1. Ninyɛne mɔɔ gyegye adwenle la boni a Nihɛmaya nwunle ye wɔ mekɛ mɔɔ ɔziale ɔrale Gyɛlusalɛm la ɛ? (Nea mɔlebɛbo nvoninli ne.)

GYƐLUSALƐM amra ɛlɛtendɛ. Ɛyɛvolɛ bie mɔɔ ɛlie duma ɛtane la ɛradɛnla ɛzonlenlɛ sua ne anu. Livaema ɛgyakyi bɛ gyima ne. Bɛ mgbanyima ne mɔ ɛkpo kɛ bɛbali bɛ menli ne anyunlu bɛamaa bɛazonle, yemɔti bɛlɛdi gua Ɛnwomenlelielɛ Kenle. Yizilayɛma dɔɔnwo ɛlɛgya mraalɛ mɔɔ bɛnle Dwuuma. Ninyɛne mɔɔ gyegye adwenle mɔɔ Nihɛmaya radole zo wɔ mekɛ mɔɔ ɔvile Gyɛlusalɛm ɔrale wɔ ɛvolɛ 443 K.Y.M. la bie ɛne.—Nih. 13:6.

2. Kɛzi Yizilayɛ rayɛle maanle mɔɔ ɛnee bɛde bɛ nwo ɛ?

² Ɛnee Yizilayɛ le maanle mɔɔ bɛyila zo bɛmaa Nyamenle. Wɔ 1513 K.Y.M., ɛnee Yizilayɛma lɛ ɛhulolɛ kɛ bɛbayɛ Gyihova ɛhulolɛdeɛ. Bɛhanle kɛ: “Edwɛkɛ biala mɔɔ [Gyihova] ɛha la, yɛbali zolɛ.” (Ade. 24:3) Yemɔti Nyamenle dele bɛ nwo anzɛɛ, ɔkpale bɛ kɛ ye menli. Nwolɛ adenle boni a le ɛhye! Ɛvolɛ abulanla anzi, Mosisi hakyele bɛ kɛ: ‘Bɛle menli mɔɔ Gyihova bɛ Nyamenle ne ɛde bɛ nwo a. Gyihova bɛ Nyamenle ne ɛkpa nu ɛye bɛ ɛvi menli mɔɔ wɔ ewiade la amuala anu, kɛ ye menli a le bɛ.’—Mɛla 7:6.

3. Mekɛ mɔɔ Nihɛmaya rale Gyɛlusalɛm bieko la, ɛnee kɛzi Dwuuma sunsum nu gyinlabelɛ de ɛ?

³ Ɔyɛ alɔbɔlɛ kɛ, anyelielɛ mɔɔ Yizilayɛma nyianle kɛ maanle mɔɔ bɛde bɛ nwo la angyɛ la. Ɔwɔ nuhua kɛ Yizilayɛma bie mɔ zonlenle Nyamenle ɛdeɛ, noko bɛ nuhua dɔɔnwo anyɛ Nyamenle ɛhulolɛdeɛ. Mekɛ mɔɔ Nihɛmaya rale Gyɛlusalɛm bieko la, ɛnee asɛɛ ɛvolɛ ɛya ko ɛpɛ nu ɔvi mekɛ mɔɔ nɔhavoma ekyi ne vi Babelɔn rale kɛ bɛfa nɔhalɛ ɛzonlenlɛ bazie ɛkɛ bieko la. Yeangyɛ, menli ne sunsum nu mɔdenlebɔlɛ hanle aze bieko.

