Yɛ Kengavoma Biza Kɛ . . .

Asoo nɔhalɛ Keleseɛnema amuala bahɔ anwuma?

▪ Menli dɔɔnwo ɛgenga Gyisɛse arɛlekyekyelɛ edwɛkɛ ɛhye: “Ɔluakɛ Nyamenle hulole ewiade amra kpole kpalɛ la ati yɛɛ ɔvale Ɔ Ra kokye ne ɔmanle a, amaa [awie biala] mɔɔ kɛlie ye kɛli la anwu na yeanyia ngoane mɔɔ ɛnlɛ awieleɛ.” (Dwɔn 3:16) Asoo ɛnee Gyisɛse ɛlɛkile kɛ ɔ Ze, Gyihova Nyamenle nɔhalɛ azonvolɛ kɔsɔɔti bɛanyia dahuu ngoane nee anyelielɛ kpalɛ wɔ anwuma ɔ?

Yɛ Gyisɛse edwɛkɛ ɛhye mɔɔ ɔmaa bɛdwenle la nzonlɛ: “Awie biala . . . ɛtɛkɔle anwuma lɔ kɛ Sonla Ra ne mɔɔ vi anwuma lɔ rale la ala.” (Dwɔn 3:13) Ɛhye kile kɛ tete nɔhalɛ azonvolɛ mɔɔ bie a le Nowa, Ebileham, Mosisi, yɛɛ Devidi la angɔ anwuma. (Gyima ne 2:34) Ɛnee nienwu a bɛ kɔsɔɔti bɛhɔle a? Ye sikalɛ a le kɛ: Tete nɔhalɛ azonvolɛ kɔsɔɔti wɔ bɛ nla ne mɔ anu, bɛla wɔ ewule nu, bɛnze ɛhwee, bɛlɛkendɛ ewudwazo.—Nolobɔvo ne 9:5, 6; Gyima ne 24:15.

Gyisɛse a lumuale hanle kɛ bɛbadwazo mɔwuamra bie mɔ bɛahɔ anwuma a. Ɔzele ye ɛzoanvolɛ ne mɔ kɛ ɔbahɔziezie ɛleka wɔ anwuma yeamaa bɛ. (Dwɔn 14:2, 3) Ɛnee ɛhye le debie fofolɛ maa Nyamenle menli. Nzinlii, ɛzoanvolɛ Pɔɔlo hilehilele nu kɛ mɔɔ Gyisɛse wule na bɛdwazole ye bɛhɔle anwuma la anzi, Gyisɛse ɛkpakye “ngoane adenle fofolɛ ɛmaa yɛ”—adenle mɔɔ ɛnee dasanli biala ɛtafale zolɛ ɛlɛ la.—Hibuluma 10:19, 20.

Asoo ɛhye kile kɛ ɔvi zɔhane mekɛ ne nɔhavoma kɔsɔɔti bɛahɔ anwuma? Kyɛkyɛ, ɔlua gyima mɔɔ menli bie mɔ kɔ ahɔyɛ ye wɔ anwuma la ati a bɛbahɔ lɔ a. Wɔ bɛ nɔe ne mɔɔ li awieleɛ la anu, Gyisɛse zele ye ɛdoavolɛ ne mɔ kɛ “bɛbadɛnlɛdɛnla arelemgbunli mbia zo bɛabua . . . ndɛne” wɔ ye anwuma Belemgbunlililɛ ne anu. Ɛhye ati, bɛ gyima a le kɛ bɛ nee Gyisɛse bɛali tumi wɔ anwuma.—Luku 22:28-30.

Ɛzoanvolɛ ne mɔ anzi, menli gyɛne noko bayɛ gyima kɛnlɛma ɛhye bie. Wɔ ɛnyelɛzodeɛnwunlɛ nu, ɛzoanvolɛ Dwɔn nwunle Gyisɛse kɛ ɔ nee ekpunli bie mɔɔ bɛdwazo bɛ bɛhɔ anwuma la wɔ lɔ, na ɔhanle bɛ nwo edwɛkɛ kɛ, “Arelemgbunli nee Nyamenle sɛlɛvolɛma na bɛbali arelemgbunli wɔ azɛlɛ ye azo.” (Yekile 3:21; 5:10) Ɛnee bɛle nyɛ yɛɛ bɛwɔ ɛkɛ a? Kɛmɔ yɛnwu ye wɔ sonla arane biala anu la, menli ekyi bie a sie maanlema ne a. Kɛ anwuma Belemgbunlililɛ ɛhye noko de la ɛne. Gyisɛse, Nyamenle Boaneralɛ ne, nee menli 144,000 mɔɔ “bɛlie bɛ” anzɛɛ bɛdɔ bɛ “bɛvi aleɛabo amra avinli” la bali tumi.—Yekile 14:1, 4, 5.

Nɔhalɛ nu, saa ɛfa 144,000 ne ɛtoto nɔhalɛ azonvolɛ kɔsɔɔti, tete amra nee adwuleso amra anwo a ɛnee bɛ nwo anzo. Noko ndelebɛbo wɔ nu ɔluakɛ bɛbadwazo 144,000 ne bɛahɔ anwuma bamaa bɛahɔyɛ gyima nwuanzanwuanza bie. Fa ye kɛ ɛkpondɛ kɛ ɛsi sua, asoo ɛbava menli mɔɔ ze sua si mɔɔ bɛwɔ ɛleka mɔɔ ɛwɔ la amuala? Kyɛkyɛ. Menli mɔɔ baza gyima ne yɛ la ala a ɛbava bɛ a. Zɔhane ala a, Nyamenle anva nwolɛ adenle kɛnlɛma ɛhye ammaa menli mɔɔ di nɔhalɛ la amuala kɛ bɛ nee Kelaese ɛhɔli tumi wɔ anwuma a.

Anwuma arane ɛhye bamaa Nyamenle bodane mɔɔ ɛnee ɔlɛ ye mɔlebɛbo ne wɔ alesama anwo la ara nu. Gyisɛse nee ye menli 144,000 ne bɛanlea amaa azɛlɛ ye kɔsɔɔti ahakyi paladaese, ɛleka mɔɔ nɔhavoma mɔɔ bɛnze bɛ nloa bɛadɛnla ye dahuu wɔ anyelielɛ nu la. (Ayezaya 45:18; Yekile 21:3, 4) Menli mɔɔ Nyamenle kakye bɛ mɔɔ bɛbadwazo bɛ la boka nwo.—Dwɔn 5:28, 29.

Gyihova nɔhalɛ sonvolɛ ko biala—tete amra nee adwuleso amra kɔsɔɔti—bahola anyia dahuu ngoane ahyɛlɛdeɛ kɛnlɛma ɛhye. (Wulomuma 6:23) Bɛ nuhua ekyi bɛanyia asetɛnla wɔ anwuma bɛahɔyɛ gyima titile bie, na bɛ nuhua dɔɔnwo ne ala anyia ngoane wɔ azɛlɛ ye mɔɔ ye kɔsɔɔti bayɛ paladaese la azo.