1. (a) Duzu a alesama yɛ ye wɔ ngakyelɛ nwo a, na duzu ati ɔ? (b) Kɛzi anwomemaazo bamaa awie abu folɛdulɛ ɛ?

ALESAMA tie adehilelɛ wɔ ndenle ngakyile zo. Saa yɛnyia ngakyelɛ yɛfi awie mɔɔ lɛ tumi la ɛkɛ a, bie a yɛbali zo, noko saa yɛ ti pɛne bie anzɛɛ awie mɔɔ yɛtɛla ye la tu yɛ folɛ a, bie a yɛnrɛli zo. Asolo kɛzi yɛ nuhua ko biala te nganeɛ wɔ ndeanlɛ nee folɛdulɛ nwo la. Bie a ɔbayɛ nyanelilɛ, alɔbɔlɛlilɛ, anwosesebɛmanlɛ, ngyegyelɛ, anzɛɛ ɛzonledolɛ yeamaa yɛ. Duzu ati a asolo awie biala nyɛleɛ wɔ folɛdulɛ nwo ɛ? Anwomemaazo boka nwo. Anwomemaazo maa sonla kola kpo folɛdulɛ nee adehilelɛ mɔɔ nvasoɛ wɔ zo la.—Mrɛ.  16:18.

2. Duzu ati a nɔhalɛ Keleseɛnema die folɛdulɛ mɔɔ vi Nyamenle Edwɛkɛ ne anu la to nu a?

² Wɔ adenle fofolɛ zo, nɔhalɛ Keleseɛnema die folɛdulɛ kpalɛ mɔɔ ɔgyi Nyamenle Edwɛkɛ ne azo la to nu. Gyihova ngakyelɛ ne mɔ maa yɛnyia nwunu, bɛkilehile yɛ yɛɛ bɛboa yɛ bɛmaa yɛkoati esiane mɔɔ bie a le anwonyia ɛhulolɛ, nla nu ɛbɛlatane, nza ɛbolɛ anzɛɛ nyile ɛtane ɛnlonlɛ la. (Mrɛ. 20:1; 2 Kɔl. 7:1; 1 Tɛs. 4:3-5; 1 Tem. 6:6-11) Bieko, yɛdi fɛlɛko ɔlua “ahonle” kpalɛ mɔɔ Gyihova ngakyelɛ ne mɔ mɔɔ yɛdi zo maa yɛnyia la ati.—Aye. 65:14.

3. Edwɛndovo ne subane kpalɛ boni a ɔfɛta kɛ yɛsukoa a?

³ Amaa yɛabɔ agɔnwolɛvalɛ mɔɔ yɛ nee yɛ anwuma Selɛ ne lɛ anwo bane la, ɔwɔ kɛ yɛkɔ zo yɛfa Gyihova adehilelɛ yɛdi gyima wɔ yɛ ɛbɛlabɔlɛ nu. Nea kɛzi ɔle kɛnlɛma kɛ yɛbanyia edwɛndovo ne mɔɔ ɔhɛlɛle edwɛkɛ ɛhye la subane ne bie a: ‘Wɔ ngakyelɛ ne mɔ le me agyadeɛ dahuu; ɛhɛe, me ahonle la nwo!’ (Edw. 119:111) Asoo yɛdayɛ noko yɛ nye die Gyihova mɛla ne mɔ anwo, anzɛɛ ɔdwu mekɛ ne bie a yɛbu bɛ adesoa ɔ? Saa ɔdwu mekɛ ne bie na folɛdulɛ maa yɛfa ɛya  a, ɔnle kɛ yɛmaa yɛ sa nu to. Yɛkola yɛnyia anwodozo kpundii wɔ Gyihova nrɛlɛbɛ kpole ne anu! Maa yɛzuzu ndenle nsa anwo.

