1. Kɛzi mediema mraalɛ boa ahyehyɛdeɛ ne ɛ, na ngyegyelɛ boni mɔ a bɛ nuhua dɔɔnwo yia a? (Nea ɔ nyunlu nvoninli ne.)

YƐ NYE die kɛ yɛlɛ mediema mraalɛ dɔɔnwo mɔɔ bɛlɛbɔ mɔdenle wɔ asafo ne anu a! Kɛ neazo la, bɛfa bɛ nwo bɛwula debiezukoalɛ nee daselɛlilɛ gyima ne anu. Bie mɔ boa maa bɛsiezie Belemgbunlililɛ Asalo na bɛmaa bɛ mediema anwosesebɛ. Noko bɛyia ngyegyelɛ. Bie mɔ ɛlɛnea bɛ awovolɛ mɔɔ bɛyɛ mgbanyinli la. Bie mɔ mbusuafoɔ dwazo tia bɛ. Yɛɛ bie mɔ le awovolɛ ko mɔɔ ɛlɛyɛ gyima ɛsesebɛ anlea bɛ mra.

2. Duzu ati a ɔwɔ kɛ yɛbɔ mɔdenle yɛboa yɛ mediema mraalɛ a?

² Duzu ati a ɔwɔ kɛ yɛboa yɛ mediema mraalɛ a? Ɔluakɛ menli dɔɔnwo mɔɔ wɔ ewiade ne anu la ɛmbu mraalɛ. Bieko, Baebolo ne maa yɛ anwosesebɛ kɛ yɛboa bɛ. Kɛ neazo la, ɛzoanvolɛ Pɔɔlo hanle hilele Wulomu asafo ne kɛ bɛlie Fobi na “[bɛmaa] ye moalɛ biala mɔɔ ɔkɛhyia nwolɛ la.” (Wlo. 16:1, 2) Kɛ mɔɔ ɛnee Pɔɔlo le Falasiinli la ati, ɔkɛyɛ kɛ bɛtetele ye wɔ ɛleka mɔɔ ɛnee bɛmbu mraalɛ la. Noko mɔɔ ɔrayɛle Kilisienenli la, ɔzukoale Gyisɛse na ɔ nee mraalɛ lile wɔ enililɛ nee atiakunlukɛnlɛma nu.​—1 Kɔl. 11:1.

3. Kɛzi Gyisɛse nee mraalɛ lile ɛ, na kɛzi ɔbule mraalɛ mɔɔ bɛyɛ Nyamenle ɛhulolɛdeɛ la ɛ?

³ Gyisɛse lile mraalɛ kɔsɔɔti eni. (Dwɔn 4:27) Ɔ nee mraalɛ anli kɛ mɔɔ ɛnee Dwuu ɛzonlenlɛ nu mgbanyima yɛ la. Nɔhalɛ nu, Baebolo nwo neɛnleanu ko ka kɛ: “Gyisɛse anga edwɛkɛ mɔɔ bamaa mraalɛ ade nganeɛ kɛ bɛ nwo ɛngyia la ɛlɛ.” Noko ɛnee Gyisɛse lɛ ɛbulɛ titili maa mraalɛ mɔɔ bɛyɛ ye Papa ɛhulolɛdeɛ la. Ɔbule bɛ kɛ bɛle ɔ mediema mraalɛ na ɔbɔle bɛ aluma ɔbokale mrenyia mɔɔ ɔbu bɛ kɛ bɛle ye sunsum nu abusua la anwo.​—Mat. 12:50.

4. Duzu a yɛbazuzu nwo wɔ edwɛkɛ ɛhye anu a?

 ⁴ Ɛnee Gyisɛse ɛziezie ɔ nwo kɛ ɔbaboa ye sunsum nu mediema mraalɛ ɛhye mɔ. Ɔhilele bɛ nwo anyezɔlɛ na ɔhanle bɛ edwɛkɛ ɔmaanle bɛ. Bɛmaa yɛnlea kɛzi yɛbazukoa Gyisɛse na yɛabu yɛ mediema mraalɛ ne mɔ la.

