1, 2. Duzu a bamaa yɛanyia anwodozo kɛ ɔlua Belemgbunlililɛ ne azo Nyamenle bodane mɔɔ ɔlɛ ɔmaa alesama la bara nu a, na duzu ati ɔ? (Nea mɔlebɛbo nvoninli ne.)

KƐ Gyihova Alasevolɛ la, yɛfa mɔdenlebɔlɛ yɛbɔ nolo kɛ Nyamenle Belemgbunlililɛ ne ala a bali yɛ ngyegyelɛ nwo gyima a. Noko, asoo yɛdie yɛdi amgba kɛ Belemgbunlililɛ ne wɔ ɛkɛ na yemɔ a Nyamenle balua zo amaa ye bodane ara nu ɔ? Duzu ati a yɛbahola yɛanyia diedi kpundii wɔ Belemgbunlililɛ ne anu a?—Hibuluma 11:1.

² Gyihova balua ye Mɛzaya Belemgbunlililɛ ne azo yeamaa ye bodane mɔɔ ɔlɛ ɔmaa alesama la ara nu. Gyihova lɛ adenle di tumi bɔkɔɔ wɔ Belemgbunlililɛ ne mɔɔ gyi kpundii la azo. Belemgbunlililɛ ne Belemgbunli a le nwane? Nwane mɔ noko a nee Belemgbunli ɛhye bali tumi a? Nwane mɔ yɛɛ ninyɛne boni a bɛbali zolɛ tumi a? Gyihova ɛlua ngyekyeleɛ ne mɔ azo ɛva Belemgbunlililɛ ne anwo ninyɛne titile bie mɔ ɛzie ɛkɛ. Ngyekyeleɛ ɛhye mɔ le mɛla adenle zo ngyehyɛleɛ mɔɔ Gyihova nee ɔ Ra Gyisɛse Kelaese ɛyɛ a. Saa yɛsuzu ngyekyeleɛ ɛhye mɔ  anwo a, yɛbade kɛzi Gyihova bodane ne mɔ bara nu la abo kpalɛ na yɛanwu deɛmɔti Belemgbunlililɛ ne gyi ye kpundii la.—Bɛgenga Ɛfɛsɛsema 2:12.

3. Duzu a yɛbazuzu nwo wɔ edwɛkɛ ɛhye nee mɔɔ doa ye la anu a?

³ Ngyekyeleɛ nsia mɔɔ fane Mɛzaya Belemgbunlililɛ ne mɔɔ Kelaese Gyisɛse bali zolɛ tumi la anwo edwɛkɛ wɔ Baebolo ne anu. Bɛmɛ a le (1) Ebileham ngyekyeleɛ ne, (2) Mɛla ngyekyeleɛ ne, (3) Devidi ngyekyeleɛ ne, (4) ɛsɔfo mɔɔ le kɛ Mɛlekezidɛke ngyekyeleɛ ne, (5) ngyekyeleɛ fofolɛ ne, yɛɛ (6) Belemgbunlililɛ ngyekyeleɛ ne. Bɛmaa yɛzuzu kɛzi ngyekyeleɛ ko biala fane Belemgbunlililɛ ne anwo nee kɛzi Nyamenle ɛlɛdua zo yeamaa ye bodane mɔɔ ɔlɛ ɔmaa alesama ara nu la anwo.—Nea ɛlɛka “ Kɛzi Nyamenle Bamaa Ye Bodane Ara Nu La.”

4. Kɛmɔ yɛnwu ye wɔ Mɔlebɛbo buluku ne anu la, mɛla boni mɔ a Gyihova vale manle alesama a?

⁴ Gyihova zieziele azɛlɛ ne amaa alesama ahola adɛnla zolɛ. Akee Gyihova lile mɛla ɛhye mɔ: (1) Nyamenle babɔ alesama wɔ ye subane zo. (2) Alesama bɛawo tenlene mralɛ bamaa azɛlɛ ne ayi na bɛayɛ azɛlɛ ne paladaese. (3) Ɔnle kɛ alesama di kpalɛ nee ɛtane ɛnwunlɛ baka ne. (Mɔlebɛbo 1:26, 28; 2:16, 17) Ɛnee mɛla nsa ɛhye mɔ di munli na ɔkilehile bodane mɔɔ Nyamenle lɛ maa sonla nee azɛlɛ ye la anu. Yemɔti, duzu ati a ɛnee ɔwɔ kɛ Nyamenle yɛ ngyekyeleɛ ɛhye mɔ ɛ?

