Fi Ɛkɛla Muala Nu Bɔ Afɔle Maa Gyihova
“Debie biala mɔɔ bɛyɛ la bɛva ahonle kpalɛ bɛyɛ, kɛ asɛɛ bɛyɛ bɛamaa Awulae.”—KƆL. 3:23.
1-3. (a) Ɔluakɛ Gyisɛse ɛva ye ngoane ɛbɔ afɔle la ati, asoo Gyihova ɛngyia afɔle bieko? Kilehile nu. (b) Kpuyia boni a yɛbahola yɛabiza wɔ afɔle mɔɔ yɛbɔ la anwo a?
WƆ ƐVOYA ne mɔɔ lumua la anu, Gyihova lale ye ali wienyi hilele ye menli ne kɛ Gyisɛse ɛkpɔnenlɛ afɔle ne ɛmaa Mosisi Mɛla ne ɛra awieleɛ. (Kɔl. 2:13, 14) Gyihova ɛmkpondɛ nane afɔle nee afɔle ngakyile ne mɔɔ Dwuuma ɛhɔ zo ɛbɔ la bieko. Mɛla ne wiele ye gyima kɛ “adekilevolɛ mɔɔ ɔkile adenle ɔkɔ Kelaese ɛkɛ.”—Gal. 3:24, NW.
2 Ɛhye ɛngile kɛ Keleseɛnema anye ɛnlie afɔlebɔlɛ nwo bieko. Ɛzoanvolɛ Pita hanle kɛ: “Bɛlua Gyisɛse Kelaese anwo zo bɛbɔ sunsum nu [afɔle] mɔɔ sɔ ɛnyelɛ la bɛmaa Nyamenle.” (1 Pita 2:5) Bieko, ɛzoanvolɛ Pɔɔlo hanle ye wienyi kɛ, Keleseɛnenli ɛbɛlabɔlɛ le kɛ “azu” anzɛɛ afɔle mɔɔ bɛbɔ bɛmaa Nyamenle la.—Wulo. 12:1.
3 Saa yɛfa ninyɛne bie mɔ yɛmaa Gyihova anzɛɛ yɛgyakyi ninyɛne bie mɔ ɛyɛlɛ amaa yɛazonle ye kpalɛ a, ɛnee yɛlɛbɔ afɔle yɛamaa ye. Ɔlua mɔɔ yɛnwu ye wɔ afɔle mɔɔ Yizilayɛma bɔle la anwo la ati, kɛ ɔkɛyɛ na yɛamaa Gyihova alie afɔle mɔɔ yɛbɔ la ado nu ɛ?
AFƆLE MƆƆ YƐBƆ YE ALEHYENLƐ BIALA
4. Duzu a ɔwɔ kɛ yɛkakye ye wɔ ninyɛne mɔɔ yɛyɛ ye alehyenlɛ biala la anwo a?
4 Bie a yɛnze kɛ ninyɛne mɔɔ yɛyɛ ye alehyenlɛ biala la boka afɔle mɔɔ yɛbɔ yɛmaa Gyihova la anwo. Yɛbahola yɛanyia adwenle kɛ sua nu, sukulu nu, nwonane afoa nu gyima, anzɛɛ ninyɛne mɔɔ yɛtotɔ la ɛnga agɔnwolɛvalɛ mɔɔ yɛ nee ye lɛ la. Noko akee, saa wɔdu ɛ nwo wɔmaa Gyihova anzɛɛ ɛbayɛ zɔ kenlebie a, ɛnee ɔwɔ kɛ ɛkakye kɛ ninyɛne ɛhye mɔ mɔɔ yɛyɛ ye alehyenlɛ biala la kola ka agɔnwolɛvalɛ mɔɔ yɛ nee Gyihova lɛ la. Yɛle Keleseɛnema dɔnehwele 24 alehyenlɛ biala, na ɔhyia kɛ yɛfa Baebolo ngyinlazo yɛdi gyima wɔ tɛnlabelɛ biala anu. Ɛhye ati Pɔɔlo dule yɛ folɛ kɛ: “Debie biala mɔɔ bɛyɛ la bɛva ahonle kpalɛ bɛyɛ, kɛ asɛɛ bɛyɛ bɛamaa Awulae, na bɛnyɛ bɛmmaa sonla.”—Bɛgenga Kɔlɔsaema 3:18-24.
