AGYALƐMA
1: Anwofamaa
MƆƆ ƆKILE LA
Kunlima nee yelɛma mɔɔ lɛ anwofamaa wɔ bɛ agyalɛ ne anu la bu ye kɛ ɔle ngyehyɛleɛ mɔɔ ɔwɔ kɛ ɔtɛnla ɛkɛ ne dahuu a. Ɛhye maa bɛte nganeɛ kɛ bɛlɛ banebɔlɛ. Bɛ nuhua ko biala lɛ anwodozo kɛ ɔ gɔnwo badɛnla agyalɛ ne abo, saa bɔbɔ bɛlɛyia ngyegyelɛ a.
Agyalɛma bie mɔ tɛte bɛ agyalɛ ne abo ɔlua mɔɔ bɛ gɔnwo mɔ anzɛɛ bɛ mbusuafoɔ baha la ati. Noko mɔɔ le kpalɛ la a le anwofamaa mɔɔ gyi ɛlɔlɛ nee ɛbulɛ zo la.
BAEBOLO NGYINLAZO: “Ɔnle kɛ kunli fi ɔ ye anwo.”—1 Kɔlentema 7:11.
“Saa ɛlɛ anwofamaa a, ɛnrɛva ɛya ndɛndɛ. Ɛbava ɛtane wɔahyɛ ndɛndɛ yɛɛ saa ɛfo a ɛbakpa kyɛlɛ ndɛndɛ. Ɛbabu ngyegyelɛ kɛ ɔtenda bɛ gyakɛ anu ala, na ɔnle debie mɔɔ ɔwɔ kɛ bɛgyinla zo bɛbɔ ewole a.”—Micah.
DEƐMƆTI ƆHYIA LA
Saa agyalɛma mɔɔ ɛnlɛ anwofamaa la yia ngyegyelɛ a, bɛta bɛka kɛ, ‘Yɛnfɛta yɛ nwo’ na bɛkpondɛ debie bɛgyinla zo bɛbɔ ewole.
“Menli dɔɔnwo kɔ agyalɛ mɔɔ bɛ adwenle a le kɛ saa ninyɛne angɔ boɛ a bɛbabɔ ewole. Saa menli fa adwenle zɛhae kɔ agyalɛ a, mɔlebɛbo ne ala ɛkola ɛnwu kɛ bɛnlɛ anwofamaa.”—Jean.
MƆƆ ƐBAHOLA WƆAYƐ LA
NEƐNLEA WƆ NU
Saa akɛsakɛsa ba bɛ avinli a . . .
-
Ɔyɛ a ɛnu ɛ nwo kɛ ɛgyale ɛ hu anzɛɛ ɛ ye ne ɔ?
-
Asoo ɔyɛ a wɔ adwenle kɔ awie gyɛne nwo zo kɛ ɛkulo kɛ ɛgya yemɔ ɔ?
-
Asoo ɔyɛ a ɛka edwɛkɛ le kɛ, “Mebabɔ wɔ ewole” anzɛɛ “Mekakpondɛ awie mɔɔ ɔkulo me la” ɔ?
Saa ɛbua kpuya ɛhye mɔ anu ko anzɛɛ ɔ muala kɛ ɛhɛe a, ɛnee kɛkala a le mekɛ mɔɔ ɔwɔ kɛ ɛmaa wɔ anwofamaa ne yɛ kpole a.
BƐ MU NWIƆ BƐZUZU ƐHYE ANWO
-
Asoo anwofamaa mɔɔ wɔ yɛ agyalɛ ne anu la ɛha aze ɔ? Saa ɔle zɔ a, duzu ati ɔ?
-
Duzu a yɛbahola yɛayɛ ye kɛkala amaa anwofamaa mɔɔ yɛlɛ la ayɛ kpole a?
NZUZULƐ BIE MƆ ƐNE
-
Ɔyɛ a kɛlɛ ɛlɔlɛ edwɛkɛ bie maa ɛ hu anzɛɛ ɛ ye
-
Da wɔ anwofamaa ne ali ɔlua ɛ hu anzɛɛ ɛ ye nvoninli mɔɔ ɛbava wɔazie ɛkponle mɔɔ ɛtɛnla nwo wɔ gyima nu la azo
-
Saa ɛkɔ gyima kenle ko biala anzɛɛ saa ɛnle ɛ hu anzɛɛ ɛ ye anwo ɛkɛ a, anrɛɛ fɛlɛ ye
BAEBOLO NGYINLAZO: “Mɔɔ Nyamenle ɛha ɛbɔ nu la, mmamaa awie biala kpakye nu.”—Mateyu 19:6.
