bieko, Nyamenle Edwɛkɛ ne bɔ ɛwɔkɛ kɛ menli zɔhane mɔ “bava azɛlɛ ne ayɛ bɛ ɛdeɛ.”​—Edw. 37:8-10, 29.

9. (a) Ndenle boni mɔ azo a bɛlɛvoma ‘banyia azɛlɛ’ ne a? (b) Duzu ati a menli mɔɔ “tenleneyɛlɛ nwo ɛhɔne nee nzuhɔne ɛlɛku bɛ” la anye balie ɛ?

⁹ Adenle boni azo a bɛlɛvoma ‘banyia azɛlɛ ne’ ɛ? Gyisɛse ɛdoavolɛma mɔɔ bɛva sunsum ne bɛkpokpa bɛ la banyia azɛlɛ ne wɔ mekɛ mɔɔ bɛlɛdi tumi kɛ arelemgbunli nee ɛsɔfoma wɔ azɛlɛ ye azo la. (Yek. 20:6) Menli dɔɔnwo mɔɔ ɛnlɛ anwuma anyelazo la noko badɛnla azɛlɛ ne azo dahuu wɔ anyelielɛ nee anzodwolɛ nu wɔ mekɛ mɔɔ bɛli munli la. Menli ɛhye mɔ a anye die a, ɔluakɛ “tenleneyɛlɛ nwo ɛhɔne nee nzuhɔne ɛlɛku bɛ.” (Mat. 5:6) Bɛbali bɛ sunsum nu ɛhɔne nee nzuhɔne mɔɔ ɛlɛku bɛ la anwo gyima bamaa bɛ bɔkɔɔ wɔ ewiade fofolɛ ne anu. (2 Pita 3:13) Saa Nyamenle ye amumuyɛma kɔsɔɔti fi ɛkɛ a, menli mɔɔ le tenlenema la anyelielɛ ne bali munli, na amumuyɛma ɛnrɛgyegye bɛ bieko.​—Edw. 37:17.

10. Anwunvɔnezelɛ kile duzu?

¹⁰ “Anyelielɛ a le anwunvɔnezelɛma, ɔluakɛ bɛbaze bɛ anwunvɔne.” (Mat. 5:7) Bɛhile anwunvɔnezelɛ nu kɛ, ɛte nganeɛ wɔamaa awie anzɛɛ menli mɔɔ ɛlɛnwu amaneɛ mɔɔ bɛ nwo yɛ wɔ alɔbɔlɛ. Noko anwunvɔnezelɛ ɛnle nganeɛdelɛ ala. Baebolo ne kilehile kɛ anwunvɔnezelɛ kile kɛ ɛyɛ debie wɔaboa awie mɔ.

11. Anwunvɔnezelɛ nwo ɛzukoalɛdeɛ boni a yɛnwu ye wɔ Samɛleanli agɔnwolɛ kpalɛ ne edwɛkɛ ne anu a?

¹¹ Kenga Luku 10:30-37. Samɛleanli agɔnwolɛ kpalɛ ne anwo ɛrɛlɛ ne mɔɔ Gyisɛse bule la maa yɛte anwunvɔnezelɛ bo kpalɛ. Anwunvɔnezelɛ hanle Samɛleanli ne maanle ɔvile ye ahonle nu ɔboale nrenyia ne. Mɔɔ Gyisɛse bule ɛrɛlɛ ne wiele la, ɔhanle kɛ: “Ɛdawɔ noko kɔyɛ ye zɔhane ala.” Yemɔti ɔwɔ kɛ yɛbiza yɛ nwo kɛ: ‘Melɛyɛ ɛhye bie ɔ? Melɛyɛ mɔɔ Samɛleanli nrenyia ne mɔɔ se anwunvɔne yɛle la bie ɔ? Asoo mebahola meavi ahunlunyele nu meayɛ ninyɛne meaboa menli mɔɔ ɛlɛnwu amaneɛ la ɔ? Kɛ neazo la, mebahola meaboa me mediema Kilisienema mɔɔ bɛyɛ mgbanyinli, bɛ hu mɔ ɛwu anzɛɛ bɛdabɛ mɔɔ bɛ awovolɛ ɛnle nɔhalɛ ne anu la ɔ? Mebahola ‘meakyekye menli mɔɔ arɛle ɛbɔ la arɛle ɔ’?’​—1 Tɛs. 5:14; Gye. 1:27.

