1, 2. (a) Esiane boni a ɛnee Kɔlɔsae asafo ne wɔ nu a? (b) Folɛdulɛ boni a boale mediema mɔɔ bɛwɔ Kɔlɔsae la manle bɛyɛle Nyamenle agɔnwo mɔ a?

KOYƐLƐ mɔɔ wɔ ɛvoya mɔɔ lumua la anu asafo ne mɔɔ wɔ Kɔlɔsae anu la anwo ɛra edwɛkɛ! Mediema ne bie mɔ ka kɛ ɔwɔ kɛ bɛdi Mosisi Mɛla ne azo. Bie mɔ noko se ɔnle kɛ bɛdie bɛ nye. Pɔɔlo bɔle esiane mɔɔ wɔ adwenle ngakyile ɛhye mɔ anu la anwo kɔkɔ kɛ: “Bɛnlea boɛ na awie anva mɛlɛbɛla nee adalɛ nrɛlɛbɛ mɔɔ bɛlua ewiade amaamuo zo bɛhyehyɛ, nee mɔɔ vi awozinli ewiade ye sunsum nu tumima ɛkɛ ne na ɔnvi Kelaese ɛkɛ ne la anyɛ bɛ ngɛkɛlɛ.”—Kɔlɔsaema 2:8.

² Saa Keleseɛnema mɔɔ bɛkpokpa bɛ la di menli nzuzulɛ nzi a, adenle mɔɔ bɛlɛ kɛ bɛbayɛ Nyamenle amra la bɛavi bɛ sa. (Kɔlɔsaema 2:20-23) Amaa bɛahɔ zo bɛ nee Nyamenle adila agɔnwolɛ la, Pɔɔlo zele bɛ kɛ: “Bɛdwenle ninyɛne mɔɔ wɔ anwuma lɔ la anwo na bɛgyakyi mɔɔ wɔ azɛlɛ ye azo la.” (Kɔlɔsaema 3:2) Ɛnee ɔwɔ kɛ zɔhane  Keleseɛnema ne kakye anyelazo kɛnlɛma mɔɔ bɛlɛ kɛ bɛbadɛnla aze dahuu wɔ anwuma la.—Kɔlɔsaema 1:4, 5.

3. (a) Keleseɛnema mɔɔ bɛkpokpa bɛ la anyelazo a le duzu? (b) Kpuyia boni a yɛbazuzu nwo wɔ edwɛkɛ ɛhye anu a?

³ Keleseɛnema mɔɔ bɛkpokpa bɛ ɛnɛ la noko dwenledwenle Nyamenle Belemgbunlililɛ ne nee anyelazo mɔɔ bɛlɛ kɛ ‘bɛ nee Kelaese bali agya’ wɔ anwuma la anwo. (Wulomuma 8:14-17) Na bɛdabɛ mɔɔ bɛbadɛnla azɛlɛ ye azo la noko ɛ? Kɛzi Pɔɔlo edwɛkɛ ne fane bɛ nwo ɛ? Kɛ ɔkɛyɛ na bɛadwenledwenle “ninyɛne mɔɔ wɔ anwuma lɔ la” anwo ɛ? (Dwɔn 10:16) Ebileham nee Mosisi dwenledwenlenle ninyɛne mɔɔ wɔ anwuma lɔ la anwo bɔbɔ wɔ anwongyelelɛ mekɛ nu. Kɛ ɔkɛyɛ na yɛazukoa bɛ ɛ?

