1-2. Kɛ mɔɔ 1 Pita 4:7, 8 ka la, duzu a baboa yɛ amaa yɛagyinla ngyegyelɛ nloa a?

BIE a yɛbayia ngyegyelɛ mɔɔ anu yɛ se wɔ mekɛ mɔɔ ‘awieleɛ mekɛ’ ne ɛlɛba ye awieleɛ la. (2 Tim. 3:1) Kɛ neazo la, mɔɔ bɛdole ma bɛwiele wɔ Africa adɔleɛ maanle bie anu la, maanle ne anu hyɛle nwiɔ na basabasayɛlɛ bɔle ɔ bo. Ɔbole siane nsia, ɛnee yɛ mediema mɔɔ de ɛleka mɔɔ bɛlɛko la ɛngola ɛnvinde. Duzu a boale bɛ maanle bɛgyinlanle ngyegyelɛ ɛhye mɔɔ anu yɛ se la anloa a? Bie mɔ nriandile hɔle bɛ mediema sua nu wɔ ɛleka mɔɔ bɛngo la. Adiema nrenyia ko bɔle amaneɛ kɛ: “Wɔ tɛnlabelɛ ɛhye anu, me nye liele kɛ me nee agɔnwolɛma bɔle nu la. Yɛmaanle yɛ nwo anwosesebɛ.”

² Wɔ “anwongyelelɛ kpole” ne anu, yɛ nye balie kɛ yɛlɛ agɔnwolɛma mɔɔ bɛkulo yɛ la. (Yek. 7:14) Yemɔti nwolɛ hyia kɛ yɛnyia agɔnwolɛvalɛ mɔɔ anu yɛ se la ɛnɛ. (Kenga 1 Pita 4:7, 8.) Yɛbahola yɛazukoa dɔɔnwo yɛavi Gyɛlɛmaya mɔɔ ɔ gɔnwo mɔ boale ye maanle ɔnyianle ɔ ti wɔ Gyɛlusalɛm ɛzɛkyelɛ ne anu la edwɛkɛ ne anu. * Kɛzi yɛbahola yɛazukoa Gyɛlɛmaya neazo ne ɛ?

3. (a) Duzu a anrɛɛ bahola amaa Gyɛlɛmaya ade ɔ nwo a? (b) Duzu a Gyɛlɛmaya hanle hilele ye kɛlɛhɛlɛvolɛ Bɛlɛke a, na duzu a vile nu rale a?

³ Gyɛlɛmaya dɛnlanle menli mɔɔ bɛnli nɔhalɛ la avinli wɔ ɛvolɛ 40 anzɛɛ mɔɔ bo zɔ la anu; ɔbayɛ kɛ ye kpalɛzoamra yɛɛ ye mbusuafoɔ bie mɔ mɔɔ bɛvi ye sua zo Anatɔto la boka nwo. (Gyɛ. 11:21; 12:6) Noko yeande ɔ nwo. Nɔhalɛ nu, ɔhanle kɛzi ɔte nganeɛ la ɔhilele ye kɛlɛhɛlɛvolɛ Bɛlɛke mɔɔ ɛnee di nɔhalɛ la, na ɔfale yɛ nwo. (Gyɛ. 8:21; 9:1; 20:14-18; 45:1) Yɛbahola yɛava yɛ adwenle yɛabu ɛlɔlɛ nee ɛbulɛ mɔɔ Gyɛlɛmaya nee Bɛlɛke nyianle maanle bɛ nwo wɔ mekɛ mɔɔ Bɛlɛke ɛlɛkɛlɛ Gyɛlɛmaya edwɛkɛ ne la.​—Gyɛ. 20:1, 2; 26:7-11.