4. Ninyɛne mɔɔ bamaa yɛ nwo ahɔ zo ade mɔɔ yɛbazuzu nwo la bie mɔ a le boni?

⁴ Nyamenle ɛde Gyihova Alasevolɛ mɔɔ bɛwɔ ɛkɛ ɛnɛ la anwo kɛ Yizilayɛma la. Bɛde Keleseɛnema mɔɔ bɛkpokpa bɛ nee “menli pemgbenleamgbe” ne anwo bɛmaa ɛzonlenlɛ nwuanzanwuanza. (Yek. 7:9, 14, 15; 1 Kɔl. 6:11) Yɛ nuhua biala ɛngulo kɛ ɔbaminli nwolɛ adenle ɛhye mɔɔ Nyamenle ɛva ɛmaa yɛ la kɛmɔ  Yizilayɛma yɛle la. Duzu a bahola aboa yɛ na ɛhye bie ando yɛ na yɛ nwo ahɔ zo ade amaa Gyihova ɛzonlenlɛ ɛ? Wɔ debiezukoalɛ ɛhye anu, yɛbazuzu ninyɛne nna mɔɔ nwolɛ edwɛkɛ wɔ Nihɛmaya ati 13 ne anu la anwo: (1) Bɛhoati agɔnwolɛ ɛtane; (2) bɛboa teokelase ngyehyɛleɛ; (3) bɛva sunsum nu ninyɛne bɛlumua; na (4) bɛbɔ bɛ Keleseɛnema nzonlɛyɛlɛ ne anwo bane. Akee bɛmaa yɛzuzu ninyɛne ɛhye mɔ anu ko biala anwo.

5, 6. Yilayahyebe nee Tobaya a le nwane, na duzu ati a Yilayahyebe nee Tobaya dule ɛ?

⁵ Bɛgenga Nihɛmaya 13:4-9. Yɛde bɛdabɛ mɔɔ bɛ subane ɛnle kpalɛ la avinli, yemɔti ɔnla aze kɛ yɛbamaa yɛ nwo ahɔ zo ade. Maa yɛva Yilayahyebe nee Tobaya kɛ neazo. Ɛnee Yilayahyebe le ɛsɔfo kpanyinli, na ɔbayɛ kɛ Amɔnonli Tobaya boka Pɛhyea mbɔlɔba mɔɔ ɛnee wɔ Dwudiya la anwo. Tobaya nee ɔ gɔnwo mɔ dwazole tiale Nihɛmaya mɔdenle mɔɔ ɛnee ɔlɛbɔ yeamaa bɛalie Gyɛlusalɛm bane ne bieko la. (Nih. 2:10) Ɛnee Amɔnoma ɛnlɛ adenle ɛmba ɛleka mɔɔ ɛzonlenlɛ sua ne gyi la. (Mɛla 23:3) Yemɔti, kɛmɔti a ɛsɔfo kpanyinli ne bamaa Tobaya ɛleka wɔ ɛleka mɔɔ bɛdi aleɛ wɔ ɛzonlenlɛ sua ne anu la ɛ?

⁶ Ɛnee abusuabɔlɛ titile bie wɔ Tobaya nee Yilayahyebe avinli. Ɛnee Tobaya nee ɔ ra Gyihoheenan ɛgya Dwuu mraalɛ, na ɛnee Dwuuma bɔ Tobaya duma kpalɛ. (Nih. 6:17-19) Ɛnee Yilayahyebe anlɔnra ko ɛgya Samɛlea amɛnlado Sanebalate mɔɔ ɔ nee Tobaya ɛgua nzule bɛ avinli a ɔngua la ara raalɛ. (Nih. 13:28) Bie a abusuabɔlɛ ɛhye mɔ a manle awie mɔɔ ɔnle diedinli na ɔle dwazotiavolɛ la nyianle Ɛsɔfo Kpanyinli Yilayahyebe anwo zo tumi la. Noko Nihɛmaya lile nɔhalɛ manle Gyihova ɔyɛle Tobaya ebia ne nee ye ɛkponle ne ɔvile aleɛlilɛ ɛleka ne.