4. Kɛ ɔkɛyɛ na Keleseɛnema mɔɔ bɛlɛ azɛlɛ ye azo anyelazo la ahola ava bɛ adwenle azie ninyɛne mɔɔ wɔ anwuma la azo ɛ?

⁴ Ɔwɔ kɛ bɛdabɛ mɔɔ bɛlɛ azɛlɛ ye azo anyelazo la noko dwenledwenle ninyɛne mɔɔ wɔ anwuma lɔ la anwo. Bɛyɛ ɛhye ɔlua Gyihova nee ye Belemgbunlililɛ ne mɔɔ bɛfa bɛdumua bɛ ɛbɛlabɔlɛ nu la azo. (Luku 10:25-27) Ɛhye a Kelaese yɛle a, na ɔhyia kɛ yɛdayɛ noko yɛyɛ zɔ. (1 Pita 2:21) Ɛnee adalɛ ngilehilelɛ, ewiade nrɛlɛbɛ, nee anwonyia ɛhulolɛ ɛbu zo wɔ ɛvoya mɔɔ lumua la anu. Yɛnwu ninyɛne ɛhye mɔ ɛnɛ wɔ Seetan ewiade ne noko anu. (Bɛgenga 2 Kɔlentema 10:5.) Ɔwɔ kɛ yɛsukoa Gyisɛse na yɛkoati debie biala mɔɔ bahola azɛkye yɛ nee Gyihova agɔnwolɛ ne la.

5. Adwenle mɔɔ yɛlɛ ye wɔ ezukoa nee anwonyia nwo la anwo kpuyia boni a yɛbahola yɛabiza yɛ nwo a?

⁵ Yɛmaa ewiade ne adwenle mɔɔ ɔlɛ ye wɔ ezukoa nee anwonyia nwo la ɛli yɛ adwenle ɔ? Mɔɔ yɛdwenle nwo nee mɔɔ yɛyɛ la da mɔɔ yɛkulo la ali. Gyisɛse hanle kɛ: “Ɛleka mɔɔ bɛ anwonyia wɔ la, ɛkɛ ne yɛɛ bɛ ahonle noko wɔ a.” (Mateyu 6:21) Ɔwɔ kɛ yɛbiza yɛ nwo debie mɔɔ nwolɛ hyia yɛ kpalɛ la. Asoo yɛfa mekɛ dɔɔnwo yɛdwenledwenle ezukoa nee gyima kpalɛ mɔɔ yɛbanyia la anwo, anzɛɛ yɛbɔ mɔdenle kɛ yɛmaa yɛ nwo adɔ yɛ ɔ? Anzɛɛ yɛmaa yɛ nye sɔ mɔɔ yɛlɛ ye la amaa yɛava yɛ adwenle yɛazie agɔnwolɛvalɛ mɔɔ yɛ nee Gyihova lɛ la azo ɔ? (Mateyu 6:22) Gyisɛse hanle kɛ saa yɛfa yɛ adwenle yɛsie “anwonyia” mɔɔ yɛkpondɛ yɛazie azɛlɛ ye azo la azo a, agɔnwolɛvalɛ mɔɔ yɛ nee Gyihova lɛ la bahola azɛkye.—Mateyu 6:19, 20, 24.

6. Kɛ ɔkɛyɛ na yɛali konim wɔ apelepele mɔɔ yɛ nee yɛ sinlidɔlɛ di la anu a?

⁶ Yɛnli munli yemɔti ɔnyɛ se kɛ yɛbayɛ ninyɛne mɔɔ ɛnle kpalɛ la. (Bɛgenga Wulomuma 7:21-25.) Saa yɛanva yɛ nwo yɛando Nyamenle sunsum ne anwo zo a, yɛbava yɛ nwo yɛawula “anwondɛlɛ mgbane mgbane, nzabolɛ, adwɔmanebɔlɛ, anzɛɛ huhunli  ɛbɛla,” Nyamenle mɛla mɔɔ bɛmbu ye bie bɔbɔ la anu. (Wulomuma 13:12, 13) Yɛ nee yɛ sinlidɔlɛ di apelepele dahuu. Yɛbahola yɛali konim a, kyesɛ yɛfa yɛ adwenle yɛsie ninyɛne mɔɔ wɔ anwuma lɔ la azo. Ɛhye hyia mɔdenlebɔlɛ, yemɔti Pɔɔlo hanle kɛ: “Mebɔ mɔdenle mesɔ me nwo na megyinla me ti koonwu medie abotokuma.” (1 Kɔlentema 9:27) Ɔwɔ kɛ yɛdayɛ noko yɛmia yɛ nwo. Bɛmaa yɛzuzu mrenya nɔhavoma nwiɔ mɔɔ bɔle mɔdenle yɛle mɔɔ sɔ Nyamenle anye la neazo nwo.—Hibuluma 11:6.

