EWIADE KONLE I mɔɔ ɔzile ɛvolɛ 1914 la, manle menli dɔɔnwo nwunle kɛ Baebolo Sukoavoma ɛnle afoa biala. (Aye. 2:2-4; Dwɔn 18:36; Ɛfɛ. 6:12) Duzu a dole Nyamenle azonvolɛ mɔɔ ɛnee wɔ Britain la ɛ?

Britain lile mɛla wɔ 1916 ne anu kɛ, ɔwɔ kɛ mrenya mɔɔ ɛli ɛvolɛ 18 kɔdwu 40 mɔɔ bɛtɛgyale la kɔ konle. Ɛnee mɛla ɛhye maa bɛdabɛ mɔɔ bɛ “ɛzonlenlɛ anzɛɛ bɛ diedi ti” bɛngulo kɛ bɛkɔ konle la nyia bɛ ti. Arane ne bukele kɔɔto ngyikyi dɔɔnwo amaa bɛanwu bɛdabɛ mɔɔ ɔnle kɛ bɛkɔ bie la.

Ɔwɔ nuhua kɛ ɛnee mɛla ɛhye wɔ ɛkɛ ɛdeɛ, noko bɛhanle kɛ Baebolo Sukoavoma ɛhɔ sogya na ɔluakɛ bɛangɔ la ati bɛhyele bɛ nuhua 40 bɛguale efiade, na bɛvale nuhua 8 bɛhɔle konle wɔ France. Nyɛleɛ ɛhye mɔɔ ɛngile pɛlepɛlelilɛ la manle mediema mɔɔ ɛnee wɔ Britain la hɛlɛle kɛlata hɔmanle Herbert Asquith mɔɔ maanle kpanyinli ne ɛnle ɛkɛ a ɔdaye a ɔwɔ ɛkɛ la. Bɛhanle kɛ efiade ne mɔɔ yeva mediema ne mɔ yehɔgua la ɛnle ye adenle zo, na menli 5,500 vale bɛ sa wulale kɛlata bie mɔɔ bɛhɛlɛle bɛhɔkpale ye kyɛlɛ la abo.

Akee amaneɛbɔlɛ rale kɛ menli mɔtwɛ ne mɔɔ bɛ nee bɛ hɔle France la bɛbahu bɛ, ɔluakɛ bɛangɔ konle la ati. Noko mekɛ mɔɔ bɛ nee mediema ne mɔ hɔle ahunleɛ la, akee bɛyɛle ye kɛ bɛhɔgua bɛ efiade ɛvolɛ bulu. Bɛvale bɛ bɛziale na bɛhɔguale bɛ efiade wɔ England.

Mekɛ mɔɔ konle ne gyinlanle nu kpalɛ la, bɛvale agyalɛ mrenya noko bɛbokale nwo. Bɛbɔle Henry Hudson mɔɔ ɛnee le Baebolo Sukoavo na eza ɔle dɔketa la somolɛ wɔ Manchester, mɔɔ wɔ England la. Wɔ August 3, 1916 ne anu, kɔɔto ne bɔle ye kakɛ kɛ yedo mɛla, na bɛvale ye bɛwulale sogyama asa nu. Mekɛ ko ne ala anu, bɛlile edwɛkɛ bieko wɔ Edinburgh, mɔɔ wɔ Scotland la. Bɛbuale James Frederick Scott, mɔɔ ɛnee ɛli ɛvolɛ 25 na ɔle adekpakyelɛnli la benle. Bɛziale bɛvɛlɛle edwɛkɛ ne bieko noko bɛpɛle nu ɔluakɛ ɛnee bɛlɛdi edwɛkɛ fofolɛ wɔ London. Mekɛ zɔhane, bɛbuale adiema Herbert Kipps fɔlɛ, bɛbɔle ye kakɛ na bɛvale ye bɛwulale sogyama asa nu.

Badwu September 1916 la, ɛnee mediema mrenya mɔɔ bɛ dodo le 264 la ɛhile kɛ bɛngulo kɛ bɛkɔ sogya. Bɛgyakyile bɛ nuhua 5, bɛmanle nuhua 154 yɛle “gyima mɔɔ anwo hyia maanle ne la,” bɛmanle 23 yɛle gyima wɔ sogyama ne ɛkɛ mɔɔ bɛngɔ konle a, bɛvale 82 bɛwulale sogyama asa nu, na bɛlile bie mɔ edwɛkɛ kɛ bɛyɛ anzosesebɛ. Maanlema dendɛle tiale atisesebɛ nyɛleɛ ɛhye, yemɔti arane yele bɛ vile sogyama efiade ne na bɛmanle bɛ gyima mɔɔ ɔnle sogya gyima la.

 Edgar Clay nee Pryce Hughes mɔɔ nzinlii zonlenle kɛ Britain ɔfese ne neavolɛ la, boka menli mɔɔ yɛle Wales damo ne la anwo. Noko, bɛvale Herbert Senior mɔɔ boka menli mɔtwɛ ne mɔɔ bɛ nee bɛ vi France rale anwo la bɛdole Wakefield Efiade wɔ Yorkshire. Bie mɔ zonlenle wɔ Dartmoor Efiade ne, bɛyɛle gyima ɛsesebɛ mɔɔ ɛnee tɛnlabelɛ ne ɛnle kpalɛ fee a, bɛhyele bɛ nwo file na bɛkpole kɛ bɛbava bɛ nwo bɛawula sogyalilɛ nu.

Bɛyɛle Frank Platt, Baebolo Sukoavo bie mɔɔ ɔliele ɔdole nu kɛ ɔbayɛ gyima mɔɔ ɔnli ɔmboa konle la kpɔdekpɔde mekɛ tendenle. Sogyama hilele Atkinson Padgett mɔɔ bɛhɛlɛle ye duma la yeangyɛ yɛɛ ɔzukoale nɔhalɛ ne la noko nyane kpalɛ ɔluakɛ yeangɔ konle.

Ɔwɔ nuhua kɛ yɛ mediema ne mɔ ande mɔɔ afoa biala mɔɔ yɛngyi kile la abo kpalɛ wɔ ɛvolɛ kɛyɛ ɛya ko mɔɔ ɛze ɛhɔ la anu ɛdeɛ, noko bɛbɔle mɔdenle kɛ bɛbayɛ mɔɔ sɔ Gyihova Nyamenle anye la. Bɛdabɛ mɔɔ bɛ anluma wɔ edwɛkɛ ɛhye anu la ɛyɛ neazo kɛnlɛma wɔ afoa biala mɔɔ bɛngyi wɔ “ngyegyelɛ” mekɛ nu la anu. (Yek. 3:10)—Ɔvi yɛ tetedwɛkɛ mɔɔ wɔ Britain la anu.