5, 6. Duzu a bahola aboa yɛ na yɛazi kpɔkɛ wɔ yɛ nyɛleɛ nee yɛ anwoziezielɛ nwo a?
5 Yɛ gyima ɛmboka ɛzonlenlɛ mɔɔ yɛfa yɛmaa Nyamenle la anwo. Noko, Pɔɔlo hanle kɛ: “Bɛva ahonle kpalɛ bɛyɛ, kɛ asɛɛ bɛyɛ bɛamaa Awulae.” Ɛhye maa yɛnwu kɛzi ɔwɔ kɛ yɛbɔ yɛ ɛbɛla mekɛ biala la. Yemɔti, duzu a yɛsukoa yɛfi nu a? Asoo yɛ subane nee yɛ anwoziezielɛ da ye ali kɛ yɛle Keleseɛnema? Anzɛɛ ɔlua yɛ nyɛleɛ nee yɛ anwoziezielɛ ti, asoo ɔyɛ a ɔyɛ yɛ nyiane kɛ yɛbaha kɛ yɛle Gyihova Alasevolɛ ɔ? Ɔnle kɛ yɛmaa ɔba ye zɔ ɛlɛ! Yɛngulo kɛ yɛbayɛ debie mɔɔ bamaa menli adendɛ atia Nyamenle duma ne la.—Aye. 43:10; 2 Kɔl. 6:3, 4, 9.
6 Bɛmaa yɛzuzu kɛzi edwɛkɛ “bɛva ahonle kpalɛ bɛyɛ, kɛ asɛɛ bɛyɛ bɛamaa Awulae” ka kɛzi yɛdwenle nee mɔɔ yɛyɛ ye wɔ tɛnlabelɛ ngakyile nu la anwo. Mekɛ mɔɔ yɛlɛsuzu nwo la, ɔhyia kɛ yɛkakye kɛ ɛnee ɔwɔ kɛ Yizilayɛma fa ninyɛne mɔɔ bɛlɛ la anu kpalɛ ne a bɔ afɔle maa Gyihova a.—Ade. 23:19.
KƐZI ƆKA WƆ ASETƐNLA LA
7. Duzu a yɛ nwo mɔɔ yɛdu yɛmaa Nyamenle la kile a?
7 Mekɛ mɔɔ ɛdule ɛ nwo ɛmanle Gyihova la, ɛzile kpɔkɛ kpalɛ. Ɛbɔle ɛwɔkɛ kɛ ɛbamaa yealumua debie biala mɔɔ ɛbayɛ la anu. (Bɛgenga Hibuluma 10:7.) Ɔda ali kɛ wɔnyia nvasoɛ dɔɔnwo wɔvi mɔɔ Gyihova ka ye wɔ debie bie anwo mɔɔ wɔnwu ye na wɔva wɔli gyima la azo. (Aye. 48:17, 18) Yɛle menli mɔɔ yɛ nwo te na yɛ nye die ɔluakɛ yɛsukoa Gyihova mɔɔ ɔkilehile yɛ la.—Sɛlɛ. 11:44; 1 Tem. 1:11.
8. Saa yɛkakye kɛ Gyihova bule Yizilayɛma afɔle ne kɛ ɔle nwuanzanwuanza a kɛzi ɔbaboa yɛ ɛ?
8 Gyihova bule Yizilayɛma afɔle ne kɛ ɔle nwuanzanwuanza. (Sɛlɛ. 6:25; 7:1) Hibulu edwɛkɛkpɔkɛ mɔɔ bɛhile ɔ bo “nwuanzanwuanza” la, kile debie mɔɔ bɛye bɛzie ahane anzɛɛ ɔle Nyamenle angome ɛdeɛ la. Saa yɛkpondɛ kɛ Nyamenle die yɛ afɔle mɔɔ yɛbɔ la to nu a, ɔwɔ kɛ yɛtwe yɛ nwo yɛfi ewiade ye anu debie biala mɔɔ anwo ɛnde la anwo. Yɛnrɛhola yɛnrɛhulo ninyɛne mɔɔ Gyihova kyi la anu biala. (Bɛgenga 1 Dwɔn 2:15-17.) Ɛhye kile kɛ ɔwɔ kɛ yɛkoati awie anzɛɛ debie biala mɔɔ ɔbamaa Nyamenle abu yɛ kɛ yɛ nwo ɛnde la. (Aye. 2:4; Yek. 18:4) Eza ɔkile kɛ, yɛnrɛhola yɛnrɛnlea ninyɛne mɔɔ anwo ɛnde anzɛɛ ɛbɛla ɛtane. Yɛɛ yɛnrɛhola yɛnrɛdwenledwenle nwo.—Kɔl. 3:5, 6.
