Duzu A Anrɛɛ Gyisɛse Baha A?

Menli dɔɔnwo te nganeɛ kɛ ɔwɔ kɛ bɛfa maanyɛlɛ bɛbɔ ɛzonlenlɛ nu. Bɛlɛ diedi kɛ ɛzonlenlɛ bahola aboa yeamaa bɛali alesama ngyegyelɛ nwo gyima. Noko akee, diedima bie mɔ suzu kɛ ɔnle kɛ bɛfa maanyɛlɛ bɛfonla ɛzonlenlɛ nu. Adwenle boni a ɛlɛ ye wɔ ɛzonlenlɛma mɔɔ fa bɛ nwo wulowula maanyɛlɛ nu la anwo a? Asoo ɔwɔ kɛ ahyehyɛdeɛ nwiɔ ɛhye mɔ bɔ nu yɛ gyima?

BƐHA Gyisɛse Kelaese anwo edwɛkɛ kɛ “awie mɔɔ ɛnyia tumi kpole wɔ alesama ɛzonlenlɛ zo.” Yemɔti, fa ye kɛ yɛkola yɛbiza ye kpuyia ɛhye, Asoo ɔwɔ kɛ bɛfa maanyɛlɛ bɛfonla ɛzonlenlɛ nu? Anrɛɛ duzu a ɔbaha a? Ɔvale ye edwɛkɛ nee ye nyɛleɛ ɔbuale kpuyia zɔhane wɔ mekɛ mɔɔ ɛnee ɔwɔ azɛlɛ ye azo la. Kɛ neazo la, wɔ ye Boka Zo Ɛdendɛlɛ ne mɔɔ menli dɔɔnwo ze la anu, Gyisɛse vale adehilelɛ mɔɔ boale ye ɛdoavolɛ ne mɔ ɔmanle bɛnwunle mɔɔ ɔwɔ kɛ bɛyɛ wɔ bɛ maanle nu la ɔmanle. Bɛmaa yɛzuzu ye ɛdendɛlɛ ne anu edwɛkɛ titile bie mɔ anwo.

Bɛmaa Menli Kakyi Bɛ Subane

Gyisɛse hilele subane mɔɔ ɔwɔ kɛ ye ɛdoavolɛ ne mɔ nyia ye wɔ ewiade ne anwo la. Ɔhanle kɛ: “Bɛmɛ a bɛle azɛlɛ ye azo ngyenle a. Ngyenle mɔɔ kɛda la bɛyɛ ye menlemenle bieko a ɔnyɛ boɛ. Bɛfa bɛyɛ ɛhwee a ɔnyɛ boɛ. Bɛto bɛgua na menli tietia zolɛ. ‘Bɛmɛ a bɛle ewiade ye kɛnlaneɛ a. . . . Zɔhane ala yɛɛ bɛmaa bɛ ɛbɛla kpalɛ ne ɛyɛ kɛ kɛnlaneɛ na ɔda wɔ menli nu a, amaa bɛanwu bɛ gyima kpalɛ ne mɔɔ bɛyɛ la na bɛaye bɛ Ze mɔɔ wɔ anwuma la ayɛlɛ.’” (Mateyu 5:13-16) Duzu ati a Gyisɛse vale ye ɛdoavolɛ ne mɔ dole ngyenle nee kɛnlaneɛ nwo ɛ?

Gyisɛse edwɛkɛ ne kile kɛ ye ɛdoavolɛ ne mɔ le kɛ ngyenle nee kɛnlaneɛ maa alesama kɔsɔɔti. Tɛ menli ekpunli ekyi bie ala. Ndonwo zɔhane mɔɔ Gyisɛse yɛle la maa ɔda ali wienyi kɛ ɔngulo kɛ ye ɛdoavolɛ ne mɔ twe bɛ nwo fi menli nwo. Duzu ati ɔ?

Yɛ mɔɔ doa zo la nzonlɛ: Saa bɛanva ngyenle bɛanfonla aleɛ a, ɔnrɛhola ɔnrɛbɔ nwolɛ bane. Kɛnlaneɛ ɛnrɛhola ɛnrɛdu awozinli ɛnrɛvi sua nu, saa bɛanva bɛanzie sua ne anu a. Ɛhye ati, ɔnyɛ nwanwane kɛ Gyisɛse anga angile ye ɛdoavolɛ ne mɔ kɛ bɛde bɛ nwo bɛhɔdɛnla azɛlɛ ne kodoka bie anu na bɛkyekye diedima maanle la. Anzɛɛ bɛde bɛ nwo bɛhɔdɛnla ɛleka mɔɔ nyamenlezonlenlɛ ahyehyɛdeɛ ɛnle la. Emomu, kɛmɔ ɔwɔ kɛ bɛfa ngyenle bɛfonla aleɛ na kɛnlaneɛ noko tu awozinli la, zɔhane ala a ɔwɔ kɛ Keleseɛnema nee menli mɔɔ wɔ bɛ maanle nu la bɔ na bɛahola bɛamaa bɛahakyi bɛ ɛbɛlabɔlɛ a.

‘Bɛnle Ewiade Ye Ɛdeɛ’

Noko akee, adehilelɛ mɔɔ Gyisɛse vale manle ye ɛdoavolɛ ne mɔ kɛ bɛ nee bɛ gɔnwo mɔ menli ɛbɔ la maa yɛbiza mɔɔ ɔwɔ kɛ Keleseɛnenli yɛ ye wɔ maanyɛlɛ nwo la anwo edwɛkɛ. Duzu ati ɔ? Ɔka ekyii na Gyisɛse awu la, ɔzɛlɛle Nyamenle ɔmanle ye ɛdoavolɛ ne mɔ kɛ: “Membiza kɛ ɛye bɛ ɛvi ewiade ye anu, mesɛlɛ kɛ ɛkɛzie bɛ gyɛlɛɛnye ɛkɛvi amumuyɛnli Seetan asa anu. Kɛmɔ menle ɛtane ewiade ɛdeɛ la, bɛdabɛ noko bɛnle ye ɛdeɛ.” (Dwɔn 17:15, 16) Yemɔti, kɛ ɔkɛyɛ na Keleseɛnema anyɛ ewiade ne ɛdeɛ wɔ mekɛ mɔɔ bɛ nee menli ne a de la ɛ? Amaa yɛanwu ɛhye la, bɛmaa yɛzuzu kpuyia nwiɔ ɛhye mɔ anwo:

• Kɛzi Gyisɛse bule maanyɛlɛ ɛ?

• Duzu a ɔwɔ kɛ Keleseɛnema yɛ ye ɛnɛ a?