7, 8. (a) Ngyegyelɛ boni a Ebileham nee Sɛla yiale a? (b) Duzu a Ebileham zuzule nwo dahuu a?

⁷ Mɔɔ Gyihova zele Ebileham kɛ ɔ nee ye abusua ne ɛdu ɛhɔ Keena la, Ebileham vile ye ahonle nu diele. Gyihova duale Ebileham kakɛ wɔ ye diedi nee ye tieyɛ nwo ɔlua ngyekyeleɛ ne mɔɔ ɔ nee ye yɛle la azo. Gyihova zele ye kɛ: “Mebayila wɔ, meamaa wɔayɛ [maanle kpole].” (Mɔlebɛbo 12:2) Ɛvolɛ dɔɔnwo pɛle nu la ɛnee Ebileham nee Sɛla ɛtɛwole. Asoo Ebileham zuzule kɛ Gyihova arɛle ɛvi ye ɛwɔkɛ ne? Ɛnee ɔnla aze ɔmmaa Ebileham wɔ mekɛ ɛhye anu. Ɛnee yegyakyi ye asetɛnla kpalɛ wɔ Yule suakpole ne azo yepɛ adenle mɔɔ bo kilomita 1,600 (anzɛɛ mayɛle 1,000) la, yeradɛnla Keena azɛlɛ zo. Ɔ nee ye abusua ne dɛnlanle ndanlɛ sua nu, ɛnee ɔdwu mekɛ ne bie a ɔbua ɔda yɛɛ nwule gyegyele ye. (Mɔlebɛbo 12:5, 10; 13:18; 14:10-16) Noko akee, Ebileham nee ye abusua ne angulo kɛ bɛkɛzia bɛkɛhɔli fɛlɛko wɔ Yule.—Bɛgenga Hibuluma 11:8-12, 15.

⁸ Ebileham “liele Nyamenle lile” na yeandwenle ‘ninyɛne mɔɔ wɔ azɛlɛ ye azo la anwo.’ (Mɔlebɛbo 15:6) Ɔzuzule ɛwɔkɛ mɔɔ Nyamenle bɔle ye la anwo dahuu. Gyihova nwunle Ebileham diedi ne na ɔzele ye kɛ: “To ɛ nye anwomanyunlu na nea saa ɛkɛhola nwɔlɔra ne mɔ tia a. Zɔhane ala yɛɛ ɛ bo zo amra bayɛ a.” (Mɔlebɛbo 15:5) Edwɛkɛ ɛhye manle Ebileham nwunle kɛ Nyamenle arɛle ɛtɛfile ye. Mekɛ biala mɔɔ ɔkɛnlea anwuma nwɔlɔra la, ɔkakye kɛ Gyihova ɛbɔ ye ɛwɔkɛ kɛ ɔbamaa ɔ bo zo amra anwo azo. Wɔ Gyihova mekɛ nu, Ebileham wole ralɛ nrenya, kɛmɔ Gyihova bɔle ye ɛwɔkɛ la.—Mɔlebɛbo 21:1, 2.