5, 6. (a) Kɛzi Seetan bɔle mɔdenle kɛ ɔnrɛmaa Nyamenle bodane ɛnrɛra nu ɛ? (b) Kɛzi Gyihova lile Yidɛn atuadelɛ ne anwo gyima ɛ?

⁵ Seetan bɔle atua ɛdelɛ bo tiale  Nyamenle nee ye bodane. Ɔluale Yive mɔɔ ɔmanle ɔlile kpalɛ nee ɛtane ɛnwunlɛ baka ne la azo ɔbɔle mɔdenle kɛ ɔnrɛmaa sonla ɛnrɛdie Nyamenle. (Mɔlebɛbo 3:1-5; Yekile 12:9) Ɔluale ɛhye azo ɔdele adenle mɔɔ Nyamenle lɛ di Ye abɔdeɛ zo tumi la anwo atua. Nzinlii, Seetan eza bɔle alesama somolɛ kɛ bɛsonle Nyamenle ɔlua mɔɔ bɛnyia ye la ati.—Dwobu 1:9-11; 2:4, 5.

⁶ Kɛzi Gyihova bali atuadelɛ ɛhye anwo gyima ɛ? Anrɛɛ ɔbahola yeazɛkye atuadelɛma ne. Noko yemɔ bahile kɛ ye bodane mɔɔ ɔlɛ kɛ Adam nee Yive ɛwo ɛyi azɛlɛ ye la ɛnrɛra nu. Gyihova zile kpɔkɛ kɛ ɔnrɛzɛkye atuadelɛma ne. Emomu, ɔhanle ngapezo titile bie, Yidɛn ɛwɔkɛ ne. Yemɔ a bamaa ɛwɔkɛ biala mɔɔ Nyamenle ɛbɔ ye wɔ azɛlɛ ne nee alesama anwo la ara nu a.—Bɛgenga Mɔlebɛbo 3:15.

7. Duzu a Yidɛn ɛwɔkɛ ne maa yɛnwu ye wɔ ɛwɔlɛ ne nee ɔ bo zo amra anwo a?

⁷ Nyamenle luale Yidɛn ɛwɔkɛ ne azo ɔbuale ɛwɔlɛ ne nee ɔ bo zo amra mɔɔ bɛmɛ a le Seetan Abɔnsam nee bɛdabɛ mɔɔ bɛbahɔ ɛwɔlɛ ne afoa bɛatia adenle mɔɔ Nyamenle lɛ di tumi la, ewule fɔlɛ. Nyamenle manle raalɛ ne abozonli ne tumi kɛ ɔzɛkye atuadelɛma ɛhye mɔ. Yemɔti, Yidɛn ɛwɔkɛ ne manle ɔlale ali kɛ bɛbaye Seetan nee mɔɔ ye atuadelɛ ne ɛva ɛra la bɛavi ɛkɛ. Ɛwɔkɛ ne eza hilele kɛzi bɛbayɛ ɛhye la.

8. Duzu a yɛnwu ye wɔ raalɛ ne nee abozonli ne anwo a?

⁸ Nwane a bayɛ raalɛ ne abozonli ne a? Abozonli ne bayɛ sunsum nu abɔdeɛ. Duzu ati ɔ? Ɔboalekɛ, abozonli ɛhye a ‘bazɛkye’ Seetan, mɔɔ ɔle sunsum nu abɔdeɛ la a. (Hibuluma 2:14) Ɛhye ati, raalɛ ne mɔɔ ɔbawo abozonli ɛhye la noko bayɛ sunsum nu abɔdeɛ. Mekɛ mɔɔ ɛnee ɛwɔlɛ ne abozoamra anwo ɛlɛso la, raalɛ ne nee abozonli ne anwo edwɛkɛ yɛle fealera nu debie ɛvolɛ kɛyɛ 4,000 wɔ Yidɛn ɛwɔkɛ ne anzi. Wɔ ɛvolɛ zɔhane mɔ anu, Gyihova yɛle ngyekyeleɛ dɔɔnwo mɔɔ bamaa yɛanwu abozonli ne nee kɛzi Nyamenle bayɛ ninyɛne mɔɔ Seetan atuadelɛ ne bazɛkye bɛ boɛ la.

