AGYALƐMA
2: Bɛbɔ Nu Bɛyɛ Ninyɛne
MƆƆ ƆKILE LA
Saa kunli nee yelɛ bɔ nu yɛ ninyɛne wɔ agyalɛ ne anu a, ɔmaa bɛyɛ kɛ alopile kavolɛ nee ye boavolɛ mɔɔ bɛlɛ adendulɛ nwo ngyehyɛleɛ ko la. Saa ngyegyelɛ ba bɔbɔ a, bɛ nuhua ko biala dwenle ɔ gɔnwo anwo na tɛ ɔ ngome —Mateyu 19:6.
“Agyalɛ ɛnle kɛ debie mɔɔ sonla ko ala a yɛ la. Ɔwɔ kɛ kunli nee yelɛ bɔ nu yɛ ninyɛne amaa agyalɛ ne ayɛ kpalɛ.”—Christopher.
DEƐMƆTI ƆHYIA LA
Saa akɛsakɛsa ba a, kɛ anrɛɛ bɛbaziezie la, agyalɛma mɔɔ ɛmbɔ nu ɛnyɛ ninyɛne la tendɛ tia bɛ nwo. Bɛmaa edwɛkɛ ngyikyi ngyikyi kakyi yɛ edwɛkɛ kpole.
“Debie mɔɔ hyia kpalɛ wɔ agyalɛ nu la a le kɛ bɛ mu nwiɔ bɛbabɔ nu bɛayɛ ninyɛne. Saa me nee me hu ɛmbɔ nu ɛnyɛ ninyɛne a, ɔbamaa yɛayɛ kɛ menli nwiɔ mɔɔ de sua ko anu la, na tɛ agyalɛma—saa ɔba ye wɔ kpɔkɛzilɛ mɔɔ ɔhyia la anwo a, asolo adwenle mɔɔ awie biala lɛ a.”—Alexandra.
MƆƆ ƐBAHOLA WƆAYƐ LA
NEƐNLEA WƆ NU
-
Asoo mebu ezukoa mɔɔ menyia la kɛ “ɔ muala le me ɛdeɛ”?
-
Asoo ɔwɔ kɛ mefi me hu anzɛɛ me ye anwo ɛkɛ kolaa na meahola mealie me menle kpalɛ ɔ?
-
Asoo mengulo kɛ mebikye me hu anzɛɛ me ye mbusuafoɔ ɔnva nwo kɛ yemɔ ɔkulo bɛ kpalɛ la ɔ?
BƐ MU NWIƆ BƐZUZU ƐHYE ANWO
-
Ninyɛne boni mɔ a yɛ mu nwiɔ yɛkola yɛbɔ nu yɛyɛ ye kpalɛ a?
-
Boni a yɛbahola yɛanyia anyuhɔlɛ wɔ nu a?
-
Duzu a yɛbahola yɛayɛ amaa yɛahɔ zo yɛabɔ nu yɛayɛ ninyɛne a?
NZUZULƐ BIE MƆ ƐNE
-
Mmabu ɛ hu anzɛɛ ɛ ye kɛ ɔle kɛ awie mɔɔ ɛ nee ye ɛlɛbɔ table tennis mɔɔ awie biala gyi ɛleka gyɛne na ɛkulo kɛ ɛdi ɔ nwo zo konim la. Ɔwɔ kɛ bɛ mu nwiɔ bɛyɛ team ko na bɛbɔ bɛtia ngyegyelɛ.
-
Mmadwenle kɛ, ‘Kɛ ɔkɛyɛ na meali konim ɛ?’ emomu nyia adwenle kɛ, ‘Kɛ ɔkɛyɛ na yɛ mu nwiɔ yɛali konim ɛ?’
“Mmafa wɔ adwenle ɛsie awie mɔɔ ye edwɛkɛ yɛ fɛ nee mɔɔ ye edwɛkɛ ɛnyɛ fɛ la azo. Anzodwolɛ nee koyɛlɛ mɔɔ bara bɛ agyalɛ ne anu la hyia tɛla yemɔ.”—Ethan.
BAEBOLO NGYINLAZO: “Bɛmmadwenle bɛ ngomekye bɛ boɛyɛlɛ nwo, emomu bɛdwenle awie mɔ noko ɛdeɛ nwo.”—Felepaema 2:3, 4.
