Baebolo kɛlɛtokɛ dɔɔnwo wɔ ɛkɛ mɔɔ ka menli mɔɔ wule la nwonane anzɛɛ mbowule mɔɔ bɛyelale bɛ la anwo edwɛkɛ. (Dwɔh. 7:25; 2 Edk. 34:4, 5) Ɛhye kile kɛ zɔhane menli ne mɔ ɛnfɛta kɛ bɛsie bɛ kpalɛ. Noko saa bɛyela funli a, tɛ mekɛ ne amuala a ɔkile kɛ bɛnfɛta kɛ bɛsie bɛ kpalɛ a.

Yɛkola yɛnwu ɛhye wɔ mekɛ mɔɔ Belemgbunli Sɔɔlo nee ɔ mra mrenya nsa ne wule la. Bɛdabɛ menli nna ne bɛwule mekɛ mɔɔ ɛnee bɛ nee Filisitiama ɛlɛko la. Bɛ nuhua ko a le Dwɔnatan mɔɔ ɛnee le Devidi agɔnwo kpalɛ na ɔdi nɔhalɛ la. Mekɛ mɔɔ Yizilayɛ katakyiema mɔɔ bɛwɔ Gyeebɛhyegeleade dele mɔɔ ɛzi la, bɛhɔkpondɛle bɛ avunli ne bɛyelale bɛ, na bɛsesale bɛ mbowule ne mɔ bɛziele bɛ. Amozii Devidi yele zɔhane Yizilayɛma ne ayɛlɛ wɔ mɔɔ bɛyɛle la anwo.—1 Sam. 31:2, 8-13; 2 Sam. 2:4-6.

Baebolo ne ka kɛ ewudwazo anyelazo wɔ ɛkɛ maa mɔwuamra—Nyamenle bamaa ahenle ara ngoane nu bieko. Saa bɛyela awie anzɛɛ bɛanyela ye a, Gyihova bahola amaa ye sonlabaka fofolɛ yeamaa yeazia yeara ngoane nu bieko. Ɛnee ɔngyia kɛ Hibiluma nsa ne mɔɔ Belemgbunli Nɛbukadenɛza hanle kɛ bɛgua bɛ sendɔlɔra ne anu la sulo, ɔluakɛ ɛnee bɛze kɛ saa bɛku bɛ a Nyamenle bahola adwazo bɛ. (Dan. 3:16-18) Zɔhane ala a ɛnee ɔde ɔmaa Gyihova azonvolɛ mɔɔ di nɔhalɛ mɔɔ ɛnee wɔ ewule nee ngoane avinli wɔ Nazi efiade ne mɔ anu nee bɛdabɛ mɔɔ bɛyelale bɛ avunli la noko a. Nyamenle azonvolɛ mɔɔ bɛdi nɔhalɛ la anu dɔɔnwo tetele anzɛɛ bɛwule wɔ ndenle gyɛne zo mɔɔ bɛannwu bɛ nwo ɛhwee a. Noko akee, yɛdie yɛdi kɛ bɛbadwazo bɛ.—Yek. 20:13.

Ɔngyia kɛ Gyihova bava bɛ nwonane dɛba ne mɔ yeasisa zo kolaa na yeahola yeadwazo bɛ. Yɛnwu ɛhye wɔ kɛzi Nyamenle badwazo Keleseɛnema mɔɔ bɛkpokpa bɛ yeahɔ anwuma la anu. Bɛbadwazo Keleseɛnema mɔɔ bɛkpokpa bɛ la noko bɛbamaa bɛ sunsum nu sonlabaka kɛmɔ “bɛdwazole [Gyisɛse] wɔ sunsum nu” ala la. Bɛnrɛva bɛ nwonane nu sonlabaka dɛba ne bɛnrɛhɔ anwuma.—1 Pita 3:18; 1 Kɔl. 15:42-53; 1 Dwɔn 3:2.

Anyelazo mɔɔ yɛlɛ ye wɔ ewudwazo ne anu la ɛngyi kɛzi bɛbayɛ yɛ funli ne la azo, na emomu, ɔgyi diedi mɔɔ yɛlɛ ye wɔ Nyamenle tumi ne anu nee ɛhulolɛ mɔɔ ɔlɛ kɛ ɔbali ye ɛwɔkɛ zo la azo. (Gyi. 24:15) Noko, bie a yɛnde kɛzi Nyamenle dwazole menli wɔ nwanwane adenle zo wɔ tete ne anzɛɛ kɛzi ɔbayɛ zɔ kenlebie la abo bɔkɔɔ. Noko akee, yɛlɛ anwodozo wɔ Gyihova anu. Ɔdwazole Gyisɛse “ɔvale ɔzile edwɛkɛ ɛhye dawua.”—Gyi. 17:31; Luku 24:2, 3.

Ɔwɔ kɛ Keleseɛnema suzu kɛzi bɛ ɛkɛ ne funli nwo amaamuo, nganeɛ mɔɔ bɛbade ye wɔ nwo, nee mɛla mɔɔ wɔ nwo de la anwo. (2 Kɔl. 6:3, 4) Yemɔti, saa bɛbayela funli bie anzɛɛ bɛnrɛyela ye a, ɔle ahenle anzɛɛ ye abusua ne kpɔkɛzilɛ.