ƐZONLENLƐ ngakyile mɔɔ wɔ ewiade, le kɛ Kateleke Asɔne, Buddha ɛzonlenlɛ nee mɔɔ bokɛboka nwo la ɛyɛ ye mɛla kɛ ɔnle kɛ bɛ asɔne mgbanyima nee bɛ ɛsɔfo ne mɔ gya. Wɔ adenle fofolɛ zo, menli dɔɔnwo suzu kɛ mɛla ɛhye boka nwolɛ bie a yemaa asɔne dɔɔnwo ɛsɔfo ne mɔ ɛva bɛ nwo ɛwula nla nu ɛbɛlatane mɔɔ yɛ anyiemgba la anu a.

Yemɔti, ndelebɛbo wɔ nu kɛ yɛbiza kɛ, Asoo Ngɛlɛlera ne ka kɛ ɔnle kɛ Kilisiene azonvolɛ gya ɔ? Amaa yɛabua kpuya ɛhye la, maa yɛzuzu kɛzi ɔbɔle ɔ bo la nee kɛzi yehɔ zo too yɛɛ adwenle mɔɔ Nyamenle lɛ ye wɔ nwolɛ la anwo.

Encyclopædia Britannica ne kile ɛzonlenlɛ nu belazinlililɛ nu kɛ “awie mɔɔ ɛngya na ɔtwe ɔ nwo ɔfi nla nwo ɔlua ye gyima mɔɔ ɔyɛ ye asɔne ne anu la ati.” Pope Benedict XVI tendɛ ahile Wulomu Mgbanyima eku mɔɔ nea asɔne ne azo wɔ 2006 la, ɔvale agyalɛ mɔɔ ɔnle kɛ bɛgya fee la ɔtotole “amaamuo mɔɔ bɔle ɔ bo wɔ Ɛzoanvolɛma ne anzi mekɛ ekyi la” anwo.

Noko akee, ɛnee ɛhye ɛnle ɛzonlenlɛ nu amaamuo wɔ ɛvoya mɔɔ limoa Kilisienema mekɛ zo. Nɔhalɛ nu, ɛzoanvolɛ Pɔɔlo mɔɔ dɛnlanle aze wɔ ɛvoya mɔɔ limoa anu la bɔle diedima kɔkɔ wɔ menli mɔɔ bɛtie “sunsum adalɛma edwɛkɛ” na “bɛtua agyalɛ” la anwo.—1 Timote 4:1-3.

Ɛvoya mɔɔ tɔ zo nwiɔ la anu yɛɛ belazinlililɛ amaamuo ne yele ɔ ti wɔ Adɔleɛ “Kilisiene” asɔne ne mɔ anu a. Kɛ mɔɔ Celibacy and Religious Traditions buluku ne kile la, ɛnee bɛyɛ ɛhye “dahuu ɔlua nla mɔɔ bɛduale ye wɔ Wulomu Tumililɛ ne abo la.”

Wɔ ɛvoya mɔɔ doale zo la anu, asɔne ayiama  nee bɛdabɛ mɔɔ bɛfɛlɛ bɛ Asɔne Selɛma la yɛle mɛla kɛ ɔnle kɛ ɛsɔfo ne mɔ gya. Bɛzuzule kɛ nla bagua bɛ nwo evinli na ɔ nee ɛsɔfolilɛ gyima ne ɛnyia. Noko akee, Encyclopædia Britannica hanle kɛ “kɛyɛ ɛvoya bulu ne anu ɛnee ɛsɔfoma dɔɔnwo yɛɛ ɛsɔfo mgbanyinli bie mɔ lɛ bɛ ye mɔ.”

Bɛyɛle ye mɛla kyengye kɛ ɔnle kɛ ɛsɔfoma gya wɔ Lateran Ayia mɔɔ bɛyɛle wɔ Wulomu wɔ 1123 nee 1139 anu na yerayɛ Kateleke Asɔne ne ngyehyɛleɛ titili too badwu ɛnɛ. Ɔlua ɛhye azo, bɛbɔ asɔne ne ezukoa mɔɔ anrɛɛ ɛsɔfoma mɔɔ bɛgya la bɛava ayɛ wele amaa bɛ mra la anwo bane.

Kɛzi Nyamenle bu belazinlililɛ la da ali wienyi wɔ ye Edwɛkɛ, Baebolo ne anu. Yɛkenga Gyisɛse edwɛkɛ ne mɔɔ fale bɛdabɛ mɔɔ bɛlɛdi belazinli kɛ mɔɔ ɔdaye ɔyɛle la kɛ, “anwuma Belemgbunlililɛ ne ati.” (Mateyu 19:12) Ɛzoanvolɛ Pɔɔlo noko hanle bɛdabɛ mɔɔ bɛkpa kɛ bɛdi ye belazinlililɛ neazo ne anzi ɔlua “edwɛkpa ne ati” la anwo edwɛkɛ.—1 Kɔlentema 7:37, 38; 9:23.

