Nwane A Anwo Hyia Wɔ Kpalɛ Wɔ Wɔ Ɛbɛlabɔlɛ Nu A?
Nwane A Anwo Hyia Wɔ Kpalɛ Wɔ Wɔ Ɛbɛlabɔlɛ Nu A?
‘Ɛdawɔ ɛ ngomekye a ɛle Anwuma Anwumanli ne mɔɔ sie azɛlɛ ye a.’—EDW. 83:18.
1, 2. Mɔɔ fane yɛ ngoanelielɛ nwo la, duzu ati a tɛ Gyihova duma ne mɔɔ yɛbanwu ye la ala a nwolɛ hyia a?
WƆ MENLI ne bie mɔ afoa nu, mekɛ mɔɔ lumua mɔɔ bɛnwunle Gyihova duma ne la a le mekɛ mɔɔ bɛhilele bɛ wɔ Edwɛndolɛ 83:18 la. Ɔyɛle bɛ nwanwane kɛ bɛgengale zɛhae edwɛkɛ ne: “Maa bɛnwu kɛ ɛdawɔ ɛ ngomekye, mɔɔ wɔ duma a le Gyihova la a ɛle Anwuma Anwumanli wɔ azɛlɛ ye amuala azo a.” (Edw. 83:18, NW) Ɔda ali kɛ, ɔvi zɔhane mekɛ ne wɔva ngɛlɛlera ɛhye wɔboa awie mɔ wɔmaa bɛranwu Gyihova, yɛ Nyamenle ne mɔɔ le ɛlɔlɛ la.—Wulo. 10:12, 13.
2 Ɔwɔ nuhua kɛ ɔhyia kɛ menli nwu Gyihova duma ne ɛdeɛ, noko ɔwɔ kɛ bɛsukoa ɔ nwo ninyɛne dɔɔnwo bɛboka nwo. Yɛ kɛzi edwɛndolɛnli ne zile nɔhalɛ bieko mɔɔ anwo hyia maa yɛ ngoanelielɛ zo la nzonlɛ. Ɔse: ‘Ɛ ngomekye, ala a ɛle Anwuma Anwumanli ne mɔɔ sie azɛlɛ ye a.’ Ɛhɛe, Gyihova a le Awie mɔɔ ɔ nwo hyia kpalɛ wɔ anwuma nee aze a. Kɛ ninyɛne kɔsɔɔti Bɔvolɛ la, ɔlɛ nwolɛ adenle ɔka kɛ ye abɔdeɛ kɔsɔɔti ɛbɛlɛ bɛ nwo aze bɔkɔɔ ɛmaa ye. (Yek. 4:11) Ɛhye ati, ɔwɔ kɛ yɛbiza yɛ nwo kɛ, ‘Nwane a anwo hyia me kpalɛ wɔ me ɛbɛlabɔlɛ nu a?’ Ɔhyia kɛ yɛkpondɛ edwɛkɛ ɛhye anwo mualɛ!
Yidɛn Tola Ne Anu Edwɛkɛ Ne
3, 4. Kɛ ɔyɛle mɔɔ Seetan holale bɛlɛbɛlale Yive ɛ, na duzu a vile nu rale a?
3 Yɛkola yɛnwu kɛzi kpuyia ɛhye anwo hyia la wɔ ninyɛne mɔɔ hɔle zo wɔ Yidɛn tola ne anu la anu. Ɛkɛ ne yɛɛ anwumabɔvolɛ atuatevolɛ ne mɔɔ nzinlii bɛravɛlɛle ye Seetan Abɔnsam la bɛlɛbɛlale Yive, raalɛ mɔɔ lumua la ɔmanle ɔvale ye ɛhulolɛdeɛ ɔlumuale Gyihova mɛla ne mɔɔ kile kɛ bɛmmadi tola ne anu baka bie ma ne bie la anyunlu a. (Mɔl. 2:17; 2 Kɔl. 11:3) Ɔdiele mɛlɛbɛla ɛhye na ɔhilele kɛ ɔmbu Gyihova tumililɛ ne. Yive ambu Gyihova kɛ Awie mɔɔ ɔ nwo hyia kpalɛ wɔ ye ɛbɛlabɔlɛ nu a. Noko kɛ ɔyɛle mɔɔ Seetan holale bɛlɛbɛlale Yive ɛ?
