Nyamenle Sunsum A Yɛnyia A, Tɛ Ewiade Sunsum Ɔ
Nyamenle Sunsum A Yɛnyia A, Tɛ Ewiade Sunsum Ɔ
“Tɛ ewiade ɛhye anu sunsum a yɛnyia ye a. Sunsum ne mɔɔ vi Nyamenle ɛkɛ ne la a yɛnyia ye a, amaa yɛanwu ninyɛne mɔɔ Nyamenle ɛva ɛlo yɛ la amuala.”—1 KƆL. 2:12.
1, 2. (a) Konle boni a nɔhalɛ Keleseɛnema ɛlɛko a? (b) Kpuyia boni mɔ a yɛbazuzu nwo a?
NƆHALƐ Keleseɛnema ɛlɛko! Yɛ kpɔvolɛ ne lɛ tumi kpole, ɔ nye ɛde, yɛɛ yebe wɔ konle nu. Ɔlɛ akodeɛ bie mɔɔ yelua zo yeli alesama dɔɔnwo anwo zo konim a. Noko ɔnle kɛ yɛte nganeɛ kɛ yɛnlɛ tumi yemɔti yɛnrɛhola yɛnrɛli konim. (Aye. 41:10) Yɛlɛ banebɔlɛ mɔɔ bamaa yɛagyinla ɛtetalɛ biala anloa a.
2 Yɛ konle ne ɛnle nwonane afoa nu konle; ɔle sunsum nu ɛdeɛ. Yɛ kpɔvolɛ ne a le Seetan Abɔnsam, yɛɛ ye akodeɛ titile mɔɔ ɔfa ɔdi gyima la a le “ewiade ɛhye anu sunsum” ne. (1 Kɔl. 2:12) Nyamenle sunsum ne a boa yɛ kpalɛ a. Amaa yɛanyia yɛ ti wɔ konle ɛhye anu na yɛ nee Nyamenle avinli azɛ dahuu la, ɔwɔ kɛ yɛsɛlɛ Nyamenle sunsum ne na yɛda ye ma ne ali wɔ yɛ ɛbɛlabɔlɛ nu. (Gal. 5:22, 23) Noko, duzu a le ewiade sunsum ne, na duzu ati a yenyia menli dɔɔnwo anwo zo tumi ɛ? Kɛ ɔkɛyɛ na yɛanwu ye saa ewiade sunsum ne ɛlɛfa yɛ ali gyima a? Na duzu a yɛkola yɛsukoa yɛfi Gyisɛse ɛkɛ ɔfane kɛzi ɔnyianle Nyamenle sunsum ne na ɔhonle ɔtiale ewiade sunsum ne la anu a?
Duzu Ati A Ewiade Sunsum Ne Ɛdɛlɛ Ɛ?
3. Ewiade sunsum ne a le duzu?
3 Ewiade ɛhye sunsum ne vi Seetan “mɔɔ sie ɛtane ewiade ɛhye la,” na ɔko ɔtia Nyamenle sunsum ne. (Dwɔn 12:31; 14:30; 1 Dwɔn 5:19) Yemɔ a le adwenle mɔɔ menli dɔɔnwo mɔɔ wɔ ewiade lɛ la, na zolɛ a bɛgyinla bɛyɛ bɛ ninyɛne a. Tumi ɛhye piepia alesama ɔmaa bɛyɛ mɔɔ nee Nyamenle ɛhulolɛdeɛ ɛnyia la.
4, 5. Kɛ ɔyɛle mɔɔ sunsum ne mɔɔ vi Seetan la dɛlɛle ɛ?
