1, 2. (a) Nzɔne ati a ɛdie ɛdi kɛ Gyihova kulo ye menli ɛ? (b) Kɛzi bɛbɔle alesama ɛ?

NZƆNE ati a ɛdie ɛdi kɛ Gyihova kulo ye menli ɛ? Kolaa na wɔabua zɔhane kpuya ne la, suzu neazo ɛhye mɔ anwo: Mediema vale ɛvolɛ dɔɔnwo maanle adiema raalɛ Taylene anwosesebɛ. Bɛzele ye kɛ ɔmmadwenle mɔɔ ɔnrɛhola ye yɛ la anwo. Ɔka kɛ: “Saa Gyihova ɛngulo me a, anrɛɛ ɔnrɛzi folɛdulɛ ko ne ala azo.” Brigitte mɔɔ ɔ hu wule na ɔ ngome ɔtetele ngakula nwiɔ la ka kɛ: “Ngakula ɛtetelɛ wɔ Seetan ewiade ɛhye anu ɛnla aze fee, titili saa ɛle wovolɛ ko a. Noko melɛ anwodozo wɔ Gyihova ɛlɔlɛ ne anu, ɔluakɛ saa me nwo kyele me kpalɛ a, ɔkile me adenle na ɔmmaa ngyegyelɛ mɔɔ menrɛhola ɔ nloa gyinla la ɛndo me.” (1 Kɔlentema 10:13) Ewule ɛzulolɛ bie mɔɔ ɔnlɛ ye ayile la ɛha Sandra. Wɔ nyianu bie abo, adiema raalɛ bie hilele ɔ nwo anyelielɛ. Sandra ahu ne ka kɛ: “Ɔnva nwo kɛ ɛnee yɛnze ye la, kɛzi ɔhilele kɛ ɔdwenle yɛ nwo la maanle yɛ nye  liele kpole. Ndenle ngyikyi mɔɔ yɛ mediema dua zo kile kɛ bɛdwenle yɛ nwo la maa menwu kɛzi Gyihova kulo yɛ la.”

² Gyihova bɔle alesama kɛ bɛhulo awie mɔ na awie mɔ noko ɛhulo bɛ. Noko ɔlua anwodolɛ, ezukoa nwo ngyegyelɛ anzɛɛ yɛ ɛzonlenlɛ gyima ne mɔɔ ɔnzo ma la ati, yɛ sa nu bahola ado. Saa yɛte nganeɛ kɛ kɛkala Gyihova ɛngulo yɛ a, ɔwɔ kɛ yɛkakye kɛ yɛ nwo hyia ye na ɔlɛ yɛ sa fema ne anu kɛ ɔboa yɛ. Saa yɛdi nɔhalɛ yɛmaa ye a, ɔ rɛle ɛnrɛvi yɛ ɛlɛ.—Ayezaya 41:13; 49:15.

3. Nzɔne a bamaa yɛanyia anwodozo kɛ Gyihova lɛ ɛlɔlɛ kpundii maa yɛ a?

³ Alasevolɛ mɔɔ yɛlimoa yɛha bɛ nwo edwɛkɛ la die di kɛ Nyamenle boale bɛ wɔ ngyegyelɛ mekɛ nu. Yɛdayɛ noko yɛbahola yɛanyia anwodozo kɛ ɔbaboa yɛ. (Edwɛndolɛ 118:6, 7) Yɛbazuzu ahyɛlɛdeɛ nna mɔɔ kile kɛ Gyihova kulo yɛ la anwo wɔ edwɛkɛ ɛhye anu. Bɛmɛ a le (1) ye abɔdeɛ, (2) Baebolo ne, (3) asɔneyɛlɛ, yɛɛ (4) ɛkpɔnedeɛ ne. Saa yɛdwenledwenle ninyɛne mgbalɛ mɔɔ Gyihova ɛyɛ ɛmaa yɛ la anwo a, ɔbamaa yɛahile anyezɔlɛ yɛamaa ye ɛlɔlɛ kpundii ne.—Kenga Edwɛndolɛ 77:11, 12.