4 Seetan vale nrɛlɛbɛ adenle ngakyile lile gyima wɔ adwelie mɔɔ ɔ nee Yive lile la anu. (Bɛgenga Mɔlebɛbo 3:1-5.) Mɔɔ lumua, Seetan anva Gyihova duma ne anli gyima. Ɔvɛlɛle ye “Nyamenle” ala. Noko, ahenle mɔɔ hɛlɛle Mɔlebɛbo buluku ne la vale Gyihova duma ne lile gyima wɔ ngyɛnu ne mɔɔ lumua wɔ tile ɛhye anu la anu. Mɔɔ tɔ zo nwiɔ, kɛmɔ Hibulu, aneɛ mɔɔ bɛlumuale bɛvale bɛhɛlɛle Baebolo ne kile la, Nyamenle lile “mɛla” manle bɛ noko akee, Seetan bizale bɛ edwɛkɛ mɔɔ Nyamenle ‘hanle’ hilele bɛ la ala. (Mɔl. 2:16) Wɔ nrɛlɛbɛ adenle ɛhye azo Seetan bɔle mɔdenle kɛ ɔto kɛzi mɛla ne anwo hyia la anu. Mɔɔ tɔ zo nsa, ɔnva nwo kɛ ɛnee ɔ nee Yive angome a ɛlɛtendɛ la, ɔvale dumagya “bɛ” mɔɔ ɔgyi ɛkɛ ɔmaa menli dɔɔnwo la a ɔlile gyima a. Ɔluale adenle ɛhye azo ɔmanle Yive dele nganeɛ kɛ ɔ nwo hyia na ɔkola ɔtendɛ ɔmaa ɔ nwo nee ɔ hu. Duzu a vile nu rale a? Yive lile ɔ ti anwo hanle kɛ: ‘Yɛkola yɛdi mbakama mɔɔ wɔ tola ye anu la biala bie.’
5. (a) Seetan manle Yive vale ye adwenle ziele duzu azo? (b) Duzu a bakama ne mɔɔ Yive lile la kile a?
5 Seetan eza hakyile nɔhalɛ ne anye. Ɔhilele kɛ Nyamenle anyɛ ye boɛ kɛ ɔhanle ɔhilele Adam nee Yive kɛ ‘bɛmmadi mbakama mɔɔ wɔ tola ye anu la biala bie’ la. Bieko, Seetan manle Yive dwenlenle ɔ nwo nee kɛzi ɔbahola yeakpazi wɔ ɛbɛlabɔlɛ nu na yearayɛ kɛ “Nyamenle” la. Awieleɛ bɔkɔɔ ne, ɔmanle ɔvale ye adwenle ɔziele baka ne nee ye ma ne azo ɔdɛlale abusuabɔlɛ mɔɔ ɔ nee Ahenle mɔɔ manle ye debie biala lɛ la azo. (Bɛgenga Mɔlebɛbo 3:6.) Yive luale bakama ne mɔɔ ɔlile la azo ɔhilele kɛ tɛ Gyihova a le Awie mɔɔ ɔ nwo hyia ye kpalɛ wɔ ye ɛbɛlabɔlɛ nu a.
Dwobu Mekɛ Zo Edwɛkɛ Ne
6. Kɛzi Seetan zule Dwobu nɔhalɛlilɛ ne anwo kpolera ɛ, yemɔti nwolɛ adenle boni a Dwobu nyianle a?
6 Ɛvoya dɔɔnwo anzi, nrenya nɔhavo Dwobu nyianle adenle hilele Awie mɔɔ anwo hyia ye kpalɛ wɔ ye ɛbɛlabɔlɛ nu la. Mekɛ mɔɔ Gyihova hanle Dwobu nɔhalɛlilɛ ne anwo edwɛkɛ hilele Seetan la, Seetan vale ɛya buale kɛ: “Na mgbane ala yɛɛ Dwobu sulo Nyamenle a?” (Bɛgenga Dwobu 1:7-10.) Seetan anzu tieyɛ mɔɔ Dwobu yɛle manle Nyamenle la anwo kpolera. Emomu, Dwobu adwenle mɔɔ ɛnee ɔlɛfa yeazonle la. Ɔluale nrɛlɛbɛ adenle zo ɔbɔle Dwobu somolɛ kɛ tɛ ɛhulolɛ nu a ɔvi ɔlɛsonle Gyihova a, na emomu, angomedi nu ɔ. Ɛnee Dwobu angome a bahola abua somolɛ zɔhane a, na bɛvale nwolɛ adenle ne bɛmanle ye.