7. Kɛzi Gyihova menli kɔsɔɔti, mɔɔ mgbanyima ne mɔ boka nwo la, bɔ mɔdenle kɛ bɛnrɛmaa bɛ nwo ɛnrɛgua evinli ɛ?

⁷ Kɛ menli mɔɔ yɛyila yɛ nwo zo yɛmaa Nyamenle la, ɔwɔ kɛ nɔhalɛ mɔɔ yɛdi yɛamaa Gyihova la dumua wɔ debie biala anu. Yɛanva ye tenlene ngyinlazo ne mɔ yɛambɔ yɛ ɛbɛla a, yɛnrɛhola yɛnrɛyɛ menli mɔɔ bɛde bɛ nwo a. Ɔnle kɛ yɛbu yɛ nye yɛgua Baebolo ngyinlazo zo ɔlua yɛ mbusuafoɔ ati. Ɔwɔ kɛ Keleseɛne mgbanyima gyinla Gyihova adehilelɛ zo si kpɔkɛ dahuu, ɔnle kɛ bɛgyinla bɛ nzuzulɛ anzɛɛ bɛ nganeɛdelɛ zo. (1 Tem. 5:21) Mgbanyima bɔ mɔdenle kɛ bɛnrɛyɛ debie mɔɔ bamaa gyinlabelɛ mɔɔ bɛlɛ ye wɔ Nyamenle anyunlu la avi bɛ sa a.—1 Tem. 2:8.

8. Duzu a ɔwɔ kɛ Gyihova azonvolɛ mɔɔ bɛyila bɛ nwo zo la kɔsɔɔti kakye ye wɔ bɛ agɔnwolɛvalɛ nwo a?

⁸ Ɔwɔ kɛ yɛkakye kɛ “agɔnwolɛ ɛtane sɛkye ɛbɛla kpalɛ.” (1 Kɔl. 15:33) Yɛ mbusuafoɔ bahola agyegye yɛ. Yilayahyebe yɛle neazo kpalɛ, ɔluakɛ ɔboale Nihɛmaya ɔmanle bɛliele Gyɛlusalɛm bane ne bieko. (Nih. 3:1) Noko nzinlii, Tobaya nee awie mɔ manle Yilayahyebe yɛle ninyɛne manle ɔ nwo guale evinli wɔ Gyihova anyunlu. Agɔnwolɛma kpalɛ si yɛ adua maa yɛfa yɛ nwo yɛwula Keleseɛnema gyimalilɛ mɔɔ bie a le Baebolo ɛgengalɛ, debiezukoalɛ nee daselɛlilɛ ɛhɔlɛ nu. Saa yɛ mbusuafoɔ maa yɛ anwosesebɛ kɛ yɛyɛ mɔɔ ɔtenrɛ la a, yɛ nye sɔ ye kpalɛ.

9. Duzu ati a ɛzonlenlɛ sua ne anu ngyehyɛleɛ ne zɛkyele ɛ, na nwane mɔ a Nihɛmaya bɔle bɛ somolɛ wɔ nwo a?

⁹ Bɛgenga Nihɛmaya 13:10-13. Mekɛ mɔɔ Nihɛmaya ziale rale Gyɛlusalɛm la, ɔzɔho kɛ ɛnee bɛgyakyi ndoboa mɔɔ bɛfa bɛba ɛzonlenlɛ sua ne anu la. Ɔluakɛ ɛnee bɛnnyia moalɛ la ati, Livaema gyakyile bɛ gyima ne na bɛziale bɛhɔle bɛ ɛya avule  ne mɔ anu. Nihɛmaya bɔle maanle mgbanyima ne mɔ somolɛ. Ɔbayɛ kɛ, ɛnee bɛnyɛ bɛ gyima ne. Bie a ɛnee bɛnlie ngyɛnu bulu ɛkpɔ ngoko ne bɛnvi menli ne ɛkɛ, anzɛɛ bɛnva bɛmba ɛzonlenlɛ sua ne anu, kɛmɔ bɛzele bɛ kɛ bɛyɛ ye la. (Nih. 12:44) Yemɔti Nihɛmaya yɛle ngyehyɛleɛ ɔmanle bɛlieliele ngyɛnu bulu ɛkpɔ ngoko ne. Ɔkpale mrenya mɔ di nɔhalɛ la kɛ bɛnlea ɛzonlenlɛ sua ne ninyɛnezielɛ azua ne mɔ nee ninyɛne mɔɔ bɛ nee bɛ bɛara la ɛhyɛlɛ ne azo.

10, 11. Kɛzi Nyamenle menli bahola aboa nɔhalɛ ɛzonlenlɛ ɛ?