9. Kɛzi yɛbahola yɛazukoa Ebileham ɛ?

⁹ Yɛdayɛ noko yɛlɛkendɛ kɛ Gyihova ɛwɔkɛ ne mɔ bara nu kɛmɔ Ebileham yɛle la. (2 Pita 3:13) Saa yɛanva yɛ adwenle yɛanzie ninyɛne mɔɔ wɔ anwuma lɔ la azo a, yɛbadwenle kɛ ɛwɔkɛ ne mɔ ɛhyɛ somaa, na bie a yɛnrɛyɛ wuluwulu wɔ Gyihova ɛzonlenlɛ nu kɛmɔ ɛnee yɛde la. Bie a ɛvale ninyɛne ɛbɔle afɔle wɔ mekɛ bie amaa wɔayɛ adekpakyelɛ anzɛɛ wɔadɛlɛ wɔ ɛzonlenlɛ gyima ne anu. Noko duzu a ɛlɛyɛ ye kɛkala? Asoo ɛle kɛ Ebileham  mɔɔ yɛle mɔɔ ɔbahola ye yɛ amuala ɔmanle Gyihova, na ɔhendɛle kɛ ɔbanyia nyilalɛ kenlebie la ɔ? (Hibuluma 11:10) Ebileham “liele Nyamenle lile” na bɛvɛlɛle ye Nyamenle agɔnwo.—Wulomuma 4:3.

10. Ndetelɛ boni a Mosisi nyianle a?

¹⁰ Mosisi noko dwenledwenlenle ninyɛne mɔɔ wɔ anwuma lɔ la anwo. Bɛtetele ye wɔ Yigyibiti alehelɛ abusua ne anu wɔ mekɛ mɔɔ ɛnee Yigyibiti a di tumi wɔ ewiade ne azo la. Baebolo ne ka kɛ, “bɛhilehilele ye Yigyibiti nrɛlɛbɛ nee ye amaamuo ne amuala.” Ndetelɛ ɛhye manle ɔyɛle “sonlakpole wɔ edwɛkɛhanlɛ nee nyɛleɛ nu.” (Gyima ne 7:22) Ɔlua ndetelɛ mɔɔ Mosisi nyianle la ati, anrɛɛ ɔbahola yeayɛ sonla titile wɔ Yigyibiti. Noko ɛnee ndetelɛ bie wɔ ɛkɛ mɔɔ nwolɛ hyia Mosisi kpalɛ a.

11, 12. Ndetelɛ boni a ɛnee nwolɛ hyia Mosisi kpalɛ a? Kɛzi yɛkola yɛnwu ɛhye ɛ?

¹¹ Mosisi mame Dwɔkɛbɛde hilehilele ye Hibuluma Nyamenle ne anwo debie wɔ ye ngakula nu. Ɛnee ngilehilelɛ ɛhye anwo hyia Mosisi tɛla debie biala. Ɔkpole adenle mɔɔ ɔbamaa yeanyia anwonyia nee tumi la amaa yeayɛ Nyamenle ɛhulolɛdeɛ. (Bɛgenga Hibuluma 11:24-27.) Ndetelɛ mɔɔ Mosisi nyianle nee Gyihova anu diedi manle ɔvale ye adwenle ɔziele ninyɛne mɔɔ wɔ anwuma la azo.

¹² Ɔnva nwo kɛ Mosisi zukoale nwoma kpole la, yeanva yeanyɛ debie mɔɔ bamaa yeanyia tumi, duma, anzɛɛ ɔ nwo wɔ Yigyibiti a. Nɔhalɛ, Baebolo ne ka kɛ, “ɔkpole kɛ bɛkɛvɛlɛ ye Yigyibiti belemgbunli ne ara raalɛ ne ara.” “Ɔhulole kɛ ɔ nee Nyamenle menli ne kɛli nyane tɛla kɛ ɔ nye kɛlie ɛtane nwo mekɛ ekyi bie.” Ɛvolɛ dɔɔnwo anzi, Mosisi vale Gyihova anwo nrɛlɛbɛ ne lile Ye menli ne ati.

13, 14. (a) Duzu a ɛnee ɔhyia kɛ Mosisi yɛ amaa yeahola yealie Gyihova menli ne ɛ? (b) Duzu a ɔhyia kɛ yɛdayɛ noko yɛyɛ a?