7, 8. Sɔnea boni mɔ a Dwobu hɔle nu a, na duzu a ye nɔhalɛlilɛ ne manle ɔlale ali a?
7 Gyihova manle Seetan adenle ɔmanle ɔvale anwubɛnyunlu ngakyile ɔrale Dwobu anwo zo. (Dwo. 1:12-19) Duzu a Dwobu yɛle wɔ ye tɛnlabelɛ ne mɔɔ ɔhakyile la anu a? Bɛha bɛhile yɛ kɛ: “[Yeanyɛ] ɛtane biala yɛɛ yeanvu Nyamenle.” (Dwo. 1:22) Noko Seetan ampɛ zo. Ɔbɔle ye somolɛ bieko kɛ: “Sonla kɛhulo kɛ ɔkɛdɛnla ngoane nu tɛla kɛ ɔkɛminli anwonyia biala mɔɔ ɔlɛ la.” (Dwo. 2:4) Seetan hanle kɛ saa Dwobu nwu amaneɛ a, ɔbazi kpɔkɛ mɔɔ kile kɛ Gyihova ɛnle Awie mɔɔ ɔ nwo hyia ye wɔ ye ɛbɛlabɔlɛ nu a.
8 Ewule ɛtane bie hanle Dwobu manle ɔ nwo nane hakyile. Yemɔti ɔ ye piepianle ye kɛ ɔdendɛ ɔtia Nyamenle na ɔwu. Nzinlii, adalɛ arɛlekyekyevoma nsa bɔle ye somolɛ kɛ ɔmbɔ ɛbɛla kpalɛ. (Dwo. 2:11-13; 8:2-6; 22:2, 3) Noko akee, wɔ ye amaneɛnwunlɛ ne kɔsɔɔti anu Dwobu hɔle zo lile nɔhalɛ. (Bɛgenga Dwobu 2:9, 10.) Ɔluale ye nɔhalɛlilɛ zo ɔhilele kɛ Gyihova a le Awie mɔɔ ɔ nwo hyia ye kpalɛ wɔ ye ɛbɛlabɔlɛ nu a. Dwobu eza manle ɔlale ali kɛ ɔnva nwo kɛ sonla ɛnli munli la, ɔbahola yeayɛ ye afoa nu ɛdeɛ yeabua Abɔnsam adalɛ somolɛ ne.—Fa to Mrɛlɛbulɛ 27:11 anwo.
Gyisɛse Mualɛ Mɔɔ Di Munli
9. (a) Kɛzi Seetan luale sonla ye atiakunluwɔzo zo zɔle Gyisɛse nleanle ɛ? (b) Duzu a Gyisɛse yɛle wɔ sɔnea ɛhye anwo a?
9 Wɔ Gyisɛse ɛzɔnenlɛ ne anzi mekɛ ekyi bie anu, Seetan bɔle mɔdenle kɛ ɔbɛlɛbɛla Gyisɛse yeamaa yeali angomedi atiakunluwɔzo nzi emomu yeadɛla kɛ ɔbamaa Gyihova ayɛ Awie mɔɔ ɔ nwo hyia ye kpalɛ wɔ ye ɛbɛlabɔlɛ nu. Abɔnsam vale sɔnea nsa rale Gyisɛse anwo zo. Mɔɔ lumua, ɔluale nwonane ne atiakunluwɔzo zo, ɔzɔle Gyisɛse ɔnleanle kɛ ɔmaa awolɛ ɛhakyi kpanwo. (Mat. 4:2, 3) Ɛnee Gyisɛse ɛhye ɛhɔne kenle 40 na ɛhɔne ɛlɛku ye kpalɛ. Ɛhye ati, Abɔnsam zile ye adua kɛ ɔva tumi mɔɔ ɔlɛ ɔyɛ nwanwane ninyɛne la ɔli ye ɛhɔne ne anwo gyima. Duzu a Gyisɛse yɛle a? Yeanyɛ mɔɔ Yive yɛle la bie, Gyisɛse vale ye adwenle ziele Gyihova Edwɛkɛ ne azo na ɔkpole sɔnea ne ɛkɛ ne ala.—Bɛgenga Mateyu 4:4.
