1, 2. (a) Nwane atɔfolɛlielɛ a bamaa anwuma amra ali fɛlɛko kpole a? (b) Kpuyia boni mɔ a yɛbahola yɛabiza a?

ƆDIE mekɛ na awie ayɛ atɔfolɛlielɛ nwo ngyehyɛleɛ. Noko yɛbazuzu atɔfolɛlielɛ titile bie—belemgbunli bie atɔfolɛlielɛ nwo. Dwenle nwolɛ nea! Bɛva asɛɛ ɛvolɛ 2,000 a bɛziezie bɛ nwo a. Kɛkala, ɔka ekyii atɔfolɛ nrenya ne nee ye atɔfolɛ raalɛ ne yia. Ɔnrɛhyɛ, anwuma ɛlɔnema bado anyelielɛ edwɛne wɔ Belemgbunli ne suakunlu ɛkɛ ne kɛ: “Bɛye Nyamenle ayɛlɛ! Ɔluakɛ Awulae, yɛ Nyamenle Bedevinli ne le Belemgbunli! Bɛmaa yɛ nye ɛlie na yɛli fɛlɛko; bɛmaa yɛyeyɛ ye kɛ ɔle kpole! Ɔluakɛ Boaneralɛ ne atɔfolɛlielɛ mekɛ ne ɛdwu, na ye atɔfolɛ [raalɛ] ne ɛziezie ɔ nwo ɛwie.”—Yek. 19:6, 7.

² Gyisɛse Kelaese a le “Boaneralɛ ne” mɔɔ ye atɔfolɛlielɛ bamaa anwuma amra ali fɛlɛko la. (Dwɔn 1:29) Tɛladeɛ boni a ɔbawula a? Ye atɔfolɛ raalɛ ne a le nwane? Kɛzi bɛziezie ye bɛmaa atɔfolɛlielɛ ne ɛ? Mekɛ boni a bɛbalie atɔfolɛ ne a? Atɔfolɛlielɛ ɛhye bamaa anwuma amra ali fɛlɛko, noko asoo bɛdabɛ mɔɔ bɛbadɛnla azɛlɛ ye azo dahuu la noko bali fɛlɛko ɔ? Mekɛ mɔɔ yɛlɛtoa zo yɛanleɛnlea Edwɛndolɛ 45 ne anu la, yɛ nye la ye ɛsesebɛ kɛ yɛbazuzu kpuyia ɛhye mɔ anwo.

3, 4. (a) Duzu a bɛha ye wɔ Atɔfolɛ nrenya ne tɛladeɛ ne anwo a, na duzu bieko a maa ɔ nye die a? (b) Nnwane mɔ a “belemgbunli raalɛ ne” nee “arelemgbunli mralɛ mraalɛ” ne mɔ mɔɔ bɛ nee Atɔfolɛ nrenya ne di fɛlɛko la gyi ɛkɛ maa a?

³ Bɛgenga Edwɛndolɛ 45:8, 9. Atɔfolɛ nrenya, Gyisɛse Kelaese wula ye anyunlunyia belemgbunli atɔfolɛ tɛladeɛ. Ɔfɛta kɛ ye tɛladeɛ ne anu bɔ evuanlɛ kɛ alufuanlɛ nee kasea mɔɔ boka “ninyɛne evuanlɛ” mɔɔ ɛnee bɛfa bɛyɛ ɛkpokpalɛ nwole nwuanzanwuanza wɔ tete Yizilayɛ anwo la.—Ade. 30:23-25.

