Yɛ Kengavoma Biza Kɛ . . .

Asoo Paladaese asetɛnla bayɛ anyelielɛ?

▪ Baebolo ne maa yɛnwu kɛ yɛbahola yɛadɛnla aze dahuu wɔ azɛlɛ ye azo Paladaese ne anu. (Edwɛndolɛ 37:29; Luku 23:43) Asoo ɛleka mɔɔ di munli mɔɔ yɛbadɛnla ye dahuu la bamaa yɛ nye alie?

Kpuyia ɛhye anwo hyia. Menli mɔɔ yɛ neɛnleanu la ɛnwu kɛ saa awie ɛnyɛ ninyɛne mɔɔ maa ɔ nye die la a ɔkola ɔmaa ɔdwenledwenle, ɔdi alɔbɔlɛ na bɔbɔ ɔfa ye ngoane ɔto esiane nu. Menli mɔɔ ɛnlɛ bodane biala wɔ ɛbɛlabɔlɛ nu anzɛɛ gyima mɔɔ bɛyɛ alehyenlɛ biala maa bɛfɛ la kola yia ngyegyelɛ ɛhye. Asoo bɛdabɛ mɔɔ bɛbadɛnla Paladaese la banyia bodane kpalɛ bie? Asoo ninyɛne mɔɔ bɛbayɛ ye dahuu la bamaa bɛ nye alie?

Mɔɔ lumua la, kakye kɛ Gyihova Nyamenle mɔɔ ɔle Baebolo ne Kɛlɛvolɛ la a ɛlɛfa dahuu ngoane ne amaa yɛ a. (Dwɔn 3:16; 2 Temɔte 3:16) Nyamenle subane titile a le ɛlɔlɛ. (1 Dwɔn 4:8) Gyihova kulo yɛ kpalɛ ɔti yeva ninyɛne kpalɛ mɔɔ maa yɛ nye die la kɔsɔɔti yemaa yɛ.—Gyemise 1:17.

Yɛ Bɔvolɛ ne ze kɛ amaa yɛ nye alie la, ɔwɔ kɛ yɛnyia gyima kpalɛ yɛyɛ. (Edwɛndolɛ 139:14-16; Nolobɔvo ne 3:12) Menli mɔɔ bayɛ gyima wɔ Paladaese la ɛnrɛyɛ kɛ milahyinli la. Bɛ nee menli mɔɔ bɛkulo bɛ edwɛkɛ la banyia gyima mɔɔ bɛyɛ la azo nvasoɛ. (Ayezaya 65:22-24) Saa ɛlɛ gyima kpalɛ bie ɛyɛ ye dahuu a, asoo anrɛɛ ɛ nye ɛnrɛlie ɔ?

Eza kakye kɛ tɛ awie biala a Gyihova Nyamenle bamaa yeadɛnla Paladaese a. Ɔfa ngoane ahyɛlɛdeɛ ne ɔmaa menli mɔɔ sukoa ɔ Ra Gyisɛse la. (Dwɔn 17:3) Mekɛ mɔɔ Gyisɛse wɔ azɛlɛ ye azo la, ɔvale anyelielɛ ɔyɛle ɔ Ze ɛhulolɛdeɛ. Ɔvale ye nyɛleɛ nee ye edwɛkɛ ɔhilele ye ɛdoavolɛma ne kɛ ɛmanlɛ a fa anyelielɛ dɔɔnwo ba a na tɛ ɛlielɛ ɔ. (Gyima ne 20:35) Menli mɔɔ badɛnla Paladaese la amuala bɛava mɛla nwiɔ ɛhye mɔɔ le titile kpalɛ la ayɛ gyima—bɛbahulo Nyamenle na bɛahulo bɛ gɔnwo mɔ. (Mateyu 22:36-40) Fa ye kɛ ɛ nee menli mɔɔ kulo wɔ edwɛkɛ na bɛkulo gyima mɔɔ bɛyɛ la a de a! Anrɛɛ ɛ nye ɛnrɛlie ɔ?

Duzu bieko a yɛbayɛ ye wɔ Paladaese a? Alehyenlɛ ko biala, yɛbazukoa yɛ Bɔvolɛ ne anwo debie fofolɛ. Menli mɔɔ yɛ neɛnleanu la ɛnwu Gyihova abɔdeɛ bie mɔ anwo ninyɛne mɔɔ yɛ anyelielɛ. (Wulomuma 1:20) Noko, ekyi bie ala a yɛnwu ye a. Kɛyɛ ɛvolɛ apenle dɔɔnwo mɔɔ ɛze ɛhɔ la, diedinli Dwobu hanle mɔɔ ɔze ye wɔ Nyamenle abɔdeɛ nwo la, na mɔɔ ɔhanle la tɛde nɔhalɛ. Dwobu hanle kɛ: “Ɛhye mɔ bɔbɔ le ye [Nyamenle] tumi ne anu ekyi bie; ɔ ne ekyi bie a yɛte a, na nwane a kɛhola kɛgyinla ye tumi kpole ne anloa a?”—Dwobu 26:14.

Saa yɛtɛnla ngoane nu dahuu bɔbɔ a, yɛnrɛhola yɛnrɛzukoa Gyihova Nyamenle nee ye gyima ne mɔ anwo debie yɛnrɛwie ɛlɛ. Baebolo ne ka kɛ Nyamenle ɛva dahuu ngoane ɛwula yɛ ahonle nu. Noko eza ɔka kɛ sonla ɛnrɛnwu “mɔɔ Nyamenle ɛyɛ, ɔvi mɔlebɛbo mɔɔ kɔ awieleɛ.” (Nolobɔvo ne 3:10, 11) Asoo wɔ Bɔvolɛ ne anwo ninyɛne fofolɛ mɔɔ ɛbazukoa la ɛnrɛmaa ɛ nye ɛnrɛlie?

Kɛkala bɔbɔ, menli mɔɔ anye bolo yɛ gyima mɔɔ boa awie mɔ na ɔwula Nyamenle anyunlunyia la anye die. Nyia anwodozo kɛ saa yɛkɔ zo yɛyɛ gyima zɛhae bie a, yɛ nye balie kpole wɔ mekɛ mɔɔ yɛbadɛnla aze dahuu la.

[Nvoninli Ɛvileka ne mɔ wɔ mukelɛ 14]

Azɛlɛ: Image Science and Analysis Laboratory, NASA-Johnson Space Center; Nwɔlɔra Ekpunli: The Hubble Heritage Team (AURA/STScI/NASA)