4. Duzu a Gyihova zele Gyɛlɛmaya kɛ ɔyɛ a, na kɛzi gyima ɛhye maanle agɔnwolɛvalɛ mɔɔ ɔ nee Bɛlɛke lɛ la anu mianle ɛ?

⁴ Gyɛlɛmaya vale akɛnrasesebɛ bɔle Yizilayɛma kɔkɔ wɔ mɔɔ ɔnrɛhyɛ ɔbado Gyɛlusalɛm la anwo. (Gyɛ. 25:3) Mekɛ bieko mɔɔ Gyihova maa menli ne anwosesebɛ kɛ bɛnlu bɛ nwo la, ɔzele Gyɛlɛmaya kɛ ɔhɛlɛ ye kɔkɔbɔlɛ ne wɔ nwomamobɔleɛ zo. (Gyɛ. 36:1-4) Mɔɔ Gyɛlɛmaya nee Bɛlɛke ɛlɛbɔ nu ayɛ gyima ɛhye mɔɔ Nyamenle ɛva ɛwula bɛ sa, mɔɔ bie a ɔlile siane dɔɔnwo la, ɔda ali kɛ bɛlile adwelie mɔɔ maa bɛ diedi nu mia la.

5. Kɛzi Bɛlɛke hilele kɛ ɔle agɔnwolɛ kpalɛ ɔmaa Gyɛlɛmaya ɛ?

⁵ Mɔɔ bɛhɛlɛle nwomamobɔleɛ ne bɛwiele la, Gyɛlɛmaya zoanle ɔ gɔnwo Bɛlɛke maanle ɔvale nuhua edwɛkɛ ne ɔdole gua. (Gyɛ. 36:5, 6) Bɛlɛke vale akɛnrasesebɛ yɛle gyima ɛhye mɔɔ esiane wɔ nu la. Nea kɛzi Gyɛlɛmaya anye liele wɔ mekɛ mɔɔ Bɛlɛke hɔle ɛzonlenlɛsua ne alie nwo ɛkɛ na ɔyɛle mɔɔ bɛze ye la. (Gyɛ. 36:8-10) Mɔɔ Dwuda mgbanyima dele mɔɔ Bɛlɛke ɛyɛ la, bɛzele  ye kɛ ɔgenga nwomamobɔleɛ ne anu edwɛkɛ ne kpole ɔhile bɛ! (Gyɛ. 36:14, 15) Mgbanyima ne mɔ hanle edwɛkɛ mɔɔ Gyɛlɛmaya ɛha la hilele Belemgbunli Gyɛhɔyakem. Ɔluakɛ bɛdwenle Bɛlɛke anwo la ati, bɛzele ye kɛ: “Kɔ na ɛ nee Gyɛlɛmaya bɛhɔvea, bɛmmamaa awie nwu ɛleka mɔɔ bɛwɔ la.” (Gyɛ. 36:16-19) Ɛnee ɛhye le folɛdulɛ kpalɛ!

6. Kɛzi Gyɛlɛmaya nee Bɛlɛke yɛle bɛ nyɛleɛ wɔ dwazotia nwo ɛ?

⁶ Mɔɔ Belemgbunli Gyɛhɔyakem dele edwɛkɛ ne la, ɔvale ɛya na ɔyelale nwomamobɔleɛ ne, akee ɔhanle kɛ bɛhye Gyɛlɛmaya nee Bɛlɛke. Noko Gyɛlɛmaya ahonle andu. Ɔvale nwomamobɔleɛ fofolɛ ɔmaanle Bɛlɛke, na ɔhanle ɔmaanle ɔhɛlɛle “edwɛkɛ mɔɔ ɛnee wɔ nwomamobɔleɛ ne azo mɔɔ Dwuda Belemgbunli Gyɛhɔyakem yelale ye wɔ senle ne anu la amuala bieko.”​—Gyɛ. 36:26-28, 32.

7. Duzu a ɔkɛyɛ kɛ ɔzile wɔ mekɛ mɔɔ Gyɛlɛmaya nee Bɛlɛke ɛlɛyɛ gyima abɔ nu la ɛ?

⁷ Menli mɔɔ bɔ nu gyinla sɔnea nloa la ta fa bɛ nwo agɔnwolɛ kpalɛ. Yemɔti, yɛbahola yɛava yɛ adwenle yɛabu kɛzi Gyɛlɛmaya nee Bɛlɛke anye balie subane ngɛnlɛma mɔɔ bɛ nuhua ko biala lale ye ali wɔ mekɛ mɔɔ bɛlɛbɔ nu bɛahɛlɛ nwomamobɔleɛ ne mɔɔ Belemgbunli Gyɛhɔyakem atisesebɛ zɛkyele ye bieko la. Kɛzi yɛbahola yɛanyia neazo mɔɔ mrenyia nɔhavoma nwiɔ ɛhye yɛle la azo nvasoɛ ɛ?