9. Duzu ati a mɔɔ yɛyɛ yɛmaa awie mɔ la anwo hyia ɛ?
9 Pɔɔlo dule ɔ mediema diedima folɛ kɛ: “Bɛmmamaa bɛ rɛle fi kɛ bɛkɛyɛ kpalɛ na bɛkɛboa bɛ nwo ngoko ngoko, ɔboalekɛ ɛhye a le azubɔlɛ [anzɛɛ, afɔlebɔlɛ] mɔɔ sɔ Nyamenle anye a.” (Hib. 13:16) Zɔhane ati, saa yɛbɔ ɛbɛla kpalɛ dahuu na yɛboa awie mɔ a, Gyihova babu yɛ nyɛleɛ ne kɛ afɔlebɔlɛ mɔɔ sɔ ɔ nye. Yɛdua ɛlɔlɛ mɔɔ yɛda ye ali la azo yɛkile kɛ yɛle nɔhalɛ Keleseɛnema.—Dwɔn 13:34, 35; Kɔl. 1:10.
AFƆLE MƆƆ YƐBƆ YE WƆ ƐZONLENLƐ NU
10, 11. Kɛzi Gyihova bu yɛ daselɛlilɛ nee yɛ ɛzonlenlɛ ɛ? Ɔwɔ kɛ ɛhye ka yɛ maa yɛyɛ duzu?
10 Adenle ko mɔɔ yɛdua zo yɛyɛ awie mɔ kpalɛ la a le yɛ “anyelazo ne” anwo edwɛkɛ mɔɔ yɛka ye bagua nu la. Asoo ɛfa adenle biala mɔɔ ɛnyia la ɛdi daselɛ? Pɔɔlo hanle kɛ: “Bɛmaa yɛva ayɛlɛyelɛ yɛlua Gyisɛse anwo zo yɛmaa Nyamenle. Ɛhye a le [afɔle] kpalɛ mɔɔ ɛnloanlɛ mɔɔ bɔ ye duma kɛ ɔle Awulae la kola bɔ a.” (Hib. 10:23; 13:15; Hoz. 14:2) Ɔwɔ kɛ yɛsuzu mekɛ dodo mɔɔ yɛfa yɛka edwɛkɛ ne nee kɛzi yɛbanyia anyuhɔlɛ wɔ nu la anwo. Ɛzonlenlɛ Nyianu gyimalilɛ ne foa dɔɔnwo boa yɛ maa yɛyɛ ɛhye. Noko ɔwɔ kɛ yɛkakye kɛ, yɛ daselɛlilɛ gyima ne le “ayɛlɛyelɛ” afɔle, yɛ ɛzonlenlɛ ne foa, yemɔti ɔwɔ kɛ yɛfi ɛkɛla muala nu yɛyɛ. Asolo tɛnlabelɛ mɔɔ awie biala wɔ nu la ɛdeɛ, noko adwenle mɔɔ yɛlɛ ye wɔ Gyihova ɛzonlenlɛ nwo la ta ka mekɛ dodo mɔɔ yɛfa yɛka edwɛkɛ ne la.
11 Yɛsonle Gyihova wɔ yɛ awuke anzɛɛ asafo ne anu dahuu. Ɔkpondɛ kɛ yɛyɛ ye zɔ. Ɔnva nwo kɛ yɛnle Ɛnwomenlelielɛ mɛla ne abo anzɛɛ yɛngɔ ɛvoyialilɛ wɔ Gyɛlusalɛm la, yɛbahola yɛazukoa debie yɛavi mɛla ɛhye mɔ anu. Nyamenle kpondɛ kɛ yɛfa yɛ mekɛ ne bie yɛsukoa ye Edwɛkɛ ne, yɛyɛ asɔne, na yɛkɔ debiezukoalɛ. Eza ɔle abusua tile ne gyima kɛ ɔ nee ye abusua ne bɛazukoa Baebolo ne. (1 Tɛs. 5:17; Hib. 10:24, 25) Yemɔti ɔle kpalɛ kɛ yɛbabiza yɛ nwo kɛ, Mebahola meamaa me Nyamenle ɛzonlenlɛ ali munli kpalɛ ɔ?
