1. Nzɔne a menli dɔɔnwo bu ye kɛ nvonleɛ ɛnle nwo a?

YƐDE ewiade mɔɔ ɛbɛlatane ɛbu zo la anu. Kɛ neazo la, menli dɔɔnwo dwenle kɛ nvonleɛ biala ɛnle nwo kɛ ɛ nee awie mɔɔ bɛ awodeɛ le ko anzɛɛ ɔnle wɔ agyalɛ bokavolɛ la bala. Nla nu ɛbɛlatane ngome ɛyi sini, mbuluku, edwɛne nee gualilɛ nwo nolobɔlɛ nu. (Edwɛndolɛ 12:8) Noko Gyihova bahola aboa yɛ yeamaa yɛabɔ ɛbɛla mɔɔ sɔ ɔ nye la. Yɛ nwo bahola ade wɔ ewiade mɔɔ ɛbɛlatane ɛbu zo la anu.—Kenga 1 Tɛsalonaekama 4:3-5.

2, 3. (a) Duzu ati a ɔwɔ kɛ yɛkpo atiakunluwɔzo ɛtane a? (b) Nzɔne a yɛbazuzu nwo wɔ edwɛkɛ ɛhye anu a?

² Saa yɛbazɔ Gyihova anye a, ɔwɔ kɛ yɛkpo debie biala mɔɔ ɔkyi la. Noko ɔluakɛ yɛtɔ sinli la ati, bie a ɛbɛlatane bahwehwe yɛ kɛmɔ kɔleɛ twehwe fɛlɛ la. Saa ɛbɛlatane nwo adwenle ba yɛ ti anu a, ɔwɔ kɛ yɛkpo ye ndɛndɛ. Saa yɛanyɛ ye zɔ a, atiakunluwɔzo ɛtane ne anu bayɛ se mɔɔ saa yɛnyia nwolɛ adenle biala a, yɛbayɛ ɛtane a. Ɔle kɛ mɔɔ Baebolo ne ka ala la: “Saa ye munzule atiakunluwɔzo ne nrenzɛ a ɔwo ɛtane.”—Kenga Gyemise 1:14, 15.

 ³ Atiakunluwɔzo ɛtane bahola abɔ ɔ bo wɔ yɛ ahonle nu. Ɛhye ati a ɔwɔ kɛ yɛnea ninyɛne mɔɔ yɛ adwenle ba zo la boɛ la. Saa yɛkpo atiakunluwɔzo ɛtane a, yɛbahoati nla nu ɛbɛlatane nee mɔɔ fi nu ba la. (Galeehyeama 5:16) Wɔ edwɛkɛ ɛhye anu, yɛbazuzu ninyɛne nsa mɔɔ baboa yɛ yeamaa yɛaho yɛatia atiakunluwɔzo ɛtane la anwo: yɛ nee Gyihova agɔnwolɛvalɛ ne, ye Edwɛkɛ ne anu folɛdulɛ nee moalɛ mɔɔ yɛnyia yɛfi Keleseɛnema mɔɔ bɛnyi sunsum nu ɛkɛ la.

4. Nzɔne ati a ɔhyia kɛ yɛbikye Gyihova a?

⁴ Baebolo ne ka kile menli mɔɔ kulo kɛ “bɛbikye Nyamenle” la kɛ: “Bɛhakyi bɛ subane!” na “bɛde bɛ ahonle nu.” (Gyemise 4:8) Saa Gyihova le yɛ Gɔnwo kpalɛ a, yɛkulo kɛ yɛmaa yɛ nyɛleɛ nee yɛ nzuzulɛ sɔ ɔ nye. Saa mɔɔ yɛdwenle nwolɛ la anwo te a, yɛ ahonle nu noko bade. (Edwɛndolɛ 24:3, 4; 51:6; Felepaema 4:8) Gyihova ze kɛ yɛtɔ sinli na bie a yɛbadwenle ninyɛndane nwo. Noko kɛmɔ yɛngulo kɛ yɛmaa Gyihova di nyane la ati, yɛbɔ mɔdenle kɛ yɛbakpo atiakunluwɔzo ɛtane. (Mɔlebɛbo 6:5, 6) Yɛbɔ mɔdenle biala kɛ yɛbamaa yɛ nzuzulɛ nwo ade.