⁴ Edwɛne ne mɔɔ bɛlɛto ye wɔ anwuma, wɔ ye suakunlu ɛkɛ ne la boka ninyɛne mɔɔ maa Atɔfolɛ nrenya ne fa anyelielɛ kendɛ ye atɔfolɛlielɛ ne la anwo. “Belemgbunli raalɛ ne” mɔɔ ɔgyi ɛkɛ ɔmaa Nyamenle ahyehyɛdeɛ ne foa mɔɔ wɔ anwuma mɔɔ “arelemgbunli mralɛ mraalɛ” mɔɔ bɛgyi ɛkɛ bɛmaa anwumabɔvolɛ nwuanzanwuanza ne mɔ boka nwo la noko di fɛlɛko. Nea kɛzi ɔyɛ anyelielɛ kɛ ɛbade kɛ anwuma ɛlɔnema ɛlɛka kɛ: “Bɛmaa yɛ nye ɛlie na yɛli fɛlɛko . . . Ɔluakɛ Boaneralɛ ne atɔfolɛlielɛ mekɛ ne ɛdwu [a]”!

5. “Boaneralɛ ne aye ne” a le nwane?

⁵ Bɛgenga Edwɛndolɛ 45:10, 11. Yɛnwu Atɔfolɛ nrenya ne, noko atɔfolɛ raalɛ ne a le nwane? Atɔfolɛ raalɛ ne gyi ɛkɛ maa menli ekpunli bie mɔɔ bɛwɔ asafo ne mɔɔ Gyisɛse Kelaese li ɔ ti anu la. (Bɛgenga Ɛfɛsɛsema 5:23, 24.) Bɛbaraboka Kelaese Mɛzaya Belemgbunlililɛ ne anwo. (Luku 12:32) Keleseɛnema ɛhye mɔ mɔɔ bɛle 144,000 mɔɔ bɛva sunsum ne bɛkpokpa bɛ la, “ɛleka biala mɔɔ Boaneralɛ ne ɛlɛkɔ la bɛdoa ye.” (Yek. 14:1-4) Bɛle “Boaneralɛ ne aye” na bɛ nee ye de wɔ ye sua nu wɔ anwuma.—Yek. 21:9; Dwɔn 14:2, 3.

6. Duzu ati a bɛfɛlɛ Keleseɛnema mɔɔ bɛkpokpa bɛ la kɛ “Belemgbunli ara raalɛ” ɛ, na kɛmɔti a bɛse ‘bɛmaa bɛ rɛle ɛvi bɛ menli ɛ’?

⁶ Bɛanvɛlɛ atɔfolɛ raalɛ ɛhye ‘ralɛ raalɛ ala,’ emomu, bɛvɛlɛle ye “Belemgbunli ara raalɛ.” (Edw. 45:13) Nwane a le “Belemgbunli” ɛhye? Keleseɛnema mɔɔ bɛkpokpa bɛ la le Gyihova “amra.” (Wulo. 8:15-17) Kɛmɔ bɛbalie bɛ atɔfolɛ wɔ anwuma la ati, bɛdule Keleseɛnema mɔɔ bɛkpokpa bɛ la folɛ kɛ: ‘Bɛmaa bɛ rɛle ɛvi bɛ menli nee bɛ ze sua nu amra.’ Ɔwɔ kɛ “bɛdwenle ninyɛne mɔɔ wɔ anwuma lɔ la anwo na bɛgyakyi mɔɔ wɔ azɛlɛ ye azo la.”—Kɔl. 3:1-4.

7. (a) Kɛzi Kelaese zieziele ye kenlebie atɔfolɛ ne ɛ? (b) Kɛzi atɔfolɛ raalɛ ne bu ye kenlebie Atɔfolɛ nrenya ne ɛ?