4 Kɛ ɔyɛle mɔɔ sunsum ne mɔɔ vi Seetan la dɛlɛle ɛ? Mɔɔ lumua, Seetan bɛlɛbɛlale Yive wɔ Yidɛn tola ne anu. Ɔmanle ɔliele ɔlile kɛ saa ɔfi Nyamenle anwo a, ye ɛbɛla bakpazi. (Mɔl. 3:13) Nea adalɛ kokye mɔɔ ɔbɔle! (Dwɔn 8:44) Akee ɔluale raalɛ ne anwo zo, ɔmanle Adam yɛle Gyihova anwo anzosesebɛ. Ɔlua mɔɔ Adam yɛle la ati, alesama rale ɛtane tumi bo, na ɔlua zo bɛdi Seetan sunsum ne anzi bɛyɛ anzosesebɛ.—Bɛgenga Ɛfɛsɛsema 2:1-3.
5 Eza Seetan bɛlɛbɛlale anwumabɔvolɛma dɔɔnwo ɔmanle bɛrayɛle sunsum ɛtanema. (Yek. 12:3, 4) Bɛkpole Nyamenle kolaa na Nowa mekɛ zo Azuyilɛ ne ara. Seetan manle anwumabɔvolɛ ɛhye mɔ liele lile kɛ saa bɛgyakyi gyima mɔɔ bɛlɛyɛ ye wɔ anwuma la na bɛbayɛ mɔɔ bɛdabɛ mumua ne bɛkulo la wɔ azɛlɛ ye azo a ɔbaboa bɛ. (Dwu. 6) Ɔlua zɛhae sunsum ɛtane ne mɔ moalɛ zo, Seetan “ɛbɛlɛbɛla ewiade amra amuala.” (Yek. 12:9) Ɔyɛ nyane kɛ alesama dɔɔnwo ɛnnwu mɔɔ sunsum ɛtane ne mɔ ɛlɛyɛ la.—2 Kɔl. 4:4.
Ewiade Sunsum Ne Ɛnyia Ɛ Nwo Zo Tumi Ɔ?
6. Kɛ ɔkɛyɛ na ewiade sunsum ne ahola anyia yɛ nwo zo tumi ɛ?
6 Menli dɔɔnwo ɛnze ndenle mɔɔ Seetan dua zo nyia menli nwo zo tumi la, noko Baebolo ne ɛmaa nɔhalɛ Keleseɛnema ɛnwu ye ndenle ne mɔ. (2 Kɔl. 2:11) Nɔhalɛ nu, ewiade ɛhye anu sunsum ne ɛnrɛhola ɛnrɛnyia yɛ nwo zo tumi kyesɛ yɛmaa ye adenle. Bɛmaa yɛzuzu kpuyia nna mɔɔ bɛamaa yɛanwu sunsum holɛ ko mɔɔ ɛnyia yɛ nwo zo tumi la anwo.
7. Adenle ko mɔɔ Seetan dua zo bɔ mɔdenle kɛ ɔtwe yɛ yeavi Gyihova anwo la a le boni?
7 Duzu a ninyɛne mɔɔ mefa medielie me nye la maa bɛnwu ye wɔ me nwo a? (Bɛgenga Gyemise 3:14-18.) Seetan bɔ mɔdenle kɛ ɔdua basabasayɛlɛ mɔɔ ɔmaa yɛ nye alie nwo la azo yeahwe yɛ yeavi Nyamenle anwo. Abɔnsam ze kɛ Gyihova kyi awie biala mɔɔ kulo basabasayɛlɛ la. (Edw. 11:5) Ɛhye ati, Seetan dua mbuluku, sini, edwɛne, yɛɛ kɔmputa zo nwɔhoalilɛ zo maa menli nyia nla nee basabasayɛlɛ nwo atiakunluwɔzo mɔɔ anu ayɛ se. Saa yɛyɛ mɔɔ ɔtenrɛ na yɛfa yɛ ahonle ekyi bɔbɔ yɛkulo ɛtane a, Seetan anye die nwo.—Edw. 97:10.
8, 9. Ninyɛne mɔɔ bɛfa bɛdielie bɛ nye la anwo kpuyia boni mɔ a ɔwɔ kɛ yɛsuzu nwo a?
