Nienwu A Ɛbanyia Nɔhalɛ Anyelazo A?

WƆ WATE ne ɛgyinla, ɔnyɛ gyima bieko. Saa ɛkulo kɛ ɛyɛ ye boɛ a, ɛleka dɔɔnwo wɔ ɛkɛ mɔɔ ɛbahola wɔahɔ a. Menli mɔɔ yɛ wate boɛ la zonle na bɛ muala bɛka kɛ bɛbahola bɛayɛ ye boɛ, noko bie mɔ edwɛkɛ ɛnle ko. Noko saa ɛnwu ye kɛ ahenle mɔɔ yɛle wate zɔhane wɔ ɛvolɛ dɔɔnwo mɔɔ ɛze ɛhɔ la de wɔ kpalɛ ne azo ɛ? Bieko, ɔlɛ ɛhulolɛ kɛ ɔbayɛ ye boɛ yeamaa wɔ mɔɔ ɛnrɛdua ɛhwee a. Kɛkala, ɔnrɛyɛ se kɛ ɛbanwu ɛleka mɔɔ ɛbava wɔahɔ la, ɔnle zɔ ɔ?

Kɛkala, akee fa wate zɔhane toto wɔ anyelazo mɔɔ ɛlɛ la anwo. Menli dɔɔnwo anyelazo ɛlɛwie wɔ ewiade ɛhye mɔɔ ngyegyelɛ ɛbu zo la anu, ɔti saa ɛnwu ye kɛ wɔ anyelazo ɛlɛwie a, nienwu a ɛbakpondɛ moalɛ wɔavi a? Menli dɔɔnwo ka kɛ bɛlɛ nwolɛ moalɛ, noko mɔɔ bɛka la ɛndɔ ɛnzolɛ nu yɛɛ bɛko bɛtia bɛ nwo. Ɔti, duzu ati a ɛngɔ Ahenle mɔɔ bɔle alesama na ɔmaanle bɛ tumi mɔɔ maa bɛkola bɛnyia anyelazo la ɛkɛ a? Baebolo ne ka kɛ, “ɔ nee yɛ nuhua ko biala avinli anwa” yɛɛ ɔlɛ ɛhulolɛ kɛ ɔbaboa yɛ.​—Gyima ne 17:27; 1 Pita 5:7.

Mɔɔ Anyelazo Kile Kpalɛ La

Mɔɔ Baebolo ne ka ye wɔ anyelazo nwo la kɔ moa tɛla mɔɔ dɔketama nee abɔdeɛ nwo nrɛlɛbɛvolɛma ka ye ɛnɛ la. Wɔ aneɛ mɔɔ bɛlimoale bɛvale bɛhɛlɛle Baebolo ne la anu, edwɛkɛ agbɔkɛ mɔɔ bɛhile ɔ bo “anyelazo” la kile kɛ ɛfa abotane wɔahendɛ debie kpalɛ bie mɔɔ ɛ nye la ye ade la. Anyelazo gyi ninyɛne titili nwiɔ azo. Mɔɔ limoa, ɔwɔ kɛ yɛmaa yɛ nye da debie kpalɛ bie ade yɛɛ mɔɔ tɔ nwiɔ, ɔwɔ kɛ yɛnyia daselɛ mɔɔ maa yɛdie yɛdi kɛ zɔhane deɛ ne bara la. Anyelazo mɔɔ Baebolo ne ka nwolɛ edwɛkɛ la ɛnle ɛlalɛ bie ala. Daselɛ mɔɔ di munli la wɔ nwo.

Wɔ ɛhye anu, anyelazo le kɛ diedi, ɔwɔ kɛ ɔgyinla daselɛ kpalɛ zo​—tɛ mɛlɛbɛla zo. (Hibuluma 11:1) Noko akee, Baebolo ne maa yɛnwu kɛ ngakyile wɔ diedi nee anyelazo avinli.​—1 Kɔlentema 13:13.

Kɛ neazo la: Saa ɛka ɛkile ɛ gɔnwo kpalɛ bie kɛ ɔboa wɔ a, ɛlɛ anyelazo kɛ ɔbaboa wɔ. Wɔ anyelazo ne gyi daselɛ zo, ɔluakɛ ɛlɛ diedi wɔ ɛ gɔnwo ne anu​—ɛze ye kɛ yela atiakunlukɛnlɛma nee nyele ali wɔ mekɛ mɔɔ ɛze ɛhɔ la. Wɔ diedi ne nee wɔ anyelazo ne yɛ gyima bɔ nu, noko ngakyile wɔ nu. Kɛ ɔkɛyɛ na wɔanyia anyelazo zɛhae bie wɔ Nyamenle anu ɛ?

