Maa Baebolo Ne Ɛhilehile Wɔ

Duzu A Le Ɛzonlenlɛ Nwo Edwɛkpa Ne?

Edwɛkɛ ɛhye ka kpuyia bie mɔ mɔɔ bie a wɔbiza ye ɛlɛ la anwo edwɛkɛ yɛɛ ɔkile ɛleka mɔɔ ɛbanyia nwolɛ mualɛ wɔ Baebolo ne anu la. Gyihova Alasevolɛ anye balie kɛ bɛ nee wɔ bazuzu kpuyia ɛhye mɔ anwo.

1. Asoo ɛzonlenlɛ kɔsɔɔti le kpalɛ?

Menli mɔɔ kulo kɛ yɛ mɔɔ sɔ Nyamenle anye la wɔ ɛzonlenlɛ dɔɔnwo anu. Ɔnwu menli zɛhae mɔ na ɔdwenle bɛ nwo. Noko, mɔɔ yɛ alɔbɔlɛ la, menli ɛlua ɛzonlenlɛ zo ɛyɛ ninyɛndane dɔɔnwo. Tete ne, ɛzonlenlɛ nu mgbanyima yɛle menli mɔɔ nee bɛ anyɛ adwenle la kpɔdekpɔde bɔbɔ. (2 Kɔlentema 4:3, 4; 11:13-15) Ɛnɛ, amaneɛbɔlɛ kile kɛ ɛzonlenlɛ nu mgbanyima bie mɔ ɛzi amumuyɛyɛlɛ adua anzɛɛ bɛboa konle anzɛɛ bɛyɛ ngakula basabasa.—Kenga Mateyu 24:3-5, 11, 12.

Baebolo ne kilehile kɛ ɛzonlenlɛ nwiɔ a wɔ ɛkɛ a—nɔhalɛ ɛzonlenlɛ nee adalɛ ɛzonlenlɛ. Adalɛ ɛzonlenlɛ ɛngilehile Nyamenle anwo nɔhalɛ ne. Noko, Gyihova Nyamenle kulo kɛ menli nwu ɔ nwo nɔhalɛ edwɛkɛ ne.—Kenga 1 Temɔte 2:3-5.

2. Duzu a le ɛzonlenlɛ nwo edwɛkpa ne?

Nyamenle ɛngulo kɛ ɛzonlenlɛ mɔɔ bɛka kɛ bɛkulo ye noko bɛnga ɔ nwo nɔhalɛ edwɛkɛ la bɛlɛbɛla menli. Nɔhalɛ nu, menli mɔɔ wɔ ɛzonlenlɛ ɛhye mɔ anu la fa ewiade ne mɔɔ Seetan Abɔnsam a nea zo la agɔnwolɛ. (Gyemise 4:4; 1 Dwɔn 5:19) Nyamenle Edwɛkɛ ne fɛlɛ ɛzonlenlɛ mɔɔ fa ɔ rɛle wula sonla arane nu tɛla Nyamenle la tuutuunli. Baebolo ne fɛlɛ tuutuunli ɛhye ‘Babelɔn Kpole.’ Bɛvale ye bɛdonle tete suakpole ne mɔɔ adalɛ ɛzonlenlɛ bɔle ɔ bo wɔ zo, wɔ Nowa Azuyilɛ ne anzi la. Ɔnrɛhyɛ, Nyamenle bazɛkye ɛzonlenlɛ mɔɔ bɛlɛbɛla alesama na ɔmaa bɛnwu amaneɛ la arɛlevilɛ nu.—Kenga Yekile 17:1, 2, 5, 17; 18:8, 23, 24.

  3. Kɛ ɔkɛyɛ na Nyamenle amaa anyelielɛ ara ɛleka biala ɛ?

Ndɛnebualɛ mɔɔ bara adalɛ ɛzonlenlɛ zo la le edwɛkpa. Ɔbamaa anwodɔlɛ ara ewiade amuala. Adalɛ ɛzonlenlɛ ɛnrɛbɛlɛbɛla menli na yeakpakye bɛ nu bieko. Menli mɔɔ de aze la baha abɔ nu azonle nɔhalɛ Nyamenle kokye ne.—Kenga Ayezaya 11:9; Yekile 18:20, 21; 21:3, 4.

4. Duzu a ɔwɔ kɛ menli mɔɔ lɛ ahonle kpalɛ la yɛ a?

Gyihova kakye menli mɔɔ lɛ ahonle kpalɛ mɔɔ bɛwɔ ewiade amuala adalɛ ɛzonlenlɛ ne mɔ anu la. Ɔlɛkilehile menli ɛhye mɔ nɔhalɛ ne na yeaha bɛ yeabɔ nu.—Kenga Maeka 4:2, 5.

Gyihova die bɛdabɛ mɔɔ bɛkulo kɛ bɛsonle ye la ba ye abusua ne anu. Saa yɛ gɔnwo mɔ nee yɛ mbusuafoɔ fa yɛ nwo ɛya ɔlua Gyihova mɔɔ yɛkulo kɛ yɛsonle ye la ati bɔbɔ a, yɛnyia nvasoɛ dɔɔnwo. Nyamenle yɛ yɛ gɔnwo, yɛnyia “abusua” fofolɛ mɔɔ ɛlɔlɛ wɔ nu, nee dahuu ngoane anyelazo.—Kenga Maake 10:29, 30; 2 Kɔlentema 6:17, 18.

Saa ɛkpondɛ nwolɛ edwɛkɛ dɔɔnwo a, nea buluku ɛhye, Duzu A Baebolo ne Kilehile Amgba A? mɔɔ Gyihova Alasevolɛ ɛyɛ la tile 15 nee 16.

[Nvoninli Ɛvileka wɔ mukelɛ 26]

The Complete Encyclopedia of Illustration/J. G. Heck