Nyilalɛ Maa Menli Mɔɔ Boa Awie Mɔ Wɔ Bɛ Ngyianlɛ Nu La
Menli dɔɔnwo mɔɔ wɔ ewiade la hyia aleɛ nee dabelɛ nwo. Bie mɔ hyia kenle bie anyelazo nwo. Saa yɛbɔ mɔdenle yɛboa menli ɛhye mɔ a, kɛzi Nyamenle bayila yɛ ɛ?
MƆƆ NGƐLƐLERA NWUANZANWUANZA NE KA LA
“Sonla mɔɔ kɛlo koahweabane la bɔ Gyihova bosea, na Ɔbadua ye kakɛ wɔ mɔɔ ɔyɛ la anwo.”—MRƐLƐBULƐ 19:17.
MƆƆ YƐYƐ A ƐNEE ƆKILE KƐ YƐLƐBOA AWIE MƆ LA
Gyisɛse hanle nrenyia bie mɔɔ nwulema bole ye na bɛgyakyile ye ɛkɛ mɔɔ ɛnee asɛɛ yewu la anwo edwɛkɛ. (Luku 10:29-37) Ɛyɛvolɛ bie mɔɔ lɛ atiakunlukɛnlɛma la boale nrenyia ne mɔɔ ɛnee yeboda la. Ɔnva nwo kɛ ɛnee asolo ɛleka mɔɔ ɔvi la, ɔboale ye.
Tɛ ayile anzɛɛ ezukoa ala a nrenyia atiakunlukɛnlɛma ne vale boale ye a, emomu ɔkyekyele ɔ rɛle ɔmaanle ɔnyianle ahomeka.
Duzu a yɛsukoa yɛfi ndonwo ɛhye anu a? Ɛnee Gyisɛse ɛlɛkilehile yɛ kɛ yɛyɛ biala mɔɔ yɛbahola la yɛva yɛboa menli mɔɔ hyia moalɛ la. (Mrɛlɛbulɛ 14:31) Ngɛlɛlera Nwuanzanwuanza ne maa yɛnwu kɛ, ɔnrɛhyɛ Nyamenle baye ehyia nee amaneɛnwunlɛ kɔsɔɔti avi ɛkɛ. Bie a ɛbabiza kɛ, kɛzi yɛɛ mekɛ boni a Nyamenle bayɛ ɛhye a? Edwɛkɛ mɔɔ doa zo la baha nyilalɛ mɔɔ Bɔvolɛ ne bava amaa wɔ la anwo edwɛkɛ.