5. Duzu ati a ɔnla aze kɛ yɛ mediema mraalɛ bie mɔ banyia agɔnwolɛma kpalɛ ɛ?

⁵ Yɛ muala, saa yɛle mediema mrenyia o anzɛɛ mraalɛ o, yɛhyia agɔnwolɛma kpalɛ anwo. Noko ɔdwu mekɛ ne bie a ɔnla aze kɛ yɛ mediema mraalɛ banyia agɔnwolɛma kpalɛ. Duzu ati ɔ? Yɛ edwɛkɛ ɛhye mɔ mɔɔ awie mɔ ɛha la nzonlɛ. Adiema raalɛ ko mɔɔ bɛfɛlɛ ye Jordan * la ka kɛ, “Kɛ mɔɔ metɛgyale la ati, ɔyɛ a mete nganeɛ kɛ me nwo ɛngyia wɔ asafo ne anu na menrɛhola menrɛyɛ ɛhwee menrɛboa.” Kristen mɔɔ le adekpakyelɛnli na ɔdule adenle ɔhɔdɛlɛle ye ɛzonlenlɛ gyima ne anu la ka kɛ: “Saa ɛkɔ asafo fofolɛ nu a, ɛ nwo yɛ wɔ koonwu.” Mediema mrenyia bie mɔ noko te nganeɛ zɔhane ala. Bie a ɔbayɛ se kɛ menli mɔɔ nee bɛ mbusuafoɔ mɔɔ ɛnle Alasevolɛ de la babikye bɛ kpalɛ yɛɛ eza bɛngola bɛmbikye asafo ne anu amra noko kpalɛ. Bie a menli mɔɔ bɛnde kpɔkɛ mɔɔ bɛha sua nu yɛɛ menli mɔɔ ɛlɛnea bɛ mbusuafoɔ mɔɔ ɛnde kpɔkɛ la noko anwo kola yɛ bɛ koonwu. Annette ka kɛ, “Ɛnee mengola menlie ɛsalɛdolɛ mendo nu ɔluakɛ ɛnee me ngomekye a melɛnea me mame a.”

6. Kɛ mɔɔ Luku 10:38-42 ka la, kɛzi Gyisɛse boale Maata nee Mɛle ɛ?

⁶ Gyisɛse nyianle mekɛ maanle ye sunsum nu mediema mraalɛ ne mɔ na ɔyɛle agɔnwolɛ kpalɛ ɔmaanle bɛ. Suzu agɔnwolɛvalɛ mɔɔ ɛnee ɔwɔ ɔdaye nee Mɛle nee Maata mɔɔ ɛnee bɛtɛgyale avinli la anwo. (Luku 10:38-42.) Gyisɛse luale ye edwɛkɛ nee ye nyɛleɛ zo maanle bɛnyianle ahomeka. Mɛle anzulo kɛ ɔbadɛnla Gyisɛse agyakɛ abo kɛ ye ɛdoavolɛ. * Yɛɛ mɔɔ Maata vale ɛya kɛ Mɛle ɛmboa ye la, ɔholale ɔhanle nwolɛ edwɛkɛ ɔhilele Gyisɛse. Gyisɛse vale nwolɛ adenle zɔhane hilele bɛ ɛzukoalɛdeɛ mɔɔ anwo hyia la. Na ɔkpɔlale bɛ wɔ mekɛ gyɛne nu ɔvale ɔhilele kɛ ɔdwenle mraalɛ nwiɔ zɔhane nee bɛ diema Lazalɛse anwo. (Dwɔn 12:1-3) Yemɔti mɔɔ Lazalɛse anwo dole ye kpole la, ɛnee Mɛle nee Maata ze kɛ Gyisɛse bahola aboa bɛ.​—Dwɔn 11:3, 5.

