Encyclopædia Britannica ne ka Easter anwo edwɛkɛ kɛ ɔle “Gyisɛse Kelaese Ewudwazo ɛvoyia titile mɔɔ Keleseɛne asɔne ne mɔ di a.” Noko akee, asoo ɔle Keleseɛnema ɛvoyia ɔ?

Amaa wɔahile kɛ debie bie le nɔhalɛ bɔkɔɔ la, ɔwɔ kɛ ɛnwu nwolɛ edwɛkɛ kɔsɔɔti. Zɔhane ala yɛɛ amaa yɛanwu kɛ Easter le Keleseɛnema ɛvoyia la, ɔhyia kɛ yɛnwu edwɛkɛ dɔɔnwo mɔɔ bɛha bɛvane Easter anwo la.

Mɔɔ lumua la, Gyisɛse zele ye ɛdoavolɛma ne kɛ bɛhakye ye ewule ne, tɛ ye ewudwazo ne ɔ. Ɛzoanvolɛ Pɔɔlo vɛlɛle ɛvoyia ɛhye ‘Awulae Nɔsolɛ Aleɛ.’—1 Kɔlentema 11:20; Luku 22:19, 20.

Bieko, Britannica ne ka kɛ amaamuo dɔɔnwo mɔɔ bɛyɛ ye wɔ Easter nu la “ɛnvane” Gyisɛse ewudwazo ne anwo, “emomu bɛnyianle bɛvile sonla amaamuo nu.” Kɛ neazo la, The Encyclopedia of Religion ne ka kolonvia nee asoasoa mɔɔ le Easter sɛkɛlɛneɛ titile anwo edwɛkɛ la, ɔse: “Kolonvia nee asoasoa ne gyi ɛkɛ maa ngoane fofolɛ mɔɔ vi ewule nu ɛlɛfi kolonvia abonle (ɛsesebɛ) ne anu avinde la anwo sɛkɛlɛneɛ.” Ɔdoale zo kɛ: “Ɛnee bɛze kɛ asoasoa le awolɛ nwo sɛkɛlɛneɛ, yemɔti ɔgyi ɛkɛ ɔmaa nyenyesuo mekɛ ne.”

Benleravolɛ bie mɔɔ bɛfɛlɛ ye Philippe Walter na ɔkɛlɛ tetedwɛkɛ mbuluku la hilele kɛzi amaamuo ɛhye rabokale Easter ɛvoyia ne anwo la anu. Ɔhɛlɛle kɛ “mekɛ mɔɔ bɛkakyi awozonlezonlenlɛma bɛamaa bɛarayɛ Keleseɛnema la,” ɛnee ɔnyɛ se kɛ bɛbava awozonlezonlenlɛma ɛvoyia mɔɔ bɛdi “wɔ ɛyɛyɛlɛ mekɛ nu kɔdwu nyenyesuo mekɛ nu la” bɛayɛ ye kɛ asɛɛ Gyisɛse ewudwazo ne la. Walter doale zo kɛ, ɛnee ɔle adenle titile mɔɔ bɛlɛdua zo bɛala “Keleseɛnema ɛvoyia” ali wɔ awozonlezonlenlɛma kalenda ne azo, amaa yeabuke adenle yeamaa menli dɔɔnwo ahakyi.

Menli mɔɔ “bɛkakyi bɛ bɛamaa bɛayɛ Keleseɛnema” la angɔ zo wɔ mekɛ mɔɔ ɛnee ɛzoanvolɛma ne wɔ ɛkɛ la, ɔluakɛ ‘bɛzile’ awozonlezonlenlɛma ne adenle. (2 Tɛsalonaekama 2:7) Ɛzoanvolɛ Pɔɔlo bɔle kɔkɔ kɛ ‘saa ɔkɔ a’ menli “badwazo araha edwɛkɛ adalɛ ahwe diedima ne bie mɔ ahɔli bɛ nzi.” (Gyima ne 20:29, 30) Ɛvoya mɔɔ lumua la ɛlɛkɔ ye awieleɛ la, ɛzoanvolɛ Dwɔn hɛlɛle kɛ ɛnee menli bie mɔ ɛbɔ ɔbo ɛlɛbɛlɛbɛla Keleseɛnema ne. (1 Dwɔn 2:18, 26) Awieleɛ kolaa ne, ɔmanle bɛliele awozonlezonlenlɛma amaamuo dɔɔnwo bɛdole nu.

Noko akee, bie mɔ bade nganeɛ kɛ Easter amaamuo ne ɛnle ɛtane ɔluakɛ ɔbamaa “awozonlezonlenlɛma” ade Gyisɛse ewudwazo ne abo kpalɛ. Noko akee, anrɛɛ Pɔɔlo ɛnrɛlie ɛnrɛdo nu ɛlɛ. Ɔnwunle awozonlezonlenlɛma amaamuo dɔɔnwo wɔ mekɛ mɔɔ ɔkɔ Wulomu Maanle ne anu la ɛdeɛ, noko yeanlie biala yeando nu kɛ ɔdua zo yeamaa menli ne anyia Gyisɛse anwo ndelebɛbo kpalɛ. Emomu, ɔbɔle Keleseɛnema kɔkɔ kɛ: “Bɛ nee bɛdabɛ mɔɔ bɛnlie Kelaese bɛnli la mmatu. Kɛ ɔkɛyɛ na kpalɛ nee ɛtane adila agɔnwolɛ ɛ? Kɛ ɔkɛyɛ na wienyi nee awozinli abɔ nu adɛnla ɛ? ‘Yemɔti kɛ [Gyihova] se la ɛne, Bɛgyakyi bɛ na bɛhwe bɛ nwo bɛvi bɛ nwo. Bɛmmafa bɛ sa bɛka debie mɔɔ anwo ɛnde la, na menwɔlie bɛ.’”—2 Kɔlentema 6:14, 17.

Duzu a yɛnyia yɛvi neɛnleanu ekyi mɔɔ yɛyɛ wɔ edwɛkɛ ne anwo la anu ɛ? Yerala ali wienyi kɛ Easter ɛnle Keleseɛnema ɛvoyia.