12. Kɛzi yɛse awie mɔ anwunvɔne a yɛ nye die ɛ?

¹² Duzu ati bɔbɔ a saa yɛse anwunvɔne a, yɛ nye die a? Saa yɛse awie mɔ anwunvɔne a, yɛnyia anyelielɛ mɔɔ wɔ ɛmaanlɛ nu la bie. Bieko, yɛze kɛ yɛlɛyɛ mɔɔ sɔ Gyihova anye la. (Gyi. 20:35; kenga Hibuluma 13:16.) Belemgbunli Devidi hanle sonla mɔɔ dwenle awie mɔ anwo la anwo edwɛkɛ kɛ: “[Gyihova] bɔ ɔ nwo bane na ɔmaa ye ngoane; bɛfɛlɛ ye  kɛ ɔle nyilalɛ wɔ azɛlɛ ne azo.” (Edw. 41:1, 2) Saa yɛda anwunvɔnezelɛ ali yɛkile awie mɔ a, Gyihova noko baze yɛ anwunvɔne, na yɛ nye balie dahuu.​—Gye. 2:13.

13, 14. Saa yɛ ahonle nu te a, kɛzi ɔmaa yɛ nye die ɛ?

¹³ Gyisɛse hanle kɛ: “Anyelielɛ a le bɛdabɛ mɔɔ bɛ ahonle nu te la, ɔluakɛ bɛbanwu Nyamenle.” (Mat. 5:8) Saa yɛ ahonle nu bade a, ɔwɔ kɛ yɛdwenledwenle ninyɛne mɔɔ anwo te la anwo. Ɔwɔ kɛ yɛmaa yɛ adwenle nu te amaa yɛ nwo angua evinli wɔ ɛzonlenlɛ mɔɔ yɛlɛfa yɛamaa Gyihova la anu.​—Kenga 2 Kɔlentema 4:2; 1 Tim. 1:5.

¹⁴ Menli mɔɔ ahonle nu te la bahola anyia gyinlabelɛ kpalɛ wɔ Gyihova anyunlu. Ɔhanle kɛ: “Anyelielɛ a le bɛdabɛ mɔɔ bɛkpo bɛ adɛladeɛ la.” (Yek. 22:14) “Bɛkpo bɛ adɛladeɛ” wɔ adenle boni azo? Kilisienema mɔɔ bɛkpokpa bɛ la yɛ ɛhye, ɔluakɛ Gyihova bu bɛ kɛ bɛ nwo te, na ɔbamaa bɛ damɛnlangoate ngoane na bɛ nye alie dahuu wɔ bɛ anwuma anyelazo ne anu. Ekpunli kpole ne anu amra mɔɔ bɛbadɛnla azɛlɛ ye azo la noko bayɛ Nyamenle agɔnwo mɔ. Kɛkala bɔbɔ, “[bɛlɛkpo] bɛ adɛladeɛ ne mɔ nwohyee wɔ Boaneralɛ ne mogya ne anu.”​—Yek. 7:9, 13, 14.

15, 16. Kɛzi menli mɔɔ bɛ ahonle nu te la “banwu Nyamenle” ɛ?