8. Duzu a bahola amaa yeayɛ se kɛ yɛbanyia agɔnwolɛma kpalɛ a, na duzu ati a ɔnle kɛ yɛmaa yɛ sa nu to a?

⁸ Bie a ɔbayɛ se kɛ yɛbaha yɛ ahonle nu edwɛkɛ yɛahile awie mɔ ɔluakɛ bɛ nee yɛ anli ye boɛ wɔ mekɛ bie la ati. (Mrɛ. 18:19, 24) Anzɛɛ bie a yɛbade nganeɛ kɛ yɛnlɛ mekɛ nee anwosesebɛ mɔɔ yɛbava yɛakpondɛ agɔnwolɛma kpalɛ a. Noko ɔnle kɛ yɛmaa yɛ sa nu to. Saa yɛkulo kɛ yɛ mediema gyinla yɛ nzi wɔ sɔnea mekɛ nu a, ɛnee ɔwɔ kɛ yɛnyia bɛ nu anwodozo na yɛka yɛ nzuzulɛ nee yɛ nganeɛdelɛ nwo edwɛkɛ yɛkile bɛ. Ɛhye a le debie mɔɔ anwo hyia mɔɔ bamaa yɛanyia agɔnwolɛma kpalɛ a.​—1 Pita 1:22.

9. (a) Kɛzi Gyisɛse hilele kɛ ɔlɛ ɔ gɔnwo mɔ anu anwodozo ɛ? (b) Kɛzi wɔ ahonle nu mɔɔ ɛbavi ɛ nee awie mɔ ali adwelie la bamaa bɛanyia agɔnwolɛvalɛ kpalɛ ɛ? Maa neazo.

⁹ Gyisɛse hilele kɛ ɔlɛ ɔ gɔnwo mɔ anu anwodozo ɔlua ye ahonle nu mɔɔ ɔvile ɔ nee bɛ lile adwelie la azo. (Dwɔn 15:15) Yɛbahola yɛazukoa ye ɔlua kɛzi yɛte nganeɛ, yɛ ngyegyelɛ nee ninyɛne mɔɔ maa yɛ nye die mɔɔ yɛbaha nwolɛ edwɛkɛ yɛahile awie mɔ la azo. Saa awie ɛlɛtendɛ ahile wɔ a, tie ye kpalɛ, bie a ɛbanwu kɛ bɛ nzuzulɛ, bɛ nganeɛdelɛ nee bɛ bodane le ko. Suzu Cindy, adiema raalɛ bie mɔɔ wɔ ye  ɛvolɛ 20 anu la anwo nea. Ɔvale adiema raalɛ bie mɔɔ wɔ ye ɛvolɛ 60 anu mɔɔ bɛfɛlɛ ye Marie-Louise la agɔnwolɛ. Cindy yɛɛ Marie-Louise bɔle nu hɔle daselɛlilɛ Kule nwonlomɔ biala, na bɛvile bɛ ɛhulolɛ nu bɛlile ninyɛne ngakyile nwo adwelie. Cindy ka kɛ, “Me nye die kɛ me nee me gɔnwo mɔ bali adwelie ahɔ moa, ɔluakɛ ɛhye maa menwu bɛ kpalɛ.” Saa agɔnwolɛma nyia mekɛ di adwelie a, ɔmaa bɛ agɔnwolɛvalɛ ne anu mia. Saa ɛdimoa ɛfi wɔ ahonle nu ɛ nee awie mɔ di adwelie kɛ Cindy a, ɛ nee bɛ agɔnwolɛvalɛ ne anu bamia.​—Mrɛ. 27:9.

10. Kɛ mɔɔ Mrɛlɛbulɛ 27:17 ka la, saa yɛ nee yɛ mediema diedima bɔ nu yɛ gyima a, duzu a fi nu ba a?

¹⁰ Kɛ mɔɔ ɛnee ɔde wɔ Gyɛlɛmaya nee Bɛlɛke afoa nu la, saa yɛ nee yɛ mediema diedima bɔ nu yɛ gyima na yɛnwu bɛ subane ngɛnlɛma ne mɔ a, ɔmaa yɛsukoa bɛ, na ɛhye maa yɛbikye bɛ kpalɛ. (Kenga Mrɛlɛbulɛ 27:17.) Kɛ neazo la, saa ɛ nee awie wɔ daselɛlilɛ nu na ɛnwu kɛ ɔlɛfa akɛnrasesebɛ yeahilehile ye diedi ne anu, anzɛɛ ɔlɛfi ye ahonle nu yeaha Gyihova nee ye bodane ne mɔ anwo edwɛkɛ a, kɛzi ɛte nganeɛ ɛ? Nɔhalɛ nu, ɔmaa ɛbikye ye kpalɛ.

