KUNLAVOLƐ raalɛ ehyianli ne ɛyɛ ɔ ra nrenya ko pɛ ne atuu. Ɔyɛ ye azibɛnwo kpole. Ɔtɛkyɛle biala yɛɛ ɛnee ɔlɛ ɔ ra ne mɔɔ ɛwu la ɔ sa zo a. Kɛkala, raalɛ ne nea ɔ ra nrenya ne mɔɔ bɛdwazo ye bɛvi ewule nu la na ɔsele. Ɛyɛvolɛ ne zele ye kɛ, “nea, ɛ ra ne ɛde kpɔkɛ!”

Ewudwazo ɛhye mɔɔ yɛ nwanwane la zile kɛyɛ 3,000 mɔɔ ɛze la. Ɛbahola wɔagenga nwolɛ edwɛkɛ wɔ 1 Arelemgbunli tile 17. Ɛyɛvolɛ ne a le Nyamenle ngapezonli Yilaegya. Na ninli ne noko ɛ? Yemɔ a le kunlavolɛ raalɛ bie mɔɔ dɛnlanle Zalefate mɔɔ bɛambɔ ye duma la. Ninyɛne mɔɔ manle kunlavolɛ raalɛ ne diedi yɛle kpole kpalɛ wɔ ye ngoane mekɛ nu la anu ko a le ɔ ra nrenya ne mɔɔ bɛdwazole ye bɛvile ewule nu la. Saa yɛdwenle ye edwɛkɛ ne anwo a, yɛbanyia ɛzukoalɛdeɛ kpalɛ dɔɔnwo.

Ɛnee Gyihova ɛbɔ kpɔkɛ kɛ ezule ɛnrɛdɔ mekɛ tendenle wɔ Yizilayɛ belemgbunli Ehabe atisesebɛ mekɛ zo. Mekɛ mɔɔ Yilaegya vale edwɛkɛ ne dole gua la, Nyamenle ammaa Ehabe annwu ye na ɔluale nwanwane adenle zo ɔmanle ahɔhɔsɛlɛ vale kpanwo nee nane rɛlɛle ngapezonli ne. Akee Gyihova zele Yilaegya kɛ: “Dwazo kɔ Zalefate mɔɔ wɔ Saedɛn maanzinli nu la kɔdɛnla ɛkɛ. Meyɛ ye kɛ kunlanvolɛ raalɛ bie mɔɔ de ɛkɛ ne maanle ne anu la ɛmaa wɔ aleɛ.”—1 Arl. 17:1-9.

Mekɛ mɔɔ Yilaegya dwule Zalefate la, ɔnwunle kunlavolɛ raalɛ ehyianli bie kɛ ɔlɛsesa ngeleka. Asoo raalɛ ɛhye a bamaa ngapezonli ne aleɛ a? Kɛzi ɔbahola yeayɛ ɛhye wɔ mekɛ mɔɔ ɔdaye mumua ne ɔle ehyianli la ɛ? Ɔnva nwo adwenle nu keseeyɛlɛ biala mɔɔ bie a Yilaegya banyia la, ɔbɔle ɔ bo ɔ nee raalɛ ne lile adwelie. Ɔzele ye kɛ, “Bɛlɛ me nzule ekyi maa meno.” Raalɛ ne hakyile ɔ nwo mɔɔ ɔkɔ la, Yilaegya zele ye kɛ, “Anrɛɛ bɛlɛ me aleɛ ekyi  noko.” (1 Arl. 17:10, 11) Ɛnee ɔnyɛ se kɛ kunlavolɛ ne bamaa ɛyɛvolɛ ne nzule, noko ɛnee ɔyɛ se kɛ ɔbamaa ye aleɛ.

Raalɛ ne buale ye kɛ, “Meka [Gyihova] wɔ Nyamenle ne kɛ menlɛ kpanwo nretee zɛ wɔ ɛkɛ. Yeha me ɛdɔkɛ ekyi bie wɔ me kpule ne abo yɛɛ nwole ekyi wɔ toba bo. Yemɔ yɛɛ melɛkpondɛ nwolɛ ngeleka kɛyɛ nwiɔ meahɔwuda senle meado na me nee me ra nrenya ne yɛava yɛazɔ yɛ ɛbolɛ a. Saa yɛdi na ɔwie a ɛnee yɛze kɛ yɛ awieleɛ ne ala ɛne; ɛhɔne yɛɛ bahu yɛ a.” (1 Arl. 17:12) Maa yɛzuzu mɔɔ adwelielilɛ ɛhye kile la anwo.

