AMAA yɛabua kpuyia ɛhye la, bɛmaa yɛzuzu Nyamenle ndɛnebualɛ nwiɔ mɔɔ bɛyɛ nwolɛ neazo wɔ Baebolo ne anu la anwo sikalɛ—Nowa mekɛ zo Azuyilɛ ne nee Keenama ɛzɛkyelɛ ne.

MƆƆ BIE MƆ KA LA: “Nyamenle ati yɛ se kɛ ɔmanle azuyilɛ zɛkyele alesama kɔsɔɔti na ɔhale Nowa nee ye abusua ne ala la.”

MƆƆ BAEBOLO NE KA LA: Nyamenle hanle kɛ: “Menlɛ anyelielɛ biala wɔ amumuyɛnli ewule nu, kyesɛ amumuyɛnli ne kakyi fi ye ndenle ne mɔ anu na ɔnyia ngoane.” (Yizikeɛle 33:11) Yemɔti amumuyɛma mɔɔ nyianle ɛzɛkyelɛ wɔ Nowa mekɛ zo la ammaa Nyamenle anye anlie biala. Ɛnee duzu ati a ɔzɛkyele bɛ a?

Baebolo ne bua kɛ mekɛ mɔɔ Nyamenle zɛkyele ɛtanevolɛma wɔ tete ne la, ɛnee ɔlɛkile kɛ “kenle bie bɛdabɛ mɔɔ bɛngulo Nyamenle la kɛzi kɛwie ye la.” (2 Pita 2:5, 6) Duzu a Nyamenle yɛle nwolɛ neazo a?

Mɔɔ lumua la, Nyamenle hilele kɛ ɔwɔ nuhua kɛ ɔyɛ ye nyane kɛ ɔkɛzɛkye menli ɛdeɛ, noko ɔnwu atisesebɛma mɔɔ fa amaneɛnwunlɛ ba la na ɔmaa bɛbu bɛ gyima ne anwo mgbonda. Ɔnrɛhyɛ, ɔbava nzisi nee amaneɛnwunlɛ kɔsɔɔti yeara awieleɛ.

Mɔɔ tɔ zo nwiɔ, ninyɛne mɔɔ Nyamenle yɛle ye dɛba ne la kile kɛ Nyamenle fi ɛlɔlɛ nu bɔ menli kɔkɔ kolaa na yeazɛkye bɛ. Ɛnee Nowa bɔ pɛlepɛlelilɛ nwo nolo, noko menli dɔɔnwo andie ye. Baebolo ne ka kɛ: “Na bɛannwu mɔɔ ɛlɛba arazi la toonwo azuyilɛ kpole ne ravale bɛ muala.”—Mateyu 24:39.

Asoo kɛ Nyamenle tɛyɛ ninyɛne la ɛne? Ɛhɛe. Kɛ neazo la, ɔbɔle ye menli Yizilayɛma kɔkɔ kɛ saa bɛkakyi bɛyɛ amumuyɛ kɛmɔ maanle mɔɔ ɛbɔ bɛ nwo ɛyia la yɛ la a, ɔbamaa agbɔvolɛ ava bɛ azɛlɛ ne; azɛkye bɛ suakpole Gyɛlusalɛm; na bɛava bɛ bɛahɔ nlɔnu. Yizilayɛma amgba yɛle amumuyɛ—bɔbɔ bɛvale ngakula bɛbɔle afɔle. Asoo Gyihova yɛle nwolɛ debie? Ɛhɛe, noko ɔzoanle ngapezoma ɔmanle bɛbɔle ye menli ne kɔkɔ fane dɔɔnwo kɛ bɛhakyi bɛ ndenle toonwo ɔhyɛle kpalɛ. Ɔhanle bɔbɔ kɛ: “Nɔhalɛ, Awulae Nyamenle ɛnyɛ debie wɔ mekɛ mɔɔ ɔtɛyele ɔtɛkilele ye sonvolɛma, Nyamenle kpɔmanvolɛma la.”—Emɔso 3:7.

 KƐZI ƆFANE Ɛ NWO LA: Adenle mɔɔ Gyihova luale zo buale ndɛne wɔ tete ne la maa yɛnyia anyelazo. Yɛbahola yɛanyia anwodozo kɛ Nyamenle babua atisesebɛma mɔɔ fa amaneɛnwunlɛ ba la ndɛne. Baebolo ne ka kɛ: “Bɛbaminli amumuyɛma abo zo . . . Na bɛlɛvoma bava azɛlɛ ne ayɛ bɛ ɛdeɛ, na bɛ nye alie bɛ ɛkpazilɛ nwo.” (Edwɛndolɛ 37:9-11) Kɛzi ɛbu ndɛnebualɛ mɔɔ bamaa alesama anwo adɔ bɛ avi amaneɛnwunlɛ nwo la ɛ? Ɔkile atisesebɛ anzɛɛ ɔkile anwunvɔnezelɛ?

