1, 2. Mɔɔ Gyisɛse nee ye ɛzoanvolɛ nɔhavoma ne wiele ɛvolɛ 33 Y.M. Akpabɛnwo ne di la, duzu a ɔyɛle ɔmanle bɛ a?

ƐNEE aleɛ ɛdwo wɔ Naesan 14 ɛvolɛ 33 Y.M. Gyisɛse nee ɔ gɔnwo mɔ ɛli Akpabɛnwo ɛvoyia ne ɛwie. Ɛvoyia ɛhye manle bɛhakyele adenle mɔɔ Nyamenle luale zo liele Yizilayɛma vile Yigyibiti akɛlɛyɛlɛ bo la. Noko ɛnee “ngoanelielɛ mɔɔ ɛnlɛ awieleɛ la” wɔ ɛkɛ maa ɛdoavolɛ nɔhavoma ɛhye kenlebie. Agbɔvolɛ bɛahu bɛ Adekilevolɛ ne mɔɔ ɛtane biala ɛnle ɔ nwo la ye alehyenlɛ nu. Noko ɛnee ɛkpɔlɛ kpole zɛhae bahakyi nyilalɛ. Bɛbalie alesama bɛavi ɛtane nee ewule nu ɔlua Gyisɛse ewule ne ati.—Hib. 9:12-14.

² Amaa yɛ rɛle anvi ɛlɔlɛ ngyehyɛleɛ kɛnlɛma ɛhye la, Gyisɛse vale ɛvoyia fofolɛ bie ziele Akpabɛnwo ɛvoyia ne agyakɛ anu. Ɔvale kpanwo mɔɔ mgbɔvonle biala ɛnle nu la ɔbubule nu ɔmanle ye ɛdoavolɛ nɔhavo 11 ne na ɔzele bɛ kɛ: ‘Ɛhye a le me nwonane ne mɔɔ bɛva bɛmaa bɛ la. Anrɛɛ bɛyɛ ɛhye bɛva bɛhakye me. Zɔhane ala noko yɛɛ mɔɔ bɛwiele debie di la, ɔvale dwora ne ɔmanle bɛ na ɔhanle kɛ, “Dwora ɛhye mɔɔ bɛlɛno nu la a le Nyamenle ngyekyeleɛ fofolɛ ne mɔɔ bɛva me mogya ne bɛzɔ ɔ nloa la; bɛlie bɛnlo.”’—Luku 22:19, 20.

3. (a) Nzenzaleɛ kpole boni a rale Gyisɛse ewule nzi a? (b) Gyisɛse nzɛlɛlɛ ne mɔɔ ɔwɔ Dwɔn ati 17 la anwo kpuyia boni a yɛbahola yɛabiza a?

³ Mɛla ngyekyeleɛ dɛba ne mɔɔ Nyamenle nee Yizilayɛma yɛle la ɛlɛba awieleɛ. Ngyekyeleɛ fofolɛ ne mɔɔ Gyihova nee Gyisɛse ɛdoavolɛma mɔɔ bɛkpokpa bɛ ɛyɛ la a bagyinla yemɔ agyakɛ anu a. Ɛnee Gyisɛse ɛngulo kɛ ye ɛdoavolɛma ne bayɛ kɛ Yizilayɛma la. Yizilayɛma guale Nyamenle duma nwuanzanwuanza ne anwo evinli ɔluakɛ bɛanyɛ ko bɛanzonle Nyamenle nɔhalɛ nu. (Dwɔn 7:45-49; Gyi. 23:6-9) Ɛnee Gyisɛse kulo kɛ ye ɛdoavolɛma yɛ ko  amaa bɛahola bɛayɛ gyima bɛawula Nyamenle duma ne anyunlunyia. Ɔlua ɛhye ati, duzu a Gyisɛse yɛle a? Ɔyɛle nzɛlɛlɛ kɛnlɛma bie mɔɔ awie biala anye balie ye ɛgengalɛ nwo la ɔvale ɔbizale ɔ Ze moalɛ. (Dwɔn 17:1-26; nea mɔlebɛbo nvoninli ne.) Mekɛ mɔɔ yɛlɛsuzu nzɛlɛlɛ ɛhye anwo la, yɛbahola yɛabiza kɛ: “Asoo Nyamenle buale Gyisɛse nzɛlɛlɛ ne?” “Asoo me nyɛleɛ nee nuhua edwɛkɛ ne le ko?”

