YƐ TETEDWƐKƐ
“Bɛyɔba Gyima Ne Dɔɔnwo Wɔ Ɛkɛ Mɔɔ Ɔwɔ Kɛ Bɛyɛ A”
George Young rale Rio de Janeiro wɔ March 1923
ƐNEE menli ɛyi São Paulo kɔnsɛte sua bie anu tɔ wɔ ɛvolɛ 1923 ne anu! Asoo ɛte George Young ane fɛlɛko ne? Bɛhilele ye ɛdendɛlɛ ne abo bɛhɔle Portuguese aneɛ nu. Ɛnee menli 585 ne mɔɔ wɔ ɛkɛ la kɔsɔɔti ɛlɛtie ye kpalɛ. Bɛyele Baebolo tɛkese ne mɔ wɔ sini nu wɔ Portuguese aneɛ nu bɛhilele. Awieleɛ bɔkɔɔ ne bɛvale brohyua mɔɔ bɛdo ye duma, Millions Now Living Will Never Die! wɔ Portuguese, Nrelenza, German, nee Italian aneɛ nu bɛmanle. Ɛdendɛlɛ ne hɔle boɛ! Edwɛkɛ ne dɛlɛle. Ye kenle nwiɔ anzi, menli yile nwɔhoalilɛ ɛleka ne kɛ bɛtie ɛdendɛlɛ fofolɛ. Duzu a manle bɛyɛle ɛhye mɔ a?
Sarah Bellona Ferguson nee ye abusua ne dule vile United States hɔle Brazil wɔ 1867. Wɔ 1899, mekɛ mɔɔ Sarah gengale Baebolo nwo mbuluku bie mɔɔ ɔ diema nrenya ekyi vale vile United State rale Brazil la, ɔhanle kɛ yenwu nɔhalɛ ne. Ɔ nye die ɛgengalɛ nwo kpalɛ, yemɔti ɔhɛlale Nrelenza Ɛzinzalɛ Arane ne bie. Ɔ nye liele Baebolo ne anu edwɛkɛ ne anwo yemɔti ɔhɛlɛle Adiema C. T. Russell, na ɔhanle kɛ, “ɔdaye mumua ne ɔle daselɛ mɔɔ kile kɛ menli ɛnde moa somaa mɔɔ bɛnrɛhola bɛnrɛhɔ bɛ ɛkɛ a.”
Can the Living Talk With the Dead? (wɔ Portuguese aneɛ nu)
Sarah Ferguson bɔle mɔdenle kɛ ɔbaha Baebolo ne anu nɔhalɛ ne yeahile awie mɔ, noko ɛnee ɔta ɔdwenle nwo kɛ nwane a baboa ye nee ye abusua ne nee ahonle kpalɛma mɔɔ bɛwɔ Brazil la kpalɛ a. Brooklyn Bɛtɛle bɔle ye amaneɛ wɔ 1912 ne anu kɛ awie ɛlɛfa Where Are the Dead? trate ne dɔɔnwo wɔ Portuguese aneɛ nu ara São Paulo. Ɔhanle kɛ wɔ 1915 ne anu, saa ɔkenga na ɔnwu kɛ ɛnee Baebolo Sukoavoma ne dɔɔnwo lɛ anyelazo kɛ ɔnrɛhyɛ bɛbahɔ anwuma a, ɔsi ɔ nwo. Mɔɔ ɔkile ye adwenle la, ɔhɛlɛle kɛ: “Na Brazil nee Ameleka Nyiakɛ noko ɛ? . . . Saa ɛnea kɛzi Ameleka Nyiakɛ le kpole wɔ ewiade amuala la a, ɔnyɛ se kɛ ɛbanwu kɛ bɛyɔba gyima ne dɔɔnwo wɔ ɛkɛ mɔɔ ɔwɔ kɛ bɛyɛ a.” Ɛhɛe, ɛnee bɛyɔba gyima ne dɔɔnwo wɔ ɛkɛ mɔɔ bɛbayɛ a!