⁷ Kelaese ɛva ɛvolɛ dɔɔnwo ɛziezie ye atɔfolɛ raalɛ ɛhye mɔɔ ɔbalie ye atɔfolɛ wɔ anwuma la. Ɛzoanvolɛ Pɔɔlo hilehilele nu kɛ “Kelaese hulole [asafo] ne na ɔdole ye ngoane aze wɔ ɔ ti. . . . Ɔyɛle ɛhye na ɔvale ɔ nloa edwɛkɛ nee nzule ɔnrinzinle nwolɛ bɔkɔɔ na ɔdele nwolɛ; amaa yeava [asafo] ne kɛnlɛma gyɛlɛɛnye yeamaa ɔ nwo, mɔɔ nwolɛ ɛtɛkpɔdele, evinli biala ɛnle nwolɛ, yɛɛ nvonleɛ biala ɛnle nwolɛ na nwolɛ te nwuanzaanwu a.” (Ɛfɛ. 5:25-27) Pɔɔlo hanle hilele tete Keleseɛnema mɔɔ ɛnee wɔ Kɔlente la kɛ: “Metwe bɛ nwo nungule, kɛmɔ Nyamenle yɛ ye ala la. Bɛle kɛ bɛlɛra mɔɔ ɛnze nrenya mɔɔ meyia ye kɛ megya ye meamaa nrenya kokye, Kelaese mumua ne.” (2 Kɔl. 11:2) Atɔfolɛ nrenya-Belemgbunli Gyisɛse Kelaese ahonle twe ye wɔ ye kenlebie atɔfolɛ raalɛ ne sunsum nu “anwofɛlɛko ne” anwo. Atɔfolɛ raalɛ ne noko die ye kenlebie ɔ hu ne to nu kɛ ɔ “menle” na ‘ɔtie ɔ ne.’

8. Duzu ati a ɔfɛta kɛ bɛhanle atɔfolɛ raalɛ ne anwo edwɛkɛ kɛ ‘bɛziezie ye hyeleenyi a’?

⁸ Bɛgenga Edwɛndolɛ 45:13, 14a. ‘Bɛziezie atɔfolɛ ne hyeleenyi’ bɛmaa  belemgbunli agyalɛ. Wɔ Yekile 21:2, bɛvale atɔfolɛ raalɛ ne bɛdole suakpole bie, Gyɛlusalɛm Fofolɛ ne anwo, na ‘bɛziezie ye bɛmaa ɔ hu.’ Suakpole ɛhye mɔɔ ɔwɔ anwuma la ta wɔ “Nyamenle anyunlunyia nu,” ye ɛdalɛ ne le kɛ “ezukoa bolɛ ne mɔɔ bɛfɛlɛ ye ‘gyasepa’ la, na ɔ nye le kɔngyekɔngye zɛhae.” (Yek. 21:10, 11) Bɛha Gyɛlusalɛm Fofolɛ ne anyunlunyia ne anwo edwɛkɛ kɛnlɛma wɔ Yekile buluku ne anu. (Yek. 21:18-21) Ɔnyɛ azibɛnwo kɛ edwɛndovo ne hanle ye wɔ atɔfolɛ raalɛ ne anwo kɛ ‘bɛziezie ye hyeleenyi la’! Yeanyɛ boɛ fee la, belemgbunli ne balie ye atɔfolɛ ne wɔ anwuma.

9. Nwane a le “belemgbunli ne” mɔɔ bɛvale atɔfolɛ raalɛ ne bɛrɛlɛle ye la, na kɛzi atɔfolɛ raalɛ ne tɛladeɛ ne fɛta ɛ?

⁹ Ahenle mɔɔ bɛbava atɔfolɛ raalɛ ne bɛamaa ye la a le Atɔfolɛ nrenya ne—Mɛzaya Belemgbunli ne. Ɔvale ‘edwɛkɛ ne ɔyɛle nzule ɔnrinzinle atɔfolɛ raalɛ ne anwo ɔdele ɔ nwo.’ “Nvonleɛ biala ɛnle” atɔfolɛ raalɛ ne anwo, ‘ɔ nwo te nwuanzaanwu.’ (Ɛfɛ. 5:26, 27) Ɔbayɛ kɛ atɔfolɛ raalɛ ne noko tɛladeɛ ne fɛta maa gyimalilɛ ne. Ɛhɛe! Nɔhalɛ nu, “ɔwula ezukoanzule adɛladeɛ,” adɛladeɛ mɔɔ sonle bolɛ la, na “bɛva ye bɛhɔ belemgbunli ne ɛkɛ.” Wɔ Boaneralɛ ne atɔfolɛlielɛ ne abo, ‘bɛmaa atɔfolɛ ne lenen ɛdanlɛ kɛnlɛma anye nwohyee kɛ ɔheda—ɛdanlɛ kɛnlɛma ne a le Nyamenle menli ne ɛbɛla kpalɛ mɔɔ bɛbɔle la.’—Yek. 19:8.