4. Debie ko boni a Devidi hɔle zo yɛle wɔ ye ɛbɛlabɔlɛ nu a?

⁴ Belemgbunli Devidi yiale ngyegyelɛ dɔɔnwo wɔ ye ɛbɛlabɔlɛ nu, noko yeangyakyi debie ko bie ɛyɛlɛ ɛlɛ—ɔvale ɔ nwo ɔdole ye Bɔvolɛ ne anwo zo bɔkɔɔ. Ɔhanle kɛ: “O [Gyihova], ɛdawɔ ala a mesu mefɛlɛ wɔ a. O me Nyamenle, wɔ nuhua yɛɛ me rɛle wɔ a.” (Edw. 25:1, 2) Duzu a boale Devidi manle ɔnyianle anwodozo zɛhae wɔ ye anwuma Selɛ ne anu a?

5, 6. Duzu a Baebolo ne ka ye wɔ agɔnwolɛvalɛ mɔɔ ɛnee Devidi nee Gyihova lɛ la anwo a?

⁵ Menli dɔɔnwo anwo kyele bɛ a yɛɛ bɛyɛ asɔne a. Bɛle kɛ agɔnwolɛ mɔɔ saa ɔhyia ezukoa anzɛɛ debie a, yɛɛ ɔba ɛ nwo la. Ɔbadwu mekɛ ne bie la, ɛbabiza ɛ nwo kɛ asoo me gɔnwo ye ɔkulo me edwɛkɛ? Noko ɛnee Devidi nee Gyihova agɔnwolɛvalɛ ne ɛnle zɔ. Wɔ ye ɛbɛlabɔlɛ kɔsɔɔti anu, ɔnyianle diedi nee ɛhulolɛ ɔmanle Gyihova wɔ mekɛ kpalɛ nee mekɛ ɛtane nu.—Edw. 40:8.

⁶ Devidi yele Gyihova ayɛlɛ na ɔyɛle ye mo kɛ: “O [Gyihova], yɛ Awulae, wɔ duma ne kpole keda azɛlɛ ye amuala azo! Bɛto wɔ anyunlunyia nwo edwɛne wɔ anwuma lɔ.” (Edw. 8:1) Asoo ɛnwu agɔnwolɛvalɛ mɔɔ ɛnee la ɔ nee ye anwuma Selɛ ne avinli la? Anyezɔlɛ mɔɔ ɛnee Devidi lɛ maa Nyamenle kpoleyɛlɛ ne nee ye anyunlunyia ne la, manle ɔyele Gyihova ayɛlɛ “dahuu.”—Edw. 35:28.

7. Yɛbikye Nyamenle wɔ nzɛlɛlɛ nu a kɛzi ɔboa yɛ ɛ?

⁷ Kɛmɔ Devidi yɛle la, ɔhyia kɛ yɛ nee Gyihova di adwelie dahuu amaa yɛanyia anwodozo wɔ ye nu. Baebolo ne ka kɛ: “Bɛhwe bɛbikye Nyamenle, na ɔdaye noko ɔkɛbikye bɛ.” (Gye. 4:8) Nyamenle mɔɔ yɛdua nzɛlɛlɛ zo yɛbikye ye la noko le adenle titile mɔɔ yɛdua zo yɛnyia sunsum nwuanzanwuanza a.—Bɛgenga 1 Dwɔn 3:22.

8. Duzu ati a ɔwɔ kɛ yɛkoati kɛ yɛbaha edwɛkɛ ko ne ala wɔ yɛ nzɛlɛlɛ nu ɛ?

⁸ Saa ɛlɛyɛ asɔne a, ɛta ɛka edwɛkɛ ko ne ala ɔ? Saa ɔle zɔ a, anrɛɛ gyinla ekyii dwenledwenle mɔɔ ɛkulo kɛ ɛka la anwo kolaa na wɔayɛ asɔne. Saa yɛti edwɛkɛ ko ne ala anu yɛkile yɛ gɔnwo bie anzɛɛ busuanli mekɛ biala a, asoo ɔ nye balie nwo? Bie a ɔnrɛdie yɛ edwɛkɛ bieko. Nɔhalɛ nu, Gyihova ɛnrɛkpo nzɛlɛlɛ mɔɔ ye nɔhalɛ azonvolɛ bɛavi bɛ ahonle nu ayɛ la ɛdeɛ, noko saa yɛ nee ye ɛlɛdi adwelie a, yɛkoati kɛ yɛbaha edwɛkɛ ko ne ala.