Mɔɔ Maa Yɛnyia Anyelazo La

Nyamenle a le anyelazo kpalɛ ne ɛvileka a. Wɔ tete ne, ɛnee bɛfɛlɛ Gyihova kɛ ɔle “Yizilayɛ anyelazo.” (Gyɛlɛmaya 14:8) Anyelazo kpalɛ mɔɔ ye menli ne nyianle la vi ye ɛkɛ; ɔti ɛnee ɔle bɛ anyelazo. Ɛnee anyelazo zɔhane ɛnle ɛlalɛ ala. Nyamenle maanle bɛ anyelazo ne anwo daselɛ mɔɔ di munli. Wɔ ɛvoya dɔɔnwo mɔɔ ɔ nee bɛ luale la anu, ɔbɔle bɛ ɛwɔkɛ ngakyile na ɔlile zo. Yizilayɛma adekilevolɛ Dwɔhyua zele bɛ kɛ: “Bɛze ye wienyi . . . kɛ ɛwɔkɛ mgbalɛ kɔsɔɔti mɔɔ Gyihova bɛ Nyamenle ne bɔle bɛ la anu edwɛkɛkpɔkɛ ko bɔbɔ anga nu.”​—Dwɔhyua 23:14.

Ɛvolɛ apenle dɔɔnwo ɛpɛ nu, noko Gyihova tɛdi ye ɛwɔkɛ zo. Ɛwɔkɛ mɔɔ Nyamenle ɛbɔ nee kɛzi bɛrale nu la anwo edwɛkɛ dɔɔnwo wɔ Baebolo ne anu. Kɛmɔ Nyamenle bɔ ɛwɔkɛ a ɔdi zo la ati, ɔyɛ a bɛka ye ɛwɔkɛ ne mɔ anwo edwɛkɛ kɛ asɛɛ bɛra nu dɛbadɛba.

Ɛhye ati a yɛkola yɛka ye wɔ Baebolo ne anwo kɛ ɔle anyelazo buluku la. Mekɛ mɔɔ ɛlɛsukoa kɛzi Nyamenle nee Alesama lile anwo debie la, deɛmɔti ɛlɛ anyelazo wɔ ye nu la bayɛ kpole. Ɛzoanvolɛ Pɔɔlo hɛlɛle kɛ: “Debie biala mɔɔ bɛhɛlɛ bɛdo ɛkɛ ne la, bɛhɛlɛ bɛmaa yɛ ɛhilehilelɛ, amaa yɛalua yɛ kpundiigyinlanlɛ nee Ngɛlɛlera ne anu arɛlekyekyelɛ zo yɛanyia anyelazo.”​—Wulomuma 15:4.

Anyelazo Boni A Nyamenle Fa Maa Yɛ A?

Mekɛ boni a ɛhyia anyelazo nwo kpalɛ a? Asoo tɛ mekɛ mɔɔ yɛ kulovolɛ bie kɛwu la? Noko akee wɔ menli dɔɔnwo afoa nu, mekɛ mɔɔ bɛ kulovolɛ bie kɛwu la a bɛ anyelazo wie a. Asoo debie wɔ ɛkɛ mɔɔ maa anyelazo wie tɛla ewule? Ewule doa yɛ nuhua ko biala. Ɔnva nwo mɔdenle mɔɔ yɛbɔ kɛ yɛnriandi ye la, yɛngola yɛnzi ye adenle. Ɔfɛta bɔkɔɔ kɛ Baebolo ne fɛlɛ ewule kɛ “kpɔvolɛ mɔɔ li amozi” la.​—1 Kɔlentema 15:26.

Kɛzi yɛbahola yɛanyia anyelazo wɔ ewule mekɛ nu ɛ? Baebolo ngyɛnu ko ne ala mɔɔ fɛlɛ ewule kpɔvolɛ mɔɔ li amozi la eza ka kɛ ‘bɛbazɛkye ye.’ Gyihova Nyamenle anwo yɛ se tɛla ewule. Yela ye ali fane dɔɔnwo kɛ ɔlɛ tumi ɔtɛla ewule. Wɔ adenle boni azo? Ɔlua menli mɔɔ bɛwule mɔɔ ɔdwazole bɛ la azo. Baebolo ne ka mekɛ ngakyile ngɔnla mɔɔ Nyamenle vale ye tumi dwazole menli mɔɔ ɛwu la.

