SAA ɛkulo kɛ ɛnwu mekɛ mɔɔ bɛbɔ la a, duzu a ɛyɛ a? Bie a ɛnea wɔ wate ne. Yɛva ye kɛ bɛbɔ ewiazo dɔne ko ɛkpa nwo mitini 30. Saa ɛ gɔnwo bie biza wɔ kɛ “bɛbɔ dɔne nyɛ a,” kɛzi ɛbabua ɛ?

Ɔbagyinla ɛleka mɔɔ ɛde la azo. Kɛ neazo la, bie a ɛbaha kɛ: “Bɛbɔ 1:30 anzɛɛ 13:30.” Wɔ ɛleka bie mɔ, ɛbahola wɔaha kɛ, yeha mitini 30 na bɛabɔ dɔne nwiɔ.

Kɛ awie mɔɔ ɛkenga Baebolo ne la, bie a ɛbabiza kɛ, kɛzi ɛnee bɛkile mekɛ wɔ tete ne ɛ? Tɛ adenle ko ala a ɛnee bɛdua zo a. Hibulu Ngɛlɛlera ne ka “nwonlomɔ,” “sɛnzɛngyinla,” “ewia henlema” yɛɛ “nɔsolɛ nu” nwo edwɛkɛ. (Mɔl. 8:11; 19:27; 43:16; Mɛla 28:29; 1 Arl. 18:26) Noko ɔyɛ a, bɛka mekɛ fɔɔnwo bie anwo edwɛkɛ.

Mekɛ zɔhane, ɛnee bɛfa sinzavolɛma bɛdi gyima, titili wɔ nɔsolɛ nu. Ɛvolɛ dɔɔnwo na bɛawo Gyisɛse la, Yizilayɛma ne hyehyɛle aledwolɛ ne anu nsa, na ɛnee bɛfɛlɛ ye ɛzinzalɛ mekɛ. Maanlebuvolɛma 7:19 vale “alevinli mu nwiɔ avinli” lile gyima. Ɔkadwu Gyisɛse mekɛ zo la, ɛnee Dwuuma ne ɛhyehyɛ aledwolɛ ne anu nna kɛ Gilikima nee Wulomuma ɛdeɛ ne la.

Wɔ Edwɛkpa ne anu, bɛhwe adwenle bɛhɔ mekɛ ɛhye mɔ azo fane dɔɔnwo. Kɛ neazo la, mɔɔ ɔdwule “aleɛbahye” la, Gyisɛse diale nyevile ne anye hɔle ɛdoavolɛma ne mɔɔ bɛde ɛlɛne ne anu la anwo ɛkɛ. (Mat. 14:25) Gyisɛse hanle ye wɔ ndonwo bie anu kɛ: “Saa suamenle ne ze “ɛzinzalɛ mekɛ” mɔɔ awule ne bara la a, anrɛɛ ɔzinzale na yeannyia adenle yeambu ye sua ne yeanwolo nu.”​—Mat. 24:43, ɔbdw.

Mɔɔ Gyisɛse ka ɛzinzalɛ mekɛ nna ne anwo edwɛkɛ ahile ye ɛdoavolɛma ne la, ɔhanle kɛ: “Yemɔti bɛhɔ zo bɛzinza, ɔboalekɛ bɛnze kenle mɔɔ suamenle ne bara la, saa ɔbara nɔsolɛ nu anzɛɛ alevinli mu nwiɔ avinli anzɛɛ aleɛbahye anzɛɛ nwonlomɔ mangyee a.” (Maake 13:35; ɔbdw.) Ɛzinzalɛ mekɛ mɔɔ limoa mɔɔ le “nɔsolɛ nu” la, bɔ ɔ bo mekɛ mɔɔ sɛnzɛne ne ɛdɔ kɔdwu kɛyɛ nɔsolɛ nu dɔne ngɔnla. Mɔɔ tɔ zo nwiɔ mɔɔ le “alevinli mu nwiɔ avinli” la bɔ ɔ bo wɔ kɛyɛ nɔsolɛ nu dɔne ngɔnla kɔdwu nɔɔzo bulu nee nwiɔ. Mɔɔ tɔ zo nsa la a le ‘kolaa na aleɛbahye adwu’ anzɛɛ mekɛ mɔɔ akɔlɛ bɔ la, ɔbɔ ɔ bo wɔ nɔɔzo bulu nee nwiɔ kɔdwu kɛyɛ nwonlomɔ dɔne nsa. Ɔbayɛ kɛ mekɛ zɔhane a akɔlɛ bɔle wɔ nɔe ne mɔɔ bɛhyele Gyisɛse la a. (Maake 14:72) “Nwonlomɔ mangyee” mɔɔ le ɛzinzalɛ mekɛ mɔɔ tɔ zo nna la bɔ ɔ bo kɛyɛ nwonlomɔ dɔne nsa kɔdwu kɛyɛ nwonlomɔ dɔne nsia.

Ɔti, ɔnva nwo kɛ zɔhane mekɛ ne ɛnee bɛnlɛ wate mɔɔ bɛfa bɛtia mekɛ la, ɛnee bɛlɛ adenle mɔɔ bɛdua zo bɛkile mekɛ la.