Kunlavolɛ raalɛ ne nwunle kɛ Yilaegya le Yizilayɛnli mɔɔ ɔsulo Nyamenle. Ɛhye da ali wɔ edwɛkɛ ɛhye mɔɔ ɔhanle la anu, “meka [Gyihova] wɔ Nyamenle ne kɛ.” Ɔbayɛ kɛ ɛnee ɔlɛ Yizilayɛ Nyamenle ne anwo nrɛlɛbɛ bie ɛdeɛ, noko mekɛ mɔɔ ɔka Gyihova anwo edwɛkɛ la, yeangola yeanga kɛ “me Nyamenle” ne. Ɔdɛnlanle Zalefate, sua bie mɔɔ ɔbayɛ kɛ ɛnee Fonehyeama suakpole Saedɛn a ‘nea’ ɛkɛ la azo. Ɔbayɛ kɛ menli mɔɔ dɛnlanle Zalefate la le Beeyale azonvolɛ. Noko, Gyihova nwunle debie titile bie wɔ kunlavolɛ raalɛ ɛhye anwo.

Ɔnva nwo kɛ Zalefate kunlavolɛ raalɛ ne dɛnlanle awozonle ɛzonlenlɛma avinli la, ɛnee ɔlɛ diedi. Raalɛ ne nee ngapezonli ne ɛnleanlɛ ti a Gyihova zoanle Yilaegya a. Yɛkola yɛsukoa debie kpalɛ yɛfi edwɛkɛ ɛhye anu.

Tɛ Zalefate Beeyale azonvolɛ ne mɔ amuala a ɛnee bɛ ɛbɛla ɛzɛkye bɔkɔɔ a. Gyihova hilele kɛ ɔdwenle awie biala mɔɔ ɛtɛbasonlenle ye noko ɔlɛ adwenle kpalɛ la anwo ɔlua Yilaegya mɔɔ Ɔzoanle ye wɔ kunlavolɛ raalɛ ɛhye anwo ɛkɛ la azo. Nɔhalɛ nu, “awie biala mɔɔ sulo [Nyamenle] na ɔdi boɛ la ɔdie ye ɔto nu, yɛɛ ɔnnea ɛleka mɔɔ ɔvi nee maanle holɛ ko mɔɔ ɔvi nu la.”—Gyi. 10:35.

Menli mɔɔ de wɔ azɛlɛsinli ne anu la anu nyɛ a le kɛ Zalefate kunlavolɛ raalɛ ne a? Ɔnva nwo kɛ bɛde adalɛ ɛzonlenlɛma avinli la, bie a ɛnee bɛlɛkpondɛ debie kpalɛ bɛazukoa. Bie a Gyihova anwo nrɛlɛbɛ ekyi bie ala a bɛlɛ a, yemɔti saa bɛbalie nɔhalɛ ɛzonlenlɛ bɛado nu a, kyesɛ yɛboa bɛ. Asoo ɛlɛkpondɛ menli ɛhye mɔ abo zo na wɔaboa bɛ ɔ?

Maa yɛzuzu mɔɔ Yilaegya zele raalɛ ne kɛ ɔyɛ la anwo kpalɛ. Ɔtɛkyɛle biala yɛɛ raalɛ ne zele ye kɛ yeha ɔ nee ɔ ra ne aleɛ mɔɔ saa bɛdi bɛwie a ɛnee bɛ awieleɛ ɛra a. Noko, duzu a Yilaegya hanle a? “Mmadwenle nwolɛ. Wɔmɔ kɔnlea yɛ mɔɔ wɔha la. Noko akee dumua te ekyi doa tata maa me kolaa na wɔado ɛ nee ɛ ra nrenya ne bɛ ɛdeɛ ne. Ɔluakɛ [Gyihova], Yizilayɛ Nyamenle ne se, ‘Ɛdɔkɛ ne abo ɛnrɛdu kpule ne abo, yɛɛ nwole ne ɛnrɛwie toba ne abo ɛlɛ, kɔkpula mekɛ mɔɔ [Gyihova] kɛmaa ezule kɛdɔ bieko kɛgua azɛlɛ ye azo la.’”—1 Arl. 17:11-14.