Wɔ mekɛ titili bie anu, Gyihova maanle Gyisɛse, ɔ Ra ne tumi ɔmaanle ɔdwazole ɔ gɔnwo kpalɛ bie mɔɔ bɛfɛlɛ ye Lazalɛse mɔɔ ɛnee yewu yeli kenle nna la. Gyisɛse anyɛ ɛhye wɔ fealera nu, ɔyɛle ye wɔ bagua nu ɔmaanle menli nwunle ye.​—Dwɔn 11:38-48, 53; 12:9, 10.

Bie a ɛbabiza kɛ, ‘Duzu ati a bɛdwazole menli a? Bɛyɛle mgbanyinli na bɛwule bieko, ɔnle zɔ ɔ?’ Ɛhɛe, bɛwule. Noko, ɔlua ewudwazo edwɛkɛ ɛhye mɔ mɔɔ yɛkola yɛfa yɛ nwo yɛto zo la ati, yɛbahola yɛamaa yɛ nye ala bɔkɔɔ kɛ, yɛ alɔvolɛ mɔɔ bɛwu la bɛazia ara ngoane nu bieko; yɛlɛ daselɛ mɔɔ ɔti yɛdie ɛhye yɛdi a. Wɔ adenle fofolɛ zo, yɛlɛ nɔhalɛ anyelazo.

Gyisɛse hanle kɛ: “Mame a mele ewudwazo ne nee ngoane ne a.” (Dwɔn 11:25) Ɔdaye a Gyihova bamaa ye tumi yeamaa yeadwazo mowuamra wɔ ewiade amuala a. Gyisɛse hanle kɛ: ‘Mekɛ ɛlɛba mɔɔ bɛdabɛ mɔɔ bɛwɔ ngakyelɛ nla ne mɔ anu la kɔsɔɔti bade Kelaese ane na bɛavinde a.’ (Dwɔn 5:28, 29) Ɛhɛe, menli mɔɔ ɛlɛda wɔ nla ne mɔ anu la lɛ anyelazo kɛ bɛbadwazo bɛ bɛara ngoane nu wɔ paladaese azɛlɛ zo.

Ngapezonli Ayezaya hanle ewudwazo ɛhye anwo edwɛkɛ wɔ adenle mɔɔ ka ahonle la azo kɛ: “Mowuamra bara ngoane nu, bɛbava bɛ nwonane ne bɛadwazo. O bɛmɛ mowuamra, bɛdunwue na bɛva anyelielɛ bɛdo edwɛne! Ɔluakɛ [Gyihova] ɛbɔlɛ mɔɔ tɔ bɛ nwo zo la le wienyi, na ɔbada mowuamra anwo zo.”​—Ayezaya 26:19, Baebolo.

Asoo ɛhye ɛnkyekye yɛ rɛle ɔ? Wɔ adenle bie azo, mowuamra wɔ tɛnlabelɛ kpalɛ nu kɛ mɔɔ adɔma mɔɔ la ye mame akunlu lɛ banebɔlɛ kpalɛ la. Nɔhalɛ nu, menli mɔɔ bɛwɔ nla ne mɔ anu la wɔ Nyamenle Tumivolɛ Bedevinli ne ngakyelɛ nu. (Luku 20:37, 38) Ɔnrɛhyɛ bɛbazia bɛara ngoane nu bieko. Na kɛ mɔɔ adɔma mɔɔ bɛbawo ye la mbusuafoɔ fa anyelielɛ nea ye ade la, zɔhane ala a yɛbava anyelielɛ yɛalie menli mɔɔ bɛbadwazo bɛ wɔ ewiade mɔɔ yɛ anyelielɛ la anu a! Ɔti, ɛbahola wɔanyia anyelazo bɔbɔ wɔ ewule mekɛ nu.