Kɛyɛ 1920 ne anu, Brazil mgbavolɛ mɔtwɛ mɔɔ bɛyɛ gyima wɔ meli nu la hɔle debiezukoalɛ wɔ New York City wɔ mekɛ mɔɔ ɛnee bɛlɛyɛ bɛ konle meli ne boɛ la. Mekɛ mɔɔ bɛlɛsia bɛara Rio de Janeiro la, bɛhanle Baebolo ne anu anyelazo fofolɛ ne mɔɔ bɛzukoa la anwo edwɛkɛ bɛhilele awie mɔ. Mekɛ ekyi guale nu, wɔ March 1923 ne anu, George Young mɔɔ ɛnee le neavolɛ adenduvo la rale Rio de Janeiro, na ɔnyianle anyelielɛma wɔ ɛkɛ. Ɔmanle bɛhilele Baebolo nwo mbuluku dɔɔnwo abo bɛhɔle Portuguese aneɛ nu. Yeangyɛ Adiema Young hɔle São Paulo, suakpole bie mɔɔ ɛnee menli kɛyɛ 600,000 a wɔ zo la azo. Ɛkɛ ne a ɔmanle ɛdendɛlɛ ne na ɔhyɛle Millions brohyua ne mɔɔ yɛhanle nwolɛ edwɛkɛ wɔ mɔlebɛbo ne la. Ɔbɔle amaneɛ kɛ, “Me ngome la ati, ɛnee memaa adwelie ngɛlata boa me wɔ nolobɔlɛ ne anu.” Ɔvale ɔzɔle zo kɛ, “ɛhye mɔ a le bagua nu ɛdendɛlɛ mɔɔ bɛlumua mɔɔ I.B.S.A. ne mɔɔ wɔ Brazil la boale manle bɛbɔle nwolɛ nolo a.” *
Adiema Young maa ye ɛdendɛlɛ ne mɔ la bɛyele tɛkese ne mɔ wɔ sini nu bɛhilele
December 15, 1923, Watch Tower ne hanle Brazil gyima ne anwo edwɛkɛ kɛ: “Saa yɛkakye kɛ mɔɔ gyima ne bɔle ɔ bo June 1 wɔ ɛkɛ la ɛnee Baebolo nwo buluku biala ɛnle ɛkɛ a, ɔmaa yɛnwu kɛzi Awulae ɛyila gyima ne azo la.” Amaneɛbɔlɛ ne doale zo kɛ Adiema Young bagua nu ɛdendɛlɛ ne mɔɔ ɔmanle ye wɔ São Paulo la le ɛdendɛlɛ 21 ne mɔɔ menli 3,600 radiele ɔvi June 1 kɔdwu September 30 la anu 2. Ɛnee Belemgbunlililɛ ne anwo edwɛkɛ ne ɛlɛtɛlɛ ngyikyi ngyikyi wɔ Rio de Janeiro. Wɔ mekɛ ekyi bie anu, bɛvale Portuguese aneɛ nu Baebolo nwo mbuluku mɔɔ bo 7,000 la bɛmanle! Bieko, bɛvale November-December 1923 The Watch Tower ne bɛbɔle mɔɔ bɛyɛ ye wɔ ɛkɛ wɔ Portuguese aneɛ nu la abo.
Sarah Bellona Ferguson, awie mɔɔ lumuale hɛlale Nrelenza Ɛzinzalɛ Arane ne bie wɔ Brazil la
George Young hɔle Sarah Ferguson ɛkɛ, na The Watch Tower ne bɔle amaneɛ kɛ: “Adiema raalɛ ne nwunle ye la yeangola ɔ nloa buke ɛkɛ ne ala. Ɔzɔle Adiema Young asa, ɔnleanle ɔ nyunlu koonwu, na ɔhanle kɛ: ‘Yemɔti, ɛle neavolɛ adenduvo mɔɔ de aze?’” Yeangyɛ bɛzɔnenle ye nee ɔ mra ne mɔ bie. Ɔhendɛle ɛvolɛ 25 kolaa na bɛazɔne ye! August 1, 1924, Ɛzinzalɛ Arane ne hanle kɛ bɛzɔnenle menli 50 wɔ Brazil, na bɛ nuhua dɔɔnwo wɔ Rio de Janeiro.