Bie mɔ ɛha kɛ: ‘Kɛ yɛbava yɛ aleɛ mɔɔ ɛha la kɔsɔɔti yɛamaa la, yemɔ ɔnrɛyɛ boɛ.’ Noko kunlavolɛ raalɛ ne anga ye zɔ. Ɔnva nwo kɛ ɛnee Gyihova anwo nrɛlɛbɛ ekyi bie ala a ɔlɛ la, ɔliele Yilaegya ɔlile na ɔyɛle mɔɔ ɔzele ye la. Nea diedi nwo sɔnea kpole mɔɔ ɔhɔle nu—nee kpɔkɛ mɔɔ nrɛlɛbɛ wɔ nu mɔɔ ɔzile a!

Nyamenle amkpo kunlavolɛ raalɛ ehyianli ɛhye. Kɛmɔ Yilaegya hanle la, Gyihova manle ye aleɛ ne nee ye nwole ekyi ne yɛle dɔɔnwo amaa Yilaegya, kunlavolɛ ne nee ɔ ra nrenya ne anyia debie ali kɔkpula kɛ ezule kɛdɔ la. Nɔhalɛ nu, “ɛdɔkɛ ne anwie kpule ne anu, yɛɛ nwole ne noko abo andu toba ne  abo, kɛmɔ [Gyihova] luale Yilaegya anwo zo hanle la.” (1 Arl. 17:16; 18:1) Saa raalɛ ne ambuke ɔ sa nu a, anrɛɛ ye ɛdɔkɛ ne nee ye nwole ne yɛle ye aleɛ mɔɔ li awieleɛ amgba. Noko, ɔnyianle diedi, ɔvale ɔ nwo ɔdole Gyihova anwo zo, na ɔlumuale ɔmanle Yilaegya aleɛ.

Debie mɔɔ yɛsukoa yɛfi nu la a le kɛ Nyamenle yila bɛdabɛ mɔɔ bɛlɛ diedi la. Saa ɛyia munli nu ɛgyinlanlɛ nwo sɔnea na ɛnyia diedi a, Gyihova baboa wɔ. Ɔbayɛ wɔ Maavolɛ, Wowavolɛ, nee Agɔnwolɛ mɔɔ baboa wɔ yeamaa wɔagyinla wɔ sɔnea ne anloa a.—Ade. 3:13-15.

Wɔ 1898, Zion’s Watch Tower ne hwenle adwenle ziele ɛzukoalɛdeɛ ɛhye mɔɔ wɔ kunlavolɛ ne edwɛkɛ ne anu la azo: “Saa raalɛ ne nyianle diedi mɔɔ maa ɔyɛ tieyɛ la a, ɛnee ɔfɛta moalɛ mɔɔ Awulae luale ngapezonli ne anwo zo vale manle ye la; saa yeannyia diedi a, anrɛɛ ɔbahola yeara ye kɛ kunlavolɛ gyɛne bayɛ zɔ. Yemɔti, yɛdayɛ noko, ɔdwu mekɛ ne bie a Awulae sɔ yɛ diedi ne nea wɔ yɛ ngoane adendulɛ ne anu. Saa yɛnyia diedi a yɛbanyia nyilalɛ; saa yɛannyia diedi a, yɛnrɛnyia ye.”

Saa yɛyia sɔnea fɔɔnwo bie a, ɔwɔ kɛ yɛdua Ngɛlɛlera ne nee Baebolo nwo mbuluku zo yɛkpondɛ adehilelɛ yɛfi Nyamenle ɛkɛ. Akee ɔwɔ kɛ yɛfa adehilelɛ mɔɔ Gyihova fa maa yɛ la yɛdi gyima ɔnva nwo kɛzi ye ɛyɛlɛ bayɛ se la. Saa yɛmaa yɛ nyɛleɛ nee ɛrɛlɛ ɛhye yɛ ko a yɛbanyia nyilalɛ: “Yeye wɔ ahonle nu fa ɛ rɛle wula [Gyihova] anu, mmafa wɔ adwenle ɛsɔ ɛ ngome wɔ nrɛlɛbɛ. Nwu Nyamenle wɔ wɔ ɛbɛlabɔlɛ muala anu, na ɔbamaa wɔ ndenle adenrɛ fɔɔnwo.”—Mrɛ. 3:5, 6.

Ɛnee kunlavolɛ raalɛ ne bayia diedi nwo sɔnea fofolɛ. Baebolo ne ka kɛ: “Ɛhye anzi kunlanvolɛ raalɛ ne, mɔɔ le awuke menle ne, ara nrenya ne anwo dole ye. Anwondolɛ ne hakyile anwonyane kpole, na nzinlii ɔwule.” Mɔɔ raalɛ ne mɔɔ ɛlɛdi alɔbɔlɛ la ɛnnwu ɛleka mɔɔ esiane ɛhye vi rale la, ɔzele Yilaegya kɛ: “Nyamenle sonla, duzu edwɛkɛ a le ɛhye? . . . Ɛrale kɛ ɛbaza me ɛtane ne mɔ wɔagua zolɛ na wɔamaa me ra ye awu.” (1 Arl. 17:17, 18) Alɔbɔlɛ edwɛkɛ ɛhye kile duzu?