5, 6. Kɛzi asɔneyɛlɛ baboa yɛ yeamaa yɛaho yɛatia atiakunluwɔzo ɛtane ɛ?

⁵ Saa yɛsɛlɛ Gyihova moalɛ dahuu a, ɔbaboa yɛ yeamaa yɛaho yɛatia nzuzulɛ ɛtane. Ɔfa ye sunsum ne ɔboa yɛ amaa yɛahɔ zo yɛamaa yɛ nwo ade. Yɛbahola yɛaha yɛahile Gyihova wɔ yɛ asɔneyɛlɛ nu kɛ yɛkulo kɛ yɛ nzuzulɛ sɔ ɔ nye. (Edwɛndolɛ 19:14) Yɛsɛlɛ ye wɔ mɛlɛbɛnwoaze nu kɛ ɔnleɛnlea yɛ nu saa atiakunluwɔzo ɛtane bie wɔ yɛ ahonle nu mɔɔ ɔbamaa yɛayɛ ɛtane a. (Edwɛndolɛ 139:23, 24) Sɛlɛ Gyihova dahuu kɛ ɔboa wɔ ɔmaa ɛkpo ɛbɛlatane na ɛyɛ mɔɔ le kpalɛ wɔ mekɛ mɔɔ anu yɛ se bɔbɔ la anu.—Mateyu 6:13.

⁶ Bie a kolaa na yɛazukoa Gyihova anwo debie la, ɛnee yɛ nye die ninyɛne mɔɔ ɛnzɔ ɔ nye la ɛyɛlɛ nwo, na bie a yɛtɛko yɛtɛtia zɔhane atiakunluwɔzo ɛtane ne mɔ. Noko Gyihova bahola aboa yɛ yeamaa yɛahakyi na yɛayɛ mɔɔ sɔ ɔ nye la. Kɛ neazo la, Belemgbunli Devidi nee Batehyɛba zɛkyele agyalɛ la anzi, Devidi nlunle ɔ nwo na ɔzɛlɛle Gyihova kɛ ɔmaa ye “ahonle mɔɔ anu te” na ɔboa ye ɔmaa ɔyɛ tieyɛ. (Edwɛndolɛ 51:10, 12) Yemɔti saa ɛnee yɛlɛ atiakunluwɔzo ɛtane mɔɔ anu yɛ se wɔ dɛba ne na yɛlɛko yɛatia bɛ a, Gyihova bahola aboa yɛ yeamaa yɛanyia ɛhulolɛ kpole kɛ yɛbadie ye na yɛayɛ mɔɔ le kpalɛ la. Ɔbahola yeaboa yɛ yeamaa yɛali yɛ nzuzulɛ ɛtane zo.—Edwɛndolɛ 119:133.

7. Kɛzi Baebolo ne bahola aboa yɛ yeamaa yɛakpo nzuzulɛ ɛtane ɛ?

⁷ Gyihova bahola alua ye Edwɛkɛ, Baebolo ne azo abua asɔne mɔɔ yɛyɛ kɛ ɔboa yɛ la. Nyamenle nrɛlɛbɛ ne mɔɔ anwo te la wɔ nu. (Gyemise 3:17) Saa yɛkenga Baebolo ne dahuu a, ɔbamaa yɛava ninyɛne mɔɔ anwo te la yɛazie yɛ adwenle nu. (Edwɛndolɛ 19:7, 11; 119:9, 11) Eza neazo nee kɔkɔbɔlɛ mɔɔ bɛbaboa yɛ bɛamaa yɛakpo nzuzulɛ nee atiakunluwɔzo ɛtane la wɔ Baebolo ne anu.

8, 9. (a) Nzɔne ati a kpavolɛ ko nee tuutuunli raalɛ bie lale a? (b) Tɛnlabelɛ boni mɔ a neazo mɔɔ wɔ Mrɛlɛbulɛ tile 7 la baboa yɛ yeamaa yɛahoati a?

