Saa ɛkɔ ngyegyelɛ nu a, ɛ nye la kɛ agɔnwolɛ kpalɛ bie bayɛ debie aboa wɔ. Ɔlua ɛhye ati, bie mɔ ka kɛ Nyamenle ɛnle bɛ gɔnwo, ɔluakɛ bɛte nganeɛ kɛ Nyamenle ɛnyɛ debie biala ɛmboa bɛ wɔ bɛ ɛbɛlabɔlɛ nu. Nɔhalɛ edwɛkɛ ne a le kɛ, tɛ kɛ Nyamenle ɛlimoa ɛyɛ ninyɛne dɔɔnwo mɔɔ boa yɛ la ala emomu eza ɔbaye ngyegyelɛ nee amaneɛnwunlɛ mɔɔ yɛyia ye ɛnɛ la yeavi ɛkɛ. Duzu a Nyamenle bayɛ a?

Nyamenle bazɛkye amumuyɛyɛlɛ ɛvileka ne yeava yeadu amumuyɛyɛlɛ bo. Baebolo ne maa yɛnwu ye ɛvileka ne wɔ mekɛ mɔɔ ɔhanle kɛ: “Ewiade amuala wɔ amumuyɛnli ne tumi bo” la. (1 Dwɔn 5:19) “Amumuyɛnli” zɔhane a le Seetan Abɔnsam mɔɔ Gyisɛse vɛlɛle ye kɛ, “mɔɔ nea ewiade ɛhye azo la.” (Dwɔn 12:31) Ngyegyelɛ mɔɔ wɔ ewiade ye anu la amuala vi tumi mɔɔ Seetan ɛnyia ye wɔ alesama anwo zo la. Duzu a Nyamenle bayɛ a?

Gyihova Nyamenle balua ɔ Ra Gyisɛse Kelaese anwo zo “yeazɛkye ahenle mɔɔ kola fa ewule ba, mɔɔ yemɔ a le Abɔnsam la.” (Hibuluma 2:14; 1 Dwɔn 3:8) Nɔhalɛ nu, Baebolo ne ka kɛ Abɔnsam ze ye kɛ “yeha ye mekɛ ekyi bie ala” na bɛazɛkye ye. (Yekile 12:12) Eza Nyamenle baminli amumuyɛma abo zo.​—Edwɛndolɛ 37:9; Mrɛlɛbulɛ 2:22.

Saa yɛ Bɔvolɛ ne tu amumuyɛyɛlɛ bo fi azɛlɛ ye azo wie a, akee ɔbamaa bodane mɔɔ ɔlɛ ɔmaa alesama nee azɛlɛ ne la ara nu. Duzu a yɛ nye bahola ala ye ade a?

Dahuu anzodwolɛ nee banebɔlɛ. “Bɛlɛvoma bava azɛlɛ ne ayɛ bɛ ɛdeɛ, na bɛ nye alie bɛ ɛkpazilɛ nwo.”​—Edwɛndolɛ 37:11.

Aleɛ kpalɛ dɔɔnwo babu. “Maa aleɛ ɛbu azɛlɛ ne azo; maa abɛlɛ ɛzi agole wɔ awoka ne mɔ azo.”​—Edwɛndolɛ 72:16.

Azua mgbalɛ nee gyima mɔɔ yɛ ahunlundwolɛ. “Bɛbasisi azua bɛadɛnla nu, bɛbayɛ vanye egyinli na bɛali nuhua ma ne bie. . . . Me menli ne mɔɔ mekpa nu meye bɛ la badidi bɛ sa anloa gyima nwo bɛ nye alie ahyɛ.”​—Ayezaya 65:21, 22.

Ɛkulo kɛ ɛnwu tɛnlabelɛ ɛhye mɔ ɔ? Ɔnrɛhyɛ biala yɛ sa baha bɛ.

Yɛ muala yɛwɔ anwodolɛ nee ewule tumi bo, noko kenle ko dedee ɔ bo bapɛ. Ɔnrɛhyɛ Nyamenle bamaa nvasoɛ mɔɔ wɔ Gyisɛse ɛkpɔnelɛ afɔlebɔlɛ ne azo la ayɛ gyima, “amaa awie biala mɔɔ kɛnyia diedi wɔ ye nu la bɛanzɛkye ye na yeanyia dahuu ngoane.” (Dwɔn 3:16) Duzu a vi nu bara a?

Anwodolɛ bavi ɛkɛ. “Awie biala mɔɔ wɔ sua ne azo la ɛnrɛha kɛ, ‘Me nwo ɛdo me.’ Bɛbava awie biala mɔɔ wɔ sua ne azo la ɛtane bɛahyɛ ye.”​—Ayezaya 33:24.

Ewule ɛnrɛgyegye alesama bieko. “Ɔbame ewule bɔkɔɔ, na Awulae Nyamenle ne bakyikyi awie biala anye anwo monle.”​—Ayezaya 25:8.

Menli badɛnla aze dahuu. “Ahyɛlɛdeɛ ne mɔɔ Nyamenle fa maa la a le dahuu ngoane wɔ yɛ Awulae Kelaese Gyisɛse ati.”​—Wulomuma 6:23.

Bɛbadwazo mowuamra. “Bɛbadwazo tenlenema nee bɛdabɛ mɔɔ bɛnle tenlenema la bɛavi ewule nu.” (Gyima ne 24:15) Bɛbanyia Nyamenle ɛkpɔnelɛ ahyɛlɛdeɛ ne azo nvasoɛ.

Kɛzi Nyamenle bayɛ ɛhye mɔ amuala ɛ?

Nyamenle balua ye anwuma arane ne, mɔɔ yekpa Kelaese Gyisɛse kɛ zolɛ Belemgbunli la azo yeamaa bodane mɔɔ ɔlɛ ɔmaa alesama nee azɛlɛ ne la ara nu. (Edwɛndolɛ 110:1, 2) Belemgbunlililɛ ɛhye a Gyisɛse hilele ye ɛdoavolɛ ne mɔ kɛ bɛyɛ nwolɛ asɔne kɛ: “Yɛ Ze mɔɔ wɔ anwuma, . . . wɔ Belemgbunlililɛ ɛrɛla” la.​—Mateyu 6:9, 10.

Nyamenle Belemgbunlililɛ ne bali tumi wɔ azɛlɛ ye azo na yeaye nyane nee amaneɛnwunlɛ kɔsɔɔti yeavi ɛkɛ. Belemgbunlililɛ ɛhye a le arane mɔɔ tɛla biala mɔɔ alesama bɛanyia a! Ɛhye ati a Gyisɛse yɛle biala mɔɔ ɔbahola la ɔbɔle “Belemgbunlililɛ ne anwo edwɛkpa ne nolo” wɔ mekɛ mɔɔ ɔwɔ azɛlɛ ye azo na eza ɔzele ye ɛdoavolɛma ne kɛ bɛyɛ bie la.​—Mateyu 4:23; 24:14.

Ɔlua ɛlɔlɛ mɔɔ Gyihova Nyamenle lɛ maa alesama la ati, yebɔ ɛwɔkɛ kɛ ɔbayɛ ninyɛne ɛhye mɔ amuala yeamaa bɛ. Asoo ɛhye ɛmmaa ɛnnyia ɛhulolɛ kɛ ɛbanwu ye na wɔabikye ye ɔ? Na saa ɛyɛ zɔ a duzu nvasoɛ a ɛbanyia a? Edwɛkɛ mɔɔ doa zo la bɛhilehile nu.