8 Noko, Nyamenle sunsum ne maa menli mɔɔ bɛnyia ye la anwo te, bɛnyia anzondwolɛ, yɛɛ anwunvɔnezelɛ yi bɛ tɛkɛɛ. Ɔle kpalɛ kɛ yɛbabiza yɛ nwo kɛ, ‘Asoo ninyɛne mɔɔ mefa medielie me nye la maa menyia subane kpalɛ?’ Nrɛlɛbɛ ne mɔɔ vi anwuma la “ɔmbɔ adalɛ” anzɛɛ ɔnle nabalaba. Bɛdabɛ mɔɔ Nyamenle sunsum ne wɔ bɛ nwo zo la ɛmbɔ anwodelɛ nee anzondwolɛ nolo ɛngile bɛ kpalɛ zo amra na akee bɛavea bɛanlea basabasayɛlɛ nee adwɔmane nyɛleɛ wɔ bɛ azua nu.
9 Gyihova kpondɛ kɛ yɛsonle ɔ ngome ala. Noko, Seetan akunlu badwo ɔ nwo saa yɛsonle ye wɔ mekɛ ko bɔbɔ ala anu kɛmɔ ɛnee ɔkpondɛ kɛ Gyisɛse yɛ maa ye la a. (Luku 4:7, 8) Ɔwɔ kɛ yɛsuzu kpuyia ɛhye mɔ anwo: ‘Asoo ninyɛne mɔɔ mefa medielie me nye la maa mefi me ahonle nu mesonle Nyamenle angome? Asoo bɛmaa mekola meko metia ewiade sunsum ne? Ɔwɔ kɛ meyɛ nzenzaleɛ ɔ?’
10, 11. (a) Anwonyia ɛhulolɛ nwo subane boni a ewiade ne maa nwolɛ anwosesebɛ a? (b) Folɛ boni a Edwɛkɛ ne mɔɔ bɛvale Nyamenle sunsum ne bɛhɛlɛle la tu yɛ a?
10 Subane boni a melɛ ye wɔ nwonane afoa nu ninyɛne nwo a? (Bɛgenga Luku 18:24-30.) “Anyebolo” nee anwonyia ɛhulolɛ le ewiade sunsum ne foa. (1 Dwɔn 2:16) Yemaa menli dɔɔnwo ɛvua ɛtafe zo kɛ ɔwɔ kɛ bɛnyia bɛ nwo. (1 Tem. 6:9, 10) Sunsum ɛhye bahola amaa yɛalie yɛali kɛ nwonane afoa nu ninyɛne dɔɔnwo bahola abɔ yɛ nwo bane dahuu. (Mrɛ. 18:11) Noko akee, saa yɛkulo ezukoa yɛtɛla Nyamenle a ɛnee yɛmaa Seetan ɛli konim. Ɔwɔ kɛ yɛbiza yɛ nwo kɛ, ‘Asoo mefa me ɛbɛlabɔlɛ kɔsɔɔti medi anyelielɛ nee nwonane afoa nu ninyɛne dɔɔnwo ɛkpondɛlɛ nzi?’
11 Noko, Nyamenle Edwɛkɛ ne mɔɔ bɛluale sunsum ne azo bɛhɛlɛle la tu yɛ folɛ kɛ ɔnle kɛ yɛ nye bolo ezukoa. Ɔwɔ kɛ yɛyɛ gyima ɛsesebɛ yɛkpondɛ mɔɔ yɛ nee yɛ abusua ne bahyia nwo la. (1 Tem. 5:8) Menli mɔɔ ɛnyia Nyamenle sunsum ne la da Gyihova nyele subane ne ali. Menli sonle bolɛ maa bɛ tɛla ninyɛne yemɔti saa bɛlɛ debie a bɛfa anyelielɛ bɛkyɛ awie mɔ bie. (Mrɛ. 3:27, 28) Bɛmmaa ezukoa ɛkpondɛlɛ ɛnnumua Nyamenle ɛzonlenlɛ nyunlu ɛlɛ.
12, 13. Kɛzi Nyamenle sunsum ne kola boa yɛ ɛ?