9, 10. (a) Duzu a yɛbahola yɛazɛlɛ wɔ nwo a? (b) Duzu a bamaa yɛahola yɛayɛ nzɛlɛlɛ mɔɔ vi ahonle nu a?

⁹ Ɔda ali kɛ, saa yɛkulo kɛ yɛbikye Nyamenle a, yɛ nzɛlɛlɛ ɛnrɛyɛ ɛnyelɛzo. Mekɛ mɔɔ yɛlɛka mɔɔ wɔ yɛ ahonle nu kɔsɔɔti yɛahile Gyihova la, yɛɛ yɛbabikye ye na yɛava yɛ rɛle yɛawula ye nu kpalɛ a. Noko, duzu a ɔwɔ kɛ yɛyɛ nwolɛ nzɛlɛlɛ a? Nyamenle Edwɛkɛ ne bua kɛ: “Wɔ debie biala anu bɛyɛ moyɛlɛ nzɛlɛlɛ na bɛva mɔɔ bɛhyia nwolɛ la bɛdo Nyamenle anyunlu.” (Fel. 4:6) Debie biala mɔɔ ka yɛ nee Nyamenle agɔnwolɛvalɛ ne anzɛɛ nwolɛ adenle mɔɔ yɛlɛ kɛ ye azonvolɛ la le debie mɔɔ ɔfɛta kɛ yɛyɛ nwolɛ asɔne a.

¹⁰ Saa yɛsuzu mrenya nee mraalɛ mɔɔ di nɔhalɛ la nzɛlɛlɛ mɔɔ bɛyɛ nwolɛ kɛlɛtokɛ wɔ Baebolo ne anu la anwo a, ɔbaboa. (1 Sam. 1:10, 11; Gyi. 4:24-31) Nzɛlɛlɛ mɔɔ vi ahonle nu nee edwɛne mɔɔ bɛto bɛmaa Gyihova la dɔɔnwo wɔ Edwɛndolɛ ne anu. Bɛla nyane nee fɛlɛkolilɛ mɔɔ dasanli biala kɔ nu la ali wɔ nzɛlɛlɛ nee edwɛne ɛhye mɔ anu. Saa yɛsukoa edwɛkɛ zɛhae mɔ mɔɔ nɔhavoma ɛhye mɔ  hanle la kpalɛ a, ɔbamaa yɛayɛ nzɛlɛlɛ mɔɔ ɔdi munli.

11. Duzu ati a ɔhyia kɛ yɛdwenledwenle Nyamenle folɛdulɛ nwo a?

¹¹ Devidi hanle kɛ: ‘Gyihova ngakyelɛ le nɔhalɛ, ɔmaa mɔɔ ɛnze nrɛlɛbɛ la nwu nrɛlɛbɛ.’ (Edw. 19:7) Saa yɛnze nrɛlɛbɛ bɔbɔ a, yɛbahola yɛalua Nyamenle mɛla ne mɔ mɔɔ yɛbali zo la azo yɛayɛ nrɛlɛbɛvolɛma. Noko saa yɛbanyia Ngɛlɛlera ne anu folɛdulɛ bie azo nvasoɛ a, kyesɛ yɛdwenledwenle nwolɛ kpalɛ. Ɛhye mɔ bie bahola ayɛ yɛ munlililɛ nu ɛgyinlanlɛ wɔ mekɛ mɔɔ yɛlɛyia ngyegyelɛ wɔ sukulu anzɛɛ gyima nu, Nyamenle ngyinlazo wɔ mogya nwo, Keleseɛnema mɔɔ bɛngyi afoa biala nee Baebolo ngyinlazo mɔɔ fane tɛladeɛ ɛwulalɛ nee anwoziezielɛ nwo la. Ninyɛne ɛhye mɔ anwo adwenle mɔɔ Nyamenle lɛ mɔɔ yɛbanyia bie la, bamaa yɛaziezie yɛ nwo yɛamaa ngyegyelɛ. Akee yɛbahola yɛabɔ kpɔkɛ wɔ yɛ ahonle nu wɔ mɔɔ yɛbayɛ ye wɔ tɛnlabelɛ ne anwo la. Anwoziezielɛ zɛhae mɔɔ yɛbalumua yɛayɛ la ɛnrɛmaa yɛnrɛli nyane.—Mrɛ. 15:28.