12. (a) Duzu a yɛbahola yɛava ɛyɛlɛ mɔɔ ɛnee bɛfa bɛbɔ afɔle wɔ tete ne la yeado nwo ɛnɛ a? (b) Kɛ ɔkɛyɛ na yɛamaa yɛ asɔneyɛlɛ ayɛ kɛ ɛyɛlɛ evuanlɛ ɛ?
12 Belemgbunli Devidi dole edwɛne manle Gyihova kɛ: “Maa me nzɛlɛlɛ ɛyɛ kɛ ɛyɛlɛ evuanlɛ wɔ ɛ nyunlu.” (Edw. 141:2) Ɔfɛta kɛ yɛsuzu fane dodo mɔɔ yɛyɛ asɔne nee ninyɛne mɔɔ yɛyɛ nwolɛ asɔne la anwo. Yekile buluku ne hanle kɛ “Nyamenle menli . . . nzɛlɛlɛ” le kɛ ɛyɛlɛ la. Ɔka kɛ asɔneyɛlɛ mɔɔ Gyihova die to nu la bɔ evuanlɛ. (Yek. 5:8) Wɔ tete Yizilayɛ, ɛnee ɔwɔ kɛ bɛnea ngyehyɛleɛ titile bie azo na bɛayɛ ɛyɛlɛ mɔɔ bɛbava bɛabɔ afɔle wɔ Gyihova afɔle mokyea ne azo la. Saa bɛbɔ afɔle ne kɛmɔ nwolɛ adehilelɛ ne de la a, yɛɛ Gyihova balie ado nu a. (Ade. 30:34-37; Sɛlɛ. 10:1, 2) Zɔhane ala a saa yɛyɛ asɔne wɔ adenle mɔɔ Gyihova ɛhile yɛ la azo a, yɛɛ yɛbanyia anwodozo kɛ ɔbalie yeado nu a.
YƐFA YƐMAA A YƐ SA KA YE
13, 14. (a) Duzu a Ɛpafulodaetɛse nee Felepaema asafo ne yɛle manle Pɔɔlo a? Nganeɛ boni a Pɔɔlo dele ye wɔ nwo a? (b) Kɛzi yɛbahola yɛazukoa Ɛpafulodaetɛse nee Felepaema neazo ne ɛ?
13 Ezukoa biala mɔɔ yɛfa yɛboa ewiade amuala gyima ne la le afɔlebɔlɛ. (Mak. 12:41-44) Wɔ ɛvoya ne mɔɔ lumua la anu, Felepae asafo ne zoanle Ɛpafulodaetɛse wɔ Wulomu kɛ ɔhɔli Pɔɔlo ngyianlɛ nwo gyima. Asafo ne vale ezukoa manle Ɛpafulodaetɛse kɛ ɔva ɔhɔmaa Pɔɔlo. Tɛ ɛhye a le mekɛ mɔɔ ɔlumua mɔɔ Felepaema yɛle Pɔɔlo nyele a. Bɛvale ahyɛlɛdeɛ ɛhye bɛmanle Pɔɔlo ɔluakɛ ɛnee bɛngulo kɛ ɔkɛdwenle ezukoa nwo, emomu, ɛnee bɛkpondɛ kɛ ɔfa ye mekɛ ne ɔyɛ ɛzonlenlɛ gyima ne. Kɛzi Pɔɔlo bule zɛhae ahyɛlɛdeɛ ne ɛ? Ɔhanle kɛ: “Bɛ ahyɛlɛdeɛ ne le kɛ [afɔlebɔlɛ] evuanlɛ mɔɔ Nyamenle kulo na ɔ nye sɔ ye la.” (Bɛgenga Felepaema 4:15-19.) Pɔɔlo hilele anyezɔlɛ wɔ nyele mɔɔ Felepaema yɛle manle ye la anwo, yɛɛ Gyihova noko anye liele nwolɛ.
