AWOVOLƐ
5: Adwelielilɛ
MƆƆ ƆKILE LA
Saa adwelielilɛ bayɛ kpalɛ a, ɔwɔ kɛ bɛ nee bɛ mra ne mɔ amuala ka bɛ nzuzulɛ nee kɛzi bɛte nganeɛ la anwo edwɛkɛ bɛkile bɛ nwo.
DEƐMƆTI ƆHYIA LA
Ɔbahola yeayɛ se kɛ ɛ nee ngakula mɔɔ bɛlɛnyi la bali adwelie. Mekɛ mɔɔ ɛ mra ne mɔ le ngyikyi la, ɛnee bɛka debie biala bɛkile wɔ. Noko kɛkala mɔɔ bɛlɛnyi la, bɛ nee wɔ ɛndendɛ dɔɔnwo, ɔti ɛnze mɔɔ wɔ bɛ ti anu nee kɛzi bɛte nganeɛ la. Ɔle kɛ asɛɛ ɛ mra ne mɔ gyi azule kpole bie anzi nehane na ɛdawɔ noko ɛgyi ɔ nyunlu ɛke la. Saa ɔzɔho kɛ ɛ mra ne mɔ ɛyɛ bɛ ti anwo mgbanyinli bɔbɔ a, mekɛ ɛhye a ɔwɔ kɛ ɛ nee bɛ di adwelie dɔɔnwo kpalɛ a!
MƆƆ ƐBAHOLA WƆAYƐ LA
Tie ɛ ra wɔ mekɛ biala mɔɔ ɔkulo kɛ ɔtendɛ la. Saa ɔkulo kɛ ɔ nee wɔ tendɛ nɔɔzo bɔbɔ a, tie ye.
“Wɔannea a ɛbaha kɛ, ‘Bɔ zo mɔɔ wɔnyia nwo kɛ ɛtendɛ a? Aleɛ hyenle too la yɛ muala a yɛwɔ ɛke a!’ Noko saa yɛ mra ne mɔ kulo kɛ bɛ nee yɛ tendɛ a, duzu ati a ɔwɔ kɛ ɔgyegye yɛ a? Asoo tɛ mɔɔ awovolɛ kɔsɔɔti anye la kɛ bɛ mra bayɛ la ɛne?”—Lisa.
“Mekulo kɛ meda ndɛ, noko mekɛ mɔɔ mehola me nee me mra ne mɔ ɛli adwelie kpalɛ la le nɔɔzo.”—Herbert.
BAEBOLO NGYINLAZO: “Awie biala mmakpondɛ ɔ ngome ye boɛyɛlɛ, ɔkpondɛ awie mɔ noko ɛdeɛ.”—1 Kɔlentema 10:24.
Mmamaa ninyɛne twehwe wɔ adwenle. Selɛ ko hanle kɛ: “Ɔdwu mekɛ ne bie a, me mra ne mɔ nee me ɛlɛtendɛ la ɛnee me adwenle wɔ ninyɛne gyɛne zo. Na bɛkola bɛnwu kɛ mendie mɔɔ bɛlɛka la!”
Saa ɛdawɔ noko ɛmaa TV anzɛɛ fonu twehwe wɔ adwenle a, anrɛɛ nua ye anzɛɛ fa fonu ne to ɛleka bie. Tie mɔɔ ɛ ra ne ɛlɛka la na bu ye kɛ ɔhyia ye, saa bɔbɔ ɔzɔho kɛ nwolɛ ɛngyia wɔ a.
“Ɔwɔ kɛ yɛmaa yɛ mra ne mɔ nwu kɛ, kɛzi bɛte nganeɛ la hyia yɛ. Saa bɛannwu ye zɔhane a, ɔnrɛmaa bɛnrɛha bɛ edwɛkɛ bɛnrɛhile yɛ anzɛɛ bɛbakpondɛ moalɛ wɔ ɛleka bie.”—Maranda.
“Saa adwenle mɔɔ ɛ ra ne lɛ la ɛnva adenle nu bɔbɔ a, mmafa nwolɛ ɛya.”—Anthony.
BAEBOLO NGYINLAZO: “Bɛnlea kɛzi bɛtie edwɛkɛ la boɛ.”—Luku 8:18.
Fa nwolɛ adenle gyɛne mɔɔ ɛbanyia la di gyima. Saa ɛ nee ngakula bɔ adawu wɔ mekɛ mɔɔ bɛlɛyɛ debie la a, bɛfi bɛ ahonle nu bɛtendɛ tɛla kɛ ɛbadɛnla bɛ aze.
“Saa yɛde kale nu yɛlɛkɔ ɛleka a, yɛ nee bɛ bɔ adawu. Kɛmɔ yɛde bɛ foa ko la ati, yɛkola yɛ nee bɛ di adwelie kpalɛ tɛla mekɛ mɔɔ bɛdede yɛ nyunlu la.”—Nicole.
Aleɛlilɛ mekɛ noko maa bɛnyia adenle bɛbɔ adawu.
“Saa yɛlɛdi aleɛ nɔsolɛ nu a, yɛ nuhua biala nyia adenle ka mɔɔ yeangɔ boɛ nee mɔɔ ɔ nye liele nwo wɔ alehyenlɛ ne anu la anwo edwɛkɛ. Ɛhye maa yɛyɛ ko na ɔmaa yɛ nuhua ko biala nwu kɛ ɔnle kɛ ɔfa ninyɛne mɔɔ ɛlɛgyegye ye la ɔfea ɔ nwo.”—Robin.
BAEBOLO NGYINLAZO: ‘Yɛ ye ndɛ tie edwɛkɛ, mmapele ɛ nwo ɛtendɛ.’—Gyemise 1:19.
Bie A Eza Ɛ Nye Balie
ƐZINZALƐ ARANE
Tendɛ Kile Ɛ Ra Mɔɔ Ɛlɛnyi La—Mɔɔ Bɛnli Butule A
Ɛ ra mɔɔ ɛlɛnyi la ɛlɛnwu kɛzi ɔde la na ɔhyia ɛleka mɔɔ ɔbahola yeaha mɔɔ ɔze la. Kɛ ɔkɛyɛ na wɔaboa ɛ?
BAEBOLO NGILEHILELƐ
Moalɛ Maa Ngakula Mɔɔ Bɛlɛnyi Yɛɛ Mgbavolɛ Nee Mbɛlɛra
Nea kɛzi Baebolo ne bahola aboa wɔ yeamaa wɔagyinla tɛnlabelɛ nee ngyegyelɛ mɔɔ ngakula mɔɔ bɛlɛnyi yɛɛ mgbavolɛ nee mbɛlɛra ta yia anloa la.
