Maa Baebolo Ne Ɛhilehile Wɔ
Asoo Nyamenle Bamaa Arane Ko Azie Ewiade Amuala?
Edwɛkɛ ɛhye ka kpuyia bie mɔ mɔɔ bie a wɔbiza ye ɛlɛ la anwo edwɛkɛ yɛɛ ɔkile ɛleka mɔɔ ɛbanyia nwolɛ mualɛ wɔ Baebolo ne anu la. Gyihova Alasevolɛ anye balie kɛ bɛ nee wɔ bazuzu kpuyia ɛhye mɔ anwo.
1. Duzu ati a alesama hyia arane mɔɔ ɔbazie ewiade amuala la ɛ?
Ɛnɛ, alesama ngyegyelɛ ne wɔ ɛleka biala. Menli dɔɔnwo di ehyia yɛɛ bɛsisi bɛ wɔ maanle dɔɔnwo anu. Wɔ bie mɔ noko anu, menli ɛnyia bɛ nwo yemaa yebo zo. Kyesɛ arane ko ala nea ninyɛne mɔɔ wɔ ewiade amuala azo na awie biala asa aha mɔɔ ɔhyia nwo la.—Kenga Nolobɔvo ne 4:1; 8:9.
2. Nwane a bɛbamaa yeanlea ewiade amuala azo a?
Menli dɔɔnwo ɛnlie ɛndo nu kɛ sonla ko bazie ewiade amuala ɔluakɛ ɔle gyima mɔɔ nrenya anzɛɛ raalɛ biala ɛnrɛhola ɛnrɛyɛ ye kpalɛ a. Dasanli biala ɛnle ɛkɛ mɔɔ menli kɔsɔɔti anye bahola alie ɔ nwo a. Bieko, dasanli boni a tumi badi ɔ sa nu a ɔnrɛzɛkye ye a? Adwenle mɔɔ le kɛ tumivolɛ atisesebɛ bie bazie menli kɔsɔɔti la maa ɛzulolɛ ka alesama.—Kenga Mrɛlɛbulɛ 29:2; Gyɛlɛmaya 10:23.
Gyihova Nyamenle ɛye ɔ Ra, Gyisɛse kɛ ɔbali belemgbunli mekɛ mɔɔ ɛnlɛ awieleɛ. (Luku 1:32, 33) Gyisɛse ze kɛzi azɛlɛ ye azo ɛbɛlabɔlɛ de la. Mekɛ mɔɔ ɛnee ɔwɔ azɛlɛ ye azo la, ɔyɛle wuleravolɛma ayile, ɔhilehilele bɛlɛvoma, yɛɛ ɔnyianle mekɛ ɔmanle ngakula. (Maake 1:40-42; 6:34; 10:13-16) Ɛhye ati, Gyisɛse le Belemgbunli mɔɔ ɔfɛta.—Kenga Dwɔn 1:14.
3. Asoo arane kokye bahola anlea ewiade amuala azo?
Nyamenle ɛye ɔ Ra ne kɛ ɔdɛnla anwuma na ɔli tumi wɔ azɛlɛ ye azo. (Daneɛle 7:13, 14) Kɛmɔ ɔngyia kɛ dasanli tumivolɛ bie tɛnla azua mɔɔ ɔnea zo la biala azo la, zɔhane ala a ɔngyia kɛ Gyisɛse bara azɛlɛ ye azo wɔ nwonane nu kolaa na yeahola yeali tumi wɔ alesama anwo zo a.—Kenga Mateyu 8:5-9, 13.
Asoo awie biala balie Gyisɛse ado nu kɛ Belemgbunli? Kyɛkyɛ. Menli mɔɔ kulo kpalɛyɛlɛ la ala a balie ye ado nu a. Gyihova baye bɛdabɛ mɔɔ bɛkpo ye Belemgbunli ne mɔɔ ɔlɛ ɛlɔlɛ na ɔdi pɛlepɛle la yeavi ɛkɛ.—Kenga Mateyu 25:31-33, 46.
4. Duzu a ewiade amuala Belemgbunli ne bayɛ a?
Kɛmɔ mboaneneavolɛ boɔboa ye mboane nloa la, zɔhane ala a Gyisɛse noko ɛlɛboɔboa bɛlɛvoma mɔɔ bɛwɔ ewiade amuala la anloa na yeahilehile bɛ Nyamenle ɛlɔlɛ ndenle ne mɔ a. (Dwɔn 10:16; 13:34) Menli ɛhye mɔ fa anyelielɛ boa Gyisɛse nee ye belemgbunlililɛ ne. (Edwɛndolɛ 72:8; Mateyu 4:19, 20) Gyisɛse nɔhalɛ azonvolɛ ɛyɛ ko ɛlɛbɔ ye nolo wɔ ewiade amuala kɛ bɛzie Gyisɛse Belemgbunli.—Kenga Mateyu 24:14.
Ɔnrɛhyɛ Gyisɛse balie alesama avi arane mɔɔ sisi menli la kɔsɔɔti abo. Yekpa ye nɔhalɛ ɛdoavolɛma ne bie mɔ kɛ bɛ nee ye badɛnla anwuma ali tumi wɔ azɛlɛ ye azo. (Daneɛle 2:44; 7:27) Gyisɛse Belemgbunlililɛ ne bamaa Gyihova anwo ndelebɛbo azo wɔ azɛlɛ ye azo na yeamaa paladaese ne mɔɔ minlinle la azia ara.—Kenga Ayezaya 11:3, 9; Mateyu 19:28.