Asoo raalɛ ne hakyele ɛtane bie mɔɔ gyegye ye adwenle la ɔ? Asoo ɔdwenlenle kɛ ɔ ra ne ewule ne le anzohwenlɛ mɔɔ Nyamenle luale ye sonvolɛ Yilaegya anwo zo vale rale ɔ nwo zo ɔ? Baebolo ne ɛnga nwolɛ edwɛkɛ noko nɔhalɛ edwɛkɛ ko da ali wienyi: Kunlavolɛ ne ambɔ Nyamenle somolɛ kɛ yeanyɛ mɔɔ tenrɛ la.

Ɔbahola yeara ye kɛ kunlavolɛ ne ara ne ewule ne, nee adwenle mɔɔ raalɛ ne nyianle kɛ ngapezonli ne a ɛmaa ɔ ra ne ɛwu la zinle Yilaegya anwo. Mɔɔ Yilaegya dwule kakula ne hɔle sua ne ati zo la, ɔzɛlɛle kɛ, “O [Gyihova], me Nyamenle, duzu munzule a akee wɔmaa yerado raalɛ ye mɔɔ merazokoɛ ye la na wɔmaa ɔ ra nrenya ye ɛwu a?” Saa Gyihova maa adenle maa raalɛ ɛhye mɔɔ ɔlɛ atiakunlukɛnlɛma na ɔdie nyɛvolɛ la nwu amaneɛ a, ɔbagua Ye duma ne anwo evinli, na ɛhye bagyegye ngapezonli ne kpalɛ. Yemɔti Yilaegya zɛlɛle kɛ: “O [Gyihova], me Nyamenle, maa kakula ye ɛrɛla ngoane nu bieko.”—1 Arl. 17:20, 21.

Ɛnee Gyihova ɛlɛtie. Kunlavolɛ raalɛ ne manle ngapezonli ne aleɛ na ɔnyianle diedi. Ɔda ali kɛ, Nyamenle manle kakula ne anwondolɛ ne anwo adenle. Ɛnee ɔze kɛ ewudwazo ɛhye mɔɔ lumua mɔɔ bɛbahɛlɛ bɛado ɛkɛ wɔ Ngɛlɛlera ne anu la, bamaa awolɛndoazo mɔɔ bara nzinlii la anyia anyelazo. Mekɛ mɔɔ Yilaegya zɛlɛle Gyihova la, Ɔmanle kakula ne rale ngoane nu bieko. Nea kɛzi kunlavolɛ ne anye balie wɔ mekɛ mɔɔ Yilaegya hanle kɛ: “Nea, ɛ ra ne ɛde kpɔkɛ” la ɛ! Akee kunlavolɛ raalɛ ne zele Yilaegya kɛ: “Kɛkala menwu kɛ ɛle Nyamenle sonla, na [Gyihova] dua ɛ nwo zo tendɛ.”—1 Arl. 17:22-24.

Kɛlɛtokɛ ne mɔɔ wɔ 1 Arelemgbunli tile 17 la anga raalɛ ɛhye anwo edwɛkɛ bieko. Noko akee, saa yɛnea edwɛkɛ kpalɛ mɔɔ Gyisɛse hanle vanenle ɔ nwo la a, bie a ɔrayɛle Gyihova nɔhalɛ sonvolɛ nzinlii. (Luku 4:25, 26) Ye edwɛkɛ ne maa yɛnwu kɛ Nyamenle yila bɛdabɛ mɔɔ bɛboa ye azonvolɛ ne mɔ la. (Mat. 25:34-40) Ɔkile kɛ, Nyamenle maa bɛdabɛ mɔɔ bɛdi nɔhalɛ la asa ka mɔɔ bɛhyia nwo wɔ mekɛ bɔbɔ mɔɔ anu yɛ se la anu. (Mat. 6:25-34) Edwɛkɛ ɛhye eza le daselɛ mɔɔ kile kɛ Gyihova lɛ ɛhulolɛ nee tumi kɛ ɔbadwazo mɔwuamra. (Gyi. 24:15) Ninyɛne ɛhye mɔ ati a ɔwɔ kɛ yɛkakye Zalefate kunlavolɛ raalɛ ne la.