7. Adenle ko mɔɔ yɛbahola yɛalua zo yɛamaa yɛ mediema mraalɛ anwosesebɛ la a le boni?

⁷ Wɔ mediema mraalɛ bie mɔ afoa nu, ayia bo ala a bɛnyia adenle bɛ nee bɛ mediema bɔ a. Yemɔti yɛkulo kɛ yɛfa nwolɛ adenle zɔhane yɛdie bɛ, yɛ nee bɛ tendɛ na yɛmaa bɛnwu ye kɛ yɛdwenle bɛ nwo. Jordan mɔɔ yɛlimoa yɛha ɔ nwo edwɛkɛ la ka kɛ: “Saa awie mɔ kile mualɛ mɔɔ memaa la anwo anyezɔlɛ na bɛ nee me dua wɔ daselɛlilɛ nu anzɛɛ bɛyɛ ninyɛne bie mɔ bɛboa me a, me nye die nwo kpalɛ.” Ɔwɔ kɛ yɛmaa yɛ mediema mraalɛ nwu kɛ bɛsonle bolɛ bɛmaa yɛ. Kia ka kɛ: “Saa meangɔ debiezukoalɛ a, meze kɛ awie babiza me wɔ fonu zo saa mete kpɔkɛ a. Yemɔ maa menwu kɛ mediema ne mɔ dwenle me nwo.”

8. Ndenle boni mɔ bieko a yɛbahola yɛalua zo yɛazukoa Gyisɛse a?

⁸ Ɔwɔ kɛ yɛnyia mekɛ yɛmaa yɛ mediema mraalɛ kɛ mɔɔ Gyisɛse yɛle la. Bie a yɛbahola yɛado yɛ sa yɛavɛlɛ bɛ yɛ nee bɛ ali aleɛ  anzɛɛ yɛ nee bɛ alie yɛ nye. Saa ɔbaye zɔhane a, yɛkulo kɛ yɛmaa yɛ adawubɔlɛ ne maa anwosesebɛ. (Wlo. 1:11, 12) Ɔwɔ kɛ asafo nu mgbanyima bɔ mɔdenle da subane mɔɔ Gyisɛse lale ye ali la bie ali. Ɛnee ɔze kɛ belazinlililɛ lɛ ye ngyegyelɛ, noko ɔmaanle ɔlale ali kɛ tɛ agyalɛ anzɛɛ awolɛ a maa bɛ nye die kpalɛ a. (Luku 11:27, 28) Emomu, saa yɛfa Gyihova adehilelɛ yɛyɛ gyima a yɛɛ yɛbanyia anyelielɛ mɔɔ tɛnla ɛkɛ kyɛ a.​—Mat. 19:12.

9. Duzu a asafo nu mgbanyima bahola ayɛ aboa mediema mraalɛ a?

⁹ Ɔwɔ kɛ asafo nu mgbanyima bu Kilisiene mraalɛ kɛ bɛle bɛ sunsum nu mediema mraalɛ nee bɛ mame mɔ. (1 Tim. 5:1, 2) Ɔwɔ kɛ mgbanyima nyia mekɛ nee bɛ mediema mraalɛ di adwelie kolaa na bɛabɔ debiezukoalɛ bo anzɛɛ wɔ mekɛ mɔɔ bɛkɛkpɔne la. Kristen ka kɛ: “Asafo nu kpanyinli ko nwunle kɛ menlɛ alagye fee, yemɔti ɛnee ɔkulo kɛ ɔnwu kɛzi meyɛ me ngyehyɛleɛ la. Me nye liele kɛ ɔdwenle me nwo zɔhane la.” Saa asafo nu mgbanyima nyia mekɛ bɛ nee bɛ sunsum nu mediema mraalɛ di adwelie a, ɔkile kɛ bɛdwenle bɛ nwo. * Annette mɔɔ yɛlimoa yɛha ɔ nwo edwɛkɛ la ka nvasoɛ ko mɔɔ saa ɛ nee asafo nu mgbanyima di  adwelie dahuu a ɛnyia la. Ɔka kɛ: “Menwu bɛ kpalɛ yɛɛ bɛdabɛ noko bɛnwu me. Yemɔti saa melɛyia tɛnlabelɛ mɔɔ nuhua yɛ se a, ɔnyɛ se kɛ mebaha me edwɛkɛ meahile bɛ amaa bɛaboa me.”

