Yɛ selɛ bie mɔɔ ɛlɛtendɛ ahile ɔ ra nrenya mɔɔ ɛli ɛvolɛ nsuu la anwo nvoninli nea. Ɔse, “Mekɛ tendenle mɔɔ ɛze ɛhɔ la, Nyamenle bɔle azɛlɛ nee nuhua debie biala, ɔbɔle sɛnzɛne, siane yɛɛ nwɔlɔra.” Kakula ne fa mekɛ ekyi dwenle ɛhye anwo na akee ɔbiza kɛ, “Papa, nwane a bɔle Nyamenle a?”

Ye papa bua kɛ, “Tɛ awie biala a bɔle Nyamenle a, ɔwɔ ɛkɛ ne dahuu.” Zɔhane edwɛkɛ sikalɛ ne maa kakula ne akunlu dwo wɔ nwolɛ. Noko akee, ɔlɛnyi la, kpuyia ne kɔ zo gyegye ye. Ɔnde ɔ bo kɛ awie bahola adɛnla aze mɔɔ ɔnlɛ mɔlebɛbo a. Nea, ewiade bɔbɔ lɛ ye mɔlebɛbo. Ɔbiza ɔ nwo kɛ, ‘Nienwu a Nyamenle vi rale a?’

Kɛzi Baebolo ne bua edwɛkɛ ne ɛ? Ɔbua ye kɛmɔ selɛ ne mɔɔ wɔ yɛ neazo ne anu yɛle la. Mosisi hɛlɛle kɛ: ‘O Gyihova, mekɛ mɔɔ ɛkabɔ awoka anzɛɛ azɛlɛ nee ewiade la, ɔvi dahuu kɔdwu dahuu, ɛle Nyamenle.’ (Edwɛndolɛ 90:1, 2) Ngapezonli Ayezaya noko deanle nu kɛ: ‘Bɛnze ɔ? Bɛtɛtele ɔ? Gyihova ewiade amuala Bɔvolɛ ne, le damɛnlangoate Nyamenle’! (Ayezaya 40:28) Zɔhane ala a Dwuudu kɛlata ne ka Nyamenle anwo edwɛkɛ kɛ ɔwɔ ɛkɛ “mekɛ mɔɔ ɛnlɛ awieleɛ” a.​—Dwuudu 25.

Ngɛlɛlera ɛhye mɔ maa yɛnwu kɛ Nyamenle le ‘damɛnlangoate Belemgbunli,’ kɛmɔ ɛzoanvolɛ Pɔɔlo hanle ɔ nwo edwɛkɛ la. (1 Temɔte 1:17) Ɛhye kile kɛ Nyamenle wɔ ɛkɛ dahuu, ɔnva nwo mekɛ tendenle mɔɔ yɛbadwenle nwolɛ la. Na ɔbadɛnla ɛkɛ ne dahuu wɔ kenlebie. (Yekile 1:8) Ɛhye ati, ɛkɛ ne mɔɔ ɔwɔ ye dahuu la le Tumivolɛ ne anwo debie mɔɔ hyia.

Duzu ati a ɔyɛ se kɛ yɛbade ɛhye abo a? Kɛmɔ yɛ ngoane mekɛ le ekyi la ati, ɔmaa kɛzi yɛbu mekɛ la le ngakyile wɔ Gyihova ɛdeɛ ne anwo. Kɛmɔ Nyamenle wɔ ɛkɛ ne dahuu la ati, ɔbu ɛvolɛ apenle ko kɛ kenle ko. (2 Pita 3:8) Neazo ɛne: Asoo abɛbɛ mɔɔ di kenle 50 pɛ la bahola ade yɛ ngoane mekɛ mɔɔ le ɛvolɛ 70 anzɛɛ 80 la abo? Kyɛkyɛ! Noko, Baebolo ne kile kɛ bɛfa yɛ bɛto yɛ Bɔvolɛ Kpole ne anwo a yɛle kɛ abɛbɛ la. Yɛ ndelebɛbo bɔbɔ ɛndwu ye ɛdeɛ ne foa. (Ayezaya 40:22; 55:8, 9) Yemɔti ɔnyɛ nwanwane kɛ alesama ɛnrɛde Gyihova anwo ninyɛne bie abo bɔkɔɔ la.

Bie a ɔbayɛ se kɛ yɛbade Nyamenle mɔɔ wɔ ɛkɛ dahuu la abo ɛdeɛ, noko yɛnwu kɛ nrɛlɛbɛ wɔ nu. Saa awie a bɔle Nyamenle a, anrɛɛ ahenle bayɛ Bɔvolɛ. Noko, kɛmɔ Baebolo ne kilehile nu la, Gyihova a ‘bɔle ninyɛne kɔsɔɔti a.’ (Yekile 4:11) Bieko, yɛze kɛ mekɛ bie ɛnee ewiade ɛnle ɛkɛ. (Mɔlebɛbo 1:1, 2) Ɔvi nienwu a ɔrale a? Ɔwɔ kɛ ye Bɔvolɛ ne dumua tɛnla aze. Eza ɔwɔ ɛkɛ na bɛabɔ abɔdeɛ biala mɔɔ ze nrɛlɛbɛ, mɔɔ le kɛ ɔ Ra kokye ne yɛɛ anwumabɔvolɛma. (Dwobu 38:4, 7; Kɔlɔsaema 1:15) Ɔda ali kɛ, ɛnee ɔ ngomekye ɔwɔ ɛkɛ. Bɛambɔ ye; ɛnee debie biala ɛnle ɛkɛ mɔɔ bahola abɔ ye a.

Aze mɔɔ yɛde nee ewiade ne amuala di daselɛ kɛ Nyamenle wɔ ɛkɛ ne dahuu. Ɔwɔ kɛ Ahenle mɔɔ bɔle ewiade kpole ɛhye, Ahenle mɔɔ yɛle mɛla mɔɔ kile ye adenle la, yɛ awie mɔɔ wɔ ɛkɛ dahuu. Ɔyɛ zɔ a yɛɛ ɔbahola yeamaa debie biala ɛnwomenle na yeanyia ngoane a.​—Dwobu 33:4.