¹⁰ Asoo yɛkola yɛsukoa debie yɛfi nu? Ɛhɛe, ɔluakɛ bɛhakye yɛ kɛ yɛlɛ nwolɛ adenle yɛfa yɛ ninyɛne yɛdi Gyihova eni. (Mrɛ. 3:9) Saa yɛye ndoboa yɛboa Gyihova gyima ne a, ɛnee mɔɔ ɔle ye ɛdeɛ la bie ala a yɛlɛfa yɛamaa ye a. (1 Edk. 29:14-16) Bie a yɛbadwenle kɛ yɛnlɛ dɔɔnwo mɔɔ yɛbava yɛamaa a, noko saa ɛhulolɛ ne wɔ ɛkɛ a, yɛbahola yɛayɛ yɛ afoa nu ɛdeɛ.—2 Kɔl. 8:12.

¹¹ Abusua bie mɔɔ ngakula mɔtwɛ a wɔ nu la ɛnee to ɛsalɛ fɛlɛ adekpakyelɛ titilema bie mɔɔ bɛle agyalɛma na bɛ ɛvolɛ ɛhɔ ɔ nyunlu la bɛmaa bɛ nee bɛ di debie dapɛne biala wɔ ɛvolɛ dɔɔnwo anu. Ɔnva nwo kɛ ɛnee awovolɛ ne mɔ lɛ ngakula mɔtwɛ la, ɛnee mame ne ta ka kɛ, ‘Meto menli bulu aleɛ na menli nwiɔ ɛdeɛ yɛɛ menrɛhola menrɛva menrɛboka nwo a?’ Bie a ɛbabu ye debie ekyi, noko adekpakyelɛma ne anye zɔle ye kpalɛ! Adekpakyelɛma ne noko boale bɛ. Bɛ edwɛkɛ mɔɔ maa anwosesebɛ nee bɛ anwubielɛ manle ngakula ne mɔ nyianle ngɔzo sunsum nu. Nzinlii, bɛ muala bɛvale dahuu ɛzonlenlɛ gyima ne bɛyɛle bɛ bodane.

12. Neazo kɛnlɛma boni a mrenya mɔɔ bɛkpa bɛ wɔ asafo ne anu la ɛlɛyɛ a?

¹² Debie bieko mɔɔ yɛsukoa yɛfi nu la a le ɛhye: Mgbanyima mɔɔ bɛkpa bɛ mɔɔ bɛwɔ ɛkɛ ɛnɛ la di asafo ne anyunlu boa teokelase ngyehyɛleɛ kɛmɔ Nihɛmaya yɛle la. Asafo ne anu amra nyia bɛ neazo ne azo nvasoɛ. Mgbanyima ne mɔ sukoa ɛzoanvolɛ Pɔɔlo. Ɔboale nɔhalɛ ɛzonlenlɛ na ɔvale adehilelɛ kpalɛ ɔmanle. Kɛ neazo la, ɔvale adenle kpalɛ mɔɔ bɛdua zo bɛye ndoboa la anwo folɛdulɛ ɔmanle.—1 Kɔl. 16:1-3; 2 Kɔl. 9:5-7.

13. Adenle boni azo a ɛnee Dwuuma bie mɔ ɛmbu Ɛnwomenlelielɛ kenle ne ɛ?

¹³ Bɛgenga Nihɛmaya 13:15-21. Saa yɛmaa nwonane afoa nu ninyɛne di yɛ adwenle a, yɛbaminli yɛ sunsum nu gyinlabelɛ. Kɛmɔ Adendulɛ 31:13 ka la, ɛnee dapɛne dapɛne Ɛnwomenlelielɛ ne kakye  Yizilayɛma kɛ bɛle menli mɔɔ bɛde bɛ nwo. Bɛdule Ɛnwomenlelielɛ kenle ne bɛziele ɛkɛ bɛmanle abusua ɛzonlenlɛ, nzɛlɛlɛ, nee Nyamenle Mɛla ne anwo ɛdwenledwenlenlɛ. Noko Nihɛmaya mekɛ zo amra bie mɔ bule ye kɛ kenle mɔɔ bɛfa bɛyɛ gyima. Bɛpianle nɔhalɛ ɛzonlenlɛ bɛziele ahane. Mekɛ mɔɔ Nihɛmaya nwunle mɔɔ ɛlɛkɔ zo la, ɔdole suakpole ne anlenkɛ ne anu wɔ kenle ne mɔɔ ɔtɔ zo nsia la aledwolɛ nu na ɔvoanle gualilɛma mɔɔ bɛvi maanle gyɛne zo la kolaa na Ɛnwomenlelielɛ kenle ne abɔ ɔ bo.