¹³ Ɛnee Mosisi kulo Gyihova nee Ye menli ne mɔɔ ɛnee le ngɛkɛlɛ wɔ Yigyibiti la. Mosisi nyianle ɛvolɛ 40 la, ɛnee ɔze kɛ ɔbahola yealie bɛ. (Gyima ne 7:23-25) Noko ɛnee Gyihova ze kɛ mekɛ ɛtɛdwule mɔɔ ɔwɔ kɛ Mosisi yɛ ɛhye a. Ɛnee ɔhyia kɛ ɔsukoa mɛlɛbɛnwoaze,  abotane, bɛtɛɛyɛlɛ nee bɛnwozohomolɛ. (Mrɛlɛbulɛ 15:33) Ɛnee Mosisi hyia ndetelɛ mɔɔ bamaa yeahola yeali ngyegyelɛ mɔɔ la ɔ nyunlu anwo gyima kpalɛ la. Ɛvolɛ 40 mɔɔ Mosisi vale yɛle mboaneneavolɛ la manle ɔnyianle subane ɛhye mɔ.

¹⁴ Asoo ndetelɛ ɛhye boale Mosisi? Ɛhɛe, Baebolo ne ka kɛ ɛnee “ɔle bɛlɛvolɛ ɔtɛla dasanli biala mɔɔ wɔ aleɛabo la.” (Ɛdianlɛ 12:3) Ɔluakɛ ɛnee yezukoa mɛlɛbɛnwoaze la ati, ɔnyianle abotane wɔ menli ngakyile mɔɔ ɔnleanle bɛ nee bɛ ngyegyelɛ nwo. (Adendulɛ 18:26) Yɛdayɛ noko yɛhyia subane mɔɔ bamaa yɛanyia yɛ ti wɔ “amaneɛnwunlɛ kpole ne” anu yɛahɔ Nyamenle ewiade fofolɛ ne anu la. (Yekile 7:14) Yɛkola yɛ nee awie biala tɛnla ɔ, bɔbɔ menli mɔɔ yɛze kɛ ɔngyɛ na bɛava ɛya la ɔ? Ɛzoanvolɛ Pita folɛdulɛ ɛhye baboa yɛ: “Bɛli menli kɔsɔɔti eni. Bɛhulo bɛ gɔnwo mɔ diedima.”—1 Pita 2:17.

15, 16. (a) Duzu ati a ɔwɔ kɛ yɛdwenle ninyɛne kpalɛ nwo ɛ? (b) Kɛmɔti a ɔhyia kɛ Keleseɛnema maa bɛ nyɛleɛ yɛ kɛnlɛma ɛ?

¹⁵ Yɛde mekɛ mɔɔ “anwongyelelɛ  dɔɔnwo” wɔ nu la anu. (2 Temɔte 3:1) Ɛhye ati a ɔhyia kɛ yɛfa yɛ adwenle yɛsie ninyɛne kpalɛ zo amaa yɛahola yɛ nee Nyamenle alua dahuu la. (1 Tɛsalonaekama 5:6-9) Bɛmaa yɛzuzu ndenle nsa anwo.

¹⁶ Yɛ nyɛleɛ: Pita kile kɛzi subane kpalɛ nwo hyia la, ɔhanle kɛ: “Ɔwɔ kɛ bɛmaa bɛ nyɛleɛ wɔ maanlema avinli yɛ kɛnlɛma.” Ɔdoale zo kɛ yemɔ bamaa menli mɔɔ ɛnze Gyihova la anwu kɛzi yɛbɔ yɛ ɛbɛla la na bie a “bɛaye Nyamenle ayɛlɛ.” (1 Pita 2:12) Saa yɛwɔ sua nu, gyima nu, sukulu, yɛlɛdi nwɔhoa, anzɛɛ yɛwɔ daselɛlilɛ nu bɔbɔ a, ɔwɔ kɛ yɛdua yɛ nyɛleɛ zo yɛwula Gyihova anyunlunyia. Nɔhalɛ, yɛ kɔsɔɔti yɛnli munli yemɔti yɛfo. (Wulomuma 3:23) Noko ɔnle kɛ yɛ sa nu to. Gyihova baboa yɛ yeamaa yɛaho “diedi nu konle kpalɛ ne.”—1 Temɔte 6:12.