12 Subane boni a meda ye ali a? (Bɛgenga Kɔlɔsaema 3:8-10, 13.) Ewiade sunsum ne maa menli da nwonane ne gyima ali. (Gal. 5:19-21) Sɔnea mɔɔ maa bɛnwu sunsum mɔɔ yɛnyia ye la da ali wɔ mekɛ mɔɔ ninyɛne ɛngɔ boɛ la, tɛ mekɛ mɔɔ ninyɛne ɛlɛkɔ boɛ la. Mekɛ mɔɔ yɛ diema Keleseɛnenli bie kɛbu ɔ nye kɛgua yɛ nwo zo, kɛha yɛ ɛya, anzɛɛ kɛvo yɛ bɔbɔ la. Bieko, sunsum mɔɔ yɛnyia ye la bala ali wienyi wɔ yɛ awuke nu. Yemɔti, ɔwɔ kɛ yɛneɛnlea yɛ nwo nu. Biza ɛ nwo kɛ, ‘Wɔ siane nsia mɔɔ ɛze ɛhɔ la, asoo mezɔho Kelaese kpalɛ anzɛɛ mezia mehɔva me subane dɛba ne nee kɛzi metendɛ la bieko ɔ?’
13 Nyamenle sunsum ne bahola aboa yɛ amaa ‘yɛaye su dɛba ne nee ye nyɛleɛ ne mɔ yɛagua’ na yɛava “su fofolɛ ne” yɛawula. Ɛhye baboa yɛ amaa yɛala ɛlɔlɛ nee nyele dɔɔnwo ali. Ɔbamaa yɛava bɛdabɛ mɔɔ bɛfo yɛ la ɛtane yɛahyɛ bɛ. Yɛnrɛva ‘sipe nee ɛkpɔlɛ nee ɛya, butule anzɛɛ aholoba’ yɛnrɛdua menli mɔɔ kɛsisi yɛ la kakɛ. Emomu, yɛbabɔ mɔdenle ‘yɛaze anwunvɔne.’—Ɛfɛ. 4:31, 32.
14. Kɛzi menli dɔɔnwo mɔɔ wɔ ewiade la bu Nyamenle Edwɛkɛ ne ɛ?
14 Asoo melɛ ɛbulɛ nee ɛlɔlɛ memaa Baebolo ne anu ɛbɛlabɔlɛ nwo ngyinlazo ne mɔ ɔ? (Bɛgenga Mrɛlɛbulɛ 3:5, 6.) Ewiade sunsum ne maa menli te Nyamenle Edwɛkɛ ne anwo atua. Bɛdabɛ mɔɔ bɛnyia ewiade sunsum ne la bu bɛ nye gua Baebolo ne anu edwɛkɛ mɔɔ bɛbu ye kɛ ɔbagyegye bɛ la azo, na bɛdi menli nrɛlɛbɛ nee amaamuo nzi. (2 Tem. 4:3, 4) Bie mɔ kpo Nyamenle Edwɛkɛ ne kɔsɔɔti. Menli ɛhye mɔ ɛmbu Baebolo ne, bɛka kɛ nuhua edwɛkɛ ɛnle nɔhalɛ, bɛyɛ bɛ nwo nrɛlɛbɛvolɛma wɔ bɛdabɛ mumua ne bɛ nye zo. Bɛtolo ye ngyinlazo mɔɔ fane agyalɛzɛkyelɛ, mrenya mɔɔ fa mrenya, nee ewolebɔlɛ nwo la. Bɛle “menli mɔɔ nwu ɛtane a bɛse ɔle kpalɛ na bɛnwu kpalɛ a bɛse ɔle ɛtane” a. (Aye. 5:20) Asoo yɛnyia sunsum ɛhye bie? Saa yɛyia ngyegyelɛ a asoo yɛgyinla sonla nrɛlɛbɛ mɔɔ yɛdayɛ mumua ne yɛ ɛdeɛ boka nwo la azo a yɛdi nwolɛ gyima a? Anzɛɛ yɛbɔ mɔdenle yɛdi Baebolo nu folɛdulɛ zo?
