Awie mɔ nyane bo mɔɔ ɛte la kile kɛ “ɛte bɛ nganeɛdelɛ bo anzɛɛ ɛfa ɛ nwo wɔawula bɛ ngyegyelɛ ne anu kɛ asɛɛ ɛdawɔ a yedo wɔ a.” Rick Hanson mɔɔ le adwenle nu kpɔkɛdelɛ nwo Dɔketa la hanle kɛ, “Bɛvale nganeɛdelɛ ɛhye bɛwole yɛ.”

SUZU NWO: Duzu ati a yɛte nyane yɛmaa awie mɔ yɛtɛla abɔdeɛ biala a? Baebolo ne kile nu kɛ, Nyamenle bɔle sonla kɛ ye ɛsaso. (Mɔlebɛbo 1:26) Bɛbɔle yɛ wɔ Nyamenle ɛsaso zo yemɔti yɛkola yɛsukoa ye na yɛda ye subane mgbalɛ ne bie ali wɔ adenle bie azo. Yemɔti saa menli fi anwunvɔnezelɛ nu boa awie mɔ a, ɛnee bɛlɛda bɛ Bɔvolɛ, Gyihova Nyamenle mɔɔ te nganeɛ maa menli la anwunvɔnezelɛ ne bie ali.​—Mrɛlɛbulɛ 14:31.

Nyamenle te nyane maa yɛ na ɔkyi kɛ ɔbanwu kɛ yɛlɛnwu amaneɛ. Baebolo ne hanle tete Yizilayɛma mɔɔ ɛnee le ngɛkɛlɛ wɔ Yigyibiti na bɛyɛle gyima ɛsesebɛ, na eza bɛvale ɛvolɛ 40 bɛkpɔsale fienemgbole ne azo la anwo edwɛkɛ kɛ: “Bɛ nyanelilɛ kɔsɔɔti yɛle ye nyanelilɛ.” (Ayezaya 63:9) Yɛ ye nzonlɛ kɛ, tɛ kɛ ɛnee Nyamenle ze bɛ ngyegyelɛ ne ala. Ɛnee ɔte bɛ nyane ne bie. Ɔhanle kɛ, “Meze nyane mɔɔ bɛlɛdi la.” (Adendulɛ 3:7, NW) Nyamenle se, “Awie mɔɔ kɛva ɔ sa kɛha bɛ la ɛva ɔ nye kuduarizi ne ɛwɔ baka zo.” (Zɛkalaya 2:8) Saa menli maa yɛdi nyane a, ɔdaye noko ɔdi nyane.

Saa yɛbua yɛ nwo ndɛne na yɛte nganeɛ kɛ yɛnfɛta Nyamenle anwunvɔnezelɛ ne bɔbɔ a, Baebolo ne maa yɛnyia anwodozo kɛ, “Nyamenle le kpole tɛla yɛ ahonle yɛɛ ɔze ninyɛne muala.” (1 Dwɔn 3:19, 20) Nyamenle ze yɛ kpalɛ tɛla kɛzi yɛze yɛ nwo la. Ɔze yɛ tɛnlabelɛ, yɛ nzuzulɛ, nee yɛ nganeɛdelɛ muala kpalɛ. Ɔte yɛ nyanelilɛ bo.

 Ngɛlɛlera ne maa yɛnyia anwodozo

• “Bɛbavɛlɛ, na mebalie bɛ zo; bɛbazu bɛavɛlɛ me, na mebaha kɛ, ‘Medame ɛne’”​—AYEZAYA 58:9.

• “‘Ɔluakɛ medame a meze adwenle mɔɔ meva ye bɛ nwo a. Ɔnle adwenle ɛtane, ɔle adwenle kpalɛ mɔɔ bamaa bɛakpazi, bɛ tɛnlabelɛ nu ayɛ boɛ na bɛanyia anyelazo. Akee bɛbazonle me, na bɛara ɛke bɛarayɛ nzɛlɛlɛ, na mebadie bɛ.’”​—GYƐLƐMAYA 29:11, 12.

• ‘Fa me monle gua toba nu ɛ! Asoo bɛtɛkɛlɛle ye wɔ wɔ buluku ne anu?’​—EDWƐNDOLƐ 56:8.

Saa yɛnwu kɛ Nyamenle te nganeɛ maa yɛ a, asoo ɔbaboa yɛ yeamaa yɛagyinla yɛ ngyegyelɛ nloa ɔ? Suzu Maria anwubielɛ ne anwo nea:

“Mekɛ mɔɔ me ra nrenyia mɔɔ ɛli ɛvolɛ 18 la nyianle kansa na ɛvolɛ nwiɔ anzi ɔwule la, ɔyɛle me nyane kpalɛ na ɛhye maanle mendele nganeɛ kɛ asetɛnla ɛnla aze yɛɛ ninyɛne ɛngɔ ye boɛ. Menvale Gyihova anwo ɛya kɛ yeamboa yeammaa yeande kpɔkɛ la!

“Ɛvolɛ nsia anzi, me gɔnwo ko mɔɔ wɔ asafo ne anu na ɔte nganeɛ ɔmaa me la nyianle alagye diele me wɔ mekɛ mɔɔ meka kɛzi mete nganeɛ kɛ Gyihova ɛngulo me anwo edwɛkɛ la. Ɔyɛle koonwu ɔdiele me dɔnehwele dɔɔnwo na amozi ɔhwenle me adwenle ɔhɔle ngɛlɛlera bie mɔɔ hanle me ahonle la azo. Ngɛlɛlera ne a le 1 Dwɔn 3:19, 20, mɔɔ se: ‘Nyamenle le kpole tɛla yɛ ahonle yɛɛ ɔze ninyɛne muala.’ Ɔhilele nu kɛ Gyihova te yɛ amaneɛnwunlɛ bo.

“Ɛhye anzi bɔbɔ, ɛnee ɔyɛ se ɔmaa me kɛ mebaye ɛya ne meavi me nu! Akee mengengale Edwɛndolɛ 94:19, mɔɔ se: ‘Saa adwenleadwenle bo me nwo zo a, ɛkyekye me rɛle ɛmaa medi fɛlɛko’ la. Mendele nganeɛ kɛ medame ti a bɛhɛlɛle zɔhane edwɛkɛ ne a! Awieleɛ kolaa ne, me nye raliele nwo kɛ mebaha me ngyegyelɛ nwo edwɛkɛ meahile Gyihova, ɔluakɛ meze kɛ ɔtie yɛɛ ɔte ɔbo.”

Nea kɛzi saa yɛnwu kɛ Nyamenle te yɛ edwɛkɛ bo na ɔte nganeɛ ɔmaa yɛ a, ɔmaa yɛ kunlu dwo yɛ nwo a! Ɛnee noko duzu ati a amaneɛnwunlɛ ɛbu zo a? Asoo yɛ ɛtane ti a Nyamenle ɛlɛfa ahwe yɛ nzo ɔ? Asoo Nyamenle bamaa amaneɛnwunlɛ ara awieleɛ ɔ? Edwɛkɛ mɔɔ doɔdoa zo la babua kpuya ɛhye mɔ.