14 Ɛnɛ, Gyihova anye die yɛ ndoboa mɔɔ yɛfa yɛboa ewiade amuala gyima ne la anwo. Yɛɛ yebɔ ɛwɔkɛ kɛ saa yɛdumua yɛkpondɛ ye Belemgbunlililɛ ne a, ɔbamaa yɛ sa aha mɔɔ yɛhyia nwo na yɛ diedi nu ayɛ se nee mɔɔ yɛbali la.—Mat. 6:33; Luku 6:38.
KILE NWOLƐ ANYENZƆLƐ
15. Ninyɛne boni mɔ ati a ɔwɔ kɛ yɛkile anyezɔlɛ yɛmaa Gyihova a?
15 Ninyɛne dɔɔnwo ati a ɔwɔ kɛ yɛkile anyezɔlɛ yɛmaa Gyihova a. Asoo ɔnle kɛ yɛda ye ase alehyenlɛ biala ɔlua ngoane ne mɔɔ yeva yemaa yɛ la ati ɔ? Ɔmaa yɛ debie biala mɔɔ yɛhyia nwo amaa yɛadɛnla ngoane nu la. Ninyɛne le kɛ aleɛ, adɛladeɛ, dabelɛ, nee anwoma mɔɔ yɛdie la. Eza yɛ nye sɔ Baebolo ne anu nɔhalɛ ne mɔɔ maa yɛnyia diedi nee anyelazo mɔɔ yemaa yɛde ɔ bo la. Yemɔti ɔwɔ kɛ yɛsonle Gyihova na yɛbɔ ayɛlɛyelɛ afɔle yɛmaa ye ɔlua kɛzi ɔde nee mɔɔ yeyɛ yemaa yɛ la ati.—Bɛgenga Yekile 4:11.
16. Kɛzi yɛkile kɛ yɛ nye sɔ Kelaese ɛkpɔnenlɛ afɔle ne ɛ?
16 Edwɛkɛ mɔɔ li ɛhye anyunlu la hanle kɛ Kelaese afɔle ne le ahyɛlɛdeɛ kpole mɔɔ Nyamenle ɛva ɛmaa alesama a. Ahyɛlɛdeɛ ɛhye maa yɛnwu kɛzi Nyamenle kulo yɛ la. (1 Dwɔn 4:10) Kɛ ɔkɛyɛ na yɛahile kɛ yɛ nye sɔ ye ɛ? Pɔɔlo hanle kɛ: “Kelaese ɛhulolɛ ne a sie yɛ a, ɔboalekɛ yɛdie yɛto nu kɛ sonla ko wule manle menli kɔsɔɔti.” Ɔdoale zo kɛ: “Ɔwule ɔmanle menli muala, amaa bɛdabɛ mɔɔ bɛde ngoane nu la andɛnla ammaa bɛ ngome bɛ nwo, na bɛadɛnla bɛamaa sonla ne mɔɔ bɛ ti a ɔwule na bɛdwazole ye bɛrale ngoane nu la.” (2 Kɔl. 5:14, 15) Ɛnee Pɔɔlo ɛlɛka kɛ saa yɛ nye sɔ mɔɔ Nyamenle ɛyɛ la a, yɛbava yɛ nyɛleɛ yɛali Ye nee Ɔ Ra ne eni. Yɛdua tieyɛ, edwɛkɛ ne mɔɔ yɛka nee ɛdoavolɛyɛlɛ gyima ne azo yɛda yɛ ɛlɔlɛ nee anyezɔlɛ ali yɛkile Nyamenle nee Kelaese.—1 Tem. 2:3, 4; 1 Dwɔn 5:3.
17, 18. Ndenle boni azo a bie mɔ ɛmaa bɛ ayɛlɛyelɛ afɔle mɔɔ bɛbɔ bɛmaa Gyihova la ɛhɔ ɔ nyunlu a? Maa neazo.