Mɔɔ Anyelazo Bahola Ayɛ Amaa Wɔ La

Pɔɔlo hilele yɛ nvasoɛ mɔɔ wɔ anyelazo zo la. Ɔhanle anyelazo nwo edwɛkɛ kɛ ɔboka sunsum nu konle ninyɛne ne anwo​—bulalɛ kyɛlɛ ne. (1 Tɛsalonaekama 5:8) Duzu ati a Pɔɔlo vale anyelazo totole kyɛlɛ nwo a? Tete ne, ɛnee sogyanli ta wula bulalɛ kyɛlɛ wɔ mekɛ mɔɔ ɔlɛkɔ konle la. Kyɛlɛ ɛhye bɔ sogyanli ne ati anwo bane. Duzu a ɛnee Pɔɔlo ɛlɛkile a? Kɛ mɔɔ kyɛlɛ bɔ sogyanli ati anwo bane la, zɔhane ala a diedi bɔ yɛ adwenle ne anwo bane a. Saa yɛnyia anyelazo kpole wɔ Nyamenle bodane ne mɔ anu a, yɛyia ngyegyelɛ a, yɛ anzodwolɛ ɛnrɛzɛkye. Yɛ nuhua boni a ɛngyia kyɛlɛ ɛhye bie anwo a?

Pɔɔlo eza vale ndonwo fofolɛ hilehilele kɛzi diedi fale Nyamenle ɛhulolɛdeɛ nwo la anu. Ɔhɛlɛle kɛ: “Anyelazo ɛhye mɔɔ yɛlɛ la le kɛ sɛkɛ maa yɛ ɛkɛla, ɔgyi ye pi yɛɛ ɔgyi ye kpundii.” (Hibuluma 6:19) Kɛmɔ ɛnee Pɔɔlo ɛbutu nyevile nu fane dɔɔnwo na ɔnyianle ɔ ti la ati, ɛnee ɔze nvasoɛ mɔɔ wɔ sɛkɛ zo la kpalɛ. Saa ahumu ɛlɛbɔ meli bie a, melikavoma ne dwula bɛ sɛkɛ ne wɔ nyevile ne anu. Saa sɛkɛ ne kɔsɔ debie nu wɔ nyevile ne abo a, ɔmmaa ahumu ne ɛmbɔ ye ɛngɔ na yeahɔbɔ bolɛ bie anu.

Zɔhane ala a saa Nyamenle ɛwɔkɛ ne mɔ maa yɛ anyelazo ne “gyinla kpundii” a, anyelazo zɔhane bamaa yɛahola yɛangyinla ngyegyelɛ mɔɔ le kɛ ahumu la anloa a. Gyihova ɛbɔ ɛwɔkɛ kɛ ɔnrɛhyɛ ɔbaye konle, basabasayɛlɛ, alɔbɔlɛlilɛ nee ewule bɔbɔ yeavi ɛkɛ. (Nea ɛlɛka mɔɔ wɔ mukelɛ 10 la.) Saa yɛfa yɛ nye yɛto anyelazo ɛhye azo a, ɔbabɔ yɛ nwo bane na yeamaa yɛanyia anwosesebɛ yɛava Nyamenle ɛbɛlabɔlɛ ngyinlazo ne mɔ yɛabɔ yɛ ɛbɛla na yɛakpo basabasayɛlɛ nee ɛbɛlatane mɔɔ ɛbu zo wɔ ewiade ɛhye anu la anwo.

Anyelazo mɔɔ Gyihova fa maa la eza fale ɛdawɔ mumua ne ɛ nwo. Ɔkulo kɛ ɛ nye die wɔ ɛbɛlabɔlɛ nu kɛ mɔɔ ɛnee ɔkpondɛ la. Ɔkulo kɛ “ɔdie menli ngakyile kɔsɔɔti.” Kɛzi? Mɔɔ limoa, ɔwɔ kɛ yɛ nuhua ko biala nyia “nɔhalɛ ne anwo nɔhalɛ ndelebɛbo.” (1 Timote 2:4) Buluku ɛhye yɛvoma ne kulo kɛ ɛnyia ndelebɛbo mɔɔ fale nɔhalɛ mɔɔ wɔ Nyamenle Edwɛkɛ ne anu mɔɔ bamaa wɔanyia ngoane la anwo. Anyelazo mɔɔ Nyamenle bamaa wɔanyia la le kpalɛ tɛla anyelazo biala mɔɔ ewiade ne bamaa wɔanyia la.

