ƐVOLƐ nwiɔ kolaa na edwɛkɛ ɛhye azi la, ɛnee me nee Evelyn Trabert, me edwɛkpatɛlɛvolɛ bokavolɛ ne ɛwie Ɛzinzalɛ Arane Geleade Baebolo Sukulu mɔɔ tɔ zo nna, mɔɔ bɛyɛle ye ɛleka mɔɔ bikye Ithaca, New York la. Bɛmanle yɛ gyimalilɛ wɔ El Salvador kɛ edwɛkpatɛlɛvolɛma, na menvale ɛvolɛ 29 menyɛle gyima wɔ ɛkɛ. Kolaa na meadoa me edwɛkɛ ne azo la, maa menga deɛmɔti menzile kpɔkɛ kɛ mebayɛ gyima ɛhye la.

Ɛnee me awovolɛ John nee Eva Olson de Spokane, Washington, U.S.A. Bɛwole me wɔ 1923. Ɛnee bɛwɔ Lutheran asɔne ne anu, noko bɛnlie abɔnsamsenle ngilehilelɛ ne bɛnli, ɔluakɛ ɛnee ɔ nee diedi mɔɔ bɛlɛ ye wɔ Nyamenle mɔɔ le ɛlɔlɛ anu la ɛnnyia. (1 Dwɔn 4:8) Ɛnee me ze to kpanwo. Kenle ko ɔ gɔnwo gyimayɛvo bie zele ye kɛ abɔnsamsenle ngilehilelɛ ne ɛnle Baebolo ne anu. Nzinlii, me awovolɛ nee Gyihova Alasevolɛ zukoale Baebolo ne. Bɛzukoale mɔɔ Baebolo ne ka ye wɔ sonla ewule nzi la anwo debie.

Ɛnee menyia ɛvolɛ ngɔnla pɛ, noko mekakye kɛ me awovolɛ vale anyelielɛ hanle mɔɔ bɛzukoale la anwo edwɛkɛ. Bɛ nye liele kɛ bɛnwunle kɛ Nyamenle duma a le Gyihova na ɔnle Nsa-Ko la. (Dwɔn 8:32) Me awovolɛ noko vale mɔɔ bɛzukoale la hilehilele me, na menliele menlile. Meannyia adwenle  ɛlɛ kɛ Baebolo ɛzukoalɛ fonle. Ɛnee me nye die Nyamenle Edwɛkɛ ne ɛzukoalɛ nwo. Ɛnee mese nyiane, noko me nee me awovolɛ hɔhanle edwɛkɛ ne. Bɛzɔnenle bɛ wɔ 1934, na wɔ 1939 ne anu mɔɔ ɛnee meli ɛvolɛ 16 la, bɛzɔnenle me.

Wɔ wawaa mekɛ nu wɔ 1940, me awovolɛ dɔnenle bɛ sua ne na yɛdule yɛhɔle Coeur d’Alene, Idaho. Yɛbɔle nu yɛyɛle adekpakyelɛ wɔ ɛkɛ. Yɛhayele sua wɔ ɛbolɔnsam bie mɔɔ bɛsiezie kale wɔ ɔ bo la azo. Ɛnee yɛyɛ debiezukoalɛ ne wɔ yɛ sua nu ɛkɛ. Mekɛ zɔhane, ɛnee asafo ekyi bie ala a lɛ Belemgbunlililɛ Asalo a. Yemɔti, ɛnee asafo dɔɔnwo yɛ bɛ debiezukoalɛ wɔ mediema azua anzɛɛ ekpumgbunli mɔɔ bɛkɛhaye la anu.

Wɔ 1941, me nee me awovolɛ hɔle nyianu wɔ St. Louis, Missouri. Bɛvɛlɛle nyianu ne kenle ne mɔɔ li awieleɛ la “Ngakula Kenle.” Bɛmanle ngakula mɔɔ bɛli ɛvolɛ 5 mɔɔ kɔ 18 la dɛnlanle ɔ nyunlu. Ɛdendɛlɛ ne ko ɛlɛkɔ ye awieleɛ la, adiema Joseph F. Rutherford zele yɛdayɛ ngakula ne mɔ kɛ: “Bɛdabɛ mɔɔ bɛkulo kɛ bɛtie Nyamenle nee ye Belemgbunli ne la, bɛdwazo!” Yɛ muala yɛdwazole. Akee, Adiema Rutherford hanle kɛ: “Bɛnlea Belemgbunlililɛ ne anwo alasevolɛ fofolɛ mɔɔ bɛbo 15,000 la!” Menzile kpɔkɛ wɔ mekɛ zɔhane kɛ mebayɛ adekpakyelɛ me ngoane mekɛ kɔsɔɔti anu.