9. Duzu a le Ebileham ngyekyeleɛ ne, na mekɛ boni a ɔbɔle ɔ bo a?

⁹ Gyihova bɔle Yidɛn ɛwɔkɛ ne la anzi ɛvolɛ kɛyɛ 2,000, ɔzele Ebileham kɛ ɔvi ye awuke nu wɔ suakpole Yule azo ɔhɔ Keena azɛlɛ ne azo. (Gyima ne 7:2, 3) Nyamenle zele ye kɛ: “Ɛvi wɔ maanle ye anu tu, ye ɛ nwo fi ɛ ze sua nu nee ɛ nwo amra avinli, na kɔ azɛlɛ ne mɔɔ mebahile wɔ la azo. Mebayila wɔ, meamaa wɔayɛ sonlakpole, ɛ bo zo amra adɛlɛ ayɛ maanle kpole, na ɛ nwo ayɛ aso. Mebayila bɛdabɛ mɔɔ bɛyila wɔ la, Na meamaa munzule ado mɔɔ kɛzuzu munzule kɛmaa wɔ la; Na ɔlua ɛ nwo zo nyilalɛ  aha maanle maanle kɔsɔɔti mɔɔ wɔ ewiade la.” (Mɔlebɛbo 12:1-3) Bɛfɛlɛ ɛwɔkɛ ɛhye mɔɔ Gyihova bɔle Ebileham la Ebileham ngyekyeleɛ ne. Yɛnze mekɛ fɔɔnwo ne mɔɔ Gyihova nee Ebileham yɛle ngyekyeleɛ ne la. Noko yɛze kɛ ngyekyeleɛ ne bɔle ɔ bo wɔ 1943 kolaa na Kelaese ara, wɔ mekɛ mɔɔ Ebileham mɔɔ ɛnee ɛli ɛvolɛ 75 la vile Hɛlan na ɔpɛle Azule Yufileti ne la.

10. (a) Kɛzi Ebileham hilele kɛ ɔlɛ diedi kpole wɔ Nyamenle ɛwɔkɛ ne mɔ anu ɛ? (b) Raalɛ ne abozonli ne anwo ninyɛne boni mɔ a Gyihova lale ye ali ngyikyingyikyi a?

¹⁰ Gyihova zile ye ɛwɔkɛ ne azo fane dɔɔnwo ɔhilele Ebileham na mekɛ biala ɔka edwɛkɛ fofolɛ ɔboka nwo. (Mɔlebɛbo 13:15-17; 17:1-8, 16) Ɛnee diedi mɔɔ Ebileham lɛ ye wɔ Nyamenle ɛwɔkɛ ne mɔ anu la anu yɛ se kpalɛ yemɔti ɛnee ɔkulo kɛ ɔfa ɔ ra ne mɔɔ ɔ nwo hyia ye kpalɛ bɔbɔ la ɔbɔ afɔle. Ɛhye hanle Gyihova ɔmanle ɔzile ngyekyeleɛ ne azo bieko kɛ ye ɛwɔkɛ ne bara nu. (Bɛgenga Mɔlebɛbo 22:15-18; Hibuluma 11:17, 18.) Mekɛ mɔɔ Ebileham ngyekyeleɛ ne bɔle ɔ bo la, Gyihova lale raalɛ ne abozonli ne anwo edwɛkɛ mɔɔ anwo hyia la ali ngyikyingyikyi. Abozonli ne bavi Ebileham abusua nu, menli dɔɔnwo baboka nwo, bɛbayɛ arelemgbunli, bɛbazɛkye Nyamenle agbɔvolɛ kɔsɔɔti, na bɛayɛ nyilalɛ bɛamaa alesama dɔɔnwo.

11, 12. Kɛzi Ngɛlɛlera ne kile kɛ Ebileham ngyekyeleɛ ne bara nu bieko anzɛɛ kpole ɛ, na duzu a ɛhye bahile amaa yɛ a?

¹¹ Ebileham ngyekyeleɛ ne anu ɛwɔkɛ ne mɔ lumuale rale nu wɔ mekɛ mɔɔ Ebileham abozoamra radɛnlanle Ɛwɔkɛ Azɛlɛ ne azo la. Noko, Baebolo ne maa yɛnwu kɛ ngyekyeleɛ ɛhye bamaa yɛanyia nyilalɛ dɔɔnwo. (Galeehyeama 4:22-25) Ɛzoanvolɛ Pɔɔlo hilele nu kɛ Gyisɛse Kelaese a le Ebileham abozonli mɔɔ lumua, anzɛɛ titile a. Keleseɛnema 144,000 ne mɔɔ bɛkpokpa bɛ la tɔ zo nwiɔ,  anzɛɛ bɛboka nwo. (Galeehyeama 3:16, 29; Yekile 5:9, 10; 14:1, 4) Raalɛ ne mɔɔ wɔ Yidɛn ɛwɔkɛ ne anu la a le Nyamenle ahyehyɛdeɛ ne foa ne mɔɔ wɔ anwuma la. Bɛfɛlɛ raalɛ ɛhye ‘Gyɛlusalɛm ne mɔɔ wɔ anwuma lɔ la’ na sunsum nu abɔdeɛ mɔɔ bɛdi nɔhalɛ la a wɔ nu a. (Galeehyeama 4:26, 31) Ɔle ɛwɔkɛ wɔ Ebileham ngyekyeleɛ ne anu kɛ, raalɛ ne abozonli ne bava nyilalɛ dɔɔnwo arɛlɛ alesama.