17 Asoo ɛbahola wɔamaa wɔ ayɛlɛyelɛ afɔle mɔɔ ɛbɔ ɛmaa Nyamenle la ali munli kpalɛ ɔ? Menli dɔɔnwo ɛyɛ nzenzaleɛ na bɛva mekɛ dɔɔnwo bɛlɛyɛ daselɛlilɛ gyima ne nee gyima gyɛne mɔɔ wɔ Gyihova ahyehyɛdeɛ ne anu la, ɔlua kpalɛ mɔɔ Gyihova ɛyɛ ɛmaa bɛ mɔɔ bɛdwenledwenle nwo la ati. Bie mɔ yɛ adekpakyelɛ boavolɛ siane ko anzɛɛ mɔɔ bo zɔ ɛvolɛ biala, yɛɛ bie mɔ noko ɛhola ɛyɛ dahuu adekpakyelɛ. Bie mɔ noko ɛboa ɛmaa bɛsisi azua mɔɔ bɛfa bɛdi gyima wɔ Gyihova ɛzonlenlɛ nu la. Ɛhye mɔ le ndenle ngɛnlɛma mɔɔ yɛdua zo yɛkile anyezɔlɛ a. Saa yɛfa adwenle kpalɛ yɛsonle Nyamenle a, ɔbalie mɔɔ yɛyɛ yɛmaa ye la yeado nu.
18 Keleseɛnema dɔɔnwo ɛhola ɛla bɛ anyezɔlɛ ali ɛhile Gyihova. Morena le bɛ nuhua ko. Bɛtetele ye wɔ Katelek ɛzonlenlɛ nu noko ɛnee ɔlɛ Nyamenle nee mɔɔ asetɛnla kile la anwo kpuyia dɔɔnwo. Ɔkpondɛle nwolɛ mualɛ wɔ Katelek ɛzonlenlɛ nee Ehyeama adalɛ nrɛlɛbɛ nu. Noko mekɛ mɔɔ ɔbɔle ɔ bo ɔ nee Gyihova Alasevolɛ zukoale Baebolo ne la yɛɛ ɔnyianle ye kpuyia ne mɔ anwo mualɛ kpalɛ a. Morena anye zɔle mɔɔ ɔzukoale ye wɔ Baebolo ne anu la, ɔluakɛ ɔmanle ɔnyianle nɔhalɛ anyelielɛ. Yemɔti ɔvale ye anwosesebɛ kɔsɔɔti ɔzonlenle Gyihova ɔvale ɔyɛle ye mo. Bɛzɔnenle ye ala la yɛɛ ɔyɛle dahuu adekpakyelɛ boavolɛ a, na mɔɔ ye tɛnlabelɛ ne manle ye adenle la ɔyɛle dahuu adekpakyelɛ. Ye ɛvolɛ 30 ɛne, Morena tɛbɔ dahuu ɛzonlenlɛ gyima ne anu.
19. Kɛ ɔkɛyɛ na yɛabɔ afɔle mɔɔ di munli kpalɛ la yɛamaa Gyihova ɛ?
19 Gyihova nɔhalɛ azonvolɛ dɔɔnwo wɔ ɛkɛ mɔɔ bɛ tɛnlabelɛ ne ati bɛngola bɛnyɛ adekpakyelɛ a. Ɔnva nwo mɔɔ yɛkola yɛyɛ ye wɔ Gyihova ɛzonlenlɛ nu la, yɛ muala yɛbahola yɛabɔ afɔle mɔɔ ɔdie ɔto nu. Wɔ yɛ nyɛleɛ nu, yɛfa Baebolo ngyinlazo yɛdi gyima na yɛkakye kɛ yɛgyi Gyihova agyakɛ anu mekɛ biala. Ɔwɔ kɛ yɛnyia diedi na yɛfa yɛ rɛle yɛwula Nyamenle anu kɛ ɔbamaa ye bodane ara nu. Yɛboa yɛmaa edwɛkpa ne tɛlɛ ɔlua gyima kpalɛ ɛyɛlɛ zo. Yɛmaa ɔda ali kɛ yɛ nye sɔ mɔɔ Gyihova ɛyɛ ɛmaa yɛ la kɔsɔɔti. Yemɔti, bɛmaa yɛvi ɛkɛla muala nu yɛbɔ afɔle yɛmaa Gyihova dahuu.
[Debiezukoalɛ kpuyia ne mɔ]
[Edwɛkɛ mɔɔ bɛkpa wɔ mukelɛ 27]
Asoo Gyihova kpalɛyɛlɛ maa ɛyɛ dɔɔnwo?
[Nvoninli wɔ mukelɛ 25]
Ɛfa adenle biala mɔɔ ɛnyia la ɛdi daselɛ ɔ?