Yɛwiele St. Louis nyianu ne la anzi siane ekyi bie, bɛmanle me abusua ne dule hɔle Oxnard wɔ California nyiakɛ. Ɛnee yɛ gyima a le kɛ yɛbade asafo. Ɛnee yɛde sua ekyi bie mɔɔ ehwili a twe ye na ɛkpa kokye a gyi nu la anu. Ɛnee ɔwɔ kɛ metoto me ɛkpa aledwolɛ biala wɔ ɛkponle mɔɔ yɛdi aleɛ zo la azo kɔkpula kɛ menyianle me ti anwo sua la!

Japanema dole bɔmbo wɔ Pearl Meli Agyinlaleɛ ne wɔ Hawaii wɔ December 7, 1941, na ye alehyenlɛ nu United States vale ɔ nwo wulale ewiade konle mɔɔ tɔ zo nwiɔ la anu. Yeangyɛ fee na yɛara California. Wɔ zɔhane mekɛ ne ɛnee Japanema meli mɔɔ dua azule bo la luolua nzule mɔɔ bikye sua zo la abo yemɔti maanle mgbanyima ne mɔ manle bɛdabɛ mɔɔ bɛdede ɛnweanloa la kɔsɔɔti luoluanle bɛ ahɛnlaneɛ nɔɔzo. Awozinli kabikabi ne ammaa menli mɔɔ wɔ azule bo meli ne mɔ anu la angola etu to.

Wɔ September 1942, yɛhɔle New World Theocratic Assembly (Ewiade Fofolɛ Teokelase Nyianu) wɔ Cleveland, Ohio. Mekakye ɛdendɛlɛ ɛhye: “Anzondwolɛ—Asoo Ɔbahyɛ?” mɔɔ Adiema Nathan H. Knorr manle la kpalɛ. Ɔhilehilele Yekile ati 17 ne mɔɔ fane “nane” anwo ɛzulolɛ ne mɔɔ “anrɛɛ de aze, na kɛkala yewu, na ɔvi azɛlɛ kuma ne mɔɔ ɛnlɛ ɔ bo la anu ɔbavinde” la anwo ngapezo ne anu. (Yekile 17:8, 11) Adiema Knorr hilehilele nu kɛ “nane” ne gyi ɛkɛ maa Maanle Maanle Ngyekyeleɛ ne mɔɔ rale ye awieleɛ wɔ konle ne anu la. Akee ɔvale ɔdole gua kɛ bɛbade anzondwolɛ nwo eku bieko na anzondwolɛ ekyi bara. Zɔhane pɛpɛɛpɛ a zile a. Ewiade konle ne mɔɔ tɔ zo nwiɔ la rale awieleɛ 1945. Yemɔ anzi, Maamgbole Koyɛlɛ Eku ne ralile Maanle Maanle Ngyekyeleɛ ne agyakɛ anu. Yemɔti, Gyihova Alasevolɛ dɛlɛle bɛ edwɛkɛhanlɛ gyima ne anu wɔ ewiade amuala. Ɔvi zɔhane mekɛ ne nea anyuhɔlɛ kpole mɔɔ yɛnyia a!

Ngapezo zɔhane manle menwunle kɛ gyima dɔɔnwo wɔ ɛkɛ mɔɔ yɛbayɛ a. Mɔɔ bɛbɔle ye nolo kɛ bɛbabɔ Geleade Sukulu ne abo ɛvolɛ bieko la, menyianle ɛhulolɛ kɛ mebahɔ bie na meayɛ  edwɛkpatɛlɛvolɛ. Kɔkpula zɔhane mekɛ ne la, bɛmanle mengɔnyɛle adekpakyelɛ wɔ Portland, Oregon wɔ 1943. Wɔ mekɛ zɔhane, ɛnee yɛfa gramafuu yɛbɔ Baebolo nu edwɛkɛ yɛkile suamenlema wɔ bɛ anlenkɛ nloa na yɛ nee bɛ sukoa Baebolo nwo mbuluku mɔɔ ka Nyamenle Belemgbunlililɛ ne anwo edwɛkɛ la. Mengɔle zo mendwenlenle edwɛkpatɛlɛvolɛ gyima ne anwo.