12. Duzu a yɛdwenledwenle nwo a ɔbamaa yɛali Nyamenle ngakyelɛ ne mɔ azo a?

¹² Mekɛ mɔɔ yɛlɛkendɛ Nyamenle ɛwɔkɛ ne la, asoo yɛ ɛbɛlabɔlɛ kile kɛ yɛlɛsinza wɔ sunsum nu ɔ? Kɛ neazo la, asoo amgba yɛdie yɛdi kɛ ɔnrɛhyɛ na bɛazɛkye Babelɔn Kpole ne? Yɛdie yɛdi nɔhalɛ nu kɛ kenlebie nyilalɛ mɔɔ bie a le dahuu ngoane wɔ paladaese la bara kɛmɔ yɛzukoale ye mɔlebɛbo ne la ɔ? Asoo yɛlɛmaa yɛ ɛhulolɛdeɛ ɛyɛlɛ ahyia yɛ adɛla mɔdenlebɔlɛ mɔɔ yɛbava yɛayɛ ɛzonlenlɛ gyima ne la? Na ewudwazo anyelazo ne, Gyihova duma ne mɔɔ bɛte nwo, nee ye tumililɛ ne mɔɔ bɛbahile kɛ yemɔ a ɔle kpalɛ la noko ɛ? Asoo ninyɛne ɛhye mɔ anwo tɛkyia yɛ? Kpuyia ɛhye mɔ mɔɔ yɛbadwenledwenle nwo la, bamaa yɛayɛ mɔɔ edwɛndovo ne hanle la, Nyamenle ‘ngakyelɛ ne mɔ le me agyadeɛ dahuu.’—Edw. 119:111.

13. Duzu ati a ɛvoya ne mɔɔ lumua la anu Keleseɛnema ande ninyɛne bie mɔ abo ɛ? Maa neazo.

¹³ Ninyɛne bie mɔ wɔ Baebolo ne anu mɔɔ bie a yɛnrɛde ɔ bo kpalɛ kɛkala a, ɔboalekɛ mekɛ kpalɛ mɔɔ Gyihova bamaa ninyɛne nu ala ɛkɛ wienyi la ɛtɛdwule. Gyisɛse hanle hilele ye ɛzoanvolɛ ne mɔ fane dɔɔnwo kɛ ɔhyia kɛ ɔnwu amaneɛ na bɛku ye. (Bɛgenga Mateyu 12:40; 16:21.) Noko ɛzoanvolɛ ne mɔ ande mɔɔ ɔhanle la abo. Mekɛ mɔɔ ɔwule na bɛdwazole ye na ɔluale dasanli sonlabaka zo ɔyele ɔ nwo ɔhilele ye ɛdoavolɛma ne na ɔhilehilele bɛ la akee “ɔbukele bɛ adwenle ɔmanle bɛdele Nyamenle Edwɛkɛ ne abo.” (Luku 24:44-46; Gyi. 1:3) Zɔhane ala a, Kelaese ɛdoavolɛma ne ande Nyamenle Belemgbunlililɛ ne mɔɔ bɛbava bɛazie ɛkɛ wɔ anwuma la abo kɔkpula kɛ bɛwolale sunsum nwuanzanwuanza ne bɛguale bɛ nwo zo wɔ Pɛntekɔso 33 Y.M. anu a.—Gyi. 1:6-8.