15. Kɛ anrɛɛ yɛbava yɛ nwo yɛado yɛ nrɛlɛbɛ zo la, duzu a ɔwɔ kɛ yɛyɛ a?
15 Nyamenle sunsum ne maa yɛbu Baebolo ne. Kɛmɔ edwɛndolɛnli ne hanle la, yɛbu Nyamenle edwɛkɛ ne kɛ ɔle kɛnlaneɛ yɛɛ ɔmaa yɛ wienyi wɔ yɛ adenle nu. (Edw. 119:105) Yɛnva yɛ nwo yɛndo yɛ nrɛlɛbɛ zo, yɛfa yɛ rɛle yɛwula Baebolo ne anu bɔkɔɔ kɛ ɔhile yɛ mɔɔ ɔle kpalɛ nee mɔɔ ɔle ɛtane la. Tɛ Baebolo ne mɔɔ ɔwɔ kɛ yɛbu ye la angome a yɛsukoa a, emomu, ɛhulolɛ mɔɔ yɛnyia yɛamaa Nyamenle mɛla ne la noko.—Edw. 119:97.
Sukoa Gyisɛse Neazo Ne
16. Duzu a ɔwɔ kɛ yɛyɛ na yɛanyia “Kelaese adwenle ne bie” a?
16 Ɔwɔ kɛ yɛnyia “Kelaese adwenle ne bie” kolaa na yɛahola yɛanyia Nyamenle sunsum ne. (1 Kɔl. 2:16) Saa yɛbava “Kelaese Gyisɛse agyakɛ” a, ɛnee ɔwɔ kɛ yɛnwu adwenle mɔɔ ɛnee ɔlɛ nee mɔɔ ɔyɛle la na yɛsukoa. (Wulo. 15:5; 1 Pita 2:21) Bɛmaa yɛzuzu ndenle mɔɔ yɛbahola yɛalua zo yɛayɛ zɔ la bie mɔ anwo.
17, 18. (a) Duzu a yɛsukoa ye wɔ Gyisɛse anwo wɔ asɔneyɛlɛ nwo a? (b) Duzu ati a ɔwɔ kɛ yɛkɔ zo ‘yɛbiza’ a?
17 Yɛ asɔne biza Nyamenle sunsum ne. Gyisɛse yɛle asɔne bizale Nyamenle sunsum ne moalɛ kolaa na yeahɔ sɔnea nu. (Luku 22:40, 41) Ɔwɔ kɛ yɛdayɛ noko yɛyɛ asɔne yɛbiza Nyamenle sunsum ne. Gyihova fa maa bɛdabɛ mɔɔ bɛbiza la. (Luku 11:13) Gyisɛse hanle kɛ: “Bɛbiza na bɛ sa kɛha ye; bɛkpondɛ na bɛkɛnwu ye; bɛbɔ nu na bɛkɛbuke bɛ. Ɔluakɛ awie biala mɔɔ biza la asa ka ye; mɔɔ kpondɛ la nwu ye, yɛɛ mɔɔ bɔ nu la, bɛbuke ye.”—Mat. 7:7, 8.
18 Saa ɛlɛkpondɛ Gyihova sunsum ne nee ye moalɛ a, mmamaa ɛ nwo pele wɔ ɛgyakyi ye ɛbizalɛ. Bie a ɔwɔ kɛ yɛsɛlɛ fane dɔɔnwo na yɛtɔ alagye wɔ asɔneyɛlɛ nu. Ɔdwu mekɛ ne bie a, Gyihova maa menli mɔɔ biza debie fi ye ɛkɛ la da bɛ ahonle nu edwɛkɛ nee diedi mɔɔ bɛlɛ la ali kolaa na yeabua bɛ nzɛlɛlɛ ne. *
