Ɛbahola Wɔakpo Adwenle Mɔɔ Ɛndenrɛ La

KƐZI ɛbu ngyegyelɛ mɔɔ ɛyia bɛ la ɛ? Ɛnɛ, nwomama dɔɔnwo die di kɛ mualɛ mɔɔ ɛbava wɔamaa wɔ kpuya ɛhye anwo la a bahile saa ɛlɛ adwenle kpalɛ anzɛɛ ɛlɛ adwenle mɔɔ ɛndenrɛ la a. Yɛ muala yɛyia sɔnea ngakyile mɔɔ anu yɛ se la wɔ ɛbɛlabɔlɛ nu, yɛ nuhua bie mɔ ɛdeɛ anu yɛ se kpalɛ. Duzu ati a bie mɔ bɔ mɔdenle gyinla ngyegyelɛ mɔɔ anu yɛ se la anloa na bɛkɔ nyunlu noko bie mɔ ɛngola ɛngyinla ɔ nloa ɛ?

Kɛ neazo la, fa ye kɛ ɛlɛkpondɛ gyima wɔayɛ. Ɛhɔle interview noko bɛanva wɔ. Kɛkala mɔɔ bɛanva wɔ la, kɛzi ɛbade nganeɛ ɛ? Bie a, ɛbade nganeɛ kɛ bɛkpo wɔ, ɛnrɛnyia gyima ɛlɛ na wɔaha wɔahile ɛ nwo kɛ, ‘Menlie menli kɛ bɛbava awie mɔɔ le kɛ medame la gyima nu. Menrɛnyia gyima ɛlɛ.’ Anzɛɛ, bie a ɛbamaa ngyegyelɛ ko ɛhye anyia wɔ ɛbɛlabɔlɛ kɔsɔɔti azo tumi na wɔadwenle nwo kɛ, ‘Nvasoɛ biala ɛnle me nwo zo. Me nwo ɛngyia awie biala.’ Adwenle ɛhye mɔ amuala ɛndenrɛ.

Ko Tia Adwenle Mɔɔ Ɛndenrɛ

Kɛ ɔkɛyɛ na wɔaho wɔatia adwenle mɔɔ ɛndenrɛ la ɛ? Adenle mɔɔ limoa mɔɔ hyia la a le kɛ ɛbanwu adwenle ne mɔ mɔɔ ɛndenrɛ la. Mɔɔ tɔ zo nwiɔ la a le kɛ ɛbaho wɔatia bɛ. Bɔ mɔdenle kɛ ɛbanwu deɛmɔti bɛanva wɔ gyima nu la. Kɛ neazo la, asoo amgba bɛanva wɔ gyima nu ɔluakɛ awie biala ɛngulo kɛ ɔbava wɔ gyima nu la ati ɔ? Anzɛɛ asoo gyimamenle ne ɛlɛkpondɛ awie mɔɔ lɛ ɔ sa anloa gyima bie mɔɔ ɛnlɛ bie la ɔ?

Saa ɛbɔ mɔdenle kɛ ɛbade edwɛkɛ ne amuala abo a, ɛbanwu ye kɛ adwenle mɔɔ ɛnyianle la ɛndenrɛ. Saa bɛkpo wɔ wɔ ɛleka ko a, asoo yemɔ kile kɛ ɛnrɛyɛ boɛ ɛlɛ ɔ. Anzɛɛ duzu ati a ɛndwenle ɛleka gyɛne wɔ wɔ ɛbɛlabɔlɛ nu​—le kɛ wɔ sunsum nu bodane, abusua asetɛnla anzɛɛ agɔnwolɛvalɛ mɔɔ wɔnyia anyuhɔlɛ wɔ nu la anwo a? Sukoa kɛ ɛbakpo adwenle mɔɔ ɛndenrɛ mɔɔ ɛlɛ ye wɔ kenle bie anwo la na nwu ye kɛ tɛnlabelɛ ne ɛnrɛzɛkye kɛ mɔɔ ɛsuzu la. Asoo amgba ɛbahola wɔanwu ye kɛ ɛnrɛnyia gyima ɛlɛ ɔ? Ninyɛne dɔɔnwo wɔ ɛkɛ mɔɔ ɛbahola wɔayɛ amaa wɔakpo adwenle mɔɔ ɛndenrɛ la.