Wɔ 1944, me nye liele kpalɛ kɛ bɛvɛlɛle me nee me gɔnwo Evelyn Trabert kɛ yɛrɛla Geleade Sukulu ne bie la. Yɛ kilehilevolɛma ne vale siane nnu hilele yɛ kɛzi yɛbahola yɛazukoa Baebolo ne na yɛ nye alie kpalɛ la. Bɛ mɛlɛbɛnwoaze ne zinle yɛ nwo kpole. Kɛ neazo la, saa ɔdwu mekɛ ne bie a, yɛ kilehilevolɛma ne a siezie yɛ aleɛ na bɛgyinla yɛ nwo ɛkɛ bɛmaa yɛdi a. Yɛwiele Sukulu ne wɔ January 22, 1945.

Me nee Evelyn, Leo nee Esther Mahan, bɔle yɛ gyimalilɛ ne abo wɔ Santa Ana, El Salvador wɔ June 1946. Yɛnwunle kɛ “nzoleɛ ɛbolo, na yedwu mɔɔ ɔwɔ kɛ bɛbu a.” (Dwɔn 4:35) Yɛhɔle ɛkɛ mɔɔ siane ekyi pɛle nu la, yɛyɛle yɛ maangyebakyi nyianu mɔɔ lumua wɔ Santa Ana la. Yɛdole ɛsalɛ yɛvɛlɛle menli dɔɔnwo na yɛ nye liele kɛ menli kɛyɛ 500 radiele bie la. Yɛ edwɛkɛhanlɛ gyima ne hanle ɛsɔfo ne mɔ ɛya yemɔti dapɛne ko anzi yɛɛ bɛmanle menli rakpale yɛ awolɛ kɛmɔ menganle ye wɔ mɔlebɛbo ne la a. Kɛ anrɛɛ yɛ ahonle badu na yɛavi sua ne azo la, yɛdele nganeɛ bɔbɔ kɛ akee yɛbadɛnla ɛkɛ yɛaboa menli mɔɔ lɛ ahonle kpalɛ la. Ɛsɔfo ne mɔ duale bɛ kɛ bɛmmakenga Baebolo ne, na ɛnee bɛ nuhua ekyi bie ala a lɛ ezukoa mɔɔ sa Baebolo tɔ a. Noko ɛnee menli dɔɔnwo kulo kɛ bɛnwu nɔhalɛ ne. Bɛ nye liele kpole kɛ yɛlɛsukoa Spanish amaa yɛahola yɛahilehile bɛ Gyihova nee ye ɛwɔkɛ mɔɔ yebɔ kɛ ɔbamaa azɛlɛ ne ahakyi paladaese anwo debie la.

Rosa Ascencio boka menli mɔɔ menlumuale me nee bɛ zukoale Baebolo ne la. Mɔɔ ɔbɔle ɔ bo kɛ ɔsukoa Baebolo ne la, ɔhwenle ɔ nwo ɔvile nrenya mɔɔ ɔ nee ye de noko bɛnle agyalɛma la anwo. Nrenya ne noko bɔle ɔ bo kɛ ɔsukoa Baebolo ne. Bɛgyale, bɛzɔnenle bɛ, na bɛrayɛle Gyihova Alasevolɛ mɔɔ bɛbɔ mɔdenle. Rosa a lumuale yɛle adekpakyelɛ wɔ Santa Ana a. *

Ɛnee Rosa lɛ ye sotɔɔ ekyi bie. Saa ɔkɔ daselɛlilɛ a, ɔto nu na ɔfa ɔ nwo ɔto Gyihova anwo zo kɛ ɔbamaa ɔ sa aha mɔɔ ɔhyia la. Saa ɔbabuke ye sotɔɔ ne a, ɔngyɛ ɛnee menli dɔɔnwo ɛra badɔ debie. Ɔnwunle kɛ Gyihova ɛlɛnea ye kɛmɔ Mateyu 6:33 ka la. Rosa lile nɔhalɛ manle Gyihova hɔle ewule nu.