10. Duzu a kola maa yɛ mediema mraalɛ ne mɔ anye die a?

¹⁰ Saa awie mɔ nwu yɛ mɔdenlebɔlɛ na bɛkile mɔɔ yɛyɛ la anwo anyezɔlɛ a, yɛ nye die ɔnva nwo kɛ yɛle mrenyia anzɛɛ mraalɛ la. Noko saa awie mɔ angile mɔɔ yɛyɛ nee yɛ ɛlolɛ ahyɛlɛdeɛ nwo anyezɔlɛ a, ɔmaa yɛ sa nu to. Adekpakyelɛnli bie mɔɔ ɔtɛgyale na bɛfɛlɛ ye Abigail la ka kɛ, ɔdwu mekɛ ne bie a ɔte nganeɛ kɛ bɛbu bɛ nye bɛgua ɔ nwo zo. Ɔka kɛ: “Mediema ne mɔ ɛnze me kpalɛ, bɛze me kɛ mele asomasi adiema raalɛ anzɛɛ asomasi ara raalɛ. Ɔyɛ a mete nganeɛ kɛ awie biala ɛnze me.” Noko yɛ mɔɔ adiema raalɛ bie mɔɔ bɛfɛlɛ ye Pam hanle la nzonlɛ. Mekɛ mɔɔ ɔtɛgyale la, ɔzonlenle kɛ edwɛkpatɛlɛvolɛ wɔ ɛvolɛ dɔɔnwo anu. Awieleɛ bɔkɔɔ ne, ɔziale ɔrale sua nu ɔranleanle ye awovolɛ. Kɛkala yenyia ɛvolɛ 70, na ɔtɛde adekpakyelɛnli. Pam ka kɛ: “Awie mɔ ka kile me kɛ bɛ nye sɔ mɔɔ meyɛ la, na ɛhye ɛboa me kpalɛ.”

11. Kɛzi Gyisɛse hilele kɛ ɔ nye sɔ mraalɛ ne mɔ mɔɔ boale ye wɔ ye ɛzonlenlɛ gyima ne anu la ɛ?

¹¹ Mraalɛ nɔhavoma bie mɔ “vale bɛ ninyɛne boale” zonlenle Gyisɛse, na ɔ nye liele moalɛ zɔhane mɔ anwo kpalɛ. (Luku 8:1-3) Tɛ nwolɛ adenle zɔhane ala a ɔvale ɔmaanle bɛ a, eza ɔhilehilele bɛ sunsum nu ninyɛne mɔɔ anwo hyia kpalɛ la. Kɛ neazo la, ɔhanle ɔhilele bɛ kɛ ɔbawu, na ɔbadwazo. (Luku 24:5-8) Ɔzieziele mraalɛ ɛhye mɔ kɛ mɔɔ ɔzieziele ye ɛzoanvolɛ ne mɔ la ɔmaanle sɔnea mɔɔ bɛbayia la. (Maake 9:30-32; 10:32-34) Mɔɔ bɛhyele Gyisɛse la, ɛzoanvolɛ ne mɔ nriandinle, noko mraalɛ bie mɔ mɔɔ boale ye la ɛnee wɔ ɛkɛ wɔ mekɛ mɔɔ ɔlɛwu wɔ baka ne azo la.​—Mat. 26:56; Maake 15:40, 41.

12. Duzu gyima a Gyisɛse vale wulale mraalɛ asa a?

¹² Gyisɛse vale gyima mɔɔ anwo hyia la wulale mraalɛ bie mɔ asa. Kɛ neazo la, mraalɛ nɔhavoma a le menli mɔɔ limoale nwunle Gyisɛse ewudwazo ne a. Ɔzoanle mraalɛ zɔhane mɔ kɛ bɛhɔze ye ɛzoanvolɛ ne mɔ kɛ bɛdwazo ye bɛvi ewule nu. (Mat. 28:5, 9, 10) Yɛɛ mraalɛ boka menli mɔɔ sunsum nwuanzanwuanza ne rale bɛ nwo zo wɔ Pɛntekɔso 33 Y.M. la anwo. Saa ɔle zɔ a, ɛnee mediema mraalɛ ɛhye mɔ mɔɔ bɛkpokpa bɛ la nyianle nwolɛ adenle hanle “ninyɛne mgbole mɔɔ Nyamenle ɛyɛ la anwo edwɛkɛ” wɔ aneɛ ngakyile nu.​—Gyi. 1:14; 2:2-4, 11.