4, 5. (a) Duzu a yɛsukoa yɛfi Gyisɛse nzɛlɛlɛ ne mukenye ne anu a? (b) Kɛzi Gyihova buale Gyisɛse nzɛlɛlɛ ne ɛ?

⁴ Gyisɛse hilehilele ye ɛdoavolɛma ne Nyamenle anwo edwɛkɛ toonwo aledwolɛ. Akee ɔnleanle anwuma ɔzɛlɛle kɛ: “Egya, mekɛ ne ɛdwu. Wula Ɛ Ra anyunlunyia na maa Ralɛ ne ɛwula wɔ anyunlunyia. Ɔluakɛ wɔmaa ye menli kɔsɔɔti anwo zo tumi, amaa yeava ngoane mɔɔ ɛnlɛ awieleɛ la yeamaa menli mɔɔ wɔva bɛ wɔmaa ye la. . . . Mehile wɔ anyunlunyia ne wɔ azɛlɛ ye azo; mewie gyima mɔɔ ɛvale ɛmanle me la di. Egya, fa me anyunlunyia maa me, anyunlunyia ne mɔɔ bɛkabɔ ewiade ye la ɛnee melɛ ye la, fa maa me.”—Dwɔn 17:1-5.

⁵ Yɛ ninyɛne mɔɔ ɛnee nwolɛ hyia Gyisɛse kpalɛ la nzonlɛ wɔ ye nzɛlɛlɛ ne anu. Debie mɔɔ ɛnee hyia ye kpole kpalɛ la a le kɛ ɔbawula ye anwuma Selɛ ne anyunlunyia. Yɛnwu ɛhye wɔ Gyisɛse edwɛkɛ mɔɔ ɔlumua wɔ ye nzɛlɛlɛ nwo neazo ne anu la anu: “Egya, Wɔ duma ne anwo ɛde.” (Luku 11:2) Mɔɔ tɔ zo nwiɔ la a le ye ɛdoavolɛma ne ngyianlɛ mɔɔ ɔbizale la, “amaa yeava ngoane mɔɔ ɛnlɛ awieleɛ la yeamaa.” Yemɔ anzi, akee Gyisɛse bizale debie mɔɔ ɔdaye mumua ne ɔhyia nwo la: “Egya, fa me anyunlunyia maa me, anyunlunyia ne mɔɔ bɛkabɔ ewiade ye la ɛnee melɛ ye la.” Gyihova manle ɔ Ra ne mɔɔ ɔdi nɔhalɛ la ahatualɛ, na “duma mɔɔ ɔvale ɔmanle ye la tɛla [anwumabɔvolɛma kɔsɔɔti] ɛdeɛ ne.”—Hib. 1:4.

6. Duzu a ɛnee ɔwɔ kɛ ɛzoanvolɛma ne yɛ na bɛanyia dahuu ngoane a, na duzu a maa yɛnwu kɛ bɛyɛle ye zɔ a?

⁶ Gyisɛse eza bizale mɔɔ ɔwɔ kɛ yɛyɛ na yɛanyia ɛlolɛ ahyɛlɛdeɛ ne mɔɔ le dahuu ngoane la. (Bɛgenga Dwɔn 17:3.) Ɔhanle kɛ ɔwɔ kɛ ‘yɛnwu’ Nyamenle nee Kelaese. Kɛ ɔkɛyɛ na yɛayɛ ɛhye ɛ? Mɔɔ lumua, ɔwɔ kɛ yɛsukoa Gyihova nee ɔ Ra ne anwo ninyɛne dɔɔnwo. Mɔɔ tɔ zo nwiɔ, ɔwɔ kɛ yɛfa mɔɔ yɛzukoa la yɛbɔ yɛ ɛbɛla. Ɛnee ɛzoanvolɛ ne mɔ ɛyɛ ninyɛne ɛhye mɔ mɔɔ Gyisɛse hanle ye wɔ ye nzɛlɛlɛ ne anu la: “Nrɛlaleɛ mɔɔ ɛvale ɛmanle me la, meva memaa bɛ, yɛɛ bɛzɔ nu noko.” (Dwɔn 17:8) Noko ɛnee ɔwɔ kɛ bɛkɔ zo bɛdwenledwenle Nyamenle edwɛkɛ ne anwo bɛfa bɛbɔ bɛ ɛbɛla kolaa na bɛanyia dahuu ngoane. Asoo ɛzoanvolɛma ne holale yɛle ɛhye hɔle ewule nu? Ɛhɛe. Yɛze ye zɔ ɔboalekɛ bɛhɛlɛ bɛ nuhua ko biala duma wɔ anwuma Gyɛlusalɛm Fofolɛ ne adiabo awolɛ 12 ne mɔ azo.—Yek. 21:14.