11-12. Maa neazo mɔɔ kile kɛ, ɛzonlenlɛ gyima ne kola maa agɔnwolɛvalɛ mɔɔ yɛ nee awie mɔ lɛ la anu mia la.

¹¹ Suzu neazo nwiɔ mɔɔ maa yɛnwu kɛ, awie mɔ mɔɔ yɛ nee bɛ bayɛ gyima wɔ daselɛlilɛ nu la maa yɛbikye yɛ nwo la. Adiema raalɛ Adeline mɔɔ ɛnyia ɛvolɛ 23 la hanle hilele ɔ gɔnwo Candice kɛ ɔmaa bɛhɔ daselɛlilɛ wɔ azɛlɛsinli mɔɔ bɛnda bɛnyɛ nu gyima la anu. Ɔka kɛ: “Ɛnee yɛkulo kɛ yɛfa anyelielɛ yɛyɛ ɛzonlenlɛ gyima ne kpalɛ. Yemɔti yɛmaanle yɛ nwo anwosesebɛ wɔ sunsum nu.” Kɛzi ɛhye boale bɛ ɛ? Adeline ka kɛ: “Nɔsolɛ biala, yɛbɔ kɛzi yɛte nganeɛ, mɔɔ yɛ nye liele nwo yɛɛ kɛzi yɛnwunle Gyihova moalɛ wɔ yɛ ɛzonlenlɛ gyima ne anu la anwo adawu. Yɛ mu nwiɔ yɛbɔ adawu yɛkɔ moa kpalɛ, na yɛ nuhua ko biala nwunle ɔ gɔnwo kpalɛ.”

 ¹² Laïla yɛɛ Marianne mɔɔ bɛle mediema mraalɛ mɔɔ bɛtɛgyale mɔɔ bɛvi France la vale dapɛne nnu lile daselɛ wɔ Bangui mɔɔ le Central African Republic suakpole la azo. Laïla ka kɛ: “Me nee Marianne yiale ngyegyelɛ dɔɔnwo, noko ɔluakɛ ɛnee yɛkulo yɛ nwo kpalɛ yɛɛ yɛfi ahonle nu yɛdi adwelie la ati, yɛ agɔnwolɛvalɛ ne anu mianle kpalɛ. Mɔɔ menwunle kɛzi ɛnee Marianne te edwɛkɛ bo, kɛzi ɔkulo menli mɔɔ wɔ ɛkɛ ne nee ye mɔdenlebɔlɛ wɔ daselɛlilɛ nu la, ɔmaanle me nye liele ɔ nwo kpalɛ.” Ɔngyia kɛ ɛkɔ maanle gyɛne zo kolaa na wɔanyia nyilalɛ ɛhye mɔ bie. Mekɛ biala mɔɔ ɛ nee adiema bie kɛhɔ daselɛlilɛ la, bɛva nwolɛ adenle ne bɛnwu bɛ nwo kpalɛ na bɛmia agɔnwolɛvalɛ mɔɔ la bɛ avinli la anu.

13. Saa yɛ nee yɛ gɔnwo mɔ yɛ gyima bɔ nu a, ngyegyelɛ boni a ɔyɛ a yɛyia a?

¹³ Saa yɛ nee yɛ gɔnwo mɔ yɛ gyima bɔ nu a, ɔmaa yɛnwu bɛ sinlidɔlɛ noko. Duzu a baboa yɛ amaa yɛali ngyegyelɛ ɛhye anwo gyima a? Suzu Gyɛlɛmaya neazo ne anwo bieko. Duzu a boale ye maanle ɔnwunle ninyɛne mgbalɛ mɔɔ wɔ awie mɔ anwo la na ɔbule ɔ nye ɔguale bɛ sinlidɔlɛ zo a?