10. Duzu ati a Seetan zele Gyisɛse kɛ ɔgyakyi ɔ nwo ɔvi ɛzonlenlɛ sua ne azo ɔde aze a?
10 Seetan eza bɔle mɔdenle kɛ ɔmaa Gyisɛse ayɛ angomedi. Ɔzele Gyisɛse kɛ ɔgyakyi ɔ nwo ɔvi ɛzonlenlɛ sua ne ati zo ɔde aze. (Mat. 4:5, 6) Duzu a ɛnee Seetan kpondɛ a? Ɛnee Seetan kpondɛ ahile kɛ saa Gyisɛse tɔ aze na yeamboda a, ɔbali daselɛ kɛ ɔle “Nyamenle Ara.” Ɔda ali kɛ ɛnee Abɔnsam kpondɛ kɛ Gyisɛse dwenle duma mɔɔ ɔbalie la anwo kpalɛ, na bɔbɔ ɔyɛ debie mɔɔ bamaa menli dɔɔnwo alie ye ado nu la. Seetan ze kɛ anwomemaazo nee menli nyunlu ɛlolɛ ti sonla bahola ayɛ debie biala, bɔbɔ mɔɔ esiane wɔ nu la. Seetan vale ngɛlɛlera ne lile gyima wɔ adenle ɛtane zo noko Gyisɛse hilele kɛ Ɔte Gyihova Edwɛkɛ ne abo kpalɛ. (Bɛgenga Mateyu 4:7.) Gyisɛse luale sɔnea ɛhye mɔɔ ɔkpole la azo ɔhilele ye bieko kɛ Gyihova a le Awie mɔɔ ɔ nwo hyia ye kpalɛ wɔ ye ɛbɛlabɔlɛ nu a.
11. Duzu ati a Gyisɛse kpole ɛwɔkɛ mɔɔ Abɔnsam bɔle kɛ ɔbava aleɛabo arelemgbunli maanle kɔsɔɔti yeamaa ye la ɛ?
11 Wɔ Seetan sɔnea ne mɔɔ li awieleɛ la anu, ɔvale aleɛabo arelemgbunli maanle kɔsɔɔti ɔbɔle Gyisɛse ɛwɔkɛ. (Mat. 4:8, 9) Ɛkɛ ne ala Gyisɛse kpole ɛwɔkɛ ne. Ɔnwunle kɛ saa ɔdie ɔto nu a ɛnee ɔkile kɛ yekpo Gyihova tumililɛ—adenle mɔɔ Nyamenle lɛ ɔdi tumi kɛ Anwuma Anwumanli ne la. (Bɛgenga Mateyu 4:10.) Wɔ sɔnea ne biala anu, Gyisɛse vale ngɛlɛlera mɔɔ Gyihova duma ne wɔ nu la buale Seetan.
12. Kpɔkɛ mɔɔ anu yɛ se la boni a ɛnee ɔwɔ kɛ Gyisɛse si a, na duzu a yɛsukoa yɛfi kɛzi ɔlile nwolɛ gyima la anu a?
12 Mekɛ mɔɔ ɛnee Gyisɛse asetɛnla wɔ azɛlɛ ye azo ɛlɛba ye awieleɛ la, ɛnee ɔwɔ kɛ ɔsi kpɔkɛ bie mɔɔ anu yɛ se la. Wɔ ye ɛzonlenlɛ gyima ne kɔsɔɔti anu, ɔlale ye ali kɛ ɔkulo kɛ ɔbava ye ngoane yeabɔ afɔle. (Mat. 20:17-19, 28; Luku 12:50; Dwɔn 16:28) Noko akee, Gyisɛse nwunle kɛ Dwuuma bɛabua ye mgbɔvodɛne na bɛamaa bɛahu ye kɛ awie mɔɔ yedendɛ yetia Nyamenle. Ewule zɛhae gyegyele ye kpalɛ. Ɔyɛle asɔne kɛ: “Egya, saa ɛyɛ na ɔkɛyɛ boɛ a, ye amaneɛnwunlɛ dwora ye fi me nloa!” Noko ɔdoale zo kɛ: “Tɛ kɛ mɔɔ mame mekulo la ɔ, na maa ɔyɛ kɛ mɔɔ wɔ ɛhulolɛ ne de la.” (Mat. 26:39) Ɛhɛe, Gyisɛse nɔhalɛ mɔɔ ɔlile ɔhɔle ewule nu la manle bɛnwunle Awie mɔɔ ɔ nwo hyia ye kpalɛ wɔ ye ɛbɛlabɔlɛ nu la!