¹² Ebileham ngyekyeleɛ ne di daselɛ kɛ anwuma Belemgbunlililɛ ne bara na ɔbabuke adenle yeamaa Belemgbunli ne nee ɔ gɔnwo mɔ ali tumi. (Hibuluma 6:13-18) Mekɛ boni a ngyekyeleɛ ɛhye bara awieleɛ a? Mɔlebɛbo 17:7 ka kɛ: Ɔle “ngyekyeleɛ mɔɔ bɛntulu ye ɛlɛ.” Ɔbadɛnla ɛkɛ kɔkpula kɛ Belemgbunlililɛ ne bazɛkye Nyamenle agbɔvolɛ na mbusua mɔɔ wɔ azɛlɛ ye azo la kɔsɔɔti anyia nyilalɛ. (1 Kɔlentema 15:23-26) Noko nvasoɛ mɔɔ wɔ ngyekyeleɛ ɛhye azo la badɛnla ɛkɛ dahuu. Nyamenle ngyekyeleɛ ne mɔɔ ɔ nee Ebileham yɛle la di daselɛ kɛ Gyihova bodane mɔɔ ɔlɛ kɛ tenlenema ‘bayi azɛlɛ ye la’ bara nu.—Mɔlebɛbo 1:28.

13, 14. Duzu a Devidi ngyekyeleɛ ne di nwolɛ daselɛ a?

¹³ Yidɛn ɛwɔkɛ ne nee Ebileham ngyekyeleɛ ne maa yɛnwu kɛ Gyihova tumililɛ ne gyi ye tenlene ngyinlazo ne mɔ azo dahuu. Yemɔti, Mɛzaya Belemgbunlililɛ ne mɔɔ Nyamenle ɛva ɛzie ɛkɛ la noko gyi tenlene ngyinlazo zɔhane mɔ azo. (Edwɛndolɛ 89:14) Asoo Mɛzaya Belemgbunlililɛ ne bazɛkye ɛlɛ ɔ? Asoo ɔbahyia kɛ bɛkakyi zɛhae Belemgbunlililɛ arane ne ɔ? Mɛla adenle zo ngyekyeleɛ bieko di daselɛ kɛ ɛhye ɛnrɛzi ɛlɛ.

¹⁴ Gyihova bɔle tete Yizilayɛ Belemgbunli Devidi ɛwɔkɛ bie. Bɛfɛlɛ ɛwɔkɛ ɛhye Devidi ngyekyeleɛ ne. (Bɛgenga 2 Samoɛle 7:12, 16.) Gyihova bɔle ɛwɔkɛ kɛ Mɛzaya ne bavi Devidi abusua nu. (Luku 1:30-33) Gyihova luale adenle ɛhye azo ɔlale abusua ne mɔɔ Mɛzaya ne bavi nu ara la ali wienyi. Gyihova hanle kɛ Devidi abozonli ɛhye a bali Mɛzaya Belemgbunlililɛ ne azo Belemgbunli a. (Yizikeɛle 21:25-27) Devidi belemgbunlililɛ ne bali tumi dahuu ɔluakɛ, Gyisɛse mɔɔ ɔle Devidi abozonli la “bali belemgbunli dahuu, ye belemgbunlililɛ bagyinla zo kɛ sɛnzɛne.” (Edwɛndolɛ 89:34-37) Yɛbahola yɛanyia anwodozo kɛ Mɛzaya tumililɛ ne ɛnrɛzɛkye ɛlɛ na nvasoɛ mɔɔ vi nu bara la badɛnla ɛkɛ dahuu!

15-17. Kɛmɔ ɛsɔfo mɔɔ le kɛ Mɛlekezidɛke ngyekyeleɛ ne de la, gyima boni bieko a wɔ ɛkɛ maa abozonli ne a, na duzu ati ɔ?