13. Duzu a Kilisiene mraalɛ ɛlɛyɛ ye ɛnɛ a, na kɛzi yɛbahile nwolɛ anyezɔlɛ ɛ?

¹³ Ɔwɔ kɛ yɛkanvo yɛ mediema mraalɛ wɔ mɔɔ bɛyɛ ye wɔ Gyihova ɛzonlenlɛ nu la anwo. Ninyɛne mɔɔ bɛyɛ la bie a le kɛ, bɛboa bɛmaa bɛsi na bɛsiezie Belemgbunlililɛ Asalo nee Bɛtɛle azua, bɛboa ekpunli gyɛne mɔɔ bɛka aneɛ gyɛne la na bɛyɛ gyima wɔ Bɛtɛle. Bɛboa esiane mekɛ nu moalɛ gyima ne, bie mɔ boa maa bɛkile yɛ mbuluku ne mɔ abo yɛɛ bie mɔ sonle kɛ adekpakyelɛma nee edwɛkpatɛlɛvolɛma. Mediema mraalɛ kɔ adekpakyelɛma sukulu, Belemgbunlililɛ Edwɛkpakavolɛma Sukulu yɛɛ Geleade Sukulu kɛ mɔɔ mediema mrenyia yɛ ala la. Bieko, yelɛma boa bɛ hu mɔ bɛmaa bɛdi asafo ne yɛɛ ahyehyɛdeɛ ne anu ɛzonlelilɛ nwo gyima. Saa tɛ mrenyia ɛhye mɔ aye mɔ a, anrɛɛ bɛnrɛhola bɛnrɛboa kpalɛ kɛ ‘menli nu ahyɛlɛdeɛ.’ (Ɛfɛ. 4:8) Ɛbahola wɔadwenle ndenle mɔɔ ɛbalua zo wɔaboa mediema mraalɛ ɛhye mɔ wɔ bɛ gyima ne anwo la anwo.

14. Kɛ mɔɔ Edwɛne 68:11 kile la, duzu a asafo nu mgbanyima mɔɔ lɛ ndelebɛbo la yɛ a?

¹⁴ Asafo nu mgbanyima ze kɛ mraalɛ “ɛlɔne  kpole” boka menli mɔɔ ɛlɛfi bɛ ɛhulolɛ nu abɔ edwɛkpa ne nolo la anwo. (Kenga Edwɛne 68:11.) Yemɔti asafo nu mgbanyima bɔ mɔdenle kɛ bɛbanyia bɛ anwubielɛ ne azo nvasoɛ. Abigail mɔɔ yɛha ɔ nwo edwɛkɛ la ka kɛ, saa awie mɔ biza me adenle kpalɛ mɔɔ medua zo medi me azɛlɛsinli ne anu amra daselɛ la a, ɔyɛ me fɛ. Ɔka kɛ, “Yemɔ maa menwu kɛ Gyihova kulo kɛ ɔfa me ɔdi gyima wɔ ye ahyehyɛdeɛ ne anu.” Eza asafo nu mgbanyima ze kɛ, mediema mraalɛ mgbanyinli mɔɔ bɛnyi wɔ sunsum nu la kola boa mbɛlɛra mɔɔ ɛlɛyia ngyegyelɛ la kpalɛ. (Tae. 2:3-5) Ɔda ali wienyi kɛ, yɛ mediema mraalɛ hyia nganvolɛ!

15. Mekɛ boni a mediema mraalɛ bahyia awie mɔɔ baha bɛ edwɛkɛ amaa bɛ la ɛ?

¹⁵ Ɔdwu mekɛ ne bie a, mediema mraalɛ bahyia awie amaa yeaha bɛ edwɛkɛ yeamaa bɛ wɔ mekɛ mɔɔ bɛlɛyia ngyegyelɛ la. (Aye. 1:17) Kɛ neazo la, kunlavolɛ anzɛɛ adiema raalɛ mɔɔ bɛbɔ ye ewole la bahyia awie mɔɔ baboa ye na yeayɛ ninyɛne bie mɔ mɔɔ anrɛɛ ɔ hu bayɛ amaa ye la. Bie a adiema raalɛ mɔɔ ɛnyi la bahyia awie mɔɔ nee dɔketama badendɛ amaa ye la. Anzɛɛ adiema raalɛ mɔɔ le adekpakyelɛnli na ɔyɛ teokelase gyimalilɛ ngakyile la bahyia awie mɔɔ badendɛ amaa ye wɔ mekɛ mɔɔ bɛlɛtendɛ bɛatia ye kɛ ɔnda ɔngɔ daselɛlilɛ la. Kɛzi yɛbahola yɛaboa yɛ mediema mraalɛ ɛhye mɔ ɛ? Bɛmaa yɛzuzu Gyisɛse neazo ne anwo bieko.

