Bɛbɔle magazine ɛhye mɔɔ ɛlɛkenga ye kɛkala la ɛyɛlɛ bo wɔ July 1879. Ɔvi mekɛ zɔhane ninyɛne ɛhakyi—na zɔhane ala a magazine ɛhye de a. (Nea nvoninli mɔɔ wɔ anwuma la.) Ɔvi magazine ɛhye azo mɔɔ kɔ la, ɛbanwu nzenzaleɛ ngakyile bieko mɔɔ bɛyɛ wɔ Ɛzinzalɛ Arane ne anu la. Duzu a bahakyi a?

Wɔ maanle dɔɔnwo anu, menli dɔɔnwo anye die nwo kɛ bɛbayɛ neɛnleanu wɔ Intanɛte zo na bɛade edwɛkɛ. Bɛbuke Intanɛte ne wɔ bɛ kɔmputa ne azo na bɛte edwɛkɛ mɔɔ ɛkɛ ne ala a ɔwɔ la. Bɛkenga mbuluku, magazine yɛɛ adwelie ngɛlata dɔɔnwo wɔ Intanɛte zo.

Kɛmɔ ɛhye ɛlɛkɔ zo la ati, kenlensa ye yɛyɛ yɛ Intanɛte address www.dan124.com ne fofolɛ, amaa menli dɔɔnwo anye alie nwolɛ na bɛahola bɛahɔ ɛkɛ. Menli mɔɔ bahɔ ɛkɛ la bɛahola agenga mbuluku mɔɔ bɛyɛ wɔ aneɛ mɔɔ bo 430 anu la. Ɔvi siane ɛhye azo noko mɔɔ kɔ la, menli mɔɔ bahɔ yɛ Intanɛte ɛleka ne la bahola agenga edwɛkɛ bie mɔ mɔɔ bɛkpa mɔɔ ɛnee wɔ yɛ magazine mɔɔ yɛyɛ la anu, noko kɛkala ɔbara Intanɛte ne azo la wɔ ɛkɛ. *

Kɛmɔ yɛbava edwɛkɛ dɔɔnwo yɛado Intanɛte zo la ati, ɔvi magazine ɛhye azo mɔɔ kɔ la, bɛbayɛ maanlema Ɛzinzalɛ Arane ne mɔɔ le mukelɛ 32 la mukelɛ 16. Kɛkala bɛyɛ Ɛzinzalɛ Arane ne wɔ aneɛ 204 anu. Kɛkala mɔɔ bɛde zolɛ la, akee bɛbahola bɛahile magazine ɛhye abo bɛahɔ aneɛ dɔɔnwo bɔbɔ anu.

Yɛlɛ anyelazo kɛ nzenzaleɛ ɛhye mɔ bamaa menli dɔɔnwo asa aha Baebolo ne anu edwɛkɛ ne mɔɔ maa ngoane la. Yɛbɔ kpɔkɛ kɛ yɛkɔ zo yɛahɛlɛ edwɛkɛ mɔɔ yɛ anyelielɛ na ndelebɛbo wɔ nu la wɔ mbuluku nu yɛɛ Intanɛte zo amaa yeaboa kengavolɛma dɔɔnwo mɔɔ bu Baebolo ne na bɛkulo kɛ bɛnwu mɔɔ ɔkilehile amgba la.

Yɛvoma