Gualilɛnli bie mɔɔ ɛlie duma la vale ye sua manle yɛdayɛ edwɛkpatɛlɛvolɛma nsia ne hayele. Kenle ko ɛsɔfo bie hɔkpɔlale nrenya ne mɔɔ vale sua ne hayele yɛ la na ɔzele ye kɛ saa ɔmaa yɛkɔ zo yɛtɛnla sua ne anu a, ɔbaye ɔ nee ɔ ye yeavi asɔne ne anu. Ɛnee nrenya ne ɛnzulo ɛsɔfo ne yemɔti ɔzele  ye kɛ saa ɔye ye yeavi asɔne ne anu a ɔye ye. Ɛnee ninyɛne bie mɔ mɔɔ ɛsɔfo ne mɔ yɛ la gyegye ye. Ɔzele yɛ kɛ yɛbahola yɛadɛnla ye sua ne anu mekɛ tendenle biala mɔɔ yɛkulo la.

Wɔ suakpole San Salvador azo, ɛnee edwɛkpatɛlɛvolɛ bie noko nee nrenya bie mɔɔ ɛbe wɔ ninyɛne ɛyɛlɛ nu mɔɔ bɛfɛlɛ ye Baltasar Perla la aye sukoa Baebolo ne. Ɛnee nrenya ne ɛnlie Nyamenle ɛnli bieko ɔluakɛ ɔnwunle kɛ asɔne mgbanyima dɔɔnwo le nabalabama. Noko ɔle awie mɔɔ ɔ ti akunlu le kɛnlɛma. Ɔnva nwo kɛ ɛnee ɔnle Dasevolɛ la, mekɛ mɔɔ bɛsi yɛ Bɛtɛle ne mɔɔ wɔ El Salvador la, ɔyɛle ninyɛne dɔɔnwo ɔboale mɔɔ yeanlie yɛ ɛhwee a.

Mɔɔ Baltasar nee Gyihova menli bɔle nu zile Bɛtɛle ne wiele la, ɔliele ɔdole nu kɛ yenwu nɔhalɛ ɛzonlenlɛ ne. Ɔzɔnenle wɔ July 22, 1955, na yeangyɛ ɔ ye Paulina noko zɔnenle. Bɛ mra nwiɔ ne noko ɛlɛsonle Gyihova wɔ nɔhalɛlilɛ nu. Bɛ ra nrenya Baltasar junior ɛva ɛvolɛ 49 ɛzonle wɔ New York Bɛtɛle. Ɔlɛboa ewiade amuala edwɛkɛhanlɛ gyima ne wɔ ɛkɛ na ɔboka United States Ɔfese Kɔmatii ne anwo. *

Mɔɔ yɛbɔle ɔ bo kɛ yɛyɛ nyianu wɔ San Salvador la, Adiema Perla boale yɛ maanle yɛnyianle ɛleka kpole bie mɔɔ bɛkpundikpundi bɛ agbɔkɛ nu wɔ ɛkɛ la. Alumua ne, ɛnee yɛ nwo anzo. Noko ɛvolɛ biala ɛnee yɛ nwo so ekyi yemɔti yeangyɛ ɛnee yɛngɔ ɛleka mɔɔ bɛkpundikpundi bɛ agbɔkɛ nu mɔɔ yɛyia ɛkɛ la. Yɛnwunle kɛ Gyihova ɛlɛyila yɛ mɔdenlebɔlɛ ne azo. Menwunle bɛdabɛ mɔɔ ɛnee me nee bɛ ɛzukoa Baebolo ne la wɔ nyianu ɛhye mɔ abo. Na mekɛ mɔɔ bɛzɔnenle menli mɔɔ me Baebolo sukoavoma ne nee bɛ ɛzukoa debie la me nye liele kpalɛ! Mendele nganeɛ kɛ menli ɛhye mɔ le me nlɔnra.

Wɔ nyianu ko abo, adiema nrenya bie rale me nwo ɛkɛ ne kɛ ɔkulo kɛ ɔkpa me kyɛlɛ. Ɛnee mengakye ye yemɔti meande mɔɔ ɔhanle la abo. Ɔhanle kɛ, “Meboka ngakula mrenya mɔɔ kpale bɛ awolɛ wɔ Santa Ana la anwo.” Me nye liele kpole  kɛ ɔ nee me ɛlɛsonle Gyihova ɛnɛ la. Adawubɔlɛ zɔhane manle menwunle kɛ dahuu ɛzonlenlɛ gyima ne maa sonla kunlu dwo ɔ nwo tɛla gyima biala.