14. Duzu a Gyɛlɛmaya zukoale vile Gyihova ɛkɛ a, na kɛzi ɛhye boale ye ɛ?

¹⁴ Gyɛlɛmaya hɛlɛle buluku ne mɔɔ ye duma la zo la, na ɔkɛyɛ kɛ ɔdaye a ɔhɛlɛle Baebolo mbuluku mɔɔ bɛfɛlɛ bɛ Arelemgbunli mɔɔ limoa nee mɔɔ tɔ zo nwiɔ la a. Gyima ɛhye mɔɔ ɔyɛle la maanle ɔnwunle kɛzi Gyihova se alesama mɔɔ ɛnli munli anwunvɔne la. Kɛ neazo la, ɛnee ɔze kɛ, mekɛ mɔɔ Belemgbunli Ehabe nlunle ɔ nwo wɔ ye ninyɛndane nwo la, Gyihova ammaa munzule mɔɔ bado ye sua nu amra la amba wɔ ye mekɛ zo. (1 Arl. 21:27-29) Ɛnee eza Gyɛlɛmaya ze kɛ Manasɛ yɛle ninyɛndane dɔɔnwo tiale Gyihova dɛlale Ehabe, noko Gyihova vale hyɛle ye ɔluakɛ ɔnlunle ɔ nwo la ati. (2 Arl. 21:16, 17; 2 Ek. 33:10-13) Edwɛkɛ ɛhye mɔ boale Gyɛlɛmaya maanle ɔzukoale Gyihova abotane nee ye anwunvɔnezelɛ ne wɔ kɛzi ɔ nee ɔ gɔnwo mɔ lile la anu.​—Edw. 103:8, 9.

15. Kɛzi Gyɛlɛmaya zukoale Gyihova abotane ne wɔ mekɛ mɔɔ ninyɛne hwehwenle Bɛlɛke adwenle la ɛ?

¹⁵ Suzu kɛzi Gyɛlɛmaya nee Bɛlɛke lile wɔ mekɛ mɔɔ ninyɛne hwehwenle ye adwenle mekɛ ekyi wɔ ye gyima ne anu la anwo nea. Gyɛlɛmaya amkpo ɔ gɔnwo ne ɛkɛ ne ala, emomu ɔboale Bɛlɛke ɔlua Nyamenle edwɛkɛ ne mɔɔ ɔvile atiakunlukɛnlɛma nee akɛnrasesebɛ nu ɔhanle ɔhilele ye la azo. (Gyɛ. 45:1-5) Duzu a yɛsukoa yɛfi edwɛkɛ ɛhye anu a?

16. Kɛ mɔɔ Mrɛlɛbulɛ 17:9 kile la, duzu a ɔwɔ kɛ yɛyɛ amaa yɛ agɔnwolɛvalɛ adɛnla ɛkɛ dahuu a?

¹⁶ Nɔhalɛ nu, ɔnle kɛ yɛkpondɛ munlililɛ yɛfi yɛ mediema ɛkɛ. Yemɔti saa yɛnyia agɔnwolɛ mɔɔ anu yɛ se a, ɔwɔ kɛ yɛbɔ mɔdenle yɛmaa ɔtɛnla ɛkɛ ne dahuu. Saa yɛ gɔnwo mɔ yɛ nvonleɛ a, ɔwɔ kɛ yɛgyinla Nyamenle Edwɛkɛ ne azo yɛfa folɛdulɛ mɔɔ fɛta la yɛmaa bɛ. (Edw. 141:5) Saa bɛfo yɛ a, ɔwɔ kɛ yɛfa yɛkyɛ bɛ. Ɛhye anzi, ɔnle kɛ yɛsia yɛbɔ nvonleɛ ne azo bieko. (Kenga Mrɛlɛbulɛ 17:9.) Nea kɛzi nwolɛ hyia kɛ yɛbava yɛ adwenle yɛazie yɛ mediema mɔdenlebɔlɛ zo wɔ awieleɛ mekɛ ɛhye anu yɛadɛla bɛ sinlidɔlɛ a! Saa yɛyɛ ɛhye a, agɔnwolɛvalɛ mɔɔ yɛ nee bɛ lɛ la anu bayɛ se, na yɛbahyia agɔnwolɛma ɛhye mɔ anwo wɔ anwongyelelɛ kpole ne anu.