7. Duzu a Nyamenle mɔɔ “ɛnwu” ye la kile a, na kɛmɔti a ɛhye anwo hyia ɛ?

⁷ Giliki aneɛ ne anwo mbɔlɔba ka kɛ edwɛkɛkpɔkɛ ne mɔɔ bɛhile ɔ bo wɔ ɛke kɛ “bɛkɛnwu” la eza kola kile kɛ “ɔwɔ kɛ ɛkɔ zo ɛnwu” anzɛɛ “ɔwɔ kɛ ɛtoa zo ɛnwu.” Ngilenu nwiɔ ɛhye mɔ lua edinli ko azo, yɛɛ ko biala anwo hyia. Yemɔti, edwɛkɛ “bɛkɛnwu” kile mekɛ tendenle mɔɔ bɛfa bɛsukoa Nyamenle anwo debie toonwo “bɛnwu” ye la. Noko akee, Sonla kpole mɔɔ tɛla biala wɔ ewiade mɔɔ yɛbanwu ye la kile dɔɔnwo tɛla Nyamenle subane nee ye bodane mɔɔ yɛbade ɔ bo ala la. Agɔnwolɛvalɛ kyengye mɔɔ yɛ nee  Gyihova nee yɛ mediema banyia la noko boka nwo. Baebolo ne ka kɛ: “Awie biala mɔɔ ɛnlɛ ɛhulolɛ la ɛnze Nyamenle.” (1 Dwɔn 4:8) Yemɔti, Nyamenle mɔɔ yɛbanwu ye la eza kile kɛ yɛbadie ye. (Bɛgenga 1 Dwɔn 2:3-5.) Nea nwolɛ adenle kpole mɔɔ yɛnyia kɛ yɛnwu Gyihova a! Noko nwolɛ adenle kɛnlɛma ɛhye bahola avi yɛ sa kɛmɔ ɔdole Dwudase Yesekaleɔto la. Ɔwɔ kɛ yɛyɛ mɔɔ yɛbahola la kɔsɔɔti yɛsɔ nu boɛ. Saa yɛyɛ zɔ a, awieleɛ kolaa ne yɛbafɛta yɛamaa dahuu ngoane ɛlolɛ ahyɛlɛdeɛ ne.—Mat. 24:13.

8, 9. Duzu a ɛnee nwolɛ hyia Gyisɛse kpalɛ wɔ ye azɛlɛ ye azo ɛzonlenlɛ gyima ne anu a, na ɛzonlenlɛ nu amaamuo boni a yeanli zo a?

⁸ Saa yɛkenga Gyisɛse nzɛlɛlɛ ne mɔɔ wɔ Dwɔn ati 17 ne la a, ɔmaa yɛnwu kɛ tɛ ye ɛzoanvolɛma ne angome a ɔkulo bɛ edwɛkɛ a, yɛdayɛ noko yɛboka nwo. (Dwɔn 17:20) Eza ɔwɔ kɛ yɛnwu kɛ tɛ yɛ ngoanelielɛ a le debie mɔɔ nwolɛ hyia Gyisɛse kpalɛ a. Mekɛ tendenle ne mɔɔ ɔvale ɔyɛle ye ɛzonlenlɛ gyima ne wɔ azɛlɛ ye azo la, ɛnee debie mɔɔ anwo hyia ye kpalɛ kpalɛ la a le ɔ Ze duma ne mɔɔ ɔbade nwo na yeawula ye anyunlunyia la. Kɛ neazo la, Gyisɛse ka gyima mɔɔ ɔrale ye ɛyɛlɛ anwo edwɛkɛ wɔ Nazalɛte nyianu sua ne anu la, ɔgengale edwɛkɛ ɛhye mɔɔ ɔwɔ Ayezaya nwoma ne anu la: “[Gyihova] Sunsum ne wɔ me nwo zo, ɔboalekɛ yekpa nu yeye me kɛ menva Edwɛkpa ne membɛlɛ ehyianvolɛma.” Ɔda ali kɛ Gyisɛse bɔle Nyamenle duma ne wɔ mekɛ mɔɔ ɔgengale edwɛkɛ ne la.—Luku 4:16-21.