Nyia Adwenle Kpalɛ Mɔɔ Baboa Yeamaa Wɔdwu Wɔ Bodane Nwo La

Kenlensa ye ala, menli mɔɔ yɛ neɛnleanu la ɛhile anyelazo nu wɔ adenle kɛnlɛma zo, ɔwɔ nu kɛ bɛ ngilenu ne ɛngɔ moa ɛdeɛ. Bɛka kɛ anyelazo kile diedi mɔɔ ɛlɛ kɛ ɛbahola wɔadwu wɔ bodane nwo la. Kɛ mɔɔ yɛbanwu ye wɔ edwɛkɛ mɔɔ doa zo anu la, anyelazo kile ninyɛne dɔɔnwo, noko ɔzɔho kɛ kɛzi bɛhile nu la baboa wɔ ndenle dɔɔnwo azo. Saa yɛfa yɛ adwenle yɛsie yɛ anyelazo zo a, ɔbahola yeaboa yɛ yɛamaa yɛanyia adwenle kpalɛ na yɛadwu yɛ bodane nwo.

Amaa yɛalie yɛali kɛ yɛbadwu yɛ kenle bie bodane nwo la, ɔwɔ kɛ yɛsukoa kɛ yɛbava bodane yɛazie yɛ nye zo na yɛapele yɛadwu nwo. Saa ɛnwu ye kɛ ɛhye ɛyɛlɛ yɛ se maa wɔ a, ɔbahyia kɛ ɛsuzu bodane mɔɔ ɛfa ɛsie ɛ nye zo la anwo kpalɛ. Mɔɔ limoa, asoo ɛlɛ bodane? Ɔnyɛ se fee kɛ yɛbamaa ninyɛne mɔɔ yɛyɛ ye alehyenlɛ biala la ali yɛ ti somaa mɔɔ yɛnrɛdwenle ninyɛne mɔɔ anwo hyia yɛ kpalɛ wɔ ɛbɛlabɔlɛ nu la anwo a. Mɔɔ ɔfale ninyɛne mɔɔ anwo hyia mɔɔ yɛbava yɛalimoa yɛ ɛbɛlabɔlɛ nu anwo la, eza yɛnwu kɛ Baebolo ne hanle dole ɛkɛ ne dɛba kɛ: “Nwu ninyɛne mɔɔ hyia kpalɛ la.”​—Felepaema 1:10.

Saa yɛnwu ninyɛne mɔɔ hyia yɛ la a, ɔnrɛyɛ se kɛ yɛbava bodane mɔɔ bie a le sunsum nu bodane, yɛ abusua asetɛnla anzɛɛ yɛ gyima yɛazie yɛ nye zo. Nwolɛ hyia kɛ alimoa ne yɛnrɛva bodane dɔɔnwo yɛnrɛzie yɛ nye zo emomu ɔwɔ kɛ yɛfa bodane mɔɔ yɛze kɛ yɛbadwu nwo la yɛsie yɛ nye zo. Saa ɔyɛ se kɛ yɛbadwu bodane bie anwo a, ɔkola ɔmaa yɛ sa nu to. Fane dɔɔnwo ne ala, ɔle kpalɛ kɛ yɛbahyɛ bodane mgbole mɔɔ ɔkyɛ na bɛadwu nwo la anu ngyikyi ngyikyi.