 ⁸ Nyamenle Edwɛkɛ ne bɔ yɛ kɔkɔ wɔ Mrɛlɛbulɛ 5:8 kɛ yɛhwe yɛ nwo yɛvi ɛbɛlatane nwo. Mrɛlɛbulɛ tile 7 ka kpavolɛ bie mɔɔ hɔle akpɔsa nɔsolɛ nu la anwo edwɛkɛ. Ɔbikyele raalɛ bie mɔɔ ye ɛbɛla ɛzɛkye la sua nu. Ɛnee raalɛ ne wɔ kodoka bie anu na ‘yeheda ye ɛdanlɛ kɛ tuutuunli.’ Ɔhɔyiale kpavolɛ ne, ɔzɔle ye, ɔvole ɔ nloa anwo na ɔhanle edwɛkɛ mɔɔ maanle kpavolɛ ne nyianle atiakunluwɔzo ɛtane la. Yeamkpo zɔhane atiakunluwɔzo ne mɔ, yemɔti ɔmaanle ɔ nee raalɛ ne lale. Ɔnva nwo kɛ ɛnee ɔtɛyɛle ye adwenle kɛ ɔyɛ ɛtane la, ɔyɛle. Akee ɔyiale nwolɛ ngyegyelɛ ne. Saa ɔnwunle esiane mɔɔ bavi nu ara la a, anrɛɛ ɔhwenle ɔ nwo ɔvile raalɛ ne anwo kolaa!—Mrɛlɛbulɛ 7:6-27.

⁹ Kɛmɔ ɔdole kpavolɛ zɔhane la, bie a yɛdayɛ noko yɛbazi kpɔkɛ mɔɔ ɛnle kpalɛ ɔluakɛ bie a yɛande esiane mɔɔ vi nu bara la abo. Kɛ neazo la, TV zo gyimalilɛ ɛleka bie mɔ ye ninyɛne mɔɔ ɛbɛlatane ɛyi nu la nɔɔzo, yemɔti ɔbayɛ esiane kɛ ɛbahakyihakyi wɔ TV ne wɔado ɛleka gyɛne kɛ ɛnea mɔɔ bɛlɛye wɔ zo la. Eza ɔbayɛ esiane kpole kɛ ɛbatinli Intanɛte adelɛse mɔɔ ɛnze ɛleka mɔɔ ɔbava wɔ yeahɔ la azo anzɛɛ ɛbahɔ Web site mɔɔ ɛbɛlatane ɛyi bɛ nolobɔlɛ nu na ɔfa bɛ ɔkɔ ɛleka mɔɔ bɛye nla nwo nvoninli la. Mɔɔ yɛbanlea  wɔ mekɛ ɛhye mɔ anu la bahola amaa yɛanyia atiakunluwɔzo ɛtane na yeamaa yɛayɛ Gyihova anwo anzosesebɛ.

10. Nzɔne ati a esiane wɔ anyezolilɛ nu a? (Nea mɔlebɛbo nvoninli ne.)

¹⁰ Baebolo ne noko ka kɛzi ɔwɔ kɛ mrenyia nee mraalɛ nee bɛ nwo di la anwo edwɛkɛ. (Kenga 1 Temɔte 5:2.) Keleseɛnema da ɛhulolɛ nwo nganeɛdelɛ ali kile bɛ agyalɛ nu bokavolɛ anzɛɛ awie mɔɔ bɛkulo kɛ bɛgya ye la ala. Bɛnva bɛ nwo bɛndwihwili awie mɔ. Bie mɔ bahola anyia adwenle kɛ saa kɛzi bɛtia, bɛkeha bɛ nwo anzɛɛ bɛnea awie la maa ɔnyia nla nwo nganeɛdelɛ na bɛtɛsosɔle bɛ nwo bɔbɔ a, ɔnyɛ ɛhwee. Noko saa menli nwiɔ di anyezo a, bɛbahola bɛabɔ ɔ bo bɛanyia atiakunluwɔzo ɛtane, na ɛhye bahola amaa bɛava bɛ nwo bɛawula nla nu ɛbɛlatane nu. Bie ɛzi ɛlɛ, na ɔbahola yeazi bieko.