¹⁵ Ebileham ngyekyeleɛ ne nee Devidi ngyekyeleɛ ne kile kɛ raalɛ ne  abozonli ne bali belemgbunli. Noko tɛ belemgbunli mɔɔ abozonli ne bali la angome a baboa alesama kpalɛ a. Ɔwɔ kɛ abozonli ne yɛ ɛsɔfo noko. Ɛsɔfo ala a kola bɔ afɔle maa bɛdie alesama bɛfi ɛtane nu amaa bɛahola bɛaboka Gyihova abusua ne mɔɔ bɛdi nɔhalɛ mɔɔ bɛwɔ anwuma nee aze la anwo a. Amaa abozonli ne ahola ayɛ ɛsɔfo la, Gyihova yɛle mɛla adenle zo ngyehyɛleɛ bieko, ɛsɔfo mɔɔ le kɛ Mɛlekezidɛke ngyekyeleɛ ne.

¹⁶ Nyamenle yele hilele Belemgbunli Devidi kɛ Ɔ nee Gyisɛse bɛbayɛ ngyekyeleɛ. Ngyehyɛleɛ ne bali ninyɛne nwiɔ anwo gyima: mɔɔ lumua, Gyisɛse ‘badɛnla Nyamenle asa fema zo’ yeanyia tumi yeali ye agbɔvolɛ kɔsɔɔti anwo zo konim; mɔɔ tɔ zo nwiɔ, Gyisɛse bayɛ “[ɛsɔfo] dahuu, kɛmɔ Mɛlekezidɛke yɛle la.” (Bɛgenga Edwɛndolɛ 110:1, 2, 4.) Duzu ati a Gyisɛse bayɛ ‘ɛsɔfo dahuu, kɛmɔ Mɛlekezidɛke yɛle’ la ɛ? Kolaa na Ebileham abozoamra aho ava azɛlɛ ne la, ɛnee Mɛlekezidɛke le belemgbunli wɔ suakpole Seelɛm azo nee “Anwuma Anwuma Nyamenle ne [ɛsɔfo].” (Hibuluma 7:1-3) Gyihova kpale Mɛlekezidɛke kɛ belemgbunli nee ɛsɔfo, ɔ ngomekye yɛɛ ɛnee ɔlɛ gyinlabelɛ nwiɔ ɛhye mɔ kolaa na Gyisɛse anyia ye a. Bieko, kɛmɔ ɛnee awie bieko ɛnlɛ gyinlabelɛ ɛhye bie la ati, ɛnee ɔle kɛ Mɛlekezidɛke le ɛsɔfo dahuu anzɛɛ mekɛ mɔɔ ɛnlɛ awieleɛ la.

¹⁷ Nyamenle luale ngyekyeleɛ ɛhye azo kpale Gyisɛse kɛ ɛsɔfo. Gyisɛse bahɔ zo ayɛ ɛsɔfo “dahuu, kɛ Mɛlekezidɛke la.” (Hibuluma 5:4-6) Ngyekyeleɛ ɛhye maa ɔda ali wienyi kɛ Gyihova balua Mɛzaya Belemgbunlililɛ ne azo yeamaa ye bodane mɔɔ ɔlɛ ɔmaa azɛlɛ ye nee alesama la ara nu.

18, 19. (a) Kɛzi ngyekyeleɛ ne mɔ mɔɔ yɛzuzu nwo la fane Belemgbunlililɛ ne anwo ɛ? (b) Duzu a yɛbazuzu nwo wɔ edwɛkɛ mɔɔ doa zo la anu a?

¹⁸ Kɛkala yɛnwu kɛ ngyekyeleɛ ko biala fane Mɛzaya Belemgbunlililɛ ne anwo na Belemgbunlililɛ ne gyi ye kpundii wɔ mɛla adenle zo ngyehyɛleɛ zo. Yidɛn ɛwɔkɛ ne maa yɛnwu kɛ Gyihova balua raalɛ ne abozonli ne anwo zo yeamaa ye bodane mɔɔ ɔlɛ ɔmaa azɛlɛ ne nee alesama la ara nu. Ebileham ngyekyeleɛ ne maa yɛnwu ahenle mɔɔ ɔbayɛ abozonli ne nee gyima mɔɔ abozonli ne bayɛ la.

¹⁹ Devidi ngyekyeleɛ ne maa yɛnwu abusua mɔɔ Mɛzaya ne vi nu la. Zɔhane ngyekyeleɛ ne eza maa Gyisɛse nyia adenle di tumi wɔ azɛlɛ ye azo dahuu. Ɛsɔfo mɔɔ le kɛ Mɛlekezidɛke ngyekyeleɛ ne bamaa abozonli ne azonle kɛ ɛsɔfo. Noko tɛ Gyisɛse angome a baboa alesama yeamaa bɛali munli a. Bɛkpa awie mɔ noko kɛ bɛzonle kɛ arelemgbunli nee ɛsɔfoma. Nienwu a bɛvi a? Yɛbazuzu nwolɛ wɔ edwɛkɛ mɔɔ doa zo la anu.