¹⁵ Noko, kɛ ɔkɛyɛ na menli mɔɔ ahonle nu te la “anwu Nyamenle” wɔ mekɛ mɔɔ “awie biala ɛnrɛnwu [Nyamenle anyunlu] na ɔnrɛdɛnla ngoane nu” la ɛ? (Ade. 33:20) Giliki edwɛkɛkpɔkɛ “nwu” mɔɔ bɛva bɛli gyima la kile kɛ, ɛfa wɔ “adwenle ɛnyelɛ ne wɔanwu ye anzɛɛ wɔanlea.” Menli mɔɔ ɛva “bɛ ahonle ne mɔ anye” ɛnwu Nyamenle la a le bɛdabɛ mɔɔ bɛnwu ye na bɛ nye die ye subane ngakyile ne mɔ anwo la. (Ɛfɛ. 1:18) Gyisɛse mɔɔ zukoale Nyamenle subane ne kpalɛ la hanle kɛ: “Mɔɔ ɛnwu me la ɛnwu Selɛ ne noko.”​—Dwɔn 14:7-9.

¹⁶ Bieko, nɔhalɛ azonvolɛ ‘nwu Nyamenle’ ɔlua kɛzi bɛnwu kɛ ɔlɛboa bɛ wɔ ɛbɛlabɔlɛ nu la azo. (Dwobu 42:5) Eza noko bɛfa “bɛ ahonle ne mɔ anye” bɛnwu nyilalɛ mgbole mɔɔ Nyamenle ɛva ɛbɔ bɛdabɛ mɔɔ bɛ ahonle nu te na bɛsonle ye wɔ nɔhalɛ nu la ɛwɔkɛ la. Ɛhɛe, Kilisienema mɔɔ bɛkpokpa bɛ mɔɔ bɛbadwazo bɛ la bava bɛ nye anwu Gyihova wɔ mekɛ mɔɔ bɛnyia bɛ anwuma ahatualɛ ne la.​—1 Dwɔn 3:2.

17. Kɛzi yɛkpondɛ anzodwolɛ a ɔmaa yɛ nye die ɛ?

¹⁷ Bieko, Gyisɛse hanle kɛ: “Anyelielɛ  a le bɛdabɛ mɔɔ bɛkpondɛ anzodwolɛ la.” (Mat. 5:9) Menli mɔɔ dimoa kpondɛ anzodwolɛ la lɛ ndelebɛbo kpalɛ mɔɔ ɔti bɛ nye die a. Ɛdoavolɛ Gyemise hɛlɛle kɛ: “Bɛdua tenleneyɛlɛ ma wɔ anzodwolɛ nu bɛmaa bɛdabɛ mɔɔ bɛkpondɛ anzodwolɛ la.” (Gye. 3:18) Saa yɛ nee awie avinli ɛnle kpalɛ wɔ asafo ne anzɛɛ abusua ne anu a, yɛbahola yɛazɛlɛ Gyihova yɛamaa yeaboa yɛ amaa yɛaziezie yɛ nee ahenle avinli. Ɛhye bamaa Gyihova sunsum ne, subane kpalɛ nee anyelielɛ ayi yɛ ahonle tɛkɛɛ. Mɔɔ Gyisɛse si kɛzi anzodwolɛ mɔɔ yɛbalimoa yɛakpondɛ anwo hyia azo la, ɔhanle kɛ: “Zɔhane ati, saa ɛlɛfa wɔ ahyɛlɛdeɛ wɔara afɔlemokyea ne anwo na ɛkakye ye wɔ ɛkɛ ne kɛ ɛ diema nee wɔ lɛ edwɛkɛ a, gyakyi wɔ ahyɛlɛdeɛ ne wɔ afɔlemokyea ne anyunlu na kɔ. Dimoa ɛ nee ɛ diema ne ɛziezie bɛ avinli na ɛsia ɛba a, akee wɔabɔ wɔ afɔle ne.”​—Mat. 5:23, 24.

18, 19. Duzu ati a saa Kilisienema ɛlɛyia ɛkpɔlɛ bɔbɔ a, bɛ nye bahola alie ɛ?