4. Nzɔne a yɛsukoa yɛfi Gyihova abɔdeɛ nu a?

⁴ Saa yɛnea ninyɛne mɔɔ Gyihova ɛbɔ la a, ɔmaa yɛnwu kɛzi ɔkulo yɛ la. (Wulomuma 1:20) Kɛ neazo la, Gyihova ambɔ azɛlɛ ne kɛ yɛdɛnla zo ala. Yeva debie biala mɔɔ bamaa yɛ nye alie ɛbɛlabɔlɛ nu la yemaa yɛ. Ɔwɔ kɛ yɛdi aleɛ, yemɔti Gyihova ɛmaa yɛ aleɛ ngakyile mɔɔ saa ɛnyia bie ɛdi a ɛnwu kɛ aleɛ yɛ fɛ! (Nolobɔvo ne 9:7) Adiema raalɛ Catherine mɔɔ vi Canada la anye die abɔdeɛ nwo, titili mɔɔ ɔnwu ye wɔ April anu la. Ɔse: “Saa ɛnea kɛzi ninyɛne kɔ ye la a ɔyɛ nwanwane kpole—felawɔse mɔɔ Gyihova ɛhyehyɛ mɔɔ bɛ mekɛ dwu a bɛfifi nee nloma mɔɔ bɛfi adendulɛ nu bɛba mɔɔ bie mɔ a le nloma ngyikyi mɔɔ bɛbadi aleɛ wɔ ɛleka mɔɔ memaa nloma aleɛ mɔɔ zua me egyaade ne la. Gyihova kulo yɛ kpalɛ la ati a yemaa yɛ ninyɛne mɔɔ maa yɛ nye die kpalɛ la a.” Yɛ Ze kulo ye abɔdeɛ na ɔkpondɛ kɛ yɛdayɛ noko yɛ nye die nwo kpalɛ.—Gyima ne 14:16, 17.

5. Kɛzi adenle mɔɔ Gyihova luale zo bɔle sonla la maa yɛnwu ye ɛlɔlɛ ne ɛ?

⁵ Gyihova bɔle yɛ kɛ yɛyɛ gyima mɔɔ nvasoɛ wɔ zo la na yɛmaa yɛ nye ɛlie nwolɛ. (Nolobɔvo ne 2:24) Ɔmaanle alesama gyima kɛ bɛmaa azɛlɛ ne ɛyi, bɛyɛ zolɛ gyima na bɛnlea fɛlɛ, nloma nee ninyɛne gyɛne mɔɔ wɔ zolɛ la anwo zo. (Mɔlebɛbo 1:26-28) Eza ɔvale subane ngɛnlɛma ɔbɔle yɛ amaa yɛahola yɛazukoa ye!—Ɛfɛsɛsema 5:1.

6. Saa yɛdwenledwenle Nyamenle Edwɛkɛ ne anwo a, nzɔne a ɔmaa yɛnwu ye a?

⁶ Gyihova kulo yɛ kpalɛ la ati a ɔvale Baebolo ne ɔmaanle yɛ a. Ɔka mɔɔ ɔwɔ kɛ yɛnwu ye wɔ ɔ nwo nee kɛzi ɔte nganeɛ wɔ alesama anwo la ɔkile yɛ. Kɛ neazo la, Baebolo ne ka kɛzi Gyihova dele nganeɛ wɔ Yizilayɛma mɔɔ ɛnee bɛta bɛte atua bɛtia ye anwo la kile yɛ. Edwɛndolɛ 78:38 ka kɛ: “Noko yemɔ, kɛmɔ ɔse anwunvɔne la ati, ɔvale bɛ ɛtane ɔhyɛle bɛ, yɛanzɛkye bɛ; mekɛ dɔɔnwo ɔmenle ye ɛya ne, yeanva ye ɛya ne amuala yeangua bɛ nwo zo.” Saa ɛdwenledwenle zɔhane tɛkese ne anwo a, ɔbamaa wɔanwu kɛzi Gyihova kulo wɔ na ɔdwenle ɛ nwo la. Yɛbahola yɛanyia anwodozo bɔkɔɔ kɛ Gyihova dwenle yɛ nwo.—Kenga 1 Pita 5:6, 7.