MƆƆ BIE MƆ KA LA: “Keenama ɛzɛkyelɛ ne le atisesebɛ konle mɔɔ nee menli dɔɔnwo mɔɔ bɛku bɛ ɛnɛ la le ko a.”

MƆƆ BAEBOLO NE KA LA: ‘Nyamenle di pɛlepɛle wɔ ye ndenle kɔsɔɔti anu. Ɔle Nyamenle mɔɔ di nɔhalɛ, mɔɔ nzisi biala ɛnle ye adenle nu a.’ (Mɛla ne 32:4) Nyamenle ndɛnebualɛ nee alesama konle ɛnle ko. Duzu ati ɔ? Ɔluakɛ ɔnle kɛ dasanli la, ɔkola ɔnwu ahonle nu—ɔnwu kɛzi alesama de la.

Kɛ neazo la, mekɛ mɔɔ Nyamenle buale suakpole Sodɔm nee Gomɔla ndɛne na ɔbɔle kpɔkɛ kɛ ɔsɛkye bɛ la, ɛnee Ebileham mɔɔ di nɔhalɛ la kulo kɛ ɔnwu kɛ pɛlepɛlelilɛ wɔ nu a. Ɛnee ɔnde ɔ bo kɛ ye Nyamenle ne mɔɔ di pɛlepɛle la ‘bazɛkye tenlenema aboka amumuyɛma anwo.’ Nyamenle manle ye mekɛ na ɔmanle ɔnwunle kɛ saa ɔnwu tenlenema bulu wɔ Sodɔm a, Ɔnrɛzɛkye suakpole ne wɔ bɛ ti. (Mɔlebɛbo 18:20-33) Ɔda ali kɛ, Nyamenle nleanle menli ne ahonle nu na ɔnwunle kɛ bɛ ɛtane ne le kpole.—1 Edwɛkɛsisilɛ 28:9.

Zɔhane ala a Nyamenle buale Keenama ndɛne na ɔmanle bɛzɛkyele bɛ a. Ɛnee Keenama ɛlie duma kɛ bɛ ti yɛ se, na ɛnee bɛyela ngakula anyewɔzo bɛfa bɛbɔ afɔle. * (2 Arelemgbunli 16:3) Ɛnee Keenama ze kɛ Gyihova ɛha ɛhile Yizilayɛma kɛ bɛva azɛlɛ ne kɔsɔɔti. Menli mɔɔ bɛangɔ na bɛvale konle bɛdoale bɛ la anye fuu dwazole tiale Yizilayɛma nee Gyihova mɔɔ yehile yemaa yela ali wienyi kɛ ɔ nee ye menli ne lua la.

Yeanga ye zɔ, Nyamenle zele Keenama mɔɔ gyakyile bɛ amumuyɛ ne na bɛliele Gyihova ɛbɛlabɔlɛ nwo ngyinlazo kpalɛ ne bɛdole nu la anwunvɔne. Kɛ neazo la, bɛliele Keenanli Releehabe mɔɔ le tuutuunli la nee ye abusua ne ngoane. Bieko, mekɛ mɔɔ Keenama mɔɔ wɔ Gebɛyɔn hanle kɛ bɛze bɛ anwunvɔne la, bɛ nee bɛ mra kɔsɔɔti nyianle bɛ ti.—Dwɔhyua 6:25; 9:3, 24-26.

KƐZI ƆFANE Ɛ NWO LA: Yɛkola yɛsukoa debie mɔɔ hyia la yɛfi Keenama ɛzɛkyelɛ ne anu. Yɛlɛbikye “ndɛnebualɛ kenle ne nee menli mɔɔ ɛnze Nyamenle la ɛzɛkyelɛ” ne mɔɔ bɛha bɛdo ɛkɛ la ndɛndɛ. (2 Pita 3:7) Saa yɛkulo Gyihova a, mekɛ mɔɔ ɔbaye menli mɔɔ bɛkpo ye pɛlepɛle tumililɛ ne na yeamaa alesama amaneɛnwunlɛ avi ɛkɛ la, ɔbayɛ nyilalɛ yeamaa yɛ.

Gyihova fi ɛlɔlɛ nu kakye yɛ kɛ kpɔkɛ mɔɔ awovolɛ kɛzi la ka bɛ mra. Nyamenle Edwɛkɛ ne se: “Bɛva ngoane, amaa bɛ nee bɛ bo zo amra bɛanyia ngoane. Bɛhulo [Gyihova] bɛ Nyamenle ne, bɛdie ɔ ne na bɛdudu bɛhisa ye.” (Mɛla ne 30:19, 20) Asoo edwɛkɛ ɛhye vi Nyamenle mɔɔ ati yɛ se anzɛɛ Nyamenle mɔɔ kulo menli na ɔkpondɛ kɛ bɛsi kpɔkɛ kpalɛ la ɛkɛ?