16. Kɛ mɔɔ Maake 14:3-9 kile la, kɛzi Gyisɛse boale Mɛle ɛ?

¹⁶ Gyisɛse yɛle ye ndɛ dendɛle maanle ye sunsum nu mediema mraalɛ wɔ mekɛ mɔɔ awie mɔ ande bɛ edwɛkɛ bo la. Kɛ neazo la, ɔhanle bie ɔmaanle Mɛle wɔ mekɛ mɔɔ Maata dendɛle tiale ye la. (Luku 10:38-42) Yɛɛ ɔgyinlanle Mɛle anzi wɔ mekɛ gyɛne nu, wɔ mekɛ mɔɔ awie mɔ deanle ye kɛ yeanzi kpɔkɛ kpalɛ la. (Kenga Maake 14:3-9.) Gyisɛse nwunle adwenle kpalɛ mɔɔ ɛnee Mɛle lɛ la na ɔhanvole ye kɛ: “Yeyɛ debie kpalɛ yemaa me. . . . Yeyɛ mɔɔ ɔbahola la.” Ɔhanle ɔdole ɛkɛ ne bɔbɔ kɛ, bɛbahakye ye atiakunlukɛnlɛma subane ne wɔ “ɛleka biala mɔɔ bɛbabɔ edwɛkpa ɛhye nolo wɔ ewiade amuala la,” na bie a yɛlɛsuzu nwolɛ la. Ɔyɛ anyelielɛ kɛ, Gyisɛse hanle edwɛkpa ne mɔɔ bɛbabɔ ye nolo wɔ ewiade amuala la anwo edwɛkɛ wɔ mekɛ mɔɔ ɔka raalɛ ne atiakunlukɛnlɛma subane ne anwo edwɛkɛ la! Nea kɛzi ye edwɛkɛ ne maanle Mɛle ahonle dɔle ye azule nu a!

17. Maa mekɛ mɔɔ yɛbahola yɛaha adiema raalɛ bie edwɛkɛ yɛamaa ye la anwo neazo.

¹⁷ Saa nwolɛ bahyia a, ɛtendɛ ɛmaa wɔ sunsum nu mediema mraalɛ ɔ? Kɛ neazo la, suzu tɛnlabelɛ ɛhye anwo. Nolobɔlɛma bie mɔ ɛyɛ ye nzonlɛ kɛ, adiema raalɛ bie mɔɔ ɔ hu ɛnle Dasevolɛ la ɛnda ɛmba debiezukoalɛ ndɛ, yɛɛ saa bɛkpɔne ala a ɛnee yehɔ. Bɛyɛ ye nzonlɛ kɛ ɔnda ɔnva ye ngakula ne mɔ ɔmba. Yemɔti bɛtendɛ bɛtia ye kɛ duzu ati a ɔngola ɔnzi ɔ gyakɛ aze wɔ ɔ hu mɔɔ ɔnle diedinli la anwo a? Noko nɔhalɛ ne a le kɛ, adiema raalɛ ne ɛlɛyɛ biala mɔɔ ɔbahola la. Ɔnlɛ ye mekɛ ngyehyɛleɛ zo tumi; yɛɛ ɔ ngomekye ɔngola ɔnzi ngakula ne mɔ anwo kpɔkɛ. Duzu a ɛbahola wɔayɛ a? Saa ɛkanvo adiema raalɛ ne na ɛka kɛzi ɔlɛbɔ mɔdenle la anwo edwɛkɛ ɛkile awie mɔ a, bɛnrɛdendɛ bɛnrɛtia ye.