Meyɛ edwɛkpatɛlɛvolɛ gyima ne ɛvolɛ 29 wɔ El Salvador. Mezonle wɔ Santa Ana, Sonsonate, Santa Tecla, yɛɛ San Salvador. Wɔ zɔhane mekɛ ne, ɛnee me awovolɛ anye ɛlɛfi na bɛhyia me moalɛ. Yemɔti, menyɛle asɔne dɔɔnwo na menzile kpɔkɛ mengyakyile edwɛkpatɛlɛvolɛ gyima ne menziale mengɔle Spokane wɔ 1975.

Mɔɔ me ze wule wɔ 1979 la, meneanle me mame noko ɛvolɛ mɔtwɛ. Ɛnee ɔngola ninyɛne dɔɔnwo yɛ ɔluakɛ ɛnee yeyɛ bɛtɛɛ na ɔnlɛ anwosesebɛ. Ɔnyianle ɛvolɛ 94 na yeawu. Ɛnee ɔnla aze. Adwenleadwenle nee nganeɛdelɛ ɛtane bubule me bɔkɔɔ. Ɔmanle ananze mɔɔ yɛ nyane kpalɛ la guale me. Noko Gyihova boale me. Ɔdiele me nzɛlɛlɛ na ɔmanle mengyinlanle tɛnlabelɛ ne anloa. Gyihova ɛli ye ɛwɔkɛ zo ɛnlea me wɔ me mrelera nu.—Ayezaya 46:4.

Mendule mengɔle Omak mɔɔ wɔ Washington la wɔ 1990. Menganle edwɛkɛ ne mengilele menli mɔɔ ka Spanish la, na menwunle kɛ me nwo ɛra nvasoɛ. Me Baebolo sukoavoma dɔɔnwo zɔnenle. Badwu November 2007 la, ɛnee mengola me sua ne mɔɔ wɔ Omak la anwo kakɛ tua, yemɔti mendule mengɔle Chelan, Washington. Spanish asafo ne mɔɔ wɔ ɛke la nea me boɛ na me nye sɔ mɔɔ bɛyɛ la kpalɛ. Kɛmɔ medame a mele Dasevolɛ mɔɔ anye ɛvi kpalɛ wɔ ɛke la ati, bɛva me kɛ bɛ nana.

Menzile kpɔkɛ kɛ menrɛgya na meawo amaa meanyia mekɛ dɔɔnwo meazonle Gyihova. (1 Kɔlentema 7:34, 35) Menwunle kɛ menrɛhola menrɛnyia debie biala wɔ ewiade ɛhye anu. Yemɔti, meva ninyɛne mɔɔ hyia la melumua, me ahonle nu mɔɔ mevi mezonle Gyihova la. Meboa menli dɔɔnwo memaa bɛnwu nɔhalɛ ne, na bɛrayɛ kɛ me kunlu mralɛ la. Na wɔ ewiade fofolɛ ne anu, mebanyia mekɛ dɔɔnwo meayɛ debie biala mɔɔ mekulo kɛ meyɛ la. Ngɛlɛlera mɔɔ me nye die nwo kpalɛ la a le Edwɛndolɛ 145:16, ɛkɛ ne Gyihova ɛbɔ ɛwɔkɛ kɛ ɔbamaa “tease abɔdeɛ biala akunlu [a]dwo ɔ nwo.”

Menyia ɛvolɛ 91, noko me kpɔkɛdelɛ ne le kpalɛ ekyi yemɔti metɛyɛ adekpakyelɛ gyima ne. Adekpakyelɛ gyima ne boa me maa mete nganeɛ kɛ meyɛ kakula bieko na menyia bodane kpalɛ wɔ ɛbɛlabɔlɛ nu. Mɔɔ mengɔle El Salvador la, ɛnee bɔ zo mɔɔ bɛbɔ edwɛkɛhanlɛ gyima ne abo wɔ ɛkɛ a. Ɔnva nwo kɛ Seetan bɔle mɔdenle kɛ ɔsi yɛ adenle la, kɛkala nolobɔlɛma mɔ bo 39,000 a wɔ maanle ne anu a. Anyuhɔlɛ ɛhye ɛmaa me diedi nu ɛmia kpalɛ. Menwu ye wienyi kɛ Gyihova sunsum ne gyi ye menli ne anzi!