17. Kɛ ɔkɛyɛ na yɛanyia Gyisɛse subane ne bie ɛ? (Nea mɔlebɛbo nvoninli ne.)

¹⁷ Yɛ subane: Saa yɛ subane le kpalɛ a, yɛbala nyɛleɛ kɛnlɛma ali. Ɛzoanvolɛ Pɔɔlo hanle kɛ: “Bɛmaa zɛhae subane ne mɔɔ ɛnee Kelaese Gyisɛse lɛ la ɛvinde bɛ ɛbɛla nu.” (Felepaema 2:5) Duzu subane a ɛnee Gyisɛse lɛ a? Ɛnee ɔbɛlɛ ɔ nwo aze, yemɔti ɔdule ɔ nwo ɔmanle Gyihova. Ɛnee ɔdwenle Nyamenle Belemgbunlililɛ ne anwo edwɛkpa ne nolobɔlɛ nwo dahuu. (Maake 1:38; 13:10) Nyamenle Edwɛkɛ ne a ɛnee kile Gyisɛse adenle kpalɛ a. (Dwɔn 7:16; 8:28) Ɔzukoale Ngɛlɛlera Nwuanzanwuanza ne kpalɛ amaa yeahola yeahwe adwenle yeahɔ zo, yeabɔ nwolɛ bane, na yeahilehile nu. Saa yɛnyia Kelaese adwenle ne bie a, yɛbabɛlɛ yɛ nwo aze yɛayɛ dɔɔnwo wɔ ɛzonlenlɛ gyima ne anu, na yɛazukoa Baebolo ne kpalɛ.

18. Ndenle titile boni mɔ a yɛdua zo yɛboa Gyihova gyima ne a?

¹⁸ Yɛ moalɛ: Ɔle Nyamenle bodane kɛ “anwuma nee aze amra amuala” bahoto Gyisɛse. (Felepaema 2:9-11) Ɔnva nwo kɛ ɛnee Gyisɛse lɛ gyinlabelɛ titile la, ɔbɛlɛle ɔ nwo aze ɔmanle ɔ Ze. Zɔhane ala a ɔwɔ kɛ yɛyɛ a. (1 Kɔlentema 15:28) Yɛ nee Gyihova yɛ gyima wɔ mekɛ mɔɔ yɛmaa menli mɔɔ vi ‘maanle ti nee maanle bo bayɛ ɛdoavolɛma la.’ (Mateyu 28:19) Eza yɛdua yɛ gɔnwo mɔ nee yɛ mediema mɔɔ yɛboa bɛ la azo “yɛyɛ nyele . . . yɛmaa awie biala.”—Galeehyeama 6:10.

19. Duzu a ɔwɔ kɛ yɛsika yɛ bo yɛyɛ a?

¹⁹ Yɛyɛ Gyihova mo kɛ yedu yɛ folɛ kɛ yɛdwenle ninyɛne mɔɔ wɔ anwuma lɔ anwo la! Ɔwɔ kɛ ‘yɛmia yɛ nwo wɔ ɛnriandilɛ ne anu’ na yɛfa yɛ adwenle yɛsie ninyɛne kpalɛ zo. (Hibuluma 12:1) Bɛmaa yɛsika yɛ bo yɛva “ahonle kpalɛ” yɛyɛ yɛ gyima kɛ asɛɛ yɛyɛ yɛamaa Gyihova la, ɔluakɛ yɛze kɛ yɛ anwuma Selɛ ne bayila yɛ dɔɔnwo.—Kɔlɔsaema 3:23, 24.