⁹ Kolaa na Gyisɛse ara azɛlɛ ye azo la, Dwuuma ɛzonlenlɛ ne anu mgbanyima duale menli ne kɛ ɔnle kɛ bɛfa Nyamenle duma ne bɛdi gyima. Yɛze kɛ Gyisɛse anli amaamuo ɛhye mɔɔ ɛngyi Baebolo ne azo la azo. Ɔzele zɔhane ɛzonlenlɛ nu mgbanyima ne mɔ kɛ: ‘Egya duma nu yɛɛ melua mɔɔ membale a, na bɛmɛ, bɛanlie me; na saa awie gyɛne ɔdaye ɔfa ye tumi ɔba a, bɛbalie ye.’ (Dwɔn 5:43) Akee ɔka ekyii bɛku Gyisɛse la, ɔhanle debie mɔɔ nwolɛ hyia ye kpole kpalɛ la wɔ nzɛlɛlɛ nu kɛ: “Egya, maa anyunlunyia  ɛha wɔ duma ne.” (Dwɔn 12:28) Yemɔti, ɔnyɛ nwanwane kɛ Gyisɛse hanle ɔ Ze duma ne mɔɔ ɔbawula ye anyunlunyia la anwo edwɛkɛ wɔ ye nzɛlɛlɛ ne mɔɔ yɛlɛsuzu nwo kɛkala la anu a.

10, 11. (a) Duzu a Gyisɛse yɛle lale ɔ Ze duma ne ali a? (b) Gyisɛse ɛdoavolɛma bodane a le duzu?

¹⁰ Gyisɛse zɛlɛle kɛ: “Mela wɔ [duma ne] ali mehile menli mɔɔ ɛvale bɛ ɛvile ɛtane ewiade ye anu ɛmanle me la. Ɛnee bɛle wɔ ɛdeɛ, yɛɛ ɛvale bɛ ɛmanle me a. Bɛli wɔ edwɛkɛ ne azo. Kɛkala melɛba ɛ nwo lɔ; menle ewiade ye anu bieko, na bɛmɛ bɛwɔ ewiade ye anu. Selɛ Nwuanzanwuanza, wɔ duma ne mɔɔ ɛvale ɛmanle me la tumi nu ti, fa bɛ sie gyɛlɛɛnye, amaa bɛayɛ ko kɛ ɛdawɔ nee medame yɛle la.”—Dwɔn 17:6, 11.

¹¹ Gyisɛse yɛle dɔɔnwo dɛlale ɔ Ze duma ne mɔɔ ɔlale ye ali ɔhilele ye ɛdoavolɛma ne la. Gyisɛse manle bɛnwunle mɔɔ Nyamenle duma ne gyi ɛkɛ maa, ye subane ngakyile ne mɔ nee kɛzi ɔ nee yɛ di la. (Ade. 34:5-7) Ɔnva nwo kɛ kɛkala Gyisɛse le Belemgbunli wɔ anwuma la, ɔkɔ zo ɔboa ye ɛdoavolɛma ɔmaa bɛda Nyamenle duma ne ali wɔ azɛlɛ ye kɔsɔɔti azo. Duzu ati ɔ? Amaa bɛaboa menli dɔɔnwo bamaa bɛanwu Gyihova kolaa na ewiade ngyehyɛleɛ ɛtane ɛhye ahɔ ye awieleɛ. Nea kɛzi Gyihova bakpogya ye duma wɔ mekɛ mɔɔ ɔbalie ye nɔhalɛ azonvolɛ wɔ zɔhane mekɛ ne la ɛ!—Yiz. 36:23.

