MGBAVOLƐ NEE MBƐLƐRA
9: Sonla Holɛ Ko Mɔɔ Ɛde La
MƆƆ ƆKILE LA
Tɛ wɔ duma nee kɛzi menli nwu wɔ la ala a kile sonla holɛ ko mɔɔ ɛde a. Emomu mɔɔ ɔhyia wɔ, mɔɔ ɛdie ɛdi nee wɔ subane noko boka nwo. Nɔhalɛ nu, kɛzi ɛde wɔ wɔ nu nee kɛzi menli nwu wɔ la a ka bɔ nu maa yɛnwu sonla holɛ ko mɔɔ ɛde la a.
DEƐMƆTI ƆHYIA LA
Saa ɛze sonla holɛ ko mɔɔ ɛde la kpalɛ a, ɔbamaa wɔagyinla wɔ diedi ne anzi tɛla kɛ ɛbamaa ɛ tipɛnema anyia ɛ nwo zo tumi.
“Menli dɔɔnwo le kɛ aboduaba mɔɔ bɛfa bɛsie sotɔɔ nyunlu la. Tɛ aboduaba ne mɔ a kpa tɛladeɛ mɔɔ bɛfa bɛwula bɛ la a, emomu awie mɔ a fa wula bɛ a.”—Adrian.
“Mezukoa kɛzi mebayɛ mɔɔ le kpalɛ la bɔbɔ wɔ mekɛ mɔɔ ye ɛyɛlɛ yɛ se la anu. Mekola mekile menli mɔɔ bɛle me gɔnwo mɔ kpalɛ la ɔlua kɛzi bɛyɛ bɛ ninyɛne nee kɛzi meyɛ me ninyɛne wɔ mekɛ mɔɔ me nee bɛ wɔ la.”—Courtney.
BAEBOLO NGYINLAZO: “Bɛmmasukoa ewiade ɛhye anu menli ne, emomu bɛhakyi bɛ subane na bɛnyia adwenle fofolɛ.”—Wulomuma 12:2.
MƆƆ ƐBAHOLA WƆAYƐ LA
Dwenle sonla holɛ ko mɔɔ ɛde kɛkala nee mɔɔ ɛkulo kɛ ɛyɛ la anwo ɔlua ninyɛne mɔɔ ɛbɔ mɔdenle wɔ nu, mɔɔ ɛmbɔ mɔdenle wɔ nu yɛɛ mɔɔ ɛdie ɛdi mɔɔ ɛbazuzu nwo la anwo. Adenle kpalɛ mɔɔ ɛbahola wɔalua zo wɔayɛ ɛhye la a le kɛ ɛbabua kpuya ɛhye mɔ mɔɔ doɔdoa zo la.
Mɔɔ ɛbɔ mɔdenle wɔ nu: Ɛlolɛ ahyɛlɛdeɛ boni mɔ a melɛ a? Ninyɛne boni mɔ a mebɔ nwolɛ mɔdenle kpalɛ a? (Kɛ neazo la: Medi mekɛ zo ɔ? Mekola mekomo me nwo zo ɔ? Mekulo gyima ɛsesebɛ ɔ? Meyɛ nyele ɔ?) Ninyɛne mgbalɛ boni mɔ a meyɛ a?
NZUZULƐ BIE MƆ ƐNE: Asoo ɔyɛ se kɛ ɛbanwu ninyɛne mgbalɛ mɔɔ ɛyɛ la ɔ? Biza wɔ awovolɛ anzɛɛ ɛ gɔnwo bie mɔɔ ɛdie ye ɛdi la maa ɔha ninyɛne mɔɔ ɛbɔ nwolɛ mɔdenle nee deɛmɔti ɔka ye zɔ la ɔhile wɔ.
BAEBOLO NGYINLAZO: “Bɛmaa awie biala ɛnleɛnlea ɔdaye ye nyɛleɛ nu, na yeanyia debie yeava yeadu ɔ nwo, na ɔmmafa ɔ nwo ɔto awie anwo.”—Galeehyeama 6:4.
Mɔɔ ɛmbɔ mɔdenle wɔ nu: Me subane boni mɔ a ɔwɔ kɛ medi nwolɛ gyima a? Mekɛ boni a ɔnyɛ se kɛ mebayɛ debie mɔɔ ɛnle kpalɛ a? Tɛnlabelɛ boni mɔ anu a ɔhyia kɛ mekomo me nwo zo kpalɛ a?
BAEBOLO NGYINLAZO: “Saa yɛka kɛ, ‘Ɛtane ɛnle yɛ nwo a,’ ɛnee yɛlɛbɛlɛbɛla yɛ nwo.”—1 Dwɔn 1:8.
Mɔɔ ɛdie ɛdi: Ɛbɛlabɔlɛ nwo ngyinlazo boni a mefa mebɔ me ɛbɛla a na duzu ati ɔ? Medie Nyamenle medi ɔ? Daselɛ boni a maa medie medi kɛ ɔwɔ ɛkɛ a? Nyɛleɛ boni mɔ a mebu bɛ kɛ ɔndenrɛ a, na duzu ati ɔ? Duzu a medie medi kɛ ɔbazi kenle bie a?
BAEBOLO NGYINLAZO: “Adwenlenubukelɛ bazinza wɔ, na adwenlenunwunlɛ abɔ ɛ nwo bane.”— Mrɛlɛbulɛ 2:11.
Bie A Eza Ɛ Nye Balie
KPUYA 10 MƆƆ MGBAVOLƐ NEE MBƐLƐRA BIZA LA ANWO MUALƐ
Kɛzi Mede Ɛ?
Ɛnwu wɔ subane, anwosesebɛ, sinlidɔlɛ nee bodane a ɔbaboa wɔ yeamaa wɔazi kpɔkɛ mɔɔ nrɛlɛbɛ wɔ nu wɔ mekɛ mɔɔ ɛbayia sɔnea la.
MGBAVOLƐ NEE MBƐLƐRA BIZA KƐ
Kɛ Ɔkɛyɛ Na Meakpa Awie Mɔɔ Mebazukoa Ye La Ɛ?
Awie mɔɔ ɛsukoa ye la bahola aboa wɔ yeamaa wɔahoati ngyegyelɛ, wɔadwu wɔ bodane nwo na yeawie wɔ boɛ wɔ ɛbɛlabɔlɛ nu. Noko nwane a ɔwɔ kɛ ɛdi ye neazo nzi a?
