MGBAVOLƐ NEE MBƐLƐRA
10: Maa Awie Mɔ Ɛlie Wɔ Ɛli
MƆƆ ƆKILE LA
Awovolɛ, agɔnwolɛma nee gyima nu mgbanyima lɛ menli mɔɔ bɛdie bɛ bɛdi la anu anwodozo. Bɛdi mɛla zo, bɛdi bɛ ɛwɔkɛ zo yɛɛ bɛka nɔhalɛ dahuu.
DEƐMƆTI ƆHYIA LA
Fane dɔɔnwo ne ala, anwodozo mɔɔ bɛnyia ye wɔ wɔ nu la a bahile fanwodi dodo mɔɔ ɛbanyia ye la.
“Adenle kpalɛ mɔɔ ɛbalua zo wɔamaa wɔ awovolɛ anyia wɔ nu diedi la a le kɛ ɛbahile kɛ wɔnyi yɛɛ ɛkola ɛdi ninyɛne nwo gyima kpalɛ wɔ mekɛ mɔɔ bɛwɔ ɛkɛ anzɛɛ bɛnle ɛkɛ la.”—Sarahi.
BAEBOLO NGYINLAZO: “Bɛhɔ zo bɛnleɛnlea bɛ nu.”—2 Kɔlentema 13:5.
MƆƆ ƐBAHOLA WƆAYƐ LA
Saa ɛkulo kɛ awie mɔ nyia wɔ nu diedi dɔɔnwo anzɛɛ ɛkulo kɛ bɛdie wɔ bɛdi bieko a, edwɛkɛ mɔɔ doɔdoa zo la bahola aboa wɔ.
Di nɔhalɛ. Saa ɛbɔ adalɛ a, diedi mɔɔ awie mɔ lɛ wɔ wɔ nu la baminli. Noko akee saa ɛka nɔhalɛ, titili mekɛ mɔɔ wɔyɛ nvonleɛ bie la a, ɔbamaa awie mɔ anyia wɔ nu diedi.
“Ɔnyɛ se kɛ ɛbali nɔhalɛ wɔ mekɛ mɔɔ ninyɛne ɛlɛkɔ boɛ la. Noko saa ɛka nɔhalɛ na ɔbamaa ɛ nyunlu agua aze bɔbɔ a, ɔbamaa diedi mɔɔ awie mɔ lɛ wɔ wɔ nu la ayɛ kpole.”—Caiman.
BAEBOLO NGYINLAZO: “Yɛkulo kɛ yɛfa nɔhalɛlilɛ yɛbɔ yɛ ɛbɛla wɔ debie biala anu.”—Hibuluma 13:18.
Maa bɛnyia wɔ nu anwodozo. Wɔ neɛnleanu ko mɔɔ bɛyɛle ye wɔ U.S. la anu, kɔmpɛlɛ mɔɔ bɛfa menli gyima nu la ɛya ko ngyɛnu 78 hanle kɛ, “debie ko mɔɔ hyia amaa bɛava awie gyima nu la a le kɛ ɔwɔ kɛ ɔyɛ awie mɔɔ bɛlɛ ye nu anwodozo.” Saa ɛsukoa kɛ ɛbamaa awie mɔ anyia wɔ nu anwodozo kɛkala a, ɛyɛ kpanyinli a ɛbanyia zolɛ nvasoɛ.
“Saa meyɛ me gyima kpalɛ na meammaa me awovolɛ angɔ zo angakye me a, bɛnwu ye. Mekɛ dɔɔnwo ne ala, saa meyɛ ye zɔ a, ɔmaa bɛnyia me nu anwodozo.”—Sarah.
BAEBOLO NGYINLAZO: “Melɛ anwodozo kɛ ɛbayɛ mɔɔ mebiza la, yɛɛ meze kɛ ɛbayɛ wɔamaa yeabo zolɛ bɔbɔ.”—Faelimɔn 21.
Nyia abotane. Ɔnyɛ se kɛ menli banwu kɛ ngakula ɛlɛnyi ayɛ ndendenle na bɛ nwo ayɛ se, noko saa bɛlɛnyi wɔ nganeɛdelɛ nee adwenle nu a, ɔdie mekɛ na awie mɔ anwu ye. Ɛhye ati a ɔhyia kɛ ngakula nyia abotane la.
“Ɔhyia mekɛ nee mɔdenlebɔlɛ na wɔ awovolɛ nee awie mɔ anyia wɔ nu diedi. Ɔti, saa ɛkɔ zo ɛyɛ ninyɛne mgbalɛ a, ngyikyingyikyi bɛbanyia wɔ nu anwodozo.”—Brandon.
BAEBOLO NGYINLAZO: “Bɛwula . . . abotane.”—Kɔlɔsaema 3:12.
Bie A Eza Ɛ Nye Balie
NVONINLI MƆƆ BƐDOLƆ LA VIDIO
Kɛzi Me Nee Me Awovolɛ Bɛadendɛ Ɛ?
Kɛ ɔkɛyɛ na ɛ nee wɔ awovolɛ adendɛ wɔ mekɛ mɔɔ ɛngulo kɛ ɛtendɛ la ɛ?