14, 15. (a) Saa yɛmaa gualilɛ di yɛ adwenle a, duzu a bado yɛ a? (b) Kɛ ɔkɛyɛ na yɛanyia Nyamenle ɛnwomenlelielɛ ne ɛ?

¹⁴ Duzu a yɛbahola yɛazukoa yɛavi Nihɛmaya neazo ne anu a? Ɛzukoalɛdeɛ ko a le kɛ, ɔnle kɛ yɛmaa gualilɛ di yɛ adwenle. Saa tɛ ye zɔ a, ɔnyɛ se kɛ ninyɛne bahwehwe yɛ adwenle—anzɛɛ yɛ ɛlɔlɛ ne anu bahyɛ nwiɔ—titile saa yɛ nye die yɛ gyima nwo a. Kakye Gyisɛse kɔkɔbɔlɛ ne mɔɔ ɔfane menlenlɛ nwiɔ ɛzonlenlɛ nwo la. (Bɛgenga Mateyu 6:24.) Ɛnee Nihɛmaya lɛ ezukoa dɔɔnwo, noko kɛzi ɔvale ye mekɛ ɔlile gyima wɔ Gyɛlusalɛm ɛ? (Nih. 5:14-18) Kɛ anrɛɛ ɔ nee Tayama anzɛɛ awie mɔ gyɛne bayɛ gualilɛ nwo ngyehyɛleɛ la, ɔdule ɔ nwo ɔziele ɛkɛ ɔboale ɔ mediema na ɔyɛle ninyɛne mɔɔ ɔbamaa Gyihova duma ne anwo ade la. Zɔhane ala a ɛnɛ noko, Keleseɛne mgbanyima nee azonvolɛ yɛ ninyɛne mɔɔ ɔbaboa asafo ne la a, na bɛ gɔnwo mɔ diedima anye die sunsum ɛhye mɔɔ bɛda ye ali la anwo. Ɛhye ati, ɛhulolɛ, anzondwolɛ nee banebɔlɛ wɔ Nyamenle menli avinli.—Yiz. 34:25, 28.

¹⁵ Ɔwɔ nuhua kɛ Keleseɛnema ɛnli dapɛne dapɛne Ɛnwomenlelielɛ ne ɛdeɛ, noko Pɔɔlo hanle kɛ ‘Ɛnwomenlelielɛ Kenle tɛbɔ ɛkɛ tɛmaa Nyamenle menli.’ Eza ɔhanle kɛ: “Awie mɔɔ kɛnyia ɛnwomenlelielɛ ne mɔɔ Nyamenle ɛva ɛbɔ ɛwɔkɛ la die ye ɛnwomenle wɔ ɔdaye ye gyima nwo, kɛmɔ Nyamenle liele ye ɛnwomenle wɔ ye gyima nwo la.” (Hib. 4:9, 10) Kɛ Keleseɛnema la, saa yɛyɛ tieyɛ yɛyɛ gyima mɔɔ ɔ nee ye bodane ne le ko la a, yɛbanyia Nyamenle ɛnwomenlelielɛ ne. Asoo ɛ nee wɔ kulovolɛma ɛlɛfa abusua ɛzonlenlɛ, debiezukoalɛ ɛhɔlɛ, nee daselɛlilɛ bɛalumua bɛ ɛbɛlabɔlɛ nu ɔ? Bie a yɛ gyima menle anzɛɛ menli mɔɔ yɛ nee bɛ yɛ gyima la baha kɛ ninyɛne ɛhye mɔ anwo ɛngyia. Yemɔti, ɔwɔ kɛ yɛgyinla kpundii na yɛmaa bɛnwu kɛ Gyihova gyima ne a nwolɛ hyia yɛ kpalɛ a. Ɔwɔ kɛ yɛto ‘suakpole ne anlenkɛ ne anu na yɛfoa Tayama ne’ amaa yɛava yɛ adwenle yɛazie ninyɛne mɔɔ le nwuanzanwuanza la azo. Kɛmɔ bɛde yɛ nwo la ati, ɔwɔ kɛ yɛbiza yɛ nwo kɛ, ‘Asoo me ɛbɛlabɔlɛ kile kɛ bɛkpa nu bɛye me kɛ Gyihova sonvolɛ ɔ?’—Mat. 6:33.