10. Mekɛ boni a bɛbalie Boaneralɛ ne atɔfolɛ ne a?

¹⁰ Bɛgenga Yekile 19:7. Mekɛ boni a bɛbalie Boaneralɛ ne atɔfolɛ ne a? ‘Atɔfolɛ raalɛ ne ɛziezie ɔ nwo’ ɛdeɛ, noko edwɛkɛ mɔɔ bɛhanle bɛdoale zo la ɛnvane atɔfolɛlielɛ nwo. Emomu, ɔmaa yɛnwu mɔɔ bazi wɔ anwongyelelɛ kpole ne awieleɛ la wienyi. (Yek. 19:11-21) Asoo ɛhye kile kɛ bɛbalie atɔfolɛ ne kolaa na Atɔfolɛ nrenya-Belemgbunli ne awie ye konimlilɛ ne ɔ? Kyɛkyɛ. Tɛ kɛzi ninyɛne badoɔdoa zo la yɛɛ bɛyele bɛhilele wɔ Yekile ne anu a. Wɔ Edwɛndolɛ 45 ne, bɛhanle kɛ Belemgbunli Gyisɛse Kelaese bava ye dadeɛ ne ali “konim” wɔ ye agbɔvolɛ nwo zo kolaa na yealie ye atɔfolɛ ne.—Edw. 45:3, 4.

11. Kɛzi Kelaese konimlilɛ ne bayɛ ɛ?

¹¹ Yemɔti yɛbahola yɛaha kɛ kɛzi ninyɛne bɛasisi la ɛne: Bɛbalumua bɛabua “tuutuunli ne mɔɔ ɛlie duma la,” Babelɔn Kpole ne, adalɛ ɛzonlenlɛ maanle ne ndɛne. (Yek. 17:1, 5, 16, 17; 19:1, 2) Akee Kelaese badoa zo ava Nyamenle ndɛnebualɛ ahɔ Seetan ngyehyɛleɛ ɛtane ne foa mɔɔ ɛha la kɔsɔɔti azo yeazɛkye bɛ wɔ Amagɛdɔn konle ne, “Nyamenle Bedevinli ne Kenle kpole ne anu.” (Yek. 16:14-16; 19:19-21) Awieleɛ bɔkɔɔ ne, Belemgbunli-Kovolɛ ne bava Seetan nee ye sunsum ɛtane ne mɔ yeagua kuma kpole ne anu, ɔbalie bɛ tumi ne amuala yeava yeawie ye konimlilɛ ne.—Yek. 20:1-3.

12, 13. (a) Mekɛ boni a bɛbalie Boaneralɛ ne atɔfolɛ ne a? (b) Nwane mɔ a bɛali fɛlɛko wɔ Boaneralɛ ne atɔfolɛlielɛ ne anwo wɔ anwuma a?