Kɛkala, ɛvolɛ 90 ɛpɛ nu, ɔngyia kɛ yɛkɛbiza kɛ: “Na bɛdabɛ mɔɔ bɛwɔ Brazil nee Ameleka Nyiakɛ amuala la noko ɛ?” Gyihova Alasevolɛ mɔɔ bɛbo 760,000 la ɛlɛbɔ edwɛkpa ne nolo wɔ Brazil. Na wɔ Ameleka Nyiakɛ amuala, bɛlɛbɔ Belemgbunlililɛ edwɛkɛ ne nolo wɔ Portuguese, Spanish, nee ɛkɛ ne aneɛ dɔɔnwo anu. Edwɛkɛ mɔɔ Sarah Ferguson hanle ye wɔ 1915 ne anu la le nɔhalɛ, “Bɛyɔba gyima ne dɔɔnwo wɔ ɛkɛ mɔɔ ɔwɔ kɛ bɛyɛ a.”
^ ɛden. 6 I.B.S.A. kile International Bible Students Association. (Maanle Maanle Avinli Baebolo Sukoavoma Eku)
Bie A Eza Ɛ Nye Balie
ƐZINZALƐ ARANE—DEBIEZUKOALƐ ƐDEƐ
Kɛzi Bɛlimoale Bɛluale Belemgbunlililɛ Ma Ne Wɔ Portugal La
Ngyegyelɛ boni mɔ a alimoa Belemgbunlililɛ nolobɔlɛma mɔɔ wɔ Portugal la lile zolɛ konim a?
ƐZINZALƐ ARANE—DEBIEZUKOALƐ ƐDEƐ
Bagua Nu Ɛdendɛlɛ Maanle Edwɛkpa Ne Dɛlɛle Wɔ Ireland
Duzu a maanle C. T. Russell liele lile kɛ azɛlɛsinli mɔɔ wɔ ɛkɛ la “ɛbolo mɔɔ ɔwɔ kɛ bɛte a”?
ƐZINZALƐ ARANE—DEBIEZUKOALƐ ƐDEƐ
“Mekɛ Boni A Yɛbahɔ Nyianu Bieko A?”
Duzu a maa nyianu mɔɔ bɛyɛle ye wɔ Mexico City, wɔ 1932 mɔɔ menli kɛyɛ 150 pɛ hɔle la yɛ titili a?
ƐZINZALƐ ARANE—DEBIEZUKOALƐ ƐDEƐ
“Yɛlale Mɔdenlebɔlɛ Nee Ɛlɔlɛ Ali Yɛdɛlale Mekɛ Biala”
Bɛwiele 1922 nyianu ne la, duzu a Baebolo Sukoavoma ne yɛle ye wɔ folɛdulɛ mɔɔ se “bɛbɔ Belemgbunli ne nee Belemgbunlililɛ ne nolo” la anwo a?
ƐZINZALƐ ARANE—DEBIEZUKOALƐ ƐDEƐ
“Adenle Biala Ɛnle Ɛkɛ Mɔɔ Zolɛ Ɛnle Kpalɛ Fee Anzɛɛ Ɔwale Somaa A”
Ɔvi 1920 nee 1930 ne anu, adekpakyelɛma mɔɔ bɔ mɔdenle la zile kpɔkɛ kɛ bɛfa Nyamenle Belemgbunlililɛ ne anwo edwɛkpa ne bɛahɔ Australia namunamu ne mɔ anu.
ƐZINZALƐ ARANE—DEBIEZUKOALƐ ƐDEƐ
“Britain Belemgbunlililɛ Nolobɔlɛma—Bɛdwazo!!”
Wɔ ɛvolɛ bulu anu bɛanyia anyuhɔlɛ kpalɛ biala wɔ Belemgbunlililɛ nolobɔlɛma ne anu wɔ Britain! Duzu a akee maanle ninyɛne hakyile a?