16. Kɛzi menli mɔɔ bɛde bɛ nwo kɛ maanle la nzonlɛyɛlɛ ne anwo rale edwɛkɛ wɔ Nihɛmaya mekɛ zo ɛ?

¹⁶ Bɛgenga Nihɛmaya 13:23-27. Wɔ Nihɛmaya mekɛ zo, ɛnee Yizilayɛ mrenya ɛlɛgya nyɛvolɛ mraalɛ. Wɔ ye ɛkpɔlalɛ ne mɔɔ lumua wɔ Gyɛlusalɛm la anu, Nihɛmaya manle mgbanyima ne mɔ vale bɛ sa wulale kɛlata bo hanle ndane kɛ bɛnrɛgya awozonle ɛzonlenlɛma. (Nih. 9:38; 10:30) Noko ɛvolɛ ekyi pɛle nu la, ɔnwunle kɛ tɛ nyɛvolɛ mraalɛ ala a ɛnee Dwuu mrenya ɛlɛgya bɛ a, na ɛnee eza bɛlɛminli bɛ nzonlɛyɛlɛ kɛ Nyamenle menli mɔɔ bɛde bɛ nwo la noko! Ngakula mɔɔ bɛ nee nyɛvolɛ mraalɛ ne mɔ wole la ɛngola ɛngenga anzɛɛ ɛnga Hibulu aneɛ ne. Saa bɛnyi a, asoo bɛbahola bɛaha kɛ bɛle Yizilayɛma? Asoo bɛnrɛha kɛ bɛle Ahyedɔdoma, Amɔnoma, anzɛɛ Mowabema ɔ? Kɛmɔ bɛnde Hibulu aneɛ ne la ati, asoo bɛbade Nyamenle Mɛla ne abo? Kɛ ɔkɛyɛ na bɛanwu  Gyihova na bɛazonle ye ɛ, anzɛɛ bɛbazonle nyamenle ne mɔ mɔɔ bɛ mame mɔ zonlenle bɛ la? Ɛnee ɔhyia kɛ Nihɛmaya maa bɛsi nwolɛ kpɔkɛ ndɛndɛ.—Nih. 13:28.

17. Kɛzi awovolɛ bahola aboa bɛ mra na bɛ nee Gyihova anyia agɔnwolɛvalɛ ɛ?

¹⁷ Ɛnɛ, ɔwɔ kɛ yɛsi yɛ gyakɛ aze yɛboa yɛ mra yɛmaa bɛnyia Keleseɛnema nzonlɛyɛlɛ ne. Awovolɛ, bɛbiza bɛ nwo kɛ, ‘Asoo me mra kola ka aneɛ tagyee ne mɔɔ le nɔhalɛ ne mɔɔ wɔ Ngɛlɛlera ne anu la kpalɛ ɔ? (Zɛf. 3:9) Asoo me mra adwelielilɛ da Nyamenle sunsum anzɛɛ ewiade sunsum ali?’ Saa ɛnwu kɛ bɛhyia moalɛ a, mmamaa ɛ sa nu to ndɛndɛ. Aneɛ ɛzukoalɛ die mekɛ, titile wɔ mekɛ mɔɔ ninyɛne ɛlɛtwehwe yɛ adwenle la. Ngakula ɛlɛyia ngyegyelɛ kpole mɔɔ ɔmaa bɛgyakyi bɛ munlililɛ nu a. Yemɔti, si abotane na dua wɔ Abusua Ɛzonlenlɛ ne nee ndenle ngakyile zo boa ɛ mra maa bɛ nee Gyihova ɛnyia agɔnwolɛvalɛ kyengye. (Mɛla 6:6-9) Anrɛɛ si nvasoɛ mɔɔ wɔ zo kɛ bɛbayɛ ngakyile wɔ Seetan ewiade ne anu la azo. (Dwɔn 17:15-17) Bɔ mɔdenle kɛ ɛbamaa edwɛkɛ ne aha bɛ ahonle.