¹² Saa Keleseɛnema mɔɔ bɛkpokpa bɛ la wie bɛ azɛlɛ ye azo gyima ne wɔ mekɛ mɔɔ Kelaese ɛra la a, bɛdwazo bɛ bɛmaa bɛkɔ anwuma. Bɛsɛkye Babelɔn Kpole ne bɛwie a, ɔ nzi mekɛ bie anu Gyisɛse baboɔboa atɔfolɛ raalɛ eku ne anu amra mɔɔ ɛha la kɔsɔɔti anloa wɔ ɔ nwo ɛkɛ. (1 Tɛs. 4:16, 17) Yemɔti, kolaa na Amagɛdɔn konle ne abɔ ɔ bo la, ɛnee ‘atɔfolɛ raalɛ’ ekpunli ne anu amra kɔsɔɔti wɔ anwuma. Wɔ konle ne anzi, akee bɛbahola bɛalie Boaneralɛ ne atɔfolɛ ne. Nea kɛzi anyelielɛ bara wɔ zɔhane mekɛ ne a! Yekile 19:9 ka kɛ: “Nyilalɛ ɛha bɛdabɛ mɔɔ bɛdo ɛsalɛ bɛvɛlɛ bɛ kɛ bɛrɛla Boaneralɛ ne atɔfolɛlielɛ ne abo la.” Atɔfolɛ eku ne, 144,000 ne anu amra anye balie kpalɛ. Akee Atɔfolɛ nrenya ne mɔɔ ɔle Belemgbunli la bali fɛlɛko kpole kɛ ɔ nee ɔ gɔnwo mɔ  arelemgbunli ‘bɛadɛnla ye ɛkponle nwo, bɛali debie na bɛanlo wɔ ye Belemgbunlililɛ ne anu’ wɔ sɛkɛlɛneɛ adenle zo la. (Luku 22:18, 28-30) Noko tɛ Atɔfolɛ nrenya ne nee atɔfolɛ raalɛ ne angome a bɛali fɛlɛko wɔ Boaneralɛ ne atɔfolɛlielɛ ne anwo a.

¹³ Kɛmɔ yɛlumua yɛha la, anwuma ɛlɔnema babɔ nu ado edwɛne kɛ: “Bɛmaa yɛ nye ɛlie na yɛli fɛlɛko; bɛmaa yɛyeyɛ [Gyihova] kɛ ɔle kpole! Ɔluakɛ Boaneralɛ ne atɔfolɛlielɛ mekɛ ne ɛdwu, na ye atɔfolɛ [raalɛ] ne ɛziezie ɔ nwo ɛwie.” (Yek. 19:6, 7) Na Gyihova azonvolɛ mɔɔ bɛwɔ azɛlɛ ye azo la noko ɛ? Bɛdabɛ noko bɛbali fɛlɛko ɔ?

14. Kɛmɔ bɛha ye wɔ Edwɛndolɛ 45 la, atɔfolɛ raalɛ ne “avoanlema” ne a le nwane mɔ?

¹⁴ Bɛgenga Edwɛndolɛ 45:12, 14b, 15. Ngapezonli Zɛkalaya hanle dole ɛkɛ ne kɛ wɔ awieleɛ mekɛ ne anu, maanle maanle ne anu amra bɛava bɛ nwo abɔ sunsum nu Yizilayɛma. Ɔhɛlɛle kɛ: “Mekɛ ne anu mrenya bulu vi maanle maanle ne mɔ nee aneɛ ngakyile ne mɔ anu barazɔ Dwuunli tɛladeɛ nu na bɛaha kɛ, ‘Maa yɛ nee wɔ ɛhɔ, ɔluakɛ yɛde kɛ Nyamenle nee bɛ lua.’” (Zɛk. 8:23) Bɛha sɛkɛlɛneɛ adenle zo “mrenya bulu” ɛhye mɔ anwo edwɛkɛ wɔ Edwɛndolɛ 45:12 kɛ ‘Taya ara raalɛ’ nee “sukoavolɛma.” Bɛfa bɛ ahyɛlɛdeɛ bɛkpondɛ ɛlolɛ nee sunsum nu moalɛ bɛfi mɔhama ne mɔɔ bɛkpokpa bɛ la ɛkɛ. Ɔvi 1935, menli dɔɔnwo ɛmaa mɔhama ne ‘ɛhile bɛ kpalɛyɛlɛ adenle.’ (Dan. 12:3) Keleseɛnema mɔɔ bɛkpokpa bɛ la agɔnwo mɔ ɛhye mɔɔ bɛdi nɔhalɛ la, ɛde bɛ ɛbɛla nwo na bɛrayɛ sunsum nu avoanlema. “Avoanlema” ɛhye mɔ ɛyila bɛ nwo zo ɛmaa Gyihova na bɛli nɔhalɛ bɛmaa Atɔfolɛ nrenya ne mɔɔ ɔle Belemgbunli la.