Ɔlua anyelazo ɛhye mɔɔ Nyamenle fa maa la ati, ɔnle kɛ ɛte nganeɛ kɛ ɛnlɛ moalɛ, ɔluakɛ Nyamenle bahola amaa wɔanyia anwosesebɛ mɔɔ ɛhyia amaa wɔadwu wɔ bodane biala mɔɔ nee ye ɛhulolɛdeɛ yia la anwo. (2 Kɔlentema 4:7; Felepaema 4:13) Asoo tɛ anyelazo zɛhae bie a ɛkpondɛ a? Ɔti saa ɛhyia anyelazo nwo na ɛlɛkpondɛ bie a, mmamaa ɛ sa nu to. Anyelazo wɔ ɛkɛ. Ɛbahola wɔanyia ye!

[Ɛlɛka/Nvoninli]

Deɛmɔti Yɛbahola Yɛanyia Anyelazo La

Edwɛkɛ ɛhye mɔ mɔɔ gyi Ngɛlɛlera ne azo la bahola amaa wɔ anyelazo ayɛ kpole:

▪ Nyamenle ɛva kenle bie mɔɔ yɛ anyelielɛ la ɛbɔ ɛwɔkɛ.

Ye Edwɛkɛ ne ka kɛ, azɛlɛ ye azo amuala bayɛ paladaese na alesama abusua ne ava anyelielɛ nee koyɛlɛ adɛnla zo.​—Edwɛne 37:11, 29; Ayezaya 25:8; Yekile 21:3, 4.

▪ Nyamenle ɛngola ɛmbɔ adalɛ.

Ɔkyi adalɛbɔlɛ kɔsɔɔti. Gyihova le nwuanzanwuanza dahuu, ɔti ɔnrɛhola ɔnrɛbɔ adalɛ ɛlɛ.​—Mrɛlɛbulɛ 6:16-19; Ayezaya 6:2, 3; Taetɛse 1:2; Hibuluma 6:18.

▪ Nyamenle lɛ tumi kpole.

Gyihova angomekye a ɔle tumivolɛ bedevinli a. Debie biala ɛnle ɛkɛ mɔɔ bahola azi ye adenle kɛ ɔbamaa ye ɛwɔkɛ ne mɔ ara nu a.​—Ɛzɛdɔso 15:11; Ayezaya 40:25, 26.

▪ Nyamenle kulo kɛ ɛtɛnla aze dahuu.

​—Dwɔn 3:16; 1 Timote 2:3, 4.

▪ Nyamenle lɛ yɛ nu anyelazo.

Ɔsi kpɔkɛ kɛ ɔnrɛva ye adwenle ɔnrɛzie yɛ nvonleɛ zo, emomu ɔfa ye adwenle ɔsie yɛ subane mgbalɛ nee yɛ mɔdenlebɔlɛ zo. (Edwɛne 103:12-14; 130:3; Hibuluma 6:10) Ɔlɛ anyelazo kɛ yɛbayɛ mɔɔ le kpalɛ la na saa yɛyɛ zɔ a ɔmaa ɔ nye die.​—Mrɛlɛbulɛ 27:11.

▪ Nyamenle ɛbɔ ɛwɔkɛ kɛ ɔbamaa wɔadwu wɔ bodane mɔɔ nee ye ɛhulolɛdeɛ yia la anwo.

Ɔnle kɛ ye azonvolɛ te nganeɛ kɛ bɛnlɛ moalɛ biala. Nyamenle fi ye ɛhulolɛ nu fa ye sunsum nwuanzanwuanza ne, ye tumi kpole ne mɔɔ tɛla biala la boa yɛ.​—Felepaema 4:13.

▪ Saa ɛnyia Nyamenle anu anyelazo a, ɔnrɛye ɛ rɛle ɔnrɛdo ɛ sa nu.

Nyamenle ka nɔhalɛ yɛɛ yɛkola yɛfa yɛ nwo yɛto ɔ nwo zo dahuu, ɔnrɛmaa ɛ sa ɛnrɛzi aze ɛlɛ.​—Edwɛne 25:3.

[Nvoninli]

Kɛ mɔɔ kyɛlɛ bɔ sogyanli ati anwo bane la, zɔhane ala a diedi bɔ yɛ adwenle ne anwo bane a

[Nvoninli]

Le kɛ sɛkɛ la, anyelazo mɔɔ gyi ye pi la maa yɛkola yɛngyinla ngyegyelɛ nloa

[Credit Line]

Courtesy René Seindal/Su concessione del Museo Archeologico Regionale A. Salinas di Palermo