Noko akee, Gyisɛse nee Pɔɔlo anyɛ ye mɛla kɛ azonvolɛ mmagya. Gyisɛse hanle kɛ belazinlililɛ le “ahyɛlɛdeɛ” mɔɔ tɛ ye ɛdoavolɛma kɔsɔɔti a balie ado nu a. Mɔɔ Pɔɔlo kɛlɛ “bɛdabɛ mɔɔ bɛtɛgyale ɛlɛ” la, ɔhanle ye wienyi kɛ: “Menlɛ mɛla biala mɔɔ vi Awulae ɛkɛ ne a, noko mekile me adwenle.”—Mateyu 19:11; 1 Kɔlentema 7:25. ɔ bo ɛkɛ edwɛkɛ ne.

Bieko, Baebolo ne maa yɛnwu kɛ Kilisiene azonvolɛ dɔɔnwo mɔɔ dɛnlanle aze wɔ ɛvoya mɔɔ limoa anu, mɔɔ ɛzoanvolɛ Pita boka nwo la ɛnee le agyalɛ mrenyia. (Mateyu 8:14; Maake 1:29-31; 1 Kɔlentema 9:5) Nɔhalɛ nu, ɔluakɛ ɛnee nla nu ɛbɛlatane ɛbu zo wɔ Wulomu ewiade ne wɔ mekɛ zɔhane la ati, Pɔɔlo hɛlɛle kɛ ɔwɔ kɛ Kilisiene neavolɛ yɛ awie mɔɔ “ɔ ye kokye” na “ɔ mra fa enililɛ bɛlɛ bɛ nwo aze maa ye.”—1 Timote 3:2, 4.

Ɛnee ɛhye ɛnle bɛdabɛ mɔɔ bɛgya noko bɛnla la, ɔluakɛ Baebolo ne ka ye wienyi kɛ ‘ɔwɔ kɛ kunli fa mɔɔ fɛta ɔ ye la maa ye’ na ɔnle kɛ agyalɛma fa nla bɔ “bɛ nwo abokɛ.” (1 Kɔlentema 7:3-5) Ɔda ali kɛ, Nyamenle ɛndua agyalɛ yɛɛ ɔnle mɛla kyengye ɔmmaa Kilisiene azonvolɛ.

Saa belazinlililɛ ɛnle kyengye a, ɛnee duzu ati a Gyisɛse nee Pɔɔlo hanle nwolɛ edwɛkɛ kpalɛ a? Ɔluakɛ belazinlililɛ bahola amaa awie anyia nwolɛ adenle dɔɔnwo abɔ edwɛkpa ne nolo ahile awie mɔ. Bɛdabɛ mɔɔ bɛtɛgyale la bahola adu bɛ nwo amaa ayɛ dɔɔnwo, ɔluakɛ bɛnlɛ ngyegyelɛ mɔɔ agyalɛma lɛ la bie.—1 Kɔlentema 7:32-35.

Suzu David mɔɔ zile kpɔkɛ kɛ ɔgyakyi gyima mɔɔ bɛtua ye kakɛ kpalɛ wɔ Mexico City amaa yeahɔ Costa Rica sua bie azo yeahilehile menli Baebolo ne la neazo ne anwo. Asoo David nwunle kɛ belazinlililɛ a boale ye maanle ɔyɛle zɔ a? Ɔka kɛ, “Ɛhɛe. Ɔnla aze kɛ ɛbadɛnla ɛleka mɔɔ asolo bɛ amaamuo nee kɛzi ɛkɛ ne asetɛnla de la, noko kɛmɔ ɛnee me ngomekye la ati, yeanyɛ se yeamaa me kɛ mebadɛnla ɛkɛ.”

Claudia, Kilisiene raalɛ bie mɔɔ ɔtɛgyale la hɔle kɛ ɔkazonle wɔ ɛleka mɔɔ bɛhyia edwɛkpakavolɛma anwo la. Ɔhanle kɛ: “Me nye die ɛzonlenlɛ mɔɔ mefa memaa Nyamenle la anwo. Saa menwu kɛzi Nyamenle nea me boɛ la a, ɔmaa me diedi nee agɔnwolɛvalɛ mɔɔ me nee ye lɛ la anu mia.”

Ɔnle kɛ belazinlililɛ yɛ adesoa. Claudia toa zo kɛ: “Saa ɛsonle Gyihova Nyamenle kpalɛ a ɛ nye balie ɔnva nwo kɛ wɔgya anzɛɛ ɛtɛgyale la.”—Edwɛndolɛ 119:1, 2.