EDWƐKƐ TITILE | DUZU A BAEBOLO NE KA A?
Nyamenle Yɛle Ngyehyɛleɛ Liele Alesama
Nyamenle bɔle Ebileham mɔɔ le nɔhavo la ɛwɔkɛ kɛ ‘abozonli’ ne mɔɔ bɛhanle ɔ nwo edwɛkɛ la bayɛ Ebileham abozoamra anu ko. Ɔlua zɔhane sonla ne anwo zo “maanle maanle mɔɔ wɔ ewiade la” banyia nyilalɛ. (Mɔlebɛbo 22:18) Nzinlii Ebileham anlɔnra Gyekɔbo hɔdɛnlanle Yigyibiti, ɛleka mɔɔ ye abusua ne yɛle kpole na bɛrayɛle Yizilayɛ maanle ne la.
Bɛdɛnlanle Yigyibiti la anzi mekɛ bie, Falo bie mɔɔ ati yɛ se la manle Yizilayɛma yɛle ngɛkɛlɛ kɔkpula kɛ Nyamenle yele ngapezonli Mosisi manle ɔlile maanle ne anyunlu na ɔvale bɛ ɔluale Nyevile Kɔkɔlɛ ne mɔɔ nuhua kpakyele wɔ nwanwane adenle zo la anu ɔyele bɛ ɔvile maanle ne anu la. Yemɔ anzi, Nyamenle manle Yizilayɛma mɛla, mɔɔ Mɛla Bulu ne boka nwolɛ la kɛ ɔbɔ bɛ nwo bane na ɔhile bɛ adenle. Zɔhane mɛla ne mɔ hilele kɛzi bɛbabɔ ɛtanefakyɛ nwo afɔle la. Nyamenle sunsum ne hanle Mosisi manle ɔhanle ɔhilele Yizilayɛma kɛ Nyamenle baye ngapezonli bieko amaa bɛ. Zɔhane ngapezonli ne bayɛ ‘abozonli’ ne mɔɔ bɛbɔ ɔ nwo ɛwɔkɛ la.
Mɔɔ bo ɛvolɛ 400 la anzi, Nyamenle bɔle Belemgbunli Devidi ɛwɔkɛ kɛ ahenle mɔɔ ɛlɛba la, ‘abozonli’ ne mɔɔ bɛhanle ɔ nwo edwɛkɛ wɔ Yidɛn la bali tumi wɔ belemgbunlililɛ mɔɔ badɛnla ɛkɛ dahuu la azo. Yemɔ a bayɛ Mɛzaya ne, Dievolɛ ne mɔɔ Nyamenle ɛkpa ye kɛ ɔlie alesama na ɔmaa Paladaese ɛzia ɛrɛla azɛlɛ ye azo a.
Nyamenle luale Devidi nee ngapezoma gyɛne anwo zo manle bɛnwunle Mɛzaya ne anwo edwɛkɛ ngyikyi ngyikyi. Bɛhanle bɛdole ɛkɛ ne kɛ ɔbayɛ bɛlɛvolɛ nee atiakunlukɛnlɛma na wɔ ye tumililɛ bo ɛhɔne, nzisi nee konle bo bapɛ. Anzondwolɛ bara alesama kɔsɔɔti avinli na bɔbɔ bɛ nee nane ne mɔ adɛnla anzondwolɛ nu. Anwodolɛ, amaneɛnwunlɛ nee ewule—mɔɔ ɔmboka Nyamenle mɔlebɛbo bodane ne anwo la bavi ɛkɛ, na bɛbadwazo menli mɔɔ ɛwu la bara ngoane nu wɔ azɛlɛ ye azo.
Nyamenle luale ngapezonli Maeka anwo zo hanle dole ɛkɛ ne kɛ bɛbawo Mɛzaya ne wɔ Bɛtelɛhɛm na ɔluale Daneɛle anwo zo ɔhanle kɛ nzinlii bɛbahu ye. Noko Nyamenle badwazo Mɛzaya ne avi ewule nu na yeakpa ye kɛ Belemgbunli wɔ anwuma. Daneɛle noko hanle dole ɛkɛ ne kɛ awieleɛ bɔkɔɔ ne Mɛzaya Belemgbunlililɛ ne baye tumililɛ kɔsɔɔti avi ɛkɛ na yeagyinla bɛ gyakɛ anu bɔkɔɔ. Asoo Mɛzaya ne rale kɛmɔ bɛbɔle ɔ nwo ɛwɔkɛ la?