¹⁸ “Anyelielɛ ɛha bɛ kɛ medame ti menli bɔ bɛ aholoba na bɛyɛ bɛ kpɔdekpɔde na bɛbɔ adalɛ bɛfa edwɛkɛ bɛto bɛ nwo zo la.” Boni a ɛnee Gyisɛse ɛlɛkile a? Ɔdoale zolɛ kɛ: “Bɛmaa bɛ nye ɛlie na bɛli fɛlɛko, ɔluakɛ bɛ ahatualɛ le kpole wɔ anwuma, zɔhane ala a bɛyɛle ngapezoma mɔɔ limoale bɛ nyunlu la kpɔdekpɔde a.” (Mat. 5:11, 12) Mekɛ mɔɔ bɛbilale ɛzoanvolɛ ne mɔ na bɛduale bɛ kɛ bɛgyakyi edwɛkɛhanlɛ gyima ne la, “bɛvale fɛlɛkolilɛ bɛvile Sanhedelin ne anyunlu ɛkɛ bɛhɔle.” Nɔhalɛ nu, tɛ empele ne ati a bɛlile fɛlɛko a, emomu bɛ nye liele “ɔluakɛ bɛbule bɛ kɛ [Gyisɛse] duma ne ati ɔfɛta kɛ bɛgua bɛ nyunlu aze.”​—Gyi. 5:41.

¹⁹ Ɛnɛ, saa Gyihova menli ɛlɛyia ngyegyelɛ nee amameɛnwunlɛ ɔlua Gyisɛse duma ne ati a, bɛgyinla kpundii. (Kenga Gyemise 1:2-4.) Le kɛ ɛzoanvolɛ ne mɔ la, yɛ nye ɛnlie amaneɛnwunlɛ biala anwo. Noko saa yɛdi nɔhalɛ yɛmaa Gyihova wɔ sɔnea mekɛ nu a, ɔbamaa yɛ anwosesebɛ yeamaa yɛagyinla ɔ nloa. Kɛ neazo la, wɔ August 1944, maanle mgbanyima mɔɔ bɛka a awie ɛnga bie la dole Henryk Dornik nee ɔ diema nrenyia ne efiade. Noko, dwazotiama ne hanle kɛ: “Yɛnrɛhola yɛnrɛmaa menli ɛhye mɔ ɛnrɛhakyi bɛ adwenle. Saa bɛte ewule edwɛkɛ bɔbɔ a, bɛ nye die.” Adiema Dornik hilele nu kɛ: “Tɛ ewule mɔɔ mebawu a yɛ me fɛ a, emomu me nye die kɛ melɛnwu amaneɛ ɔluakɛ mekulo kɛ medi Gyihova eni na mesonle ye nɔhalɛ nu la ati. . . . Asɔneyɛlɛ mɔɔ vi ahonle nu la hwenle me bikyele Gyihova na amgba noko ɔhilele kɛ ɔwɔ ɛkɛ ne kɛ ɔboa me.”

20. Duzu ati a yɛ nye die kɛ yɛlɛsonle “anyelielɛ Nyamenle ne” ɛ?

²⁰ Ɔnva nwo kɛ yɛlɛyia ɛkpɔlɛ wɔ yɛ ɛzonlenlɛ nu, dwazotia wɔ sua nu, anwodolɛ anzɛɛ kpanyinliyɛlɛ ɛlɛgyegye yɛ la, yɛ nye bahola alie ɔluakɛ, “anyelielɛ Nyamenle ne” die yɛ to nu. (1 Tim. 1:11) Yɛ Nyamenle ne mɔɔ “ɔngola ɔmbɔ adalɛ” la ɛbɔ yɛ ɛwɔkɛ kɛnlɛma, ɔti yɛdayɛ noko yɛ nye die. (Tae. 1:2) Gyihova ɛwɔkɛ ne mɔ mɔɔ bara nu la maa yɛ nye die kpole, ɔti yɛnva yɛ adwenle yɛnzie ewiade ɛhye anu ngyegyelɛ nee sɔnea ngakyile ne mɔ azo somasoma. Wɔ Paladaese ne mɔɔ ɛlɛba la anu, nyilalɛ mɔɔ Gyihova bamaa yɛanyia la badɛla mɔɔ yɛsuzu la. Amgba yɛ nye balie adɛla mekɛ biala. Ɛhɛe, ‘yɛ nye balie yɛ ɛkpazilɛ nwo.’​—Edw. 37:11.