19. Duzu a ɛnee Gyisɛse yɛ ye dahuu a, na duzu ati a ɔwɔ kɛ yɛsukoa ye a?
19 Tie Gyihova wɔ debie biala anu. Gyisɛse yɛle mɔɔ sɔ ɔ Ze anye la dahuu. Kenle ko bie ɛnee mɔɔ Gyisɛse kulo kɛ ɔyɛ ye wɔ edwɛkɛ bie anwo la nee mɔɔ ɔ Ze kpondɛ la ɛnle ko. Noko akee, ɔvale anwodozo ɔzele ɔ Ze kɛ: “Tɛ me ɛhulolɛdeɛ ɔ, na wɔ ɛhulolɛdeɛ ɛyɛ ɛkɛ.” (Luku 22:42) Biza ɛ nwo kɛ, ‘Asoo metie Nyamenle saa bɔbɔ ɔyɛ se ɔmaa me a?’ Nyamenle mɔɔ yɛbadie ye la anwo hyia na yɛanyia ngoane. Ɔwɔ kɛ yɛtie ye wɔ debie biala anu ɔluakɛ ɔle yɛ Yɛvolɛ, ngoane Maavolɛ nee Awie mɔɔ bɔ yɛ ngoane nwo bane a. (Edw. 95:6, 7) Yɛnrɛhola yɛnrɛva debie biala yɛnrɛzie tieyɛ mɔɔ ɔwɔ kɛ yɛyɛ la agyakɛ anu. Saa yɛanyɛ tieyɛ a yɛnrɛnyia Nyamenle anyunlu ɛlolɛ.
20. Ɛnee Gyisɛse asetɛnla kɔsɔɔti gyi duzu azo, na kɛzi ɔwɔ kɛ yɛsukoa ye ɛ?
20 Sukoa Baebolo ne kpalɛ. Gyisɛse ko atia diedi nwo sɔnea mɔɔ Seetan vale rale ɔ nwo zo la, ɔvale Ngɛlɛlera ne anu edwɛkɛ a ɔbuale ye a. (Luku 4:1-13) Mekɛ mɔɔ Gyisɛse tendɛ ahile asɔne mgbanyima mɔɔ dwazole tiale ye la, ɔvale ye edwɛkɛ ne ɔgyinlanle Nyamenle Edwɛkɛ ne azo. (Mat. 15:3-6) Ɛnee Gyisɛse asetɛnla kɔsɔɔti gyi Nyamenle mɛla ne mɔɔ ɔbanwu ye na yeali zo la azo. (Mat. 5:17) Yɛdayɛ noko yɛkpondɛ kɛ yɛkɔ zo yɛsukoa Nyamenle Edwɛkɛ ne mɔɔ maa diedi nu yɛ se la kpalɛ. (Fel. 4:8, 9) Bie a ɔbayɛ se yeamaa yɛ nuhua bie mɔ kɛ yɛbanyia mekɛ yɛayɛ bɛtianwo nee abusua debiezukoalɛ. Noko, kɛ anrɛɛ yɛbahendɛ saa yɛnyia mekɛ a yɛayɛ la, ɔwɔ kɛ yɛkpondɛ mekɛ emomu.—Ɛfɛ. 5:15-17.