Yɛ Mualɛ Wɔ Kpuyia Ne Anwo
13. Badwu ɛke la duzu a yɛzukoa yɛvi Yive, Dwobu, nee Gyisɛse Kelaese neazo ne mɔ anu a?
13 Badwu ɛke la duzu a yɛzukoa a? Kɛmɔ yɛnwu ye wɔ Yive edwɛkɛ ne anu la, yɛsukoa kɛ bɛdabɛ mɔɔ bɛdi bɛ atiakunluwɔzo nzi la bu bɛ nwo somaa fa kile kɛ tɛ Gyihova a le Awie mɔɔ ɔ nwo hyia kpalɛ wɔ bɛ ɛbɛlabɔlɛ nu a. Noko, wɔ Dwobu nɔhalɛlilɛ ne anu, yɛsukoa kɛ alesama mɔɔ ɛnli munli bɔbɔ la kola di nɔhalɛ fa kile kɛ bɛmaa Gyihova dumua bɛ ɛbɛlabɔlɛ nu ɔlua amaneɛnwunlɛ nloa mɔɔ bɛgyinla—saa bɔbɔ bɛnze deɛmɔti bɛlɛnwu amaneɛ ne a. (Gye. 5:11) Awieleɛ kolaa ne, Gyisɛse neazo ne kile yɛ kɛ ɔnle kɛ yɛdwenle anyiemgba mɔɔ yɛbabɔ nee duma mɔɔ yɛbalie la anwo somaa. (Hib. 12:2) Noko kɛ ɔkɛyɛ na yɛava ɛzukoalɛdeɛ ɛhye mɔ yɛali gyima ɛ?
14, 15. Adenle boni azo a mɔɔ Gyisɛse yɛle wɔ sɔnea nwo la le ngakyile fi mɔɔ Yive yɛle la anwo a, na kɛzi yɛbahola yɛazukoa Gyisɛse ɛ? (Ka ndonwo ne mɔɔ wɔ ɔbo ɛkɛ la anwo edwɛkɛ.)
14 Ɔnle kɛ sɔnea maa ɛ rɛle fi Gyihova ɛlɛ. Yive manle ye adwenle hɔle sɔnea ne mɔɔ ɛnee la ɔ nyunlu la azo ndɛndɛ. Ɔnwunle kɛ “baka ne ma ne le kɛnlɛma, na bɛdi a ɔle kpalɛ.” (Mɔl. 3:6) Ɛhye nee mɔɔ Gyisɛse yɛle wɔ ye sɔnea nsa ne mɔ anwo la ɛnle ko fee! Yeammaa ɔ rɛle anvi mɔɔ ɔbavi ye nyɛleɛ wɔ sɔnea ne anwo anu ara la ɛlɛ. Ɔvale ɔ nwo ɔdole Nyamenle Edwɛkɛ ne azo yɛɛ ɔvale Gyihova duma ne ɔlile gyima.