17. Kɛzi Gyɛlɛmaya hilele kɛ ɔle agɔnwolɛ kpalɛ wɔ ngyegyelɛ mekɛ nu ɛ?

¹⁷ Ngapezonli Gyɛlɛmaya hilele kɛ ɔle agɔnwolɛ kpalɛ wɔ ngyegyelɛ mekɛ nu. Kɛ neazo  la, mɔɔ Yibɛdemɛlɛke mɔɔ ɛnee le kpanyinli wɔ Belemgbunli sua nu liele Gyɛlɛmaya ngoane wɔ bula bie anu la, ɛnee ɔsulo kɛ mgbanyima mɔɔ ɛha la bagyegye ye. Mɔɔ Gyɛlɛmaya dele ɛhye la, yeanyɛ koonwu; yeande nganeɛ kɛ ɔ gɔnwo ne bahola ali ngyegyelɛ ne anwo gyima. Ɛnee bɛdo Gyɛlɛmaya efiade, noko ɔhanle ɛwɔkɛ mɔɔ Gyihova ɛbɔ ɔ gɔnwo Yibɛdemɛlɛke la ɔhilele ye.​—Gyɛ. 38:7-13; 39:15-18.

18. Kɛ mɔɔ Mrɛlɛbulɛ 17:17 ka la, saa yɛ gɔnwo bie kɔ ngyegyelɛ nu a, duzu a ɔwɔ kɛ yɛyɛ a?

¹⁸ Ɛnɛ, yɛ mediema ɛlɛyia ngyegyelɛ ngakyile. Kɛ neazo la, esiane to bɛ nuhua dɔɔnwo. Saa ɔbaye zɔhane a, yɛ nuhua bie mɔ kola die agɔnwolɛma ɛhye mɔ bie wɔ bɛ sua nu. Bie mɔ kola boa wɔ ezukoa afoa nu. Noko yɛ muala yɛbahola yɛazɛlɛ Gyihova kɛ ɔboa yɛ mediema ɛhye mɔ. Saa yɛte kɛ yɛ diema bie asa nu ɛdo a, bie a yɛnrɛnwu edwɛkɛ mɔɔ yɛka a, anzɛɛ mɔɔ yɛyɛ a. Noko yɛ muala yɛbahola yɛayɛ debie. Kɛ neazo la, yɛbahola yɛanyia mekɛ yɛamaa yɛ gɔnwo ne. Yɛbahola yɛavi atiakunlukɛnlɛma nu yɛadie ye wɔ mekɛ mɔɔ ɔlɛtendɛ la. Eza yɛbahola yɛaha ngɛlɛlera mɔɔ yɛ nye die nwo kpalɛ la yɛahile ye. (Aye. 50:4) Mɔɔ hyia la a le kɛ ɛbanyia mekɛ wɔamaa ɛ gɔnwo mɔ wɔ mekɛ mɔɔ bɛhyia ɛ nwo la.​—Kenga Mrɛlɛbulɛ 17:17.

19. Saa yɛnyia agɔnwolɛvalɛ mɔɔ anu mia la ɛnɛ a, kɛzi ɔbaboa yɛ kenle bie ɛ?

¹⁹ Ɔwɔ kɛ yɛbɔ kpɔkɛ ɛnɛ kɛ yɛbamaa agɔnwolɛvalɛ mɔɔ yɛ nee yɛ mediema lɛ la anu amia na yeadɛnla ɛkɛ dahuu. Duzu ati ɔ? Ɔluakɛ yɛ agbɔvolɛ babɔ mɔdenle kɛ bɛdua adalɛ edwɛkɛ zo bɛatete yɛ avinli. Bɛbahulo kɛ yɛko yɛtia yɛ nwo. Noko bɛ ɛvɛlɛ bayɛ mgbane. Bɛnrɛhola bɛnrɛzɛkye ɛlɔlɛ mɔɔ wɔ yɛ avinli la. Debie biala mɔɔ bɛbayɛ la ɛnrɛhola ɛnrɛzɛkye yɛ agɔnwolɛvalɛ ne. Nɔhalɛ nu, agɔnwolɛvalɛ ɛhye mɔ badɛnla ɛkɛ ne ɛnɛ nee dahuu!