12. Ninyɛne nsa boni a ɔhyia kɛ yɛyɛ na yɛahola yɛawie yɛ ngoanelielɛ gyima ne yɛ a?

¹² Gyisɛse yɛle gyima ɛsesebɛ boale ye ɛdoavolɛma ɔmanle bɛlile bɛ sinlidɔlɛ nwo gyima. Ɛnee ɛhye anwo hyia na bɛahola bɛawie gyima mɔɔ Gyisɛse bɔle ɔ bo la. Gyisɛse zɛlɛle kɛ: “Mezoa bɛ wɔ ewiade ye anu, kɛmɔ ɛzoanle me wɔ ewiade ye anu la.” Gyisɛse zɛlɛle ninyɛne nsa mɔɔ ɔwɔ kɛ ye ɛdoavolɛma ne yɛ la anwo moalɛ. Mɔɔ lumua, ɔnle kɛ ye ɛdoavolɛma ne yɛ Seetan ewiade ne ɛdeɛ. Mɔɔ tɔ zo nwiɔ, ɔzɛlɛle kɛ bɛbayɛ tieyɛ amaa bɛ nwo ade anzɛɛ bɛayɛ nwuanzanwuanza. Mɔɔ tɔ zo nsa, Gyisɛse zɛlɛle kɛ ye ɛdoavolɛma ne ɛyɛ ko kɛmɔ ɔ nee ɔ Ze le ko la. Yɛ nuhua ko biala bahola abiza ɔ nwo kɛ, ‘Asoo melɛyɛ ninyɛne nsa ne mɔɔ Gyisɛse hanle nwolɛ edwɛkɛ la?’ Ɛnee Gyisɛse lɛ anwodozo kɛ saa ye ɛdoavolɛma ne yɛ ninyɛne ɛhye mɔ a, “ewiade amra” dɔɔnwo bɛalie bɛ edwɛkɛ ne ali.—Bɛgenga Dwɔn 17:15-21.

13. Kɛzi bɛbuale Gyisɛse nzɛlɛlɛ ne wɔ ɛvoya ne mɔɔ lumua Y.M. la anu ɛ?

¹³ Saa yɛsukoa, Baebolo buluku ne mɔɔ ɔdoa Edwɛkpa nna ne azo mɔɔ yemɔ a le Ɛzoanvolɛma Gyima Ne la a, yɛbanwu kɛ Gyihova buale Gyisɛse nzɛlɛlɛ ne. Ɛnee Dwuuma nee menli mɔɔ ɛnle Dwuuma, sukoavolɛma nee ehyiavolɛma, ngɛkɛlɛ nee menlenlɛma a ɛnee wɔ alumua Keleseɛnema asafo ne mɔ anu a. Anrɛɛ ɛhye bahola ava mgbakyemgbakyenu ara. Noko, bɛ kɔsɔɔti bɛbɔle nu bɛyɛle ko yemɔti bɛvale bɛ bɛtotole sonlabaka ne mɔɔ ɔlɛ nvɛyeba ngakyile mɔɔ Gyisɛse a le bɛ ti la anwo. (Ɛfɛ. 4:15, 16) Nea kɛzi ɛhye yɛ nwanwane wɔ Seetan ewiade mɔɔ nuhua ɛhyehyɛ la anu a! Ɛhye anwo ayɛlɛyelɛ kɔsɔɔti le Gyihova mɔɔ ɔmanle ɔyɛle boɛ ɔlua ye sunsum nwuanzanwuanza ne moalɛ zo la ɛdeɛ.—1 Kɔl. 3:5-7.

14. Kɛzi bɛbua Gyisɛse nzɛlɛlɛ ne ɛnɛ ɛ?

¹⁴ Ɔyɛ alɔbɔlɛ kɛ koyɛlɛ ɛhye angyinla wɔ ɛzoanvolɛma ne ewule nzi la. Kɛmɔ bɛhanle bɛdole ɛkɛ la, bie mɔ kpɔkyele, na bɛvale adalɛ ngilehilelɛ nee mgbakyemgbakyenu bɛrale asafo ne anu. Ɛhye a vale Keleseɛnemaanle ne anu ɛzonlenlɛ  ngakyile ne mɔ rale a. (Gyi. 20:29, 30) Noko wɔ ɛvolɛ 1919 ne, Gyisɛse liele ye ɛdoavolɛma mɔɔ bɛkpokpa bɛ la vile adalɛ ɛzonlenlɛ nu na ɔboɔboale bɛ nloa wɔ ‘koyɛlɛ mɔɔ ɔdi munli’ la anu. (Kɔl. 3:14) Duzu a vi bɛ daselɛlilɛ gyima ne mɔɔ bɛfa koyɛlɛ bɛyɛ la anu ɛra a? Bɛnyia ‘mboane gyɛne’ mgbe nsuu, bɛvi “mbusua, maanle, aneɛ nee menli ngakyile kɔsɔɔti anu,” na bɛ nee Nyamenle menli ne mɔɔ bɛkpokpa bɛ la ɛyɛ ko wɔ ɛzonlenlɛ nu. (Dwɔn 10:16; Yek. 7:9) Ɔle Gyisɛse nzɛlɛlɛ ɛhye mɔɔ ɔyɛle la anwo mualɛ mɔɔ ɔyɛ azibɛnwo, “na ewiade amra anwu kɛ ɛdawɔ [Gyihova] a ɛzoanle me a, na ɛkulo bɛ kɛmɔ ɛkulo me la”!—Dwɔn 17:23.