15 Saa yɛyia sɔnea mɔɔ bamaa yɛayɛ debie mɔɔ ɛnzɔ Gyihova anye la a, duzu a yɛfa yɛ adwenle yɛsie zo a? Mekɛ mɔɔ yɛlɛfa yɛ adwenle yɛahɔ sɔnea ne azo la ɛnee atiakunluwɔzo ɛtane ne noko anu ɛlɛyɛ se. (Gye. 1:14, 15) Ɔwɔ kɛ yɛyɛ ye ndɛndɛ yɛtu atiakunluwɔzo ne abo saa bɔbɔ ye ɛyɛlɛ yɛ se kɛ asɛɛ bɛlɛpɛ yɛ sonlabaka ne nvɛyeba ne bie bɔbɔ la a. (Mat. 5:29, 30) Kɛmɔ Gyisɛse yɛle la, ɔwɔ kɛ yɛdwenle mɔɔ bavi yɛ nyɛleɛ ne anu ara la anwo—kɛzi ɔbaha yɛ nee Gyihova agɔnwolɛvalɛ ne la. Ɔwɔ kɛ yɛkakye mɔɔ ye Edwɛkɛ Baebolo ne ka la. Adenle ɛhye azo ala a yɛbahola yɛahile kɛ Gyihova le Awie mɔɔ ɔ nwo hyia yɛ wɔ yɛ ɛbɛlabɔlɛ nu a.
16-18. (a) Duzu a bahola amaa yɛ sa nu ado a? (b) Duzu a baboa yɛ amaa yɛagyinla tɛnlabelɛ mɔɔ yɛ nyane la anloa a?
16 Ɔnle kɛ anwubɛnyunlu maa ɛfa Gyihova anwo ɛya ɛlɛ. (Mrɛ. 19:3) Kɛmɔ yɛlɛbikye ewiade ɛtane ɛhye awieleɛ ne kpalɛ la ati, Gyihova menli dɔɔnwo kɔ esiane nee anwubɛnyunlu ngakyile nu. Yɛ nye ɛnla kɛ bɛbalua nwanwane adenle zo bɛabɔ yɛ nwo bane wɔ mekɛ ɛhye anu. Kɛmɔ bie dole Dwobu la, yɛ rɛle bahola abɔ wɔ mekɛ mɔɔ yɛ kulovolɛ bie kɛvi nu anzɛɛ yɛlɛnwu amaneɛ la.
17 Ɛnee Dwobu ɛnze deɛmɔti Gyihova manle ninyɛne bie mɔ sisile la, na ɔdwu mekɛ ne bie a yɛnrɛde deɛmɔti ninyɛndane bie mɔ si la abo. Bie a ɛnee yɛde yɛ mediema mɔɔ bɛdi nɔhalɛ mɔɔ bɛwule wɔ azɛlɛkpusulɛ ne mɔɔ zile wɔ Haiti anzɛɛ esiane fofolɛ bie anu la. Anzɛɛ bie a ɛnee yɛze yɛ diema bie mɔɔ di nɔhalɛ mɔɔ ɔwule wɔ basabasayɛlɛ anzɛɛ esiane bie mɔɔ yɛ ɛzulolɛ anu la. Anzɛɛ bie a ɛnee amaneɛnwunlɛ bie ɛdo yɛ ɔlua tɛnlabelɛ mɔɔ gyegye adwenle anzɛɛ pɛlepɛlelilɛ mɔɔ ɛnle ɛkɛ la ati. Bie a nyane mɔɔ yɛlɛdi la bamaa yɛaha kɛ: ‘Gyihova, duzu ati ɔ? Duzu ɛtane a meyɛ a?’ (Hab. 1:2, 3) Duzu a baboa yɛ amaa yɛagyinla tɛnlabelɛ zɛhae mɔ anloa a?
18 Ɔhyia kɛ yɛnea boɛ na yɛannyia adwenle kɛ ninyɛne ɛhye mɔ kile kɛ Gyihova ɛnlie yɛ ɛndo nu. Gyisɛse hilehilele edwɛkɛ ɛhye anu wɔ mekɛ mɔɔ ɔhanle esiane nwiɔ bie mɔɔ zile wɔ ye mekɛ zo anwo edwɛkɛ la. (Bɛgenga Luku 13:1-5.) Kɛmɔ “tɛ mekɛ ne amuala a bɛdi ye moavolɛ” la ati a, munzule dɔɔnwo ne ala sisi a. (Nolo. 9:11) Noko, kɛzi yɛ ngyegyelɛ ne de ye biala la, saa yɛfa yɛ adwenle yɛsie “arɛlekyekyelɛ [kɔsɔɔti] Nyamenle ne” anwo zo a yɛbahola yɛagyinla ɔ nloa. Ɔbamaa yɛ anwosesebɛ mɔɔ fɛta la na yɛahɔ zo yɛali nɔhalɛ.—2 Kɔl. 1:3-6.