11. Nzɔne a yɛsukoa yɛfi Dwosefi ɛkɛ a?

¹¹ Dwosefi yɛle nwolɛ neazo kpalɛ maanle yɛ. Pɔtefaa aye ne bɔle mɔdenle kɛ ɔmaa Dwosefi nee ye ala. Dwosefi amkponle, noko Pɔtefaa aye ne hɔle zo gyegyele ye. Dahuu ɔka ɔkile Dwosefi kɛ ‘ɔ nee ye ɛdɛnla.’ (Mɔlebɛbo 39:7, 8, 10) Baebolo nwo abɔlɔba ko hanle kɛ ɛnee Pɔtefaa aye ne anye la kɛ saa ɔka bɛ mu nwiɔ ala a, Dwosefi anye balie ɔ nwo. Ɛnee Dwosefi ɛzi pi kɛ ɔnrɛlielie raalɛ ne zo yɛɛ ɔnrɛva ɔ nwo ɔnrɛhwihwili ye ɛlɛ. Yemɔti yeammaa atiakunluwɔzo ɛtane amba ye ahonle nu. Na mekɛ mɔɔ ɔzɔle Dwosefi tɛladeɛ ne anu kɛ ɔ nee ye ɛla la, ndɛndɛ ne ala Dwosefi “kpolole ye tɛladeɛ ne manle ye na ɔnriandile ɔvile sua nu ɛkɛ.”—Mɔlebɛbo 39:12.

12. Kɛzi yɛkola yɛnwu kɛ mɔɔ yɛnea la kola nyia yɛ ahonle zo tumi ɛ?

¹² Gyisɛse bɔle kɔkɔ kɛ mɔɔ yɛnea la bahola anyia yɛ ahonle zo tumi na yeamaa yɛanyia nla nwo atiakunluwɔzo ɛtane. Ɔhanle kɛ: “Saa nrenya nea raalɛ maa ɔ nwo dɔ ye a ɛnee yeva ye wɔ ye ahonle nu.” (Mateyu 5:28) Ɛhye bie a dole Belemgbunli Devidi a. Ɔgyi ye sua ne ati zo la, “ɔnwunle kɛ raalɛ bie ɛlɛbia,” noko ɔhɔle zo ɔnleanle ye na ɔdwenledwenlenle ɔ nwo. (2 Samoɛle 11:2) Ɔnva nwo kɛ ɔle awie aye la, Devidi nyianle ɔ nwo atiakunluwɔzo na ɔ nee ye lale.

13. Nzɔne ati a ɔwɔ kɛ yɛ nee yɛ nye yɛ “ngyekyeleɛ” a, na kɛzi yɛbayɛ ye ɛ?

¹³ Saa yɛkulo kɛ yɛkpo nzuzulɛ ɛtane a, ɔwɔ kɛ yɛdi Dwobu neazo ne anzi. Ɔhanle kɛ: “Me nee me nye ɛyɛ ngyekyeleɛ.” (Dwobu 31:1, 7, 9) Kɛmɔ Dwobu yɛle la, yɛbahola yɛazi kpɔkɛ kɛ yɛnrɛnyia awie mɔɔ yɛbanlea ye la anwo atiakunluwɔzo ɛtane. Yɛɛ saa yɛnwu nla nwo nvoninli wɔ yɛ kɔmpita zo, nolobɔlɛ debie zo, magazine nu nee ɛleka biala a, yɛbaye yɛ nye ndɛndɛ.

14. Nzɔne a ɔwɔ kɛ yɛyɛ amaa yɛ nwo ade a?

¹⁴ Saa ɛdwenle mɔɔ yɛzuzu nwo la anwo a, bie a ɛbanwu kɛ ɔwɔ kɛ ɛmia ɛ nwo na wɔaho wɔatia atiakunluwɔzo ɛtane. Saa ɔwɔ kɛ ɛyɛ nzenzaleɛ a, yɛ ye kɛkala! Saa ɛtie Gyihova a, ɛbahola wɔahoati nla nu ɛbɛlatane na ɛ nwo ade.—Kenga Gyemise 1:21-25.

15. Saa ɔyɛ se kɛ yɛbaho yɛatia atiakunluwɔzo ɛtane a, nzɔne ati a ɔwɔ kɛ yɛkpondɛ moalɛ a?

¹⁵ Saa ɔyɛ se kɛ ɛbaho wɔatia atiakunluwɔzo ɛtane a, ka kile awie mɔɔ yezonle Gyihova yehyɛ na ɔbahola  yeagyinla Baebolo ne azo yeadu wɔ folɛ kpalɛ la. Bie a ɔnla aze kɛ ɛbaha wɔ ngyegyelɛ nwo edwɛkɛ wɔahile awie mɔ, noko ɔwɔ kɛ ɛkpondɛ moalɛ. (Mrɛlɛbulɛ 18:1; Hibuluma 3:12, 13) Keleseɛnema mɔɔ bɛnyi sunsum nu la bahola aboa wɔ bɛamaa wɔanwu nzenzaleɛ mɔɔ ɔwɔ kɛ ɛyɛ la. Akee yɛ nzenzaleɛ ɛhye mɔ amaa wɔayɛ Gyihova Agɔnwo.