15. Nwolɛ adenle boni a Gyisɛse zɛlɛle manle ye ɛdoavolɛma mɔɔ bɛkpokpa bɛ la ɛ?

¹⁵ Wɔ Naesan 14 ne mɔlebɛbo, Gyisɛse wulale ye ɛzoanvolɛma ne anyunlunyia ɔlua ngyekyeleɛ mɔɔ ɔ nee bɛ yɛle amaa bɛ nee ye ali tumi wɔ ye Belemgbunlililɛ ne anu la azo. (Luku 22:28-30; Dwɔn 17:22) Gyisɛse zɛlɛle manle ye ɛdoavolɛma mɔɔ bɛkpokpa bɛ la kɛ: “Egya! Wɔva bɛ wɔmaa me, na mekpondɛ kɛ bɛ nee me tɛnla ɛleka mɔɔ mewɔ la, amaa bɛanwu me anyunlunyia ne mɔɔ ɛvale ɛmanle me la, ɔluakɛ ɛhulole me kolaa na bɛabɔ ewiade ye.” (Dwɔn 17:24) Gyisɛse mboane gyɛne ne anye ɛmbolo nwolɛ adenle ɛhye, emomu, bɛ nye die, na ɔle daselɛ bieko mɔɔ ɔkile kɛ koyɛlɛ wɔ nɔhalɛ Keleseɛnema mɔɔ bɛwɔ ɛkɛ ɛnɛ la avinli.

16, 17. (a) Duzu a Gyisɛse hanle ye wɔ ye nzɛlɛlɛ ne awieleɛ kɛ ɔbahɔ zo yeayɛ a? (b) Duzu a ɔwɔ kɛ yɛyele yɛ nwo yɛyɛ a?

¹⁶ Ɛzonlenlɛ nu mgbanyima ɛmaa bɛ menli ne dɔɔnwo ɛbu bɛ nye ɛgua daselɛ mɔɔ kile kɛ Gyihova lɛ menli ekpunli bie mɔɔ bɛze ye na koyɛlɛ wɔ bɛ avinli la azo. Kɛ ɛnee ɔde ye wɔ Gyisɛse mekɛ zo la ɛne. Yemɔti a ɔvale edwɛkɛ ɛhye ɔdwulale ye nzɛlɛlɛ ne la: “Pɛlepɛlelilɛ Egya! Ɛtane ewiade ye ɛnze wɔ, na mame meze wɔ, yɛɛ ɛhye mɔ ze kɛ ɛdawɔ a ɛzoanle me a. Mela wɔ [duma ne] ali mehile bɛ na mebahɔ zo meayɛ ye zɔhane, amaa ɛhulolɛ ne mɔɔ ɛlɛ ye me nwo la adɛnla bɛ nu, na medame noko meadɛnla bɛ nu.”—Dwɔn 17:25, 26.

¹⁷ Kpolerazulɛ biala ɛnle nwolɛ kɛ Gyisɛse bɔle ɛbɛla mɔɔ ɔ nee ye nzɛlɛlɛ ne le ko la. Kɛ asafo ne Ati la, ɔkɔ zo ɔboa yɛ ɔmaa yɛda ɔ Ze duma ne nee ye bodane ne ali yɛkile menli. Bɛmaa yɛdie Gyisɛse yɛbɔ edwɛkpa ne nolo na yɛboa menli yɛmaa bɛrayɛ ye ɛdoavolɛma. (Mat. 28:19, 20; Gyi. 10:42) Eza bɛmaa yɛbɔ mɔdenle yɛdɛnla koyɛlɛ nu kɛ Nyamenle menli. Saa yɛyɛ ɛhye mɔ a, ɛnee yɛlɛmaa yɛ ɛbɛlabɔlɛ nee Gyisɛse nzɛlɛlɛ ne ayɛ ko, na yemɔ bawula Gyihova duma ne anyunlunyia na yɛ nye alie dahuu.