19, 20. Duzu a manle Gyisɛse gyinlanle tɛnlabelɛ mɔɔ yɛ anyiemgba la anloa a, na kɛ ɔkɛyɛ na yɛava ɔ gyakɛ ɛ?
19 Ɔnle kɛ ɛmaa anwomemaazo mɔɔ ɛbayɛ anzɛɛ ɛ nyunlu mɔɔ ɔbagua aze la anwo kyia wɔ titile. Gyisɛse mɛlɛbɛnwoaze ne manle “ɔkpɔlale ɔ kunlu ɔyɛle ɔ nwo akɛlɛ.” (Fel. 2:5-8) Ɔvale ɔ nwo ɔdole Gyihova anwo zo yemɔti ɔholale ɔgyinlanle tɛnlabelɛ mɔɔ yɛ anyiemgba bɔbɔ la anloa. (1 Pita 2:23, 24) Gyisɛse luale ɛhye ɛyɛlɛ zo vale Gyihova ɛhulolɛdeɛ ɛyɛlɛ lumuale, na ɔlua zo bɛkpogya ye zo. (Fel. 2:9) Gyisɛse hanvole asetɛnla adenle ko ne ala manle ye ɛdoavolɛ ne mɔ.—Mat. 23:11, 12; Luku 9:26.
20 Ɔdwu mekɛ ne bie a yɛ diedi ne anwo sɔnea ne bie mɔ anu bahola ayɛ se. Noko akee, ɔwɔ kɛ yɛnyia anwodozo mɔɔ ɛzoanvolɛ Pɔɔlo mɔɔ hanle edwɛkɛ ɛhye nyianle la bie: “Zɔhane ati yɛɛ menwu amaneɛ ɛhye mɔ a. Noko ɔnyɛ me nyiane, ɔluakɛ meze mɔɔ meva me rɛle mewula ye nu la, na medie medi kɛ ɔkɛhola ɔkɛzie mɔɔ meva mewula ɔ sa nu la gyɛlɛɛnye ɔkɛhɔkpula Awulae Kenle ne.”—2 Tem. 1:12.
21. Ɔnva nwo kɛ angomedi ɛbu ewiade la, duzu a wɔsika ɛ bo kɛ ɛbayɛ a?
21 Baebolo ne hanle kɛ wɔ yɛ mekɛ ye anu menli bayɛ “angomedi.” (2 Tem. 3:2) Ɔnyɛ nwanwane kɛ yɛde menli mɔɔ bɛdwenle bɛ ngome bɛ nwo la avinli a. Ɔnle kɛ yɛnyia bɛ angomedi subane ne bie ɛlɛ! Emomu, saa yɛkɔ sɔnea, anwubɛnyunlu, anzɛɛ tɛnlabelɛ mɔɔ yɛ nyiane la anu a, ɔwɔ kɛ yɛsika yɛ bo kɛ yɛbamaa yeala ali kɛ Gyihova a le Awie mɔɔ ɔ nwo hyia yɛ kpalɛ wɔ yɛ ɛbɛlabɔlɛ nu a!
Duzu A Yɛsukoa Yɛfi . . .
• kɛzi Seetan bɛlɛbɛlale Yive la anu a?
• mɔɔ Dwobu yɛle wɔ ye amaneɛnwunlɛ ne anwo la anu a?
• mɔɔ Gyisɛse vale ye adwenle ziele zo titile la anu a?
[Debiezukoalɛ kpuyia ne mɔ]
[Nvoninli wɔ mukelɛ 21]
Gyisɛse kpole Seetan sɔnea ne mɔ na ɔvale ye adwenle ɔziele Gyihova ɛhulolɛdeɛ ɛyɛlɛ zo
[Nvoninli ne mɔ wɔ mukelɛ 22]
Ndanlɛ azua bo daselɛlilɛ wɔ Haiti azɛlɛkpusulɛ ne anzi
Saa yɛkɔ ngyegyelɛ nu a, yɛbahola yɛava yɛ rɛle yɛawula ‘arɛlekyekyelɛ kɔsɔɔti Nyamenle ne’ anu