15. Kɛzi “avoanlema” ne nee atɔfolɛ eku ne anu amra mɔɔ bɛtɛbɔ azɛlɛ ye azo la ɛbɔ nu ɛlɛyɛ gyima ɛ?

 ¹⁵ Atɔfolɛ raalɛ eku ne mɔhama ne anye die moalɛ kpole ne mɔɔ “avoanlema” ɛhye mɔ ɛlɛfa aboa bɛ wɔ ‘edwɛkpa ne mɔɔ fane Belemgbunlililɛ ne anwo’ mɔɔ bɛlɛbɔ ye nolo wɔ aleɛabo amuala la anwo kpalɛ. (Mat. 24:14) Tɛ ‘sunsum ne nee atɔfolɛ ne angome a ka kɛ, “Bɛla!” a,’ na emomu, awie biala mɔɔ ɔkɛde la ɔdaye ɔka kɛ, “Bɛla!” (Yek. 22:17) Ɛhɛe, ‘mboane gyɛne’ ne te kɛ atɔfolɛ eku ne anu amra mɔɔ bɛkpokpa bɛ la ka kɛ “Bɛla!” yemɔti, bɛboka atɔfolɛ raalɛ ne anwo bɛlɛka “Bɛla!” bɛahile aleɛabo amra amuala.—Dwɔn 10:16.

16. Nwolɛ adenle boni a Gyihova ɛva ɛmaa mboane gyɛne ne a?

¹⁶ Mɔhama ne mɔɔ bɛkpokpa bɛ la kulo bɛ gɔnwo ne mɔ edwɛkɛ na bɛ nye die kɛ Atɔfolɛ nrenya ne ɔ Ze, Gyihova ɛmaa mboane gyɛne ne mɔɔ bɛwɔ azɛlɛ ye azo la adenle kɛ bɛli fɛlɛko wɔ Boaneralɛ ne atɔfolɛlielɛ ne mɔɔ bɛbayɛ ye wɔ anwuma la anwo a. Bɛhanle bɛdole ɛkɛ ne kɛ bɛbava “avoanlema” ɛhye mɔ wɔ ‘anyelielɛ nee fɛlɛkolilɛ nu bara.’ Ɛhɛe, mboane gyɛne ne mɔɔ bɛlɛ anyelazo kɛ bɛbadɛnla azɛlɛ ye azo la, bɛanyia fɛlɛko kpole ne mɔɔ Boaneralɛ ne atɔfolɛlielɛ ne bamaa bɛali ye wɔ anwuma la anu kyɛfoa. Ɔfɛta kɛ Yekile buluku ne hanle “menli pemgbenleamgbe” ne anwo edwɛkɛ kɛ “bɛgyigyi belemgbunli ebia kpole ne nee Boaneralɛ ne anyunlu ɛkɛ ne [la].” Bɛfa ɛzonlenlɛ nwuanzanwuanza bɛmaa Gyihova wɔ ye sunsum nu ɛzonlenlɛ sua ne alie ne anwo wɔ azɛlɛ ye azo.—Yek. 7:9, 15.

17, 18. Kɛzi Boaneralɛ ne atɔfolɛlielɛ ne bazo ma ɛ, na nwane mɔ a Kelaese bayɛ selɛ amaa bɛ wɔ ye Ɛvolɛ Apenle Ko Tumililɛ ne anu a?