21. Ngyehyɛleɛ boni a yɛbahola yɛava yɛali gyima amaa yɛanwu Nyamenle Edwɛkɛ ne kpalɛ na yɛali zo a?
21 ‘Akɛlɛ nɔhavo nee nrɛlɛbɛvolɛ ne’ ɛlua nɔsolɛ Abusua Ɛzonlenlɛ mɔɔ bɛyɛ ye dapɛne biala la anwo ngyehyɛleɛ ne azo yemaa yɛnyia mekɛ mɔɔ yɛbava yɛayɛ bɛtianwo nee abusua debiezukoalɛ a. (Mat. 24:45) Asoo ɛlɛfa ngyehyɛleɛ ɛhye wɔali gyima wɔ adenle kpalɛ zo? Amaa wɔanyia Kelaese adwenle ne bie la, duzu ati a ɛnzukoa ninyɛne mɔɔ Gyisɛse hilehilele la bie mɔ ɛ? Ɛbahola wɔalua Watch Tower Publications Index ne azo wɔakpa edwɛkɛ mɔɔ ɛkulo kɛ ɛsukoa la. Kɛ neazo la, ɔvi 2008 kɔdwu 2010, edwɛkɛ ngakyile 12 mɔɔ ɔ ti ne se “What We Learn From Jesus” (Mɔɔ Yɛsukoa Yɛfi Gyisɛse Ɛkɛ) la rale maanlema magazine ɛdeɛ ne anu wɔ Nrelenza aneɛ nu. Ɛbahola wɔazukoa edwɛkɛ ɛhye mɔ. Ɔvi 2006, edwɛkɛ “How Would You Answer?” (Kɛzi Ɛbabua Ɛ?) ba Nrelenza Awake! ne noko anu dahuu. Bɛkɛlɛ edwɛkɛ ɛhye mɔ amaa yeaboa wɔ yeamaa ndelebɛbo mɔɔ ɛlɛ ye wɔ Nyamenle Edwɛkɛ ne anu la ayɛ kpole. Duzu ati a ɔdwu mekɛ ne bie a ɛnzukoa ninyɛne ɛhye mɔ bie wɔ wɔ Abusua Ɛzonlenlɛ ne anu ɛ?
Yɛbahola Yɛali Ewiade Ne Azo Konim
22, 23. Duzu a ɔwɔ kɛ yɛyɛ na yɛali ewiade ne azo konim a?
22 Ɔwɔ kɛ yɛkpo ewiade sunsum ne na Nyamenle sunsum ne ahile yɛ adenle. Ɛhye ɛyɛlɛ ɛnla aze. Ɔbahola yeayɛ konle mɔɔ anu yɛ se. (Dwu. 3) Noko yɛbahola yɛali konim! Gyisɛse hanle hilele ye ɛdoavolɛ ne mɔ kɛ: “Ɛtane ewiade ɛhye bamaa bɛali nyane, noko bɛgyinla kpundii. Meli ɛtane ewiade ɛhye anwo zo konim!”—Dwɔn 16:33.
23 Yɛdayɛ noko yɛbahola yɛali ewiade ne azo konim, saa yɛko yɛtia ye sunsum ne na yɛbɔ mɔdenle yɛnyia Nyamenle sunsum ne a. Nɔhalɛ nu, “saa Nyamenle gyi yɛ nzi a nwane a kɛhola yɛ a?” (Wulo. 8:31) Saa yɛnyia Nyamenle sunsum ne na yɛdi ye adehilelɛ zo kɛmɔ bɛhile ye wɔ Baebolo ne anu la a, yɛ kunlu badwo yɛ nwo, yɛanyia anzondwolɛ, yɛ nye alie, na yɛanyia dahuu ngoane anyelazo wɔ ewiade fofolɛ ne mɔɔ ɔnrɛhyɛ na yeara la anu.
[Ɔ bo ɛkɛ ne edwɛkɛ]
^ ɛden. 18 Saa ɛkpondɛ nwolɛ edwɛkɛ dɔɔnwo a, nea Duzu A Baebolo ne Kilehile Amgba A? buluku ne mukelɛ 170-173.
Asoo Ɛkakye?
• Duzu ati a ewiade sunsum ne ɛdɛlɛ a?
• Kpuyia nna boni mɔ a ɔwɔ kɛ yɛbiza yɛ nwo a?
• Ninyɛne nsa mɔɔ yɛsukoa yɛfi Gyisɛse ɛkɛ wɔ kɛzi yɛbanyia Nyamenle sunsum ne anwo la a le boni?
[Debiezukoalɛ kpuyia ne mɔ]
[Nvoninli wɔ mukelɛ 10]
Kɛ ɔyɛle mɔɔ anwumabɔvolɛ bie mɔ rayɛle sunsum ɛtane ɛ?
[Nvoninli wɔ mukelɛ 12]
Ewiade sunsum ne ɛnrɛhola ɛnrɛnyia yɛ nwo zo tumi kyesɛ yɛmaa ye adenle