16, 17. (a) Kɛ ɔkɛyɛ na mgbanyima aboa menli mɔɔ ɔyɛ se ɔmaa bɛ kɛ bɛbaho bɛatia atiakunluwɔzo ɛtane la ɛ? Maa neazo. (b) Nzɔne ati a ɔwɔ kɛ menli mɔɔ nea nlanwonvoninli la kpondɛ moalɛ ndɛndɛ a?

¹⁶ Yɛ asafo nu mgbanyima titili a fɛta kɛ bɛboa yɛ a. (Kenga Gyemise 5:13-15.) Wɔ ɛvolɛ dɔɔnwo anu, ɛnee ɔyɛ se ɔmaa kpavolɛ bie mɔɔ wɔ Brazil la kɛ ɔbahoati atiakunluwɔzo ɛtane. Ɔka kɛ: “Ɛnee meze kɛ mɔɔ medwenle nwo la ɛnzɔ Gyihova anye, noko ɛnee mese nyiane kɛ mebaha nwolɛ edwɛkɛ meahile awie mɔ.” Asafo nu kpanyinli bie nwunle kɛ ɔhyia moalɛ yemɔti ɔmaanle ye anwosesebɛ kɛ ɔmaa mgbanyima ne mɔ ɛboa ye. Kpavolɛ ne ka kɛ: “Atiakunlukɛnlɛma nee ndelebɛbo mɔɔ mgbanyima ne mɔ lale ye ali hilele me la tɛla mɔɔ ɛnee me nye la ye ade la, na ɛhye zinle me nwo. Bɛdiele me kpalɛ. Bɛmaanle menwunle ye wɔ Baebolo ne anu kɛ Gyihova kulo me na bɛ nee me yɛle asɔne. Yemɔ ammaa yeanyɛ se kɛ mebava bɛ Baebolo nu folɛdulɛ ne meayɛ gyima.” Nzinlii mɔɔ ɔ nee Gyihova agɔnwolɛvalɛ ne anu mianle la, ɔhanle kɛ: “Kɛkala menwu ye kɛ, kɛ anrɛɛ yɛ ngomekye yɛbazoa yɛ adesoa la, ɔwɔ kɛ yɛkpondɛ moalɛ.”

¹⁷ Saa ɛnea nlanwonvoninli a, ɔwɔ kɛ ɛkpondɛ moalɛ ndɛndɛ. Saa ɛkyɛ nwolɛ a, ɔnrɛyɛ se kɛ ɛbabɔ ɛbɛlatane. Akee ɛbaboda awie mɔ na wɔamaa menli aha Gyihova anwo edwɛkɛ ɛtane. Menli dɔɔnwo ɛmaa mgbanyima ne mɔ ɛboa bɛ na bɛlie bɛ folɛdulɛ bɛdo nuhua amaa bɛazɔ Gyihova anye na bɛadɛnla Keleseɛne asafo ne anu dahuu.—Edwɛndolɛ 141:5; Hibuluma 12:5, 6; Gyemise 1:15.

18. Nzɔne a wɔbɔ kpɔkɛ kɛ ɛbayɛ a?

¹⁸ Ɛbɛlatane ɛlɛkɔ ɔ nyunlu kpalɛ wɔ Seetan ewiade ne anu. Noko Gyihova azonvolɛ bɔ mɔdenle kɛ bɛbamaa bɛ nzuzulɛ nee bɛ nwo ade. Gyihova anye die Keleseɛnema ɛhye mɔ anwo kpalɛ. Bɛmaa yɛhɔ zo yɛbeta Gyihova na yɛli adehilelɛ mɔɔ yɛnyia yɛfi ye Edwɛkɛ ne nee asafo ne anu la azo. Saa yɛyɛ ɛhye a, yɛ nye balie na yɛanyia adwenle mɔɔ anu te. (Edwɛndolɛ 119:5, 6) Saa kenle bie bɛsɛkye Seetan a, yɛbadɛnla aze dahuu wɔ Nyamenle ewiade fofolɛ mɔɔ anu te la anu.