18. Ndenle gyɛne boni mɔ azo a yɛbahola yɛaboa yɛ mediema mraalɛ a?

¹⁸ Saa yɛyɛ ninyɛne ngyikyi ngyikyi yɛboa yɛ mediema mraalɛ a, bɛbanwu kɛ yɛdwenle bɛ nwo. (1 Dwɔn 3:18) Adiema raalɛ Annette mɔɔ ɛlɛnea ye mame mɔɔ ɛnyi la ka kɛ: “Ɔyɛ a mediema bie mɔ baboa me anzɛɛ bɛto aleɛ bɛbɛlɛ me. Ɛhye maa mete nganeɛ kɛ bɛkulo me yɛɛ me nwo hyia wɔ asafo ne anu.” Jordan  noko nyianle moalɛ. Adiema nrenyia bie boale maanle ɔyɛle ye kale boɛ. Ɔka kɛ: “Saa menwu kɛ me mediema dwenle me boɛyɛlɛ nwo a, ɔmaa me nye die.”

19. Ndenle boni mɔ bieko azo a mgbanyima bahola aboa mediema mraalɛ a?

¹⁹ Asafo nu mgbanyima noko bɔ mɔdenle kɛ bɛbanwu mediema mraalɛ ngyianlɛ. Bɛze kɛ Gyihova kulo kɛ bɛ nee mediema ɛhye mɔ di wɔ adenle kɛnlɛma zo. (Gye. 1:27) Yemɔti bɛsukoa Gyisɛse mɔɔ lɛ ndelebɛbo la, bɛnli mɛla mɔɔ anwo ɛngyia yɛɛ bɛnyɛ kyengye. (Mat. 15:22-28) Saa asafo nu mgbanyima bɔ mɔdenle boa mediema mraalɛ a, ɔbamaa bɛade nganeɛ kɛ Gyihova nee ye ahyehyɛdeɛ ne dwenle bɛ nwo. Mɔɔ Kia daselɛlilɛ ekpunli zo neavolɛ ne dele kɛ ɔbadu yeahɔ awuke fofolɛ nu la, ɔyɛle ngyehyɛleɛ ɛkɛ ne ala ɔmaanle bɛboale ye. Kia ka kɛ: “Ɔmaanle me gyima zo dele bɔkɔɔ. Bɛ edwɛkɛ mɔɔ maa anwosesebɛ yɛɛ kɛzi bɛboale me la maanle menwunle ye wienyi kɛ meboka asafo ne anwo na saa meyia ngyegyelɛ a, bɛbaboa me.”

20-21. Kɛ ɔkɛyɛ na yɛahile kɛ yɛ mediema mraalɛ sonle bolɛ maa yɛ ɛ?

²⁰ Saa yɛnea yɛ asafo ne mɔ anu a, yɛnwu Kilisiene mraalɛ dɔɔnwo mɔɔ bɛbɔ mɔdenle a, na ɔwɔ kɛ yɛboa bɛ. Kɛ mɔɔ yɛnwu ye wɔ Gyisɛse neazo ne anu la, yɛbahola yɛaboa bɛ ɔlua mekɛ mɔɔ yɛbanyia yɛamaa bɛ na yɛanwu bɛ kpalɛ la azo. Ɔwɔ kɛ yɛkile mɔɔ bɛyɛ ye wɔ Nyamenle ɛzonlenlɛ nu la anwo anyezɔlɛ. Yɛɛ ɔwɔ kɛ yɛka bɛ edwɛkɛ yɛmaa bɛ wɔ mekɛ mɔɔ nwolɛ bahyia la.

²¹ Mɔɔ Pɔɔlo dwula ye kɛlata mɔɔ ɔhɛlɛle Wulomuma la, ɔbobɔle Kilisiene mraalɛ ngɔnla bie mɔ aluma. (Wlo. 16:1, 3, 6, 12, 13, 15) Mraalɛ zɔhane mɔ anye liele wɔ mekɛ mɔɔ bɛdele kɛ Pɔɔlo ɛlɛbiza bɛ ahye na ɔlɛkanvo bɛ la. Bɛmaa yɛdayɛ noko yɛboa yɛ mediema mraalɛ mɔɔ wɔ yɛ asafo ne anu la. Saa yɛyɛ zɔ a, ɛnee yɛlɛkile kɛ bɛboka yɛ sunsum nu abusua ne anwo.