Tete ɛrɛlɛ bie ka kɛ, “Saa ɛlɛ ɛhulolɛ kɛ ɛyɛ debie a, ɛbakpondɛ ndenle wɔalua zo wɔali nwolɛ gyima.” Ɔzɔho kɛ nɔhalɛ bie wɔ edwɛkɛ ɛhye anu. Saa yɛfa bodane yɛsie yɛ nye zo a, ɔwɔ kɛ yɛnyia ɛhulolɛ ne na yɛbɔ mɔdenle yɛdwu nwo. Saa yɛdwenledwenle kɛzi bodane ne anwo hyia nee nvasoɛ mɔɔ saa yɛdwu nwo a yɛbanyia la anwo a, ɔbamaa yɛanyia anwosesebɛ yɛapele yɛadwu nwo. Nɔhalɛ nu, yɛbayia ngyegyelɛ ɛdeɛ, noko ɔnle kɛ yɛmaa yemɔ si yɛ adenle.

Noko akee, eza ɔwɔ kɛ yɛdwenle ndenle ngakyile mɔɔ yɛbalua zo yɛadwu yɛ bodane ne mɔ anwo la anwo. C. R. Snyder mɔɔ ɛzukoa nvasoɛ mɔɔ wɔ anyelazo zo la ka kɛ, ɔwɔ kɛ awie dwenle ndenle ngakyile mɔɔ ɔbalua zo yɛadwu ye bodane nwo la anwo. Ɔti, saa adenle ko anyɛ boɛ a, yɛbahola yɛalua adenle fofolɛ zo yɛali nwolɛ gyima.

Snyder eza hanle kɛ ɔwɔ kɛ yɛsukoa kɛzi yɛbava bodane fofolɛ yɛazie ko agyakɛ anu la. Saa debie si yɛ adenle na yɛandwu yɛ bodane bie anwo na yɛdwenledwenle nwo a, ɔbamaa yɛ sa nu ado. Noko akee, saa yɛfa bodane fofolɛ mɔɔ yɛbahola yɛadwu nwo la yɛsie ɔ gyakɛ anu a, ɔbamaa yɛanyia anyelazo.

Ɛhye anwo neazo wɔ Baebolo ne anu. Ɛnee Belemgbunli Devidi kulo kɛ ɔsi ɛzonlenlɛsua ɔmaa Gyihova, ye Nyamenle ne. Noko Nyamenle zele Devidi kɛ, ɔ ra Sɔlɔmɔn a banyia nwolɛ adenle zɔhane a. Kɛ anrɛɛ Devidi bahɔ zo adwenledwenle ɛhye anwo na yeali nyane la, ɔvale ye adwenle ɔziele bodane gyɛne zo. Ɔvile ye anwosesebɛ kɔsɔɔti anu ɔboɔboale ezukoa nee ninyɛne mɔɔ ɔ ra ne bahyia amaa yeawie gyima ɛhye yɛ la anloa.​—1 Arelemgbunli 8:17-19; 1 Edwɛkɛsisilɛ 29:3-7.

Saa yɛkpo adwenle mɔɔ ɛndenrɛ na yɛnyia adwenle kpalɛ mɔɔ baboa yeamaa yɛadwu yɛ bodane nwo na ɔmaa yɛ anyelazo ne yɛ kpole bɔbɔ a, ɔdwu mekɛ ne bie a, yɛbahyia anyelazo nwo. Duzu ati ɔ? Ɔluakɛ yɛnlɛ ninyɛne mɔɔ to yɛ mɔɔ maa yɛ anyelazo wie la anu dɔɔnwo azo tumi. Saa yɛdwenledwenle ngyegyelɛ mɔɔ to alesama le kɛ ehyia, konle, nzisi, anwodolɛ nee ewule la anwo a, kɛ ɔkɛyɛ na yɛahɔ zo yɛanyia adwenle kpalɛ ɛ?

[Nvoninli]

Saa bɛanva wɔ wɔ gyima bie mɔɔ ɛkulo la anu a, asoo ɛnyia adwenle kɛ ɛnrɛnyia gyima ɛlɛ?

[Nvoninli]

Belemgbunli Devidi yɛle nzenzaleɛ wɔ ye bodane ne mɔ anu