7. Nzɔne ati a ɔwɔ kɛ Baebolo ne sonle bolɛ maa yɛ ɛ?

 ⁷ Ɔwɔ kɛ Baebolo ne sonle bolɛ maa yɛ. Nzɔne ati ɔ? Ɔluakɛ Gyihova dua zo ɔ nee yɛ tendɛ. Saa wovolɛ nee ɔ ra di adwelie kpalɛ a, ɔmaa ɛlɔlɛ nee anwodozo mɔɔ bɛlɛ bɛmaa bɛ nwo la anu mia. Gyihova le yɛ Ze mɔɔ ɔkulo yɛ. Ɔwɔ nuhua kɛ yɛtɛnwunle ye yɛɛ yɛtɛtele ɔ ne ɛlɛ, noko ɔle kɛ asɛɛ ɔdua Baebolo ne azo ɔ nee yɛ tendɛ la. Ɔwɔ kɛ yɛtie ye dahuu! (Ayezaya 30:20, 21) Saa yɛkenga Baebolo ne a, ɔmaa yɛnwu Gyihova mɔɔ kile yɛ adenle na ɔbɔ yɛ nwo bane la na yɛnyia ye nu anwodozo.—Kenga Edwɛndolɛ 19:7-11; Mrɛlɛbulɛ 1:33.

8, 9. Nzɔne a Gyihova kpondɛ kɛ yɛnwu ye a? Maa Baebolo ne anu neazo bie.

⁸ Gyihova kpondɛ kɛ yɛnwu ye kɛ ɔkulo yɛ na tɛ yɛ sinlidɔlɛ ne mɔ a ɔnea a. Ɔnea ninyɛne mgbalɛ mɔɔ wɔ yɛ nu la. (2 Edwɛkɛsisilɛ 16:9) Maa yɛzuzu kɛzi Gyihova nwunle ninyɛne mgbalɛ mɔɔ wɔ Dwuda Belemgbunli Gyɛhɔhyafate anu la anwo. Gyɛhɔhyafate zile kpɔkɛ ɛtane ɔvale ɔ nwo ɔbɔle Yizilayɛ Belemgbunli Ehabe na ɔhonle ɔtiale Seleama wɔ Releemɔto mɔɔ wɔ Geleade la. Adalɛ ngapezoma 400 hanle hilele Ehabe atisesebɛ kɛ ɔbali konim, noko Gyihova nɔhalɛ ngapezonli Maekaya hanle kɛ saa Gyɛhɔhyafate nee Ehabe kɔ konle ne a, bɛbaho bɛadɔ. Zɔhane pɛpɛɛpɛ a zile a. Ehabe wule wɔ konle ne anu yɛɛ ɔhale ekyi bie na bɛahu Gyɛhɔhyafate. Wɔ konle ne anzi, Gyihova luale Gyihu anwo zo denrɛle Gyɛhɔhyafate wɔ ye nvonleɛ ne anwo. Eza Gyihu zele ye kɛ: “Noko akee, bɛnwu kpalɛ ekyi bie wɔ wɔ nuhua.”—2 Edwɛkɛsisilɛ 18:4, 5, 18-22, 33, 34; 19:1-3.

⁹ Ɛnee Gyɛhɔhyafate ɛlimoa ɛha ɛhile safohyenlema, Livaema nee ɛsɔfo ne mɔ kɛ bɛhɔ Dwuda suakpole biala azo bɛhilehile menli ne Gyihova Mɛla ne. Bɛyɛle gyima kpalɛ yemɔti ɔmaanle menli mɔɔ bɛvi maanle gyɛne zo la ranwunle Gyihova. (2 Edwɛkɛsisilɛ 17:3-10) Yemɔti ɔnvane nwo kɛ Gyɛhɔhyafate zile kpɔkɛ ɛtane nzinlii la, Gyihova arɛle anvi ninyɛne mgbalɛ mɔɔ ɔlimoale ɔyɛle la. Zɔhane neazo ne kyekye yɛ rɛle kpalɛ ɔluakɛ ɔyɛ a yɛfo. Noko saa yɛbɔ mɔdenle biala kɛ yɛsonle Gyihova a, ɔbahulo yɛ dahuu yɛɛ ɔ rɛle ɛnrɛvi ninyɛne mgbalɛ mɔɔ yɛyɛle la.

10, 11. (a) Nzɔne ati a nzɛlɛlɛ le ahyɛlɛdeɛ mɔɔ sonle bolɛ mɔɔ vi Gyihova ɛkɛ a? (b) Kɛzi Nyamenle babua yɛ asɔneyɛlɛ ɛ? (Nea mɔlebɛbo nvoninli ne.)

¹⁰ Saa selɛ mɔɔ lɛ ɛlɔlɛ la amra kpondɛ kɛ bɛka edwɛkɛ bɛkile ye a, ɔnyia mekɛ ɔtie bɛ. Ɔkpondɛ kɛ ɔnwu kɛzi bɛte nganeɛ la, ɔluakɛ ɔdwenle bɛ nwo kpalɛ. Zɔhane ala a Gyihova, yɛ ɛlɔlɛ Selɛ ne yɛ a. Ɔtie yɛ asɔneyɛlɛ. Yɛ Ze mɔɔ yɛ nee ye tendɛ la le nwolɛ adenle kpole!

¹¹ Yɛkola yɛsɛlɛ Gyihova mekɛ biala. Ɔle yɛ gɔnwo, na yeziezie ɔ nwo kɛ mekɛ biala ɔbadie yɛ nzɛlɛlɛ. Taylene mɔɔ yɛlimoa yɛha ɔ nwo edwɛkɛ la ka kɛ: “Ɛbahola wɔaha edwɛkɛ biala wɔahile ye.” Saa yɛka yɛ ahonle nu edwɛkɛ yɛkile Gyihova a, bie a ɔbalua ngɛlɛlera ne, yɛ mbuluku ne anu edwɛkɛ bie anzɛɛ yɛ mediema anwosesebɛmaanlɛ  zo yeabua yɛ. Saa yɛbiza Gyihova debie mɔɔ amgba yɛhyia nwo la a, ɔtie, na saa awie gyɛne ɛnde yɛ edwɛkɛ bo a, yemɔ ɔte ɔ bo. Kɛzi ɔbua yɛ nzɛlɛlɛ la maa yɛnwu kɛ ɔkulo yɛ kpalɛ.

12. Nzɔne ati a ɔwɔ kɛ yɛsukoa Baebolo ne anu nzɛlɛlɛ ne mɔ ɛ? Maa neazo.

¹² Yɛbahola yɛazukoa ninyɛne dɔɔnwo yɛavi nzɛlɛlɛ mɔɔ wɔ Baebolo ne anu la anu. Saa yɛsukoa nzɛlɛlɛ ɛhye mɔ bie wɔ yɛ abusua ɛzonlenlɛ bo a, ɔbaboa yɛ. Saa yɛdwenle Nyamenle tete azonvolɛ nzɛlɛlɛ mɔɔ vi ahonle nu la anwo a, ɔbamaa yɛayɛ nzɛlɛlɛ kpalɛ. Kɛ neazo la, sukoa Dwona mɛlɛbɛnwoaze nzɛlɛlɛ ne wɔ mekɛ mɔɔ ɛnee ɔwɔ fɛlɛ ne akunlu la. (Dwona 1:17–2:10) Neɛnlea kɛzi Sɔlɔmɔn vile ahonle nu zɛlɛle Gyihova wɔ mekɛ mɔɔ ɔyila ɛzonlenlɛ sua ne azo la anu. (1 Arelemgbunli 8:22-53) Eza dwenledwenle Awulae nzɛlɛlɛ ne anwo. (Mateyu 6:9-13) Mɔɔ hyia kpalɛ la, ‘fa mɔɔ ɛhyia nwolɛ la to Nyamenle anyunlu’ dahuu. “Na Nyamenle anzonudwolɛ ne mɔɔ bo sonla ndelebɛbo muala azo la bazie bɛ ahonle nee bɛ adwenle gyɛlɛɛnye.” Anyezɔlɛ mɔɔ yɛlɛ yɛmaa Gyihova ɛlɔlɛ kpundii ne la anu bamia dahuu.—Felepaema 4:6, 7.

13. Nwolɛ adenle boni a ɛkpɔnedeɛ ne ɛmaa yɛnyia a?

¹³ Gyihova vale ɛkpɔnedeɛ ne hyɛle yɛ amaa “yɛanyia ngoane.” (1 Dwɔn 4:9) Ɛzoanvolɛ Pɔɔlo hɛlɛle Nyamenle ɛlɔlɛ ɛhye mɔɔ yɛ nwanwane la anwo edwɛkɛ kɛ: “Kelaese wule manle bɛdabɛ mɔɔ bɛnze Nyamenle la wɔ mekɛ mɔɔ Nyamenle ɔdaye ɔhyehyɛle la anu. Ɔyɛ se kɛ awie kɛwu kɛmaa tenlenenli. Ɔyɛ a bie kɛhulo kɛ ɔkɛwu ɔkɛmaa sonla kpalɛ bɔbɔ ɛdeɛ, noko Nyamenle ɛhile kɛ ɔsi ɔkulo yɛ la, na yemɔ a le kɛ, mɔɔ ɛnee yɛtɛda nwo yɛtɛde ɛtaneyɛlɛma la, Kelaese wule manle yɛ.” (Wulomuma 5:6-8) Ɛkpɔnedeɛ ne maa yɛnwu kɛ Nyamenle kulo yɛ kpole kpalɛ, na ɔmaa alesama kola nee ye nyia agɔnwolɛvalɛ mɔɔ anu mia.

14, 15. Anyelazo boni a ɛkpɔnedeɛ ne ɛmaa (a) Kilisienema mɔɔ bɛkpokpa bɛ la ɛnyia a? (b) bɛdabɛ mɔɔ bɛtɛkpokpale bɛ la ɛnyia a?

¹⁴ Kilisienema ekpunli ekyi bie ɛnyia Gyihova ɛlɔlɛ kpundii ne azo nvasoɛ wɔ adenle titili zo. (Dwɔn 1:12, 13; 3:5-7) Nyamenle ɛva ye sunsum ne ɛkpokpa bɛ, ɔti kɛkala bɛle ɔ mra. (Wulomuma 8:15, 16) Kɛmɔ bie mɔ tɛbɔ azɛlɛ ye azo la ati, nzɔne ati a Pɔɔlo hanle kɛ ‘Nyamenle ɛdwazo bɛ nee Kelaese kɛ bɛ nee ye ɛhɔli belemgbunli wɔ anwuma’ ɛ? (Ɛfɛsɛsema 2:6) Ɔluakɛ Gyihova ɛbɔ bɛ ɛwɔkɛ kɛ bɛbadɛnla aze dahuu wɔ anwuma.—Ɛfɛsɛsema 1:13, 14; Kɔlɔsaema 1:5.

¹⁵ Saa bɛdabɛ mɔɔ bɛtɛkpokpale bɛ la nyia diedi wɔ ɛkpɔnedeɛ ne anu a, bɛbayɛ Nyamenle agɔnwo mɔ. Bɛbahola  bɛarayɛ Nyamenle amra na bɛadɛnla aze dahuu wɔ paladaese azɛlɛ ne azo. Ɛkpɔnedeɛ ne maa yɛnwu kɛzi Gyihova kulo alesama la. (Dwɔn 3:16) Ɔyɛ yɛ fɛ kɛ yɛnwu kɛ saa yɛsonle Nyamenle nɔhalɛ nu a, ɔbamaa yɛanyia asetɛnla kpalɛ wɔ paladaese la! Ɔti bɛmaa yɛhile kɛ yɛbu ɛkpɔnedeɛ ne mɔɔ maa yɛnwu Nyamenle ɛlɔlɛ kpundii ne la.

16. Saa yɛdwenledwenle Nyamenle ɛlɔlɛ ne anwo a, nzɔne a ɔbamaa yɛayɛ a?

¹⁶ Yɛnrɛhola yɛnrɛdia ndenle ngakyile mɔɔ Gyihova dua zo da ɛlɔlɛ ali kile yɛ la. Belemgbunli Devidi hanle kɛ: “O Nyamenle, wɔ adwenle ne mɔ sonle bolɛ maa me! Bɛ muala bɛbɔ nu a ɔle kpole kpalɛ! Saa mese kɛ metia a, bɛzonle bɛtɛla ɛnwea.” (Edwɛndolɛ 139:17, 18) Saa yɛdwenle ndenle ngakyile mɔɔ Gyihova dua zo da ɛlɔlɛ ali kile yɛ la anwo a, ɔbamaa yɛahulo ye bie na yɛava biala mɔɔ yɛlɛ la yɛamaa ye.

17, 18. Ndenle mɔɔ yɛdua zo yɛmaa Nyamenle nwu kɛ yɛkulo ye la bie a le boni mɔ?

¹⁷ Ninyɛne dɔɔnwo wɔ ɛkɛ mɔɔ yɛbahola yɛayɛ yɛamaa Gyihova anwu ye kɛ yɛkulo ye a. Kɛ neazo la, saa yɛbɔ mɔdenle yɛka Belemgbunlililɛ edwɛkpa ne yɛkile awie mɔ a, ɛnee yɛlɛmaa Gyihova anwu kɛ yɛkulo ye. (Mateyu 24:14; 28:19, 20) Eza saa yɛyia diedi nwo sɔnea na yɛfa nɔhalɛlilɛ yɛgyinla ɔ nloa a, ɛnee yɛlɛkile kɛ yɛkulo Nyamenle. (Kenga Edwɛndolɛ 84:11; Gyemise 1:2-5.) Saa bɔbɔ yɛ sɔnea ne mɔ anu yɛ se a, yɛze kɛ Gyihova nwu yɛ amaneɛnwunlɛ ne na ɔbaboa yɛ, ɔluakɛ yɛ nwo hyia ye.—Edwɛndolɛ 56:8.

¹⁸ Gyihova mɔɔ yɛkulo ye la maa yɛdwenledwenle ye nwanwane ninyɛne mɔɔ yebɔ la kɔsɔɔti anwo. Saa yɛsukoa Baebolo ne kpalɛ a, yɛmaa Gyihova nwu ye kɛ yɛkulo ye nee ye Edwɛkɛ ne. Yɛkulo Gyihova na yɛkpondɛ kɛ agɔnwolɛvalɛ mɔɔ yɛ nee ye lɛ la anu mia ɔti a yɛsɛlɛ ye dahuu la. Na saa yɛdwenledwenle ɛkpɔnedeɛ ne mɔɔ sonle bole kpole la anwo a, ɔmaa ɛlɔlɛ mɔɔ yɛlɛ yɛmaa ye la anu mia kpole kpalɛ. (1 Dwɔn 2:1, 2) Ndenle mɔɔ yɛdua zo yɛmaa Gyihova nwu kɛ yɛ nye sɔ ye ɛlɔlɛ kpundii ne la bie mɔ ɛne.