14. Ɔnva nwo kɛ mediema dɔɔnwo ande awieleɛ mekɛ ne abo kpalɛ wɔ ɛvoya 20 ne mɔlebɛbo la, neazo kpalɛ boni a bɛyɛle a?

¹⁴ Wɔ ɛvoya 20 ne mɔlebɛbo, ɛnee nɔhalɛ Keleseɛnema lɛ anyelazo mɔɔ ɛndenrɛ la wɔ “awieleɛ mekɛ ne” anwo. (2 Tem. 3:1) Kɛ neazo la, bie mɔ nyianle adwenle kɛ ɔnrɛhyɛ bɛbava bɛ bɛahɔ anwuma wɔ 1914. Mɔɔ bɛ anyelazo ne amba nu ɛkɛ ne ala la, Ngɛlɛlera ne mɔɔ bɛzukoale ye kpalɛ la manle bɛvale bɛ adwenle bɛziele edwɛkɛhanlɛ gyima kpole mɔɔ la bɛ nyunlu la azo. (Maake 13:10) Ɔlua ɛhye ati, wɔ 1922, J.  F. Rutherford mɔɔ ɛnee li edwɛkɛhanlɛ gyima ne anyunlu la vale dole bɛdabɛ mɔɔ bɛwɔ maanle maanle avinli nyianu ne abo wɔ  Cedar Point, Ohio, U.S.A. la anyunlu kɛ: “Bɛnlea, Belemgbunli ne ɛlɛdi tumi! Bɛmɛ a bɛgyi ɔ gyakɛ anu a. Yemɔti bɛbɔ, bɛbɔ, bɛbɔ, Belemgbunli ne nee ye belemgbunlililɛ ne nolo.” Ɔvi zɔhane mekɛ ne, “Belemgbunlililɛ ne anwo Edwɛkpa ne” nolobɔlɛ ɛyɛ ɛnɛ mekɛ ye Gyihova azonvolɛ nzonlɛyɛlɛ.—Mat. 4:23; 24:14.

15. Kɛzi Nyamenle nee ye menli ne luale mɔɔ yɛbadwenledwenle nwo la baboa yɛ wɔ adenle boni azo?

¹⁵ Saa yɛdwenledwenle kɛzi Gyihova nee ye menli ne luale wɔ tete ne nee ɛnɛ la anwo a, yɛnyia anwodozo kpole wɔ ye tumi ne mɔɔ ɔfa ɔdi ye ɛhulolɛdeɛ nee ye kenlebie bodane nwo gyima la anu. Eza Nyamenle ngakyelɛ ne mɔ boa maa ye ngapezo ne mɔ mɔɔ ɛlɛba nu la tɛnla yɛ adwenle nee yɛ ahonle nu dahuu. Yɛbahola yɛalie yɛali kɛ saa yɛyɛ ye zɔ a, ɔbamaa anwodozo mɔɔ yɛlɛ ye wɔ ye ɛwɔkɛ ne mɔ anu la ayɛ kpole.