18. Duzu ati a awovolɛ mɔɔ bɛle Keleseɛnema la a bahola aboa bɛ mra kpalɛ amaa bɛayila bɛ nwo zo bɛamaa Gyihova ɛ?

¹⁸ Awieleɛ bɔkɔɔ ne, kakula biala bɛazi ye kpɔkɛ wɔ Nyamenle ɛzonlenlɛ nwo. Noko, ninyɛne dɔɔnwo wɔ ɛkɛ mɔɔ awovolɛ bahola ayɛ a. Neazo kpalɛ mɔɔ bɛbala ye ali, bɛahilehile nu wienyi bɛamaa bɛanwu mɔɔ ɔnle kɛ bɛyɛ, na bɛ nee bɛ mra azuzu mɔɔ bɛavi kpɔkɛ ɛtane mɔɔ bɛbazi anu ara la boka nwo. Awovolɛ bɛdabɛ a bɛbahola bɛaboa bɛ mra kpalɛ bɛamaa bɛayila bɛ nwo zo bɛamaa Gyihova a. Bɛhyia bɛ moalɛ na bɛanyia Keleseɛne nzonlɛyɛlɛ ne na bɛabɔ nwolɛ bane. Nɔhalɛ nu, ɔhyia kɛ yɛ kɔsɔɔti yɛsinza na yɛ sɛkɛlɛneɛ adenle zo “ndanlɛ” anzɛɛ subane nee ngyinlazo mɔɔ da yɛ ali kɛ yɛle Kelaese ɛdoavolɛma la anvi yɛ sa.—Yek. 3:4, 5; 16:15.

19, 20. Kɛ ɔkɛyɛ na Gyihova ahakye yɛ na ‘yeayila yɛ ɛ’?

¹⁹ Ngapezonli Malakae mɔɔ dɛnlanle aze wɔ Nihɛmaya mekɛ zo la lale ye ali kɛ, “bɛdabɛ mɔɔ bɛsulo [Gyihova] na bɛdwenle ɔ nwo la, bɛhɛlɛle bɛ muala aluma wɔ ngakyelɛ buluku nu.” (Mal. 3:16, 17) Nyamenle arɛle ɛnrɛvi bɛdabɛ mɔɔ bɛsulo ye nɔhalɛ nu na bɛkulo ye duma ne la ɛlɛ.—Hib. 6:10.

²⁰ Nihɛmaya zɛlɛle kɛ: “O me Nyamenle, kakye ɛhye mɔ kɔsɔɔti na yila me.” (Nih. 13:31) Kɛmɔ Nihɛmaya yɛle la, saa yɛkoati agɔnwolɛ ɛtane, yɛboa teokelase ngyehyɛleɛ, yɛfa sunsum nu ninyɛne yɛdumua, na yɛbɔ yɛ Keleseɛnema nzonlɛyɛlɛ ne anwo bane a, Nyamenle bɛahɛlɛ yɛ aluma wɔ ye ngakyelɛ buluku ne anu. Bɛmaa yɛhɔ zo ‘yɛnleɛnlea yɛ ahonle nu saa yɛtɛdɛ diedi ne anu a.’ (2 Kɔl. 13:5) Saa yɛsɔ yɛ gyinlabelɛ mɔɔ yɛlɛ kɛ menli mɔɔ bɛde yɛ nwo wɔ Gyihova anyunlu la anu a, ɔbahakye yɛ na ‘yeayila yɛ.’