¹⁷ Bɛgenga Edwɛndolɛ 45:16. Saa Kelaese anwuma atɔfolɛ raalɛ ne “avoanlema” ne nwu kɛ nvasoɛ ɛlɛba atɔfolɛlielɛ ne azo wɔ ewiade fofolɛ ne anu a, ɔbamaa bɛ nye alie kpalɛ. Atɔfolɛ nrenya ne mɔɔ ɔle Belemgbunli la bahakyi ɔ nye wɔ azɛlɛ ye azo yeadunwue ɔ “ze mɔ” mɔɔ bɛbayɛ ɔ ‘mra mrenya’ wɔ azɛlɛ ye azo la. (Dwɔn 5:25-29; Hib. 11:35) Ɔbakpa bɛ nuhua bie mɔ yeayɛ “maanle mgbanyima wɔ azɛlɛ ye azo.” Ɛhɛe, Kelaese bɛakpa mgbanyima mɔɔ bɛwɔ ɛkɛ ɛnɛ mɔɔ bɛdi nɔhalɛ la bie mɔ noko yeamaa bɛayɛ maanle mgbanyima wɔ ewiade fofolɛ ne anu.—Aye. 32:1.

¹⁸ Wɔ Kelaese Ɛvolɛ Apenle Ko Tumililɛ ne anu, ɔbayɛ selɛ yeamaa awie mɔ gyɛne noko. Nɔhalɛ, aleɛabo amra mɔɔ fɛta la kɔsɔɔti bɛanyia dahuu ngoane ɔluakɛ bɛnyianle diedi wɔ Gyisɛse ɛkpɔnelɛ afɔle ne anu. (Dwɔn 3:16) Yemɔti, ɔbayɛ “Damɛnlangoate Selɛ” yeamaa bɛ.—Aye. 9:6, 7.

19, 20. Kɛzi gyimalilɛ kɛnlɛma ne mɔɔ wɔ Edwɛndolɛ 45 la fane nɔhalɛ Keleseɛnema kɔsɔɔti anwo ɛ?

¹⁹ Bɛgenga Edwɛndolɛ 45:1, 17. Nɔhalɛ, edwɛkɛ mɔɔ wɔ Edwɛndolɛ 45 la fane Keleseɛnema kɔsɔɔti anwo. Mɔhama mɔɔ bɛkpokpa bɛ la anye la kɛ ɔnrɛhyɛ bɛ nee bɛ mediema nee Atɔfolɛ nrenya ne bɛaha abɔ nu wɔ anwuma. Ɔmaa mboane gyɛne ne bɛlɛ bɛ nwo aze kpalɛ maa bɛ anyunlunyia Belemgbunli ne na bɛ nye sɔ nwolɛ adenle mɔɔ bɛnyia bɛ nee ye atɔfolɛ raalɛ eku ne anu amra mɔɔ ɛha azɛlɛ ye azo ɛlɛbɔ nu ayɛ gyima la. Wɔ bɛ atɔfolɛlielɛ ne anzi, Kelaese nee ɔ gɔnwo mɔ mɔɔ ɔ nee bɛ bali Belemgbunli la bamaa aleɛabo amra anyia nyilalɛ dɔɔnwo.—Yek. 7:17; 21:1-4.

²⁰ Mekɛ mɔɔ yɛ nye la kɛ ‘debie kpalɛ’ mɔɔ Mɛzaya Belemgbunli ne bayɛ la bara la, asoo ɔnle kɛ ‘yɛmaa awolɛndoazo kɔsɔɔti bɔ ye duma ɔ’? Ɔrɛla ye kɛ yɛbaboka bɛdabɛ mɔɔ ‘bɛbaye Belemgbunli ne ayɛlɛ mekɛ mɔɔ ɛnlɛ awieleɛ la anwo.’