16. Saa yɛbɔ mɔdenle yɛyɛ ɛzonlenlɛ gyima ne a, duzu nyilalɛ a yɛnyia a?

¹⁶ Yɛ Nyamenle Gyihova ne le Nyamenle mɔɔ ɔlɛ tumi, ɔle Nyamenle mɔɔ ɔ nwo yɛ se. Edwɛndovo ne bizale kɛ: ‘O Gyihova, nwane a le tumivolɛ kɛ ɛdawɔ a?’ Ɔdoale zo kɛ: “Ɛ nwo yɛ se, wɔ tumi le kpole.” (Edw. 89:8, 13) Yɛnwu ye wienyi kɛ, Gyihova anye sɔ mɔdenlebɔlɛ mɔɔ yɛfa yɛyɛ Belemgbunlililɛ gyima ne la na ɔyila zo. Ɔnwu kɛ ye azonvolɛ—mrenya anzɛɛ mraalɛ, ngakula anzɛɛ mgbanyinli—‘ɛnli bɛ sa anzi aleɛ.’ (Mrɛ. 31:27) Yɛsukoa yɛ Bɔvolɛ ne, yɛfa yɛ nwo yɛwula teokelase gyimayɛlɛ nu dahuu. Nyamenle mɔɔ yɛfi yɛ ahonle muala nu yɛsonle ye la boa yɛ, na ɔmaa Gyihova fa anyelielɛ kpole yila yɛ ɛzonlenlɛ gyima ne azo.—Bɛgenga Edwɛndolɛ 62:12.

17, 18. Duzu ati a yɛkola yɛka kɛ diedi nwo gyima maa yɛfa yɛ nwo yɛto Gyihova folɛdulɛ zo ɛ? Maa neazo.

 ¹⁷ Adenle boni azo a diedi nwo gyima maa yɛnyia anwodozo wɔ Gyihova anu ɛ? Suzu Ngɛlɛlera ne anu kɛlɛtokɛ mɔɔ fane Yizilayɛma mɔɔ hɔle Ɛwɔkɛ Azɛlɛ ne azo la anwo nea. Gyihova zele ɛsɔfo ne mɔ mɔɔ bɛzo ngyekyeleɛ ɛlɛka ne la kɛ bɛpɛ Azule Dwɔdan ne. Noko mɔɔ menli ne dule bɛ bo kɛ bɛkɔ la, bɛnwunle kɛ nyenyesuo ne ɛmaa azule ne ɛyi bonrabonra. Duzu a Yizilayɛma ne bayɛ a? Asoo bɛbadɛnla azule ne anloa bɛahendɛ dapɛne anzɛɛ mɔɔ bo zɔ la bɛamaa azule ne ahwe ɔ? Kyɛkyɛ, bɛvale bɛ rɛle kɔsɔɔti bɛwulale Gyihova anu na bɛlile ye adehilelɛ nzi. Duzu a vi nu rale a? Mgbondabulɛ ne kile kɛ: “Mɔɔ sɛlɛvolɛma mɔɔ zo Ngyekyeleɛ Ɛlɛka ne la agyakɛ hanle nzule ne mɔɔ wɔ azule ne pemgbɛne ne anloa ala la yɛɛ ɔgyakyile ɛzenlɛ a; . . . na menli ne luale azɛlɛ resee zo pɛle, wɔ ɛleka mɔɔ bikye Gyɛleko la.” (Dwɔh. 3:12-17) Nea kɛzi bɛ nye balie kɛ azule bonrabonra ne sesanle yɛle resee a! Nɔhalɛ nu, kɛmɔ Yizilayɛma vale bɛ nwo dole Gyihova adehilelɛ zo la ati bɛ diedi ne anu mianle.

¹⁸ Ɔle nɔhalɛ kɛ ɛnɛ, Gyihova ɛnyɛ nwanwane debie zɛhae ɛmmaa ye menli, noko ɔyila bɛ diedi ne anwo gyima mɔɔ bɛyɛ la azo. Nyamenle gyimayɛlɛ tumi ne maa bɛ anwosesebɛ bɛyɛ Belemgbunlililɛ nolobɔlɛ gyima ne wɔ ewiade amuala. Gyihova Dasevolɛ mɔɔ lumua, Gyisɛse Kelaese mɔɔ bɛdwazo ye bɛvi ewule nu la zile ye ɛdoavolɛ ne mɔ adua kɛ, ɔbaboa bɛ wɔ gyima ɛhye mɔɔ hyia la anwo: “Bɛhɔ maanle ti nee maanle bo, bɛmaa menli ɛrayɛ me ɛdoavolɛma; . . . bɛhakye kɛ me nee bɛ lua dahuu, kɔkpula ewiade awieleɛ.” (Mat. 28:19, 20) Alasevolɛ dɔɔnwo mɔɔ ɛnee se nyiane anzɛɛ sulo debie la kola di daselɛ kɛ Nyamenle sunsum nwuanzanwuanza ne ɛmaa bɛ akɛnrasesebɛ bɛ nee nyɛvolɛ ɛdendɛ wɔ daselɛlilɛ nu.—Bɛgenga Edwɛndolɛ 119:46; 2 Kɔlentema 4:7.

19. Ɔnva nwo sinlidɔlɛ biala mɔɔ yɛlɛ la, anwodozo boni a yɛbahola yɛanyia a?

¹⁹ Mediema bie mɔ ɛnlɛ anwosesebɛ ɔlua anwodolɛ anzɛɛ kpanyinliyɛlɛ ti. Noko, bɛbahola bɛanyia diedi kɛ “anwunvɔnezelɛ Selɛ ne nee arɛlekyekyelɛ Nyamenle ne” te nɔhalɛ Keleseɛnenli biala tɛnlabelɛ mɔɔ ɔwɔ nu la abo. (2 Kɔl. 1:3) Ɔ nye die debie biala mɔɔ yɛyɛ yɛboa Belemgbunlililɛ gyima ne la anwo. Mekɛ mɔɔ yɛlɛyɛ mɔɔ yɛ tɛnlabelɛ ne bamaa yɛ adenle la, ɔwɔ kɛ yɛ muala yɛkakye kɛ diedi mɔɔ yɛbanyia ye wɔ Kelaese ɛkpɔnedeɛ nziezielɛ ne anu la a balie yɛ ngoane a.—Hib. 10:39.

20, 21. Ndenle boni mɔ anu a yɛbahola yɛahile kɛ yɛ rɛle wɔ Gyihova anu ɛ?

²⁰ Yɛ mekɛ, anwosesebɛ, nee nwonane afoa nu ninyɛne mɔɔ yɛfa yɛboa la boka yɛ ɛzonlenlɛ ne anwo. Yɛkulo kɛ yɛfi ahonle muala nu ‘yɛyɛ edwɛkpa ne nolobɔlɛma.’ (2 Tem. 4:5) Nɔhalɛ nu, yɛ nye die kɛ yɛyɛ ɛhye la, ɔluakɛ ɔboa ɔmaa “menli kɔsɔɔti nwu nɔhalɛ ne.” (1 Tem. 2:4) Ɔda ali kɛ, Gyihova mɔɔ yɛdi ye eni na yɛye ye ayɛlɛ la maa yɛnyia nyilalɛ dɔɔnwo. (Mrɛ. 10:22) Yɛɛ ɔboa ɔmaa yɛ nee yɛ Bɔvolɛ ne nyia abusuabɔlɛ kpalɛ.—Wulo. 8:35-39.

²¹ Kɛmɔ yɛzuzu nwo la, anwodozo mɔɔ yɛbanyia ye wɔ Gyihova adehilelɛ mɔɔ di munli anu la ɛmba mgbane; ɔwɔ kɛ yɛbɔ nwolɛ mɔdenle. Zɔhane ati, dua nzɛlɛlɛ zo fa ɛ nwo to Gyihova anwo zo wɔ adenle biala anu. Dwenledwenle kɛzi Gyihova manle ye ɛhulolɛdeɛ yɛle ɛkɛ wɔ tete ne nee mɔɔ ɔbayɛ ye kenlebie la anwo. Dua wɔ ɛzonlenlɛ zo fa ɛ nwo to Gyihova anwo zo dahuu. Nɔhalɛ, Gyihova ngakyelɛ ne mɔ wɔ ɛkɛ dahuu. Saa ɛdi zo a ɛbanyia